بحثنا اليوم ضد صفات الشباب. ضد خلق الشباب. وهو صفة من صفات الله تعالى. من منكم يعلم هذه الصفة؟ موضوع اليوم لعلكم تستمعون ولكن صعب عليكم ان تطبقون الا ما طلب الله تعالى بقوله (وَإِنَّهَا لَكَبِيرَةٌ إِلَّا عَلَى الْخَاشِعِينَ * الَّذِينَ يَظُنُّونَ أَنَّهُم مُّلَاقُو رَبِّهِمْ وَأَنَّهُمْ إِلَيْهِ رَاجِعُونَ) من فكر بلقاء الله وفكر بأن الله معه ممكن ان يطبق هذا الخلق اليوم. خلق اليوم هو الحلم. صفة من صفات الله ﷻ هذه الصفة التي بها احيا الله الامم وبهذه الصفة عفا ﷻ عن جميع المذنبين والخطائين وبدل شقاوة الاشقياء الى سعادة. الحلم صفة من صفات الله ﷻ ومن تخلق بخلق من اخلاق الله تعالى دخل الجنة. وهذا خلق عجيب من اخلاق الله تعالى. الحلم الذي ينقذ العباد من السخط والغضب والنكبات الى الحنان والرحمة والعفو. خلق الحلم الله ﷻ من اسمائه الحليم وورد في القرآن كلمة الحليم بعدة الفاظ كقول الله تعالى (وَإِنَّ اللَّهَ لَعَلِيمٌ حَلِيمٌ) (وَكَانَ اللَّهُ عَلِيمًا حَلِيمًا) جمع العلم مع الحلم. وهذا من اكمل ما يمكن ان يعطاه الانسان في الحياة: ان يعطى علما مع حلم. فإن لم يكن العلم معه حلم فمعناها علم لا يساوي مغرز ابرة. اذا دائما يتصل العلم بالحلم. وهذه الصفة كما قلت صعبة ان توجد في اثنين : في حفاظ القرآن وفي العلماء. وخاصة الشباب. حفاظ القرآن القرآن يعطي الانسان حدّة. يعني نزاءة فصعب عليه ان يحلم. مع ان النبي ﷺ امر قارئ القرآن قال : لا ينبغي لصاحب القرآن ان يجد مع من وجد (يعني يغضب مع من غضب) وفي جوفه كلام الله. حمل كلام الله ويغضب؟ هذا كثير في حق القرآن. 2 العالم اذا ما بلغ سن الكمال. سن الكمال في العالم بعد ال40. لذلك الله ﷻ ما اعطى الرسالة لرسول الا من بعد ال40 الا سيدنا يحيى وسيدنا عيسى. اما بقية الانبياء فما اتى بالرسالة الا من بعد ال40. في ال40 يكمل العقل. يصل العقل الى منتهى الكمال. فبعد ال40 اذا ما كان عنده الحلم فعلمه لا يساوي مغرز ابرة. الله ﷻ اتصف بصفة الحليم الذي لا يستخفه شيء من عصيان العصاة ولا يستفزه (لا يهيجه) الغضب على المذنبين والعصاة. وقد جعل لكل شيء قدراً وميقات. وكل شيء سينتهي للميقات الذي هيأه الله له. فعدم سرعان الغضب او عدم استفزاز الغضب لانه التصق بالحلم. فالعباد يعصونه وجعلوا لله ولدا وجعلوا له من الملائكة بنات. وجعلوا له شركاء وهو يحلم عليهم ويرزقهم ويعافيهم . حلم الهي(وَلَوْ يُعَجِّلُ اللَّهُ لِلنَّاسِ الشَّرَّ اسْتِعْجَالَهُمْ بِالْخَيْرِ لَقُضِيَ إِلَيْهِمْ أَجَلُهُمْ) (مَا تَرَكَ عَلَى ظَهْرِهَا مِنْ دَابَّة) لو بدو يعجل العقوبة لأهلك الرجال والنساء والاطفال. لكن ﷻ بكاء طفل بسببه ينزل الرحمة على امة. كسر خاطر عبد الله ﷻ يرفع النقمة عن امة. بانكسار خاطر عبد او بكاء طفل او ارملة. والحلم دائماً لا يوجد