نحن اليوم مع اسم من اسماء الله سبحانه وتعالى هو الجبار جل جلال الله.. قال الله تعالى (هو الله الذي لا اله الا هو الملك القدوس السلام المؤمن المهيمن العزيز الجبار المتكبر).. جل جلال الله.. هذه صفة من صفات الله تتداخل في صفات الانسان.. يقال للانسان جبار ويقال لله جبار.. لكنها صفة اذا انتسبت للانسان دلت على نقص واذا نُسبت الى الله دلت على كمال جل جلال الله.. فصفات الانسان اذا اتفقت بينها وبين صفات الله تكون في الانسان صفات نقص وتكون في الله صفات كمال.. الله عز وجل خلق الانسان ضعيفاً خلق الانسان من عجل خلق الانسان هلوعاً صفات نقص في الانسان.. والله عز وجل صفاته صفات الكمال جل وعلا.. يسمى الانسان بعض اوقات جبار لكنه يعجزه اقل شيء نقطة دم اذا جمّدت صار معه جلطة.. نقطة دم صغيرة .. مرة تانية صار معه بالكلاوي صار معه بالكبد .. الانسان عاجز.. بيكون بقوة وصحة بينقلب بين صباح ومساء ينقلب الى عجز والى ضعف وصفات الله جل وعلا صفات القدرة وصفات العزة جل جلاله لا مرض ولا ضعف ولا فقد .. انما هي القدرة والعزة والعظمة.. جل جلال الله.. الانسان اذا اصيب بأي مصيبة ينقلب من قوي الى ضعيف من صحيح الى مريض بلحظة من لحظات الحياة فمهما الانسان رأى نفسه بقوة وعزة فهو خيال يتخيله.. اسم الجبار له عدة معاني مناخد منها 3 معاني اساسية.. اولاً الجبار هو العالي المتعالي عن صفات خلقه جل جلال الله.. والعالي الذي لا يُنال.. في عند البدو يقول عنده نخلة جبارة.. النخلة العالية بيسموها النخلة الجبارة.. عالية عن صفات الخلق جل جلال الله.. فهي معنى من المعاني.. معنى ثانٍ ان الجبار هو الذي يجبر عثرات الكرام.. ما بيقولوا جبار الخواطر.. يجبر كسر المكسورين.. فهي صفة من صفات الله جل وعلا.. المُصلح للامور جبار عثرات الكرام العالي المتعالي.. فهذه صفات الجبار.. معنى الجبار الاله الذي لا تناله الافكار.. مهما العقل فكر لا يحيط بعلم الله ولا قدرة الله.. لا تحيط به الابصار ولا تناله الافكار ولا يصل الى كنهه عقول العقلاء.. جل جلال الله.. اذا عرف الانسان ان الله عز وجل هو الاله الجبار يستريح من كل هم وغم لان الله جبار كسر المكسورين وان الله عز وجل يصلح الكسرة.. يلي بيصلح الكسر شو بيسموه؟ جبار.. انكسرت يده فأصلح له ياها.. فالدراسة لصفات الله عز وجل خلينا نوصل لنقطة اول ما نبدأ افضل فنقول دائماً عين العلم به هو عين الجهل به.. كلما زاد علما زاد جهلاً.. فاعلانك الجهل بعظمته هو العلم بقدرته.. وعين الجهل به هو عين العلم به.. (لا يحيطون بشيء من علمه) عدم وجود قدرة الاحاطة دليل انه جاهل .. فهذا جاهل بانه هو الاله الواحد العظيم جل جلال الله.. فاذا قلت لا اعلم فانت عالم به.. يقال العجز عن الادراك ادراك.. متى عجزت عن الاحاطة بقدرته فانت عالم بقدرته.. جل جلال الله.. فهذا المعنى الاول انه الاله العالي الذي لا يناله عقل ولا يحيط به فهم.. جل جلال الله.. المعنى الثاني جابر عثرات الكرام.. يصلح الامور ويلمّ الشمل ويغني الفقير ويجبر الكسير ويعطي المحروم ويرفع الذليل ويذل العزيز .. هذا من عظمة الله سبحانه.. فالله عز وجل من صفات الجبار انه يصلح الامور جل جلال الله.. يجبر الكسر ويلم الشمل ويصلح الامور ويجبر كسر القلوب جل جلال الله.. لما نعرف ان الله عز وجل اله جبار فالاله الجبار كان النبي ﷺ يقول في دعائه : يا جابر كل كسير.. هذا كان من دعاء النبي ﷺ.. فاذا كان الانسان حزين فهو