نحن الان في دراسة بدء سيرة النبي معنا سيرة النبي التي تقرأ يعني كيف بنى النبي الكريم كيف بنى الاسلام واذا كان الواحد اجا لعند النجار لحتى يتعلم النجارة وقرأنا له سيرة شلون بينصنع الباب .. يعني المقصود ان نحكي او المستمع يصير يعمل بواب متل المعلم تبعه .. ما هيك؟ هذا الاسلام يا ابني وهذا العلم.. المسلمين الان فقدوا العلم كفكر وفهم مضافاً الى ذلك لو سمعوا العلم ما بيسمعوه لاجل ان يسمعوا الاسلام كما صنعه الصانع الاول.. ايه ابني اسلامنا اذاً كاذب.. المقصود اذا سمعت سيرة النبي يعني سيرة النبي المهندس كيف عمّر البيت ما بدك تتعلم الهندسة؟ اي طيب اذا قلنا لك شلون عمّر البيت يعني تعال انت عمِّر.. بيقول اخي هيدا النبي.. اذا الصحابة شو عملوا بعدما شافوا سيرته في بناء الاسلام هني شو عملوا ؟ ما مشيوا على منواله وعلى منهاجه.. والقرآن ما هيك حكالهم؟ (أُولَئِكَ الَّذِينَ هَدَى اللَّهُ فَبِهُدَاهُمُ اقْتَدِهِ) (لَّقَدْ كَانَ لَكُمْ فِي رَسُولِ اللَّهِ أُسْوَةٌ حَسَنَةٌ ) اذا بدكن تصيروا مسلمين من ( الذين آمنوا وعملوا الصالحات) هذا الطريق.. وغير هالطريق هذا كذب وغش.. يعني انه بالاماني انا مسلم.. متل اذا قلت انا طمبرجي وقلت عن حالك طيرجي.. وبتفتخر انه اخي الطيار ما في متله والطيار بياخد هيك معاش وبينعز وكذا هالحكي هاد بيعملك طيار؟ ادما اثنيت على الطيران واعتزيت بالطيران حتى تتدرب وتتعلم على يد معلم مدرّب وتصنع كما صنع المعلم تبعك.. هذا الاسلام ابو هريرة هيك عمل بلال هيك عمل عمر هيك عمل.. هيدول المسلمين.. فالاسلام جهاد واخلاق وروحانية وربانية و (تَتَجَافَىٰ جُنُوبُهُمْ عَنِ الْمَضَاجِعِ) (وَيَهْدِي إِلَيْهِ مَنْ أَنَابَ) شو الانابة ؟ الانابة خلوة القلب وعكوفه في حضرة الله.. هي الانابة.. شو ثمرتها؟ في (اهدنا الصراط المسقيم).. وفي (ويهدي اليه).. في معرفة بالله وفي معرفة بالطريق الى الله.. (اهدنا الصراط المستقيم) طريق الى الله اما ويهدي اليه الطريق الى معرفة الله هي قمة الاسلام.. انت صار عندك مقام الانابة؟ (اهدنا الصراط المستقيم) عم تفهم شو عم تحكي؟ لما تطلب من الله بالفاتحة اخدنا الصراط المستقيم الله بيهديك الصراط المستقيم.. بعد آمين يقول لك (إِنَّا أَرْسَلْنَا نُوحًا إِلَىٰ قَوْمِهِ ) هي بده يهديك بده يدلك على طريق الاسلام من مدرسة نوح بدك تكون لحتى تهتدي الصراط المستقيم بدك تمشي على ممشا نوح (إِنِّي لَكُمْ نَذِيرٌ مُبِينٌ) (فَقَالَ يَا قَوْمِاعْبُدُوا اللَّهَ ) هي الهداية اهدنا الصراط المستقيم.. (وَاتَّقُوهُ وَأَطِيعُونِ) يعني بتصير نجار من غير معلم يا ابني ما بيصير.. فيا ابني الان المسلمين فقدوا مين يصنع لهم اسلامهم.. بتحسن انت تعمل فلافل لحالك من غير ما تتعلم من المعلم؟ بتعرف تحسن تعمل بوشار من غير ما تتعلم من المعلم.. ؟ الاسلام يا ابني الاسلام بناء العالم.. بناء الفلاسفة العلماء الحكماء.. بناء النصر بناء العز المجد الوحدة الملائكية الاخلاق.. جامع وهي الجامع هلق لو ما لقيتوا الشيخ هالعضايض شو بتستفيدوا منه؟ جامع النبي ما كان في هالشي. لكن كان في النبي هيداك.. هيداك ملك الجوامع وشمس الجوامع.. فالنبي ﷺ لما الله عز وجل انزل عليه (فَاصْدَعْ بِمَا تُؤْمَرُ ) يعني اعلن الاسلام في صلاتك كمان بالتدرج ما رأسا انزل حارب وضارب وقاتل.. فصار النبي يعلن الجهر في صلاته لتبليغ الناس حتى يتعلموا الاسلام بنظرهم.. وكانوا على جاهليتهم كان اذا سمعوا القرآن كانوا يفهموه .. القرآن يا ابني كتاب ثقافي كتاب مدرسة كتاب مصنع.. بده يصنع الرجال .. لكن يا ابني هالمصنع وهالمدرسة ما بدها مدير؟ هالمدرسة ما بدها معلم؟ المزرعة ما بدها مزارع؟ فالله انزل على النبي (فَاصْدَعْ ) يعني اجهر بالقرآن بشكل تتصدع قلوبهم وتنزعج.. وتجيها متل الضربة يصحوا.. هي ما خاصة بالنبي.. هي خاصة بكل مسلم وكل مسلمة.. انت صدعتي بما تؤمري؟ خلي ينزعجوا منك وفي سبيل الله.. اذا كان يا ابني خسرت الناس من اجل الله ما في حدا عامل الله وخسر.. الله يا بيكسبك يلي زعلوا يا بيكسبك احسن منهم لكن ابني هي كلها صارت بعد ما تخرج النبي من غار حراء بعد ما حيي قلبه بالله بذكر الله عشق الله ما عاد سأل عاد عن جسده عن بدنه عن كلام الناس عن اذى الناس عن حكي الناس جوع عطش عداوة خوف.. ايه هلق المسلم اذا بده يسمع كلمة مشان الدين بيقول لك عيفني اخي شو بدي بهالشغلة... امشي اخي امشي بلاها بالناقص واحدة.. هذا ما بيصير يا ابني.. له من الاسلام الاسم. الله عم يطلب منك اسلام العلم والعمل.. اسلام القلب والقالب.. اسلام الروح والاخلاق اسلام الدعوة الى الله.. عم تعطيه اسلام الاسلام.. فاذا انت يلي ما بتسوى شي وعم تغضب لما واحد عم يعطيك الاسم على الحقيقة اي انت شو عامل بينك وبين الله؟ فالناس نايمين ونوم تقيل ومبنجين بدن صحو.. بحكمة برفق بقوة ايمان بده قلب ابني بلا قلب ما بيصير طلاب العلم لو بتعلموا لفتكن قد هالجامع وبتجيبوا كل القماش الابيض يلي بسوق الحميدية ما بتصيروا مشايخ الا ليصرلكن قلب تنطقوا بالله وبنور الله وبروح الله وتغيبوا عن انفسكم وتغيبوا عن حضوركم واهواؤكم وشهواتكم.. بيضل الهي انت مقصودي ورضاك مطلوبي.. والله انزل بعدين (وَأَنْذِرْ عَشِيرَتَكَ الأَقْرَبِينَ) قال له عيلتك قرايبينك القراب القراب جمعهم.. بني هاشم وبني المطلب وبني عبد شمس وبني لؤي ومدري ايش .. جمعهم وقام فيهم خطيب وشي لا بيعرفوه ولا سمعوا فيه ومتمسكين بدينهم وبده يطالعهم من دينهم الى دين ما بيعرفوا منه ولا حرف.. ابوه وجده وجد جده الصنم تبعه هذا الرب.. هي قليلة ابني؟ فالنبي (وانا اول المسلمين).. وكان النبي بس اول مسلم؟ ما في تاني مسلم؟ وتالت مسلم ما في ؟ ورابع؟ ما في.. ؟ ما مر معكم انه بدار الارقم صاروا اديش 40 مسلم.. وكلهم كانوا يعملوا عمل النبي ؟ كلهم كانوا يعملوا عمل النبي.. دعوة و (تتجافى جنوبهم عن المضاجع) وتقوى.. وذكر وحب وتضحية وبذل .. شو الاسلام ؟ الاسلام مدرسة.. اعظم مدرسة في الوجود من خلق ادم الى الان.. توجد الانسان العظيم في كل شيء في العلم في العقل في الحكمة في الاخلاق في الروحانية في السعادة.. اي ابني الناس عم يزهدوا بالاسلام ونحن ما شايفين .. جبلنا بس لحسة لحتى ندوق .. ما في.. تنكة فاضية ونشفانة وما فيها غير الغبار.. طيب وين العسلات وما بيعرف العسل.. فالنبي تسلط عليه من اهله ابو لهب.. صار يؤذي النبي وصار يزهّد بالنبي ويحذّر عشيرة النبي انه بكرا العرب تقاتلكم كلها.. بدكن تصبؤوا وتتركوا دينكم .. العرب هي دين اباءها واجدادها من مئات السنين.. في عندك صمود تحسن تصمد امام ابي لهب تبع زمانك؟ يُسلط عليك ابو لهب. .بكل زمان في ابو لهب وبكل زمن في ابو جهل.. كل عصرٍ فرعون فيه وموسى وابو الجهل في الورى ومحمدُ.. بتحسن تصبر وتتلذذ اني لاجد ريح الجنة من قِبل احد ويهجم.. يشو يعني اني لاجد ريح الجنة بده يدخل الجنة .. بيدخل الجنة وهو طيب؟ يعني بده يستشهد.. هذا كان ابني بعض صفات المسلم.. هلق ما بتحتاج العملية.. قلب ذاكر وشوية ثقافة اسلامية جيدة وحكمة واخلاق وسلوك وين ما رحت بتتقبّل يدك.. لان ابني المجتمع عم ينتسب للاسلام لكن ما في بحياته الاسلام بده اللحمة بالصحن لكن ما عم يصرله لحام فاذا صار له اللحام بيقبّل اجرك.. العالم كله الان مهيأ للاسلام لكن ما في المسلم القدوة ولا المسلم المعلم ولا الجامع المنجب المنتج.. ولذلك ان شاء الله ربي يجعل منكم وفيكن ومن كل المسلمين المسلم الحقيقي فدعاهم وقال لهم : يا بني عبد مناف يا بني زهرة يا بني عبد المطلب يا صفية عمة محمد يا فلانة يا فلانة.. انقذوا انفسكم من النار.. بكرا بعد الموت في جهنم.. الناس ما حاسبين حساب الاخرة.. بيخاف بالدنيا اذا خاف من الله انه الله يفقره.. اذا خاف الله بيخاف الله يضعفه ويمرضه .. اذا خاف من الله بيخاف الله يكسر له اجره.. ايه وين صفي ايمانه بالقرآن؟ وين شهادة القرآن وتخرجه من القرآن .. فردّ الله كرر عليه الامر انه اشتغل بعشيرتك الاقربين.. لانه الواحد اول ما بده يشتغل بمين ؟ بالاقرب فالاقرب.. هلق كل واحد منكم اذا بدكن تقروا سيرة النبي هيك لازم تعملوا كل واحد يرجع لأسرته يجمعهم فجمعهم النبي مرة اخرى.. وخطبهم وقال: " ان الرائد لا يكذب اهله".. القافلة يلي بتسافر بيبعتوا واحد قدامهم يلي بتشوف لهم البير محل المحطة لحتى يأمّن لهم محل الجلوس الخيمة يأمن لهم المياه يأمّن لهم الخيم.. هذا شو اسمه الرائد.. فاذا كان عائلة رايحة عالحج وبعتت الرائد قدامها بيكذب على اهله؟ قال لهم وانا رائد انا ما بكذب عليكم انتو اهلي .. ان الرائد لا يكذب اهله والله لو كذبت الناس جميعا ما كذبتكم.. ولو غررت الناس جميعا ما غررتكم.. والله الذي لا اله الا هو اني لرسول الله اليكم خاصة.. قبل كل شيء انا مرسل اليكم بشكل خصوصي والى الناس كافة فبدي اول بلغكم والبلاغ المبين المقنع.. البلاغ يلي يصل في اعماق القلوب.. بده صحبة.. المسلم كان اذا اسلم بمكة كان يصحب النبي معنى يصحب النبي يعني يضل مع النبي دخل في مدرسة النبي .. عم يشوف الدراسة بعينه وبأذنه وبقلبه وبروحه وقوة النبوة من اين تعلم الاسلام؟ سيدنا ابو بكر من وين اخد الاسلام؟ من الحيط؟ سيدنا عمر من وين اخد الاسلام؟ شيخنا من وين اخد الاسلام؟ شيخنا كان عالم .. لما راح لعند شيخ التربية راح لعنده وهو عالِم دخل عليه لما عرفه انه هذا شيخ الامام شيخ القلوب دخل عليه تجرد عن كل شخصيته وعن كل علمه وعن كل دروسه.. فالله نوّر قلبه بنور الله من مدرسة الشيخ القلبي.. من هالتنوير القلبي مع العلم هذا ما نحن فيه الان كلها من رشحات ذلك اللقاء وتلك المدرسة.. ان الرائد لا يكذب اهله والله لو كذبت الناس جميعا ما كذبتكم.. ولو غررت الناس جميعا ما غررتكم.. والله الذي لا اله الا هو اني لرسول الله اليكم خاصة .. والله لتموتنّ كما تنامون.. شلون وقت بتنام بتنعس بتنعس بتنعس بعدين ما بتعرف حالك شلون نمت.. كمان الموت شو الموت.. الموت بيوقف القلب .. لما بيوقف القلب الدم الدورة الدموية بتوقف ما عاد يوصل الدم الى خلايا المخ بيصرله غيبوبة لما بينقص الدم.. لما بينقطع الدم نهائياً خلايا المخ اذا انقطع عنها الدم 5 دقايق كلها بتموت.. فهالجسد هذا مات.. اما يلي كانت عم تدرك بواسطة خلايا المخ خرجت من جسدك الذي هو انتَ وانتِ.. وهون الشحار.. شو رسمالك عاد ؟ ورق سوري ما عاد ينفع واملاك ما عاد تفيد وشهادات ما عاد تنقذ ووظائف عليا مدري ايش.. لو تملك متل ما بيملك ريدان .. ما في الا من "اتى الله بقلب سليم".. لتموتنّ كما تنامون ولتبعثنّ كما تستيقظون.. في شك بيقظتكم بعد النوم ؟ كمان ما في شك بانكم بعد الموت الله بده يعيدكم الى الحياة مرة اخرى والى محاكمة الله.. واعمالك كلها مسجلة الكلمات والنظرات والخطرات والخطوات والمساخر والمهازل وخطوات السينما محسوبة وتبع الجامع محسوبة وكله محسوب اكل الحرام والغش والعقوق والبر والذكر والغفلة والمعصية والطاعة.. المسلم حاسب حساب؟ الشي يلي النبي.. هيدا اول الاسلام.. ما في مين يحكيله ولا مين يذكره ولا له مدرسة تؤانسه.. ولتحاسبنّ بما كنتم تعملون.. النبي عم يحلف ولمين واول اسلامه لاهله لعشيرته الاقربين.. ولتجزونّ بالاحسان احساناً وبالسوء سوءاً وانها لجنة ابداً.. حياة ابدية خالدة بسعادة لا تتخيلها العقول .. وانها لنار ابداً.. يا بني عبد المطلب.. ايه انت كطالب علم هيك بتدرسهم؟ بتدرسهم اركان الوضوء اربعة عالحنفي وستة على الشافعي.. ايه قلبه ميت هيدا اولا ابدأ بقلبه.. ابدأ بايمانه.. الاحكام ما دام صار عنده ايمان هو بيسألك عن الاحكام.. يا بني عبد المطلب ما اعلم شاباً جاء قومه بأفضل مما جئتكم به.. قد جئتكم بأمر الدنيا والاخرة.. جئتكم بسعادة الدنيا.. الاسلام يا ابني ما اخرة.. المشايخ باخر الزمان لما جدوا وشمروا وبدن يعملوا حالن ابطال عملوه اخرة بس دنيا ما في.. اما النبي بنى الدنيا وبنى الاخرة.. علمهم الاقتصاد والغنى والثروة والوحدة والدولة والتحرير واخراج المستعمر وهزيمة العدو والغنى وكنوز الارض كلها زحفت على اجريهم.. وين العقل يا ابني وين الحكمة ؟ وين العلم وين الثقافة وين الاعداد.. (اعدوا لهم ما استطعتم من قوة) هيدا كله مهمة الشيخ .. بده يمشي بالتدرج وبالحكمة.. الناس كلها بخير.. الدولة بخير اذا الدولة انوجد الشيخ الحكيم العالِم المخلص يلي ما له غرض ولا بيصير عميل لاحد الا ان يرقى بأمته الدولة تقدّره الله بيقدّره يا ابني الله بيتولى حفظه والعناية فيه.. الله موجود يا ابني.. الله سميع بصير.. قال : فتكلم القوم كلاماً ليناً غير ابي لهب.. كلام ما فيه ازعاج .. تعوا لاسعدكن بالاحسان احسانا وبالسوء سوءا يعني ايش مقبولة ما شد عليهم كتير.. فقال ابو لهب: يا بني عبد المطلب هذه والله السوأة هي المصيبة والكارثة.. خذوا على يديه قبل ان يأخذ على يديه غيركم.. انتو اعتقلوه واحبسوه قبل ما يجوا العرب هني يتعدوا عليه بعدين بيصير كسر لشآمتكم لانه من عشيرتكم وينمسك هذا ذل لكم لا انتو انزلوا هذا الشيء فيه.. شوف الشقي ابني عمه .. فإن التمستموه حينئذٍ .. اذا غيركم اعتقله وحبسه وعذبه وقتله ذللتم وان منعتموه.. العالم كلها بدها تفز.. قُتلتم.. فقالت اخته صفية عمة رسول الله .. أي أُخيّ .. هي ال أي شو اسمها؟ حرف نداء للقريب.. قالت له : اي اخيّ ايحسن بك خذلان ابن اخيك؟ ابن اخوك الله اكرمه بالنبوة اي انت بدل ما تنصره انت تتخلى عنه هيك بيليق فيك؟ والله ما زال العلماء يعني علماء اهل الكتاب اليهود والنصارى يخبرون انه يخرج من ضئضئ .. اي من اصل وعائلة ابي طالب نبيّ.. كان المجتمع الاشاعات مملوءة انه قرّب خروج نبي اخر الزمان .. فهو نبيّ.. قال ابو لهب : والله هذا الباطل والاماني وكلام النساء في الحجال.. الحجال يعني الخيم.. فاذا قامت بطون اهالي قريش وقامت العرب معها فما قوتنا بهم؟ والله ما نحن عندهم الا اكلة راس.. اذا واحد اشترى راس من عند الرواس بقديش بيخلص الراس ؟ بقعدة وحدة .. هي نحن قدام العرب اكلة راس.. فقال ابو طالب : والله لنمنعه ما بقينا.. والله لحتى نحميه وندافع عنه ونناصره ما دامت في اجسادنا حياة وارواح.. ثم ردّ مرة تالتة دعا النبي جميع قريش.. هالمرة اهل مكة كلهم.. ورقا على جبل الصفا.. كان بين الصفا والمروة وادي فطلع على جبل الصفا وقال بأعلى صوته: يا معشر قريش ان اخبرتكم ان خيلاً تخرج من سفح هذا الجبل تريد ان تهاجمكم وتغير عليكم أكنتم تكذبونني؟ انه النبي اشتهر في مجتمعه بالصادق الامين.. ما حدا طول حياته قبل النبوة مسك عليه كذبة ولا خيانة .. قال لهم اذا بخبركم في خيل بدها تهجم عليكم من الاعداء بتشكوا في كلامي؟ قالوا : والله ما جربنا عليك كذاباً.. فقال : يا معشر قريش انقذوا انفسكم من النار فاني لا اغني عنكم من الله شيئاً.. جيب اسرتك وعيلتك وخالتك وامك ذكرها بالله يلي خلقها من ذرة من وجود وبكرا بدها تموت وتصير تراب وكفن على قد ما بتتحمل.. لانه الناس الان نسيوا الاسلام كله لذلك بيجي عليهم التذكير بالاخرة بيجي عليهم شيء شديد بدك تكون حكيم وتدس النبض وعلى اساس النبض بتوصف الدوا.. اني لكم نذير مبين بين يدي عذاب شديد.. قدامكم بالاخرة عذاب شديد الانبياء كانوا مرعوبين منه وخايفين منه الاتقياء الصلحلاء .. ويلي جهلاء والفساق وتاركين الصلاة واهل الجاهلية اذا الميت اجا الحنش على رقبته ولف على رقبته وما بخاف ولا مد ايده ولا فز.. هي شجاعة ولا شو هو ؟ هي موت.. اذا رأى الذهب وما مد يده له بيدل على العفة ولا على الموت؟ فصفيان في المسلمين الحس الجسدي اما الحس الروحي الحس القلبي الحس الرباني هيدا كله ميت.. ولذلك الله قال (اومن كان ميتا فأحييناه) ما كانوا ميتين الاجساد والنبي احيا اجسادهم.. كانوا ميتين القلوب والارواح فحيت بالله فكرا وذكرا وحسا وشعوراً.. وصار يشاع على النبي في اوساط قريش بأن غلام بني عبد المطلب يُكلم من السماء يعني صار النبي هالة قدسية.. اول الامر ما الناس كلها بدها تجي وتتجند معك في سبيل الاسلام.. بالتدرج .. اول بيسمعوا بيجي ابو لهب وابو جهل.. وقبل منه بيجي ابو بكر وسعد وابو عبيدة.. قال حتى انتقل فعاب آلهتهم.. صار يتنقص اصناهم ان هذه لا تسمع ولا تبصر ولا تعي ولا تفهم انتم ضالين.. وسفّه عقولهم وضلّل آباءهم.. (إِنَّا وَجَدْنَا آبَاءَنَا عَلَى أُمَّةٍ ) اباءهم كانوا ضالين.. شو يعني اذا ابوك كان ضال انت لازم تكون ضال؟ هي الرجعية شو يعني؟ انه تمشي على العقل الاولاني.. اذا كان غلط بدك تتركه واذا كان صح الحقيقة لا تتغير لا اذا كانت جديدة ولا اذا كانت عتيقة.. العسل من عهد ادم الى الان تغيرت قيمته؟ ما بتتغير.. اما اذا كان كوسا محشي ومضا عليه يومين تلاتة مرور هالزمن بيغيّر حقيقته ولا ما بيتغير؟ بيتاكل عاد؟ يمكن الكلاب ما عاد ياكله.. بيخمّ وبيحمّض.. فجاؤوا الى ابو طالب يشكوا رسول الله وقالوا : ان ابن اخيك قد سبّ آلهتنا وعاب علينا ديننا وسفّه احلامنا وعم ينسبنا لقلة العقل وان اباءنا ضالين.. فإما ان تكفّه عنا واما ان تخلي بيننا وبينه.. بدأت المعركة الان المعركة الحامية.. كان بالاول معركة دعوة فالنبي عم يمشي بالمخطط الالهي.. انت بدك تمشي بمخطط زمانك ومكانك.. ما تحط اجرك الا حيث الارض تحمل ثقلك.. بتحط اجرك على خشبة على دفة بالاول زينها بركي قلبت فيك؟ شوفها ماكنة من كل الاطراف بعدما تكون ماكنة وقّف عليها.. فقالوا له : فإما ان تكفّه عنا واما ان تخلي بيننا وبينه.. انت لا تتداخل.. لان كان له مكانته وهو كان عم يحمي النبي.. فانك على مثل ما نحن عليه من خلافه.. فقال لهم قولا رفيقا وردهم ردا جميلا فانصرفوا عنه ومضى رسول الله يظهر دين الله ويدعو اليه لا يرده عن ذلك شيء.. يعني امّن النبي حمايته بواسطة مين ؟ ابو طالب.. بهيداك الوقت ابو طالب وحده بيكفي.. فانت ايها الداعي كمان يا ابني ما بتتحامق بدك تهاجم الدبابة بموس وبدك تناطح القطار براسك .. بدك تزين طاقتك والطاقة يلي بدك تقابلها وعلى ضوء هالمعادلة هي لازم تكون الدعوة ناجحة ما بيصير تدخل في معركة فاشلة .. او معركة هزيمة.. فاذا قاتلت وكان القتال يوجب الهزيمة فينتهي القتال بإذلال كلمة الله .. القتال لازم يكون لاعلاء كلمة الله .. النبي ليش ما قاتل في مكة؟ لانه القتال بده يذل كلمة الله.. في المدينة لما صار عنده قوة قاتل وما اراد القتال.. في بدر ما اراد القتال اراد مصادرة القاتل.. في احد اراد يحاصر .. في الخندق عمل الخندق ما بده يقتل العرب .. بده يعمل من العرب اعز اهل الارض بمكة ربط الطرقات كلها حتى يفاجئهم ما يحسنوا يحاربوا.. ايه هلق يا ابني هلق الشيخ رأساً يا بيكفّر يا بيغتال.. واحد عم بيقول ربي الله يا ابني يقول لك كذاب انت منك مأمور تقول كذاب وصادق.. انت ما لك تحكم الا بالظاهر وما تسمع.. اما القلب موكول الى الله.. لذلك ليش يا ابني؟ لانه ما تربى عند المربي. لا تربى عقله ولا نشأ على الحكمة ولا فهم الاسلام.. وهذا اخطر ما يكون نص الطيار اذا بده يستلم الطيارة شو بيصير بالركاب بيروحوا عالاخرة بدل ما يروحوا على عرفات ما هيك.. قال : والى ذلك اشار صاحب الهمزية فقال : ثم قام النبي يدعو الى الله وفي الكفر نجدة وايباء.. الكفر في مين ينجده ويسعفه ومتأبي متمنّع عن طاعة الله ورسوله في هالظرف النبي قاتل.. قال : ثم قام النبي يدعو الى الله وفي الكفر نجدة وايباء أمماً .. يدعو الى الله مين؟ أمماً.. امما شو بتصير ؟ مفعول به.. امماً أُشربت قلوبهم الكفر فداء الضلال فيهم عياء... الكفر متشرب بالعظام تبعهم.. فمعالجة ضلالهم تعيي وتتعب وتعجّز الاطباء في المعلاجة.. مع ذلك بالاسلوب الالهي يلي طبقه رسول الله نجح ب20 سنة.. هلق الناس مسلمين يا ابني.. هلق اذا عندك حكمة وعندك قلب وعدتك كاملة الناس بيقبلوا اجرك.. الناس بيعزوك بدنا نصمد ونثابر وبالحكمة والموعظة الحسنة وبالحب وبالنتيجة اذا مشينا على طريقة النبي النتيجة مضمونة بحول الله.. قال : ثم كثر الشر وتزايد وانتشرت العداوة بين النبي وبين كفار قريش وبين اصحابه.. حتى تباعد الرجال وتضاغنوا وأضمروا العداوة والحقد واكثرت قريش ذكر رسول الله بينها وحضّ بعضهم بعضاً على حربه وعداوته ومقاطعته.. هي انتقل النبي الى مرحلة المقاومة السلبية.. هلق ما في حاجة ابني .. هلق الناس مسلمين.. روح لقرية واعرف كيف تعلم وكيف ترشد بيبوسوا اجريك.. تستلم ولادهم تستلم اطفالهم.. هي لحالها ما بتصير بدها المعلم المرشد الرباني الحكيم.. فوصلنا هلق الى بدء المعركة الحامية.. هلق انتو دخلتوا المعركة الباردة؟ فكل واحد منكم بيحسن يحيي 10 جوامع .. لا تظنوا يا ابني بيصير شي بلا شي.. الله عز وجل الغني ما بيعطينا الجنة الا مقابل الاعمال الصالحة.. المسلمين تعودوا عبر القرون الاخيرة انه بدن بالدعاء وبالتمني.. الان نسيوا الاسلام نسيوه.. كل واحد همه بطنه فرجه لبسه شغله رأسماله مربحه اما اخرة دينه اسلامه هذا.. اي طيب النبي هيك عمل؟ الاسلام هيك قال؟ فجدّوا ان شاء الله ابني ببركة سيرة النبي ﷺ الله بيجعل من كل واحد منكم المسلم الحقيقي.. المسلم يلي مبني اسلامه بالعلم وبالذكر وبالقلب وبالاخلاق وبالدعوة الى الله .. وبيبذل وقته وجهده وبيتحمل في سبيل الله وبالحكمة والموعظة الحسنة.. وصلى الله على سيدنا محمد وعلى اله وصحبه اجمعين.