الا بعد كظم الغيظ. كظم الغيظ هو اولا، ثم يكون الحلم. وكظم الغيظ هو درجة تعتبر درجة اولى من الحلم. كظم الغيظ بعده التحلم وبعده الحلم. فلا يكون حليما ما لم يكظن الغيظ ثم يتحلم ثم يحلم. بهذه الصفات ال3 يكون حليماً. فأولا كظم الغيظ. عندما يشتد غضب الانسان. متل لما نجيب قنينة القازوز يلي فيها الغاز ومنخضها اذا خضيتها وحاطت اصبعتك عليها ورفعت اصبعتك وين بتصير القنينة كلياتها بتطلع لفوق عالسقف. واذا ضميت حاطت اصبعتك عليها هيدا شو بيسموه ؟ كظم. لحد ما ترجع الكولا كلها تسخن. فالانسان اذا غضب بدو يضل كاظم الغيظ شادد على اعصابه كازز على سنانه حتى يرجع له الفتور والهدوء. هذا اسمه الكظم. فالانسان غضب ومن شدة الغضب لح تطلع معه فذكر قول الله تعالى (وَالْكَاظِمِينَ الْغَيْظَ ). فكز على سنانه وضبط اعصابه وشد عحاله. لح ينفجر ممكن يتأثر بنفسيته ممكن باعصابه ممكن يصير معه جلطة. بكظم الغيظ هذا استطاع ان يتغلب على 3 : النفس والهوى والشيطان. فمتى كظم غيظه بعده بيطلع الى خلق التحلم. يعني بيبذل الجهد ان يتحلم. بدو يسب بدو يشتم. كظم غيظه. كما فعل سيدنا عمر بن عبد العزيز. اتى اليه عبد من عبيده حامل معزاية او خاروف اجا لقدامه حطها بالارض واخد حجر ضربها بالحجر كسرلها اجرها. امير المؤمنين قاعد قدامه. فعمر بن عبد العزيز اطلع فيه هيك قال له لم فعلت ذلك؟ قال لأغيظنك. قال : بدي اغضبك. قال (رضي الله عنه وارضاه) : والله لأغيظن من دفعك لهذا. انت حر لوجه الله قوم. ولم يغضب. قال له يلي دفعك الشيطان لحتى تغضبني فانا لح اغضب يلي دفعك. قال وما غضب. الله يرضى عنهم. هذا كظم الغيظ ابني. فبدل ما يعاقبه لك عم تتجرأ قدامي؟ لاكسر اجرك متل ما كسرت اجرها. لا. كظم غيظه وقال له لاغيظن من كان سبب لتغيظني. هذا اسمه كظم الغيظ. فهذا الشباب لا تطيقه لان الشاب دائما فيه حدة عنده نزاءة بدو غرضه قوام بدو لو حسن يقلب الدنيا بدقيقة واحدة ما بيقول لا. يا ابني ما كل الامور تتحقق كما تريد. الله ﷻ (إِذَا أَرَادَ شَيْئًا أَن يَقُولَ لَهُ كُن فَيَكُونُ). انت منك اعظم من الله. بدك فورا يتحقق لك امالك وطلباتك فهذا لا يكون. فلا بد من كظم الغيظ عند الغضب. ثم تحلّم. التحلم ان تعفو عمن اساء. هذا اسمه تحلم. ثم بعد التحلّم تحلَم . الحلم ان تعطيه هدية. كم مرحلة ؟ 3 . كظمت الغيظ ثم تحلّمت فعفوت. ثم حلمت. يعني تبتسم وتقدم له هدية والله يعطيك العافية. هيدا شو اسمه ؟ هذا الحلم. وأظنه صعب عليكم. صعب نحن نوصل لدرجة الحلم . لكن بما انه سالكين ونريد التقرب الى الله والتخلق باخلاق الله فلا بد لنا ان ناخد كيف نحلم او نتحلم. النبي ﷺ قال : انما العلم بالتعلم والحلم بالتحلّم. بدك كل مرة تضبط اعصابك زيادة. اول مرة دقيقة ضبطت اعصابك تاني مرة دقيقتين. تالت مرة 3 دقايق بيجي يوم بتلاقي ضبت اعصابك 10 دقايق ربع ساعة.. بيكون هدأ الغضب وفترت عن الغضب فتخلقت بخلق من اخلاق الله. ومن تخلق بخلق من اخلاق الله دخل الجنة. كمال العلم يكون مع كمال الحلم. فدائما بدنا نكون من اهل الحلم. عم تجي كل وحدة ما تخلي الواحد يغضب بل يفقد عقله. فتن الحياة مصائب الحياة عدم معرفة قدر العلم والايمان. عم تخلي الواحد يفقد اعصابه. فشد على اعصابك وارضى وخليك حليم لتتخلق بخلق الله تعالى. والحلم لا يعرف الا عند شدة الغضب. وانت ساكن وهادي ما بينعرف. لكن امتا بينعرف؟ عند الغضب. بيجي واحد بده يغضبك ويعمل عمل يغضبك.. وانت هيدي الساعة عطيتها برودة قلب. كما حصل مع النبي ﷺ امامنا وقائدنا ﷺ وقدوتنا في الحلم. كان في زمن النبي ﷺ حبر من احبار اليهود. يعني عالم من علماء اليهود. يقال له : زيد بن سعنة.. كانوا يصدرون عن رايه. وكان اذا قال قولا قاموا بتنفيذه فورا. له مكانته ورأيه لما راى النبي ﷺ رجع الى التوراة فوجد نفس الصفات التي قرأها في التوارة وجدها في النبي ﷺ فعرف انه رسول الله. فراجع التوراة وكان كلما قرأ صفة أقبل فنظر الى النبي ﷺ ليتحقق هذه الصفة به. قال فما بقيت صفة الا ورأيتها فيه. الا صفة واحدة قرأها في التوراة لكن ما استطاع ان يكتشفها في النبي ﷺ انه حليم لا يغضب. لا يزيد شدة غضب الغاضب الا حلماً. هي بدها مخالطة بالنظر ما ممكن. قال فبايعت رسول الله. جاب بضاعة عم بيبيعها ب80 مثقال من الذهب. اخذها من زيد ابن سعنة الى اجل وكان الأجل الى نهاية الشهر عندما يغيب القمر ثم يطلع بيحل الأجل ما كان في تاريخ غاب القمر يعني اخر الشهر ولما يطلع الشهر بيحل الاجل. اعطاه فقبل ما يغيب القمر بليلة معناتها لسا في 3 ليالي. اتى الى النبي ﷺ وامسكه من صدره من اواعيه وشد عالنبي ﷺ وسحبه سحبة غليظة أثر الثوب بعنق النبي ﷺ ونظر له نظرة غضب مفنجر عيونه وعم يهز النبي ﷺ قال له أنتم يا بني عبد المطلب مطل انتم اكالين حقوق الناس بتماطلوا بالناس ما تعطيني حقي اعطيني حقي مع انه لسا ما دخل الوقت. سيدنا عمر لما شاف هالشوفة (رضي الله عنه وارضاه) ما حسن يصبر نزئ. سحب السيف وقال له ولك انت عم تحكي للنبي يلي عم بسمعه؟ سحب السيف قال له والله لولا رسول الله ما خليتك دقيقة. فنظر النبي الى عمر وهو يبتسم. اهدا يا عمر. ضب السيف. فقال له ﷺ يا عمر انا وهو اليك لغير هذا احوج. انا وياه منحتاجك لغير هيك. ما تسحب السيف. قال له يا رسول الله وما غير ذلك؟ بايش؟ قال هلا امرتني بحسن الاداء وامرته بحسن القضاء؟ قل له طالب برفق. وقل لي اعطيه حقه. دخيل الله. عم يهزه هالهزة لو كان معنا شو كنا منقوله اقعد ولا لسا ما صار الوقت والله يستر ما نعطي كمان شي كفين. خذه يا عمر . اذهب فاعطه حقه وزده عشرين صاعاً. الصاع 2 كيلو. 20 صاع باديش يعني؟ 