في كنف الله دائماً .. فالله عز وجل يحب كل خلق حزين وكل قلب كسير.. يجبر خاطر المكسورين.. ومن صفة الانسان الجبار الانسان جبار ضعيف.. والله عز وجل جبار قوي.. يقسم الظالم ويقسم الجبابرة جل جلال الله.. فلما بيكون الانسان يكون الجانب الاضعف يكون عزة الله معه تكون نصرة الله معه .. فالله مع الضعيف حتى ينتصر له من الظالم.. جل جلال الله.. زوجين تخاصموا مع بعضن البعض فواحد تعدى حدوده شوي ظلم التاني زوج وزوجة ظلم الزوجة فكان الله عز وجل مع المظلوم .. كسر الظالم وجعله تحت رحمة المظلوم.. في اب غني ترك ميراث كبير هالميراث الكبير تركه لاولاده فاجا الاخ الكبير جمع الثروة وقال لهم انا بشغلكن ياها وبعطيكن ياها يدفع لكل واحد شيء قليل فلما كبروا الولاد طالبوا بميراث ابوهم قال لهم انا صرفته عليكم .. ما دفع لهم شيء ولا اعطاهم شيء.. فراحوا الاولاد اشتغلوا والله فتح على احدهم واشتغل وصار غني فالاخ الكبير انتقص والاخ الصغير استغنى صار غنياً .. فاحتاج الاخ الكبير يشتغل عند الصغير.. في قدرة الهية.. اغنى وافقر اعطى ومنع.. فالصغير صلح امره واصلح امر اخواته والكبير احتاج ان يشتغل اجير عند الصغير.. فالصغير قال له انا ما لح عاملك متل ما عاملتنا.. انت قبضت المال واخدت حقنا وطلعت ظالم النا.. نحن ما اخدنا منك اشتغلنا بجدنا والله عطانا بفضله.. فنحن عم ندفعلك افضل ما كنت تدفعلنا.. صار الصغير يتحنن على الكبير.. هيدا قديش صار بنفسيته انه اشتغل .. فسبحان الله.. هذا اسم الجبار.. قسم الظالم واكرم المظلوم جل جلال الله.. من اسم الجبار ان مشيئته نافذة في خلقه.. اذا شاء شيئاً نفذ بدون ما تتعب انت ولا يتعب التاني ولا يتعب.. فالله سبحانه وتعالى قال : عبدي انت تريد وانا اريد ولا يكون في كوني الا ما اريد.. ما يريد الله هو الذي يكون.. فان سلمت لي فيما اريد كفيتك ما تريد وانا عليك راضي.. وان لم ترضَ بما اريد اتعبتك فيما تريد وانا عليك ساخط.. بخليك تتعب في كل امورك.. جل جلال الله.. فالله يفعل ما يشاء.. خلينا نجيب من القرآن ما اجمل القرآن.. فرعون بلغ ان قال : انا ربكم الاعلى.. حكى هالكلمة.. وقال : ما علمتُ لكم من اله غيري.. طيب بهالعظمة بهالقوة بهالقدرة .. رأى في منامه بان طفلا من بني اسرائيل بده ينزع منه الملك.. منام شافه.. صار يهلوس فيه.. غلام طفل بده ياخد الملك.. فأصدر القرار والامر بذبح كل طفل من بني اسرائيل كل ولد يولد يندبح.. عمل عالدايات يلي عم تولد كله مخابرات متى ما ولد الصبي دبحه.. بنت يتركوها.. "يذبّح ابناءهم ويتسحي نساءهم" فالله ربى الولد يلي بده يهدم ملك فرعون وسط قصره .. سيدنا موسى وين تربى ؟ في قصر فرعون.. شافوه الجواري بالنهر حمّلوه وفاتوا عند زوجة فرعون ولد متل القمر عم يلالي لما شافته حبته حملته وفاتت لعند فرعون.. دخيلك شو الاية (قرة عين لي ولك) قال لها الك مو الي.. قالت له خليلي ياه (عَسَى أَنْ يَنْفَعَنَا أَوْ نَتَّخِذَهُ وَلَدًا) بكرا لما يكبر.. قال لها خليلك ياه الك.. تربى ببيت فرعون واكل من طعام فرعون وعاش على فراش فرعون ولما كبر نزع ملك فرعون.. طفل موسى.. نعم هو موسى.. فقضى على ملك فرعون .. ما بس قضى عالملك هلك فرعون وقومه.. (وَجَاوَزْنَا بِبَنِي إِسْرَائِيلَ الْبَحْرَ فَأَتْبَعَهُمْ فِرْعَوْنُ وَجُنُودُهُ بَغْيًا وَعَدْوًا ۖ حَتَّىٰ إِذَا أَدْرَكَهُ الْغَرَقُ قَالَ آمَنتُ أنه لا إله إلا الذي آمنت به بنو إسرائيل وأنا من المسلمين) سيدنا جبريل اخد الطين وحطه بفمه وقال له (آلْآنَ وَقَدْ عَصَيْتَ قَبْلُ وَكُنتَ مِنَ الْمُفْسِدِينَ ) جل جلال الله.. فموسى رجع الى مصر هو وبني اسرائيل استلموا مصر .. مصر فاضية هلك فرعون وقومه.. مين كان يصدق انه هالطفل يلي عم يتربى عند فرعون هو بده يهلك فرعون وياخد منه الملك.. هذه القدرة الالهية.. لما الانسان بيعجز بيشوف انه ما في عنده قدرة . قدرة الله هي النافذة مشيئة الله هي النافذة.. فسيدنا موسى استلم الملك بنو اسرائيل استلموا وانتهى فرعون.. ننتقل الى قصة تانية.. سيدنا يوسف صلوات الله عليه.. طفل عمره 12 سنة شلحوه بدن يدبحوه.. فقال لهم اخوهم مشان خاطري ارموه بالبير لا تدبحوه.. (وَأَجْمَعُوا أَن يَجْعَلُوهُ فِي غَيَابَتِ الْجُبِّ) رموه بالبير .. رموه استلمه سيدنا جبريل من تحت في صخرة بالبير قعّده عليها.. مرت قافلة رايحة على مصر عطشانين اجا وارد الماء نزّل الدلو تعلق فيه سيدنا يوسف.. يا بشرى هذا غلام.. هذا غلام.. غلام .. (واسروه بضاعة).. حطه مع البضاعة عالجمل ركّبه .. اخدوه الى مصر (وشروه ) يعني باعوه ( وَشَرَوْهُ بِثَمَنٍ بَخْسٍ دَرَاهِمَ مَعْدُودَةٍ) انسان بيسوى قديش باعوه برخيص.. طيب.. ومشيت الايام وراحت وانطوت الايام واذ بسيدنا يوسف صار ملك مصر.. واخواته اجوا لعنده فقراء (وَتَصَدَّقْ عَلَيْنَا إِنَّ اللَّهَيَجْزِي الْمُتَصَدِّقِينَ) (قَالَ هَلْ عَلِمْتُمْ مَا فَعَلْتُمْ بِيُوسُفَ وَأَخِيهِ إِذْ أَنْتُمْ جَاهِلُونَ ) بتعرفوا شو عملتوا؟ (قَالُوا أَإِنَّكَ لَأَنتَ يُوسُفُ ۖ قَالَ أَنَا يُوسُفُ وَهَٰذَا أَخِي ۖ قَدْ مَنَّ اللَّهُ عَلَيْنَا ۖ إِنَّهُ مَن يَتَّقِ وَيَصْبِرْ فَإِنَّ اللَّهَ لَا يُضِيعُ أَجْرَ الْمُحْسِنِينَ) الله اكبر.. من البير لعرش الملك.. مين رتب هالترتيب هذا؟ .. اخواته لو يعرفوا انه لو بدن يرموه بالبير بده يصير ملك بيرموه كانوا بالبير؟ هذا ترتيب الله.. لذلك يقال : ما من محنة الا ويتبعها منحة.. محنة رمي البير وشلح القميص .. تركوه اجت المنحة الى المُلك.. شلحوه القميص ودبحوا ارنب ولوتوا القميص بدم الارنب.. واخدوه لابوه .. اكله الذئب.. اطلع سيدنا يعقوب بالقميص .. القميص ما صاير له شي.. قال لهم لو اكله الذئب لقطّع القميص كان نتف له قميصه .. قميصه ما فيه شيء.. معناتها مؤامرة عاملينها.. (وَجَاءُوا أَبَاهُمْ عِشَاءً يَبْكُونَ) بكاء الكذب.. واذ بيوسف من الزلط بالبير عالقصر .. بالقصر عشقته زوجة الوزير فترك الحرام لله.. اتهمته ووضعته في السجن. .7 سنوات في السجن.. الله اكبر.. وهو نبي ورسول .. 7 سنين.. محنة ورا محنة ورا محنة.. من السجن .. الله ورجا الملك منام ما حدا عرف يفسره غير سيدنا يوسف.. (يُوسُفُ أَيُّهَا الصِّدِّيقُ أَفْتِنَا فِي سَبْعِ بَقَرَاتٍ سِمَانٍ يَأْكُلُهُنَّ سَبْعٌ عِجَافٌ ) سبع بقرات نحاف بياكلوا سبع بقرات سمان.. بقرة بتاكل بقرة؟.. منام لذلك لما حكالهم المنام لال المملكة قالوا له اضغاث احلام.. بقرة صغيرة تاكل بقرة سمينة ما بيصير.. وسنبلة ضعيفة تاكل سنبلة كبيرة.. الله فهّم المنام لسيدنا يوسف وجابه الملك وحطه عنده واستلم الملك بعده واخواته اجوا لعنده فقراء اذلاء مادين يد الفقر لا اله الا الله.. هذا الجبار.. يقسم المتكبّر ويعلي ويعز المظلوم.. (وَاللَّهُ غَالِبٌ عَلَى أَمْرِه وَلَكِنَّ أَكْثَرَ النَّاسِ لَا يَعْلَمُونَ) لا يعلمون تقدير الله ولا يعلمون ما خلق الله في هذا الوجود.. فجل جلال الله .. فرفع يوسف من السجن الى القصر.. سيدنا ابراهيم صلوات الله عليه.. كمان مين كان في زمانه؟ النمرود كان متكبر ومتعجرف وعامل حاله اله.. من عجرفته جاب نسرَين كبار حط افة وقعد فيها وحط لهم لحمة معلقة وطايرين بدن يستناولوا اللحمة.. ركبن وطايرين فيه بده يطلع يشوف اله موسى.. لوين وصلت الكبرياء تبعه.. ما شاف شي نزّل اللحمة ونزّلوه.. قال يا هامان ابنِ لي صرحاً لعلي ابلغ الاسباب.. (يَا هَامَانُ ابْنِ لِي صَرْحًا لَّعَلِّي أَبْلُغُ الْأَسْبَابَ) اسباب السموات.. (فاطلع الى اله موسى وَإِنِّي لَأَظُنُّهُ كَاذِبًا(.. استكبر وطلع ما في.. وجود سيدنا ابراهيم مع النمرود بيحطم كبرياؤه قال لهم احرقوه.. شلعوا النار واوقدوا النار ضلوا يجمعوا حطب 3 اشهر اهل البلد كلها جورة كبيرة وحفروها وشعلوا النار الطير يقع من حرها.. جابوا سيدنا ابراهيم مكتوف اليدين ومكتوف الرجلين .. مقيد من يديه ورجليه قذفوه في النار.. وقف سيدنا ابراهيم ولا شعرة اصابته .. قلب الله عليه النار نوراً.. هي قوة الجبار.. جل جلال الله.. (قلنا يا نار كوني بردا وسلاما على ابراهيم) جل جلال الله.. لو قال كوني بردا ولم يقل سلاما لما انتفع بالنار احد.. كان انقلبت خاصيتها .. لكن كوني بردا وسلاما معين على ابراهيم.. اما على غيره ما في بردا وسلاما فيه حراً.. لا اله الا الله.. نبينا ﷺ تآمروا على قتله قاطعوه.. 27 شهر مقاطعة بوادي بيسموه شعب ابي طالب هذا عند جامع .. مسجد الخيف صلى فيه 70 نبياً.. محله حبسوا النبي 27 شهر هو واهله واصحابه لا يوصلولهن اكل ولا خبز ولا ماء الا يلي سرقة يوصلولن ياهن وكاتبين معاهدة مقاطعة لا طعام ولا شراب ولا زواج ولا معاونة ابدا.. فالله بعت الدودة اكلت الورقة كلها يلي كاتبين عليها. الا كلمة اسم الله لما شافوا ورغم ذلك ما امنوا.. لا اله الا الله.. بعدين قال له يالله روح لعندهم .. دخل النبي الى مكة فاتح منتصر وقف على باب الكعبة.. ما تظنوا اني فاعل بكم؟ لو اصدر النبي قرار ﷺ اقتلوا الرجال حدا كان بيمنعه؟ حدا بيقول له ليش؟ تباح دماؤهم ولا لأ؟ لانه باعوا بيت النبي وباعوا بيوت الصحابة وما خلولهن شي.. النبي قال لهم : عفوتُ عنكم.. اذهبوا فانتم الطلقاء.. ﷺ.. هي معنى من معاني الجبار.. ان الله عز وجل يقسم الجبابرة والاكاسرة وينعش المظلومين.. تبارك الله رب العالمين.. من معاني الجبار الذي يجبر جميع الخلق على ارادته وعلى مشيئته.. النافذ امر الله ما امر احد.. حصلت قصة ذات نهار.. الرجل كان معروف بالغنى الفاحش.. هي موعظة ليلي بده يتعظ.. رجل غني غنى كبير.. تاجر وعم تجي الارباح.. خطب بنته شاب مهندس.. فدخل لعنده عم يخطب بنته قعد صار يطلع فيه.. البعيد انت بدك تاخد بنتي؟ انت اهل تاخد بنتي؟ انت اهل تتقرب لبنتي؟ لك مين انت؟ شقفة مهندس انت.. صار يستهزئ فيه ويتضحك عليه وطالعه مكسور الخاطر.. مرقت الايام اول سنة تاني سنة فجأة توقفت التجارة.. كسدت البضاعة صارو الديانة عم يطالبوا.. انقلبت الحالة.. من الغنى الى ان وصل الى درجة ما عاد عنده تمن الطعام ياكل ما في.. الله كبير.. لما وصل لهالحالة حط ناس قال لهم احكوا المهندس بركي بيجي مرة تانية بيخطب البنت.. بعطيه ياها.. ما بقا في عنده شي.. رجع الشاب المهندس تقرب وتزوج البنت.. وصل الحال ان هذا الغني يلي كان يقول له لك مين انت ؟ انت اهل؟ راح اشتغل اجير عند الشاب المهندس.. عند صهره.. اشتغل اجير عند صهره بتمن طعامه بس انه ياكل.. بيقولوا بالعوام : لا تتكبر الله اكبر.. فرجع اشتغل عنده .. الصهر طلع صاحب دين.. كرّم عمه ودلّله ونزله عنده بالبيت.. ماتت الحماية صفي العم لحاله.. فكان يبكي ويقول له انا طلعت لئيم معك وانت طلعت كريم معي.. عاملتني بالكرم الله يعاملك بالكرم.. هو يقول له انا ما عاملتك الا لوجه الله.. كل واحد بيعمل بأصله.. لا اله الا الله.. فمات وليس عنده درهم يلبسوه كفن.. في الله.. الله اكبر.. يلي بيتكبر شو بتكون النتيجة تبعه.. رجل كان متزوج كمان 2 وحدة اجاها ولاد ووحدة ما اجاها.. كانت يلي اجاها ولاد تطلع بهيديك لك انت ما في عندك ولاد .. ولادي ولادي.. تكسر خاطرها.. كل يوم تكسر خاطرها.. فيوم من الايام قالت لها : انت وحدة عاقر عالمزبلة والشجرة يلي ما بتثمر قطعها اولى.. عم تكسر خاطرها.. قالت لها انا هلق عندي 3 .. هي ولد قدامي وولد عم رضعه وولد تالت ببطني.. 3 ولاد انت ما فيك شي.. فكان ينكسر خاطرها المسكينة.. انقلب الامر قدرة الله عز وجل ابنها يلي قدامها سقط في الماء فاختنق.. اول ولد.. الولد يلي عم ترضعه صابته الحمى الشوكية بيسموها فمات.. من زعلها الولد يلي ببطنها مات ببطنها.. 3 ولاد فقدتهم وهيديك حملت.. جابت اول ولد وجابت تاني ولد وجابت تالت ولد.. انقلب الميزان لا اله الا الله.. هيديك دائما تجمع ولادها وتحصنهم بالله.. هيديك ولد قدامي وولد عم رضعه وولد ببطني انت ما في عندك فانقلب الحال.. هي صار ما في عندها ولا ولد ولا حدا حن عليها وهيديك اجاها الولاد يلي متل الوردة.. الله موجود لا تتكبر الله اكبر.. قصص من هالناحية كثيرة سمعنا قصة من شيخنا الله يرضا عنه.. رجل كان غنيا وفتش على مرأة على جمال على كذا فتزوحها.. ليلة العرس حب يكرمها يتعشا هو وياها او يتغدا هو وياها جبلها فروجين .. هو وياها.. عم ياكل هو وياها اندق الباب.. فزت فتحت فقير.. قالت له فقير .. قال لها : قلعيه.. الله يعطيك يا عمي.. ما راح.. طلع هوي بهدله ورفسه برجله قلعه وما عطاه شي.. بده يبين عضلاته قدام مرته.. فراح.. حصل خصام بينها وبين زوجها.. جديدة.. بعد سنتين تلاتة طلقها .. ثم افتقر .. خطبها واحد تاني فتزوحها.. يوم العرس جبلها فروجين.. هيدا التاني.. قاعدين عم ياكلوا اندق الباب.. افتحي قالت له فقير.. لفلها الفروجين برغيف خبز قال لها اعطيه ياهن.. اجت عم تعطيه ياهن اطلعت فيه واذ زوجها الاولاني.. نفس الحادثة.. رجعت عم تبكي ليش عم تبكي ليش عم تبكي بدل الفروجين بجبلك 10 فراريج.. ليش تزعلي.. قالت له ما عم ببكي عالفراريج.. تعرف هيدا الفقير مين .. هيدا كان زوجي.. ليلة عرسي انا وياه كنا عم ناكل فراريج اجا واحد شحاد عالباب وقام طلع ضربه وقلّعه قام فزّ دغري ورجع التاني عم يبيكي.. قالت له انا عم ببكي كان زوجي انت ليش عم تبكي؟ قال لها انا الشحاد يلي كنت عالباب يلي ضربني.. وحدة بوحدة.. انا الشحاد يلي ضربني ورفسني برجله وقلعني.. فالله بعتلي زوجته جعلها زوجتي وبيته جعله بيتي وماله صار مالي.. لانه عامل الخلق بكبرياء وعنف فالله عز وجل بينتقم من الظالم.. والعادة اذا الله انتقم من الانسان بسرعة دل على كرامته عند الله.. اما اذا اخرله ياها العصاية كرمالها بتطخن وشوكها كرماله بيطول.. نسأل الله العفو والعافية.. الحديث الوارد : اذا اراد الله بعبد خيراً عجل له العقوبة في الدنيا.. واحد بيكون ماشي في الطريق بيكون له كرامة عند الله .. بيطلع تطليعة ما بيشوف الا انطرق بالحيط.. اجت الطرقة مقابل.. اوعا.. هذا له كرامة عند الله.. اما اذا اخرله ياها نسأل الله العفو والعافية.. مين طلع .. الاولاني وقع بالسياج والتاني اكل دجاج.. كون مع الله.. كونوا مع الله.. والله يا ابني شي بيخوف.. والله صدق الله العظيم (ومن يعمل مثقال ذرة خيراً يره * ومن يعمل مثقال ذرة شراً يره) امتى ؟ والله في الدنيا قبل الاخرة عم تصير.. عم نشوفها في حياتنا.. فلان شاف حاله وفلان انكسر خاطره .. المكسور خاطره الله بيعزه ويلي شاف حاله الله بيذله.. لا اله الا الله.. الله عز وجل يرزقنا الصدق في محبة الله.. لا اله الا الله.. في كل زمن وفي كل عصر عم نسمع من الاخبار شيء كبير .. حصلت قصة في اول ابو جرش.. رجل كان مزوج اثنتين.. الاولانية عندها ولاد والتانية كمان اجاها ولدين تلاتة.. فكانت التانية بدها تسيطر عالمال كله.. ما بدها تخلي شي للاولانية.. ولاد وولادي. مات الاب التانية سيطرت على كل التركة.. الاولانية وولادها ما طلعلن شي.. ماما حقنا .. تقول لهم يا ولادي طولوا بالكن خدوا حقكم من الله.. خليها تفرح .. نزلوا الولاد اشتغلوا على صغرهم.. الاولانية صالحة تقية طولوا بالكم اصبروا.. كبروا ولاد التانية وفتحوا محلات .. مال بيدهم صار .. ولاد الاولانية مسكينة ما عندن لا اشغال ولا شي.. بتدور الايام بتوفيق الله وبعناية الله .. ولاد الاولانية بيصرلهم مين يشغلهم عنده تعلموا صنعة فتحوا محلات.. ولاد التانية استغنوا بالمال انه صار مال ما مال ضاع المال من بين ايديهم .. هيدول يغنوا وهيدول يفتقروا.. حتى صار ولاد الاولانية من الاغنياء الكبار وولاد التانية صاروا شحادين.. ولاد التانية يجوا لعند ولاد الاولانية مشان الله والله جوعانين لقمة طعام.. قالوا لها اخواتنا جايين عم يشحدوا من عنا.. قالت لهم يا ابني اعطوهم اوعكن تردوهم.. اعطوهم كرموهم.. اي هني ما عطونا.. قالت لهم : انتو ما تعاملوهم متل ما عاملوكم .. اعطوهم.. المعاملة مع الله.. اعطوا اخواتهم.. صار عندن بيوت اشتروا لاخواتهم بيوت كرموهم زوجوهم.. ولاد الفقيرة صاروا اغنياء ولاد الغنية شو صاروا فقراء.. هي ميزان الله في الكون.. (فمن يعمل مثقال ذرة خيراً يره ومن يعمل مثقال ذرة شراً يره).. عم نشوفه بحياتنا.. بعض اوقات بقعد انا والحجة تعي لنشوف.. اهلك واهلي مين بأهلك ومين بأهلي.. مين نحن.. انا واحد فقير درويش ابن طحان شو يعني.. شو يعني ابن طحان.. لكن اذا اعطى ادهش.. نسأل الله الكرم والفضل من جوده وكرمه.. كتار يلي سلطوا شو كانت نهايتهم؟ واحد حصّل 10 مليون شاف ما بقا الدنيا تسعه.. بليلة ما فيها ضو قمر صفي عالارض.. ما في عنده قرش.. وين راحت الثروة كلها بالتجارة تبعه.. اجا واحد لعند شيخنا قال له سيدي فاتحين باب الكوبرتيف بيسموه يعني ياخدوا البضاعة للجيش.. الحاصل .. قال له لح اشتغل فيها .. قال له لا تشتغل فيها خليك بشغلتك.. يعني المربح قليل.. ما سمع كلام الشيخ دخل.. بالمزاد والحاصل.. طلعت له 80 الف من 40 سنة.. صار 80 الف.. دخل بوحدة تانية.. ضرب مدفع الافلاس بالمرة.. ومديون تحت اطالة الدولة.. اجا لعند سيدنا عم يبكي دخيلك .. قال له يا ابني قلت لك لا تدخل.. رجع اتدخل .. كمان دفعله مبلغ ورد دخل مرة تانية.. سنة.. لعب بالمال سنة.. يقول انا اذا بدي فوت عالبيت لازم امشي عالدهب.. من عاداتها تخفض العالي وتعلي من سفل.. هي الدنيا يا ابني.. كمان كبر كبر كبر.. دخل بوحدة كمان اكبر منه .. فلس بالقرش.. اجا بعد 3 سنين لعند شيخنا.. شيخنا قال له : لا يُلدغ المؤمن من جحر مرتين.. ما لك عندي شي يا ابني.. قال له : سيدي حتى انت بتتخلى عني؟ قال له : ما انا تخليت عنك اذا الله تخلى عنك.. ونسال الله العافية.. طلق مرته وترك ولاده وباع بيته .. بده يمشي عالدهب.. والنهاية راح سكن بمغارة بالجيوعية.. بالجبل.. بالمقبرة.. الله في يا ابني.. راقبوا الله خليكن مع الله.. لا يغتر الانسان بالمال.. المال ظل متل فيّة شجرة.. ﷺ قال : " مثلي ومثل الدنيا الا كمثل رجلٍ نزل تحت شجرة ثم تركها ومشى.. مسافر.. نزل تحت شجرة اكل لقمته ودار ضهره ومشي.. هي الدنيا.. الدنيا ظل هالشجرة.. المؤمن بده يخاف من الله.. تذكروا الله.. لا يظلم الله لا صغير ولا كبير.. بعرف رجل ... نسال الله العفو والعافية .. كان في يتيم بالحارة عنا .. فالرجل الكبير بشوفة حاله دائماً ماشي حاطت يديه هيك كان ما بعرف شو معناتها هي .. كبرياء ماشي.. كلما شاف هاليتيم يبزق بوجهه ويقلعه ويرفسه برجله .. يقول له الطريق يلي بدي امشي فيه انا ما بتمشي فيه.. لليتيم.. كبر اليتيم بعدما كبر هالكبير طلق مرته او تزوج عليها.. فكانت مرته تجيب فنجان تعبيه من الطين توقف تستناه لما يطلع من الباب توقف ترشه بالطين.. بالطريق.. شوفة هالعين والله يا ابني.. بعدين صارت تعبي نجاسة.. ترشه.. ما بقا في هيك .. طربوشه يلي كان يحطه هيك صار حطه هيك بعدين قام الطربوش صار يتلوت كله بالنجاسة.. وين الكبرياء.. نسأل الله العفو والعافية.. فخلينا دائماً نصل كون على قدك.. وقدما كبر الانسان صغير بين يدي الله صغير.. ما له وجود.. خليك دائماً افتقر الى الله عز وجل ولعل الله عز وجل ان يغفر.. كان هناك طبيب نسائي جبار لا يوجد في دمشق غيره قصة وقعت من 70 سنة.. كان لا يخرج من العيادة الا بليرة دهب وعرباية.. حتى يطلع يشوف المرضى.. ما كان في سيارات.. فاجت لعنده مريضة فقيرة.. ما بطلع الا بليرة دهب.. فاضطرت هالمريضة تبيع الفرشة تبعها حتى جمعت له ليرة دهب دفعتله ياها حتى داواها.. ليرة دهب.. شفيت هالمريضة هي .. الله عوض عليها صار عندها اواعي وفرشة.. ابتلي هذا الطبيب بالمرض.. بده مداواة.. ما انوجد عند الطبيب اجرة معالجة الطبيب.. يجي طبيب لعنده والاطباء كلهم تنكروا له.. انه يعامل المرضى بهالقسوة هي.. ما عاد حدا يحي لعنده فعسعس بمرضه.. حتى زوجته تركته واولاده تركوه.. مات وحده بالعيادة.. ما عنده غطا يتغطا فيه.. في الله.. الله.. جل جلال الله.. هي كلها قصص الانسان بينتفع منها بيفكر بعظمة الله عز وجل .. اذا كان الانسان عامل حاله هو الكبير في اكبر.. لا اله الا الله.. الله جبار.. الطبيب ما كان يرحم المرأة حتى تبيع فرشتها .. فالله قسّى قلوب الخلق عليه وجعله يموت عالارض بدون غطا وبدون فرشة.. الله عز وجل جبار مع الضعيف ضد القوي ومع المظلوم ضد الظالم ومع الفقير ضد الغني الظالم.. فالله عز وجل لا تخفى عليه خافية في الارض ولا في السماء.. الجبار هو الله الذي اجبر الخلق على ما اراد عليه جل جلال الله.. احبوا ام لم يحبوا.. فلذلك هلق منقول : يا رب عجبت لمن يعرفك كيف يرجو احدا غيرك.. وعجبت لمن يعرفك كيف يستعين على امر بغيرك.. بتستعين بغير الله؟ وعجبت لمن يعرفك كيف يلتفت لاحد غيرك.. ما في غيره.. الله يجعلنا من اهل الرضا بقضائه وقدره.. فالجبار اذاً جل جلال الله هو الذي لا يمكن للعقل ان يصل الى احاطة قدرته وعظمته.. نحن شو النا بهالاسم؟ مناخد من هالدرس اسم الجبار.. هل للانسان ان يتجبر؟ نعم. اول ما تتجبر تجبر على نفسك الامارة بالسوء لا تعطيها سؤلها .. الامام الجنيد (ر) مرة كان قاعد ببيته قال فاحسستُ بنار تغلي في نفسي.. نار بده يطلع شو في.. فطلع من البيت شو في الحرارة كلها.. واذ فقير بالطريق قال له تاخرت يا جنيد صار لنا طالبينك زمان تاخرت.. قال والله ما عرفت شو صار معي خير.. قال له طلبناك مشان نسألك سؤال .. طلب الامام الجنيد وهو بالطريق مشان يساله سؤال.. قال له : اي جيت لعندك شو سؤالك؟ قال له : ما دواء النفس؟ النفس شو دواها؟ قال : دواء النفس مخالفتها.. تخالفها بكل وحدة.. فقال لنفسه : اما قلت لك هذا؟ اما سمعتي؟ ابيتِ الا ان تسمعي من الجنيد سمعتي من الجنيد؟ دواء النفس مخالفتها.. وهذا الحقيقة والله يا ابني.. كل شيء بدها ياه النفس خالفها.. الله يوفقنا واياكم.. هذا انا اخدته درس في حياتي مخالفة النفس.. كل ما تشتهي خالفها.. كنت اشرب الشاي بالابريق.. كلياتنا منعرف انه منغلي الشاي عبكرا وعالسفرة مع الشاي.. فجيب نص الابريق حاطين السكر فيه.. حطه قدامي كلما اعطش اشرب من الابريق.. بعدين فكرت انه شو صاير انا عبد الشاي؟ ما عدت احسن اقعد بلاه .. معاهدة على ترك الشاي.. هلق صار لي ما يقارب 54 سنة تارك الشاي خلص.. كل شي تطلبه النفس.. رحت مرة لعند مفتي لبنان الله يتغمده برحمته والله عمل لي درس ساعة وربع او ساعة ونص مشان شرب الشاي .. الشاي منافعه كذا .. بعدين عطاني كاسة شاي.. قلت له عفوا ما بشرب.. قال لي درس ساعة ونص عن الشاي قلت له ما بشرب.. عند شيخنا مرة مرتين قلت له ما بشرب شاي قال لي برافو عليك.. لما يجيبه صار يقول شيلوه ما بيشرب.. خلص ما بشرب ما بشرب.. صدقوني لو نفسي تطلب الماء لا اسقيها ياها.. ما بشرب الا تقربا وطاعة لله.. ما باكل الا طاعة لله اما لحظ النفس ما بعطيها وهذا فضل الله عز وجل.. وخالف النفس والشيطان واعصيهما وان هما محضاك النصح فاتهم.. شلون يعني النفس قالت لك قوم صلي.. هذا نصح او غش؟ قوم صلي مشان ايش بدك ياني قوم صلي هلق ؟ قوم صلي.. النفس الها استنى دقيقتين تلاتة الا بتشوف واحد من الصالحين جاي يخرب بيتك بدك ياني صلي مشان اذا دخل تغمض عيونك راح ثوابه كله .. بعض الصالحين رضي الله عنه وارضاه قال نويت الصيام .. نوى الصيام عشية بده يساوي اكل راح عند اللحام يجيب وقيتين لحمة وصل لعند اللحام شاف واحد واقف عند اللحام رجل كبير مبين عليه الصلاح والتقوى قال له اعطينا وقية لحمة من الشرباية قال له لا الله يخليك تعطيني ياها من الزورة.. عطاها ياها من الزورة وقت قسم له رجع قال له الله يخليك .. اربع خمس مرات .. الرجل يلي جاي الصالح قال له اخي كله لحم كله نعمة الله ليش هيك .. قال له والله انا صايم والصايم بيحب ياكل لقمة طيبة.. قاله اي ليه اخي انا بصوم 3 اشهر ما باكل كل هذا .. قال لهم بخاطركم ما بقا بدي لحمة.. طلع الشيطان هيدا سأله مشان وقية لحمة ضيع له كل ثوابه.. اللهم انا نسألك العفو والعافية.. قولوا امين.. بسم الله الرحمن الرحيم الحمد لله رب العالمين وصلى الله على سيدنا محمد وعلى اله وصحبه اجمعين.. اللهم خلقنا باخلاق سيدنا محمد ﷺ ظاهرا وباطنا وادبنا بآداب شريعته ظاهرا وباطنا واجعلنا اللهم من اهل الصدق في محبته برحمتك يا ارحم الراحمين.. اللهم اغفر لنا وارحمنا ولوالدينا ومشايخنا ومن جالسنا وللمسلمين اجمعين.. وصلى الله على سيدنا محمد وعلى اله والحمد لله رب العالمين.