40 كيلو زيدو على حقه. هيدا 20 صاع بياكل فيهن شهرين تلاتة. اعطيه زيادة لانك روّعته. رعبته حطيت ايدك عالسيف بدك تقطع راسه. فزيده عشرين صاع. امرك يا رسول الله. اخده سيدنا عمر عطاه حقه و20 صاع. فقال زيد ما تصنع يا عمر؟ النبي امر ان اعطيك حقك وهي زيادة فقال يا عمر اشهد باني اشهد ان لا اله الا الله وان محمدا رسول الله. واشهد ان نصف مالي لرسول الله. وهيدول التمرات كلن للفقراء. طعمين للفقراء ونص مالي لرسول الله ﷺ. شلون هيك اسلمت. قال له ايه طيب انا فحصت كل اخلاقه وبهالخلق هيدا ما بينفحص الا هيك فما زاده جهل الجاهل الا حلما. ﷺ جهلت عليه وغضبت وعم هزه بس مشان يغضب شوي. فاذا بالنبي يبتسم. ما قاله ما صار الاجل لسا. سيدنا عمر طول بالك. هي يا ابني الحلم الذي تخلق به سيدنا رسول الله ﷺ يقينا لا نستطيع ان نطبق ما فعله رسول الله ﷺ نبذل الجهد اما نصل لهالحلم هاد هذا حلم الانبياء اما نحن ما بلغنا النبوة نحن عنا نزاءة وعنا نفس. عند النبي ﷺ ما في نفس. ﷺ روح قدسية مقدسة. نسال الله ان يخلقنا بهالخلق. فكر لو كنت انت بالبيت وابوك غضب وسبك بماذا تقابل شتم ابيك وسباته بتغضب وبتطلع من البيت وبتطرش الباب وبدمك ماشي والله يستر ما تضلك شي يومين برات البيت مع رفقاتك. يعني بدك تربي ابوك. لا يا ابني. غضب ابوك احلم. والدك ولو ضربك اذا ضربك على خدك اليمين اعطيه خدك الشمال. اذا ضربك على راسك اعطيه جسمك. نخ بين ايديه خليه يضربك معليش. ضرب الوالدين ما بتعرفو هالشي يا ابني، ويمكن اول مرة بسمعكن ياها. ضرب الوالد للولد تأديباً يزيد م مغفرة الذنوب وكمال الاخلاق ورفعة الدرجة. يعطى ثلاث الولد تغفر ذنوبه وترفع الدرجة تبعه ويعطى من كمال الايمان والاخلاق. فيا ابني هذا الحلم اصبر وطول بالك ما تتنازأ الحدة من الشيطان والتأني من الله. فاحلم اولا وهذا الحلم هو صفة من صفات الانبياء والاولياء. اما النبياء فقد قال الله تعالى عن سيدنا ابراهيم (إن إبراهيم لحليم أواه منيب). وفي اية تانية (إِنَّ إِبْرَاهِيمَ لَحَلِيمٌ أَوَّاهٌ). فإذا كان حليم ما غضب على النمرود عندما قذفه في النار. ما غضب عليه ولا دعا عليه بل استسلم لامر الله وقضائه فبدل الله له النار نورا. حلم. وما دام الحلم موجود فيك معنى ذلك انك تسير الى الكمال. اكمل خلق الانبياء خلقين : الحلم والوفاء. مع انه كل اخلاق الانبياء كاملة. ولكن خلقين لا يطيق الناس تطبيقهما على اكملهما. ان تكون حليما عند الغضب. عند النزأ عند ما يثيرو فيك النفس العاطفة. عندما يغضبوك. الغضب ان تغضب لله لا تغضب لنفسك. ﷺ ما غضب لنفسه ابدا انما كان غضبه لله تعالى. اذا طعنوا فيه حكوا عليه ما يغضب. اما اذا انتهكت حرمات الله فكان لا يقوم لغضبه قائم ﷺ لانه فنيان بحب الله فنيان بالله ما باقي منه ذرة لوجوده. ولما كان كله مع الله تخلق بهذه الاخلاق. اتصف بهذه الاخلاق. فالعبد مثلا يعصي الله والله يحلم عليه. ولو كان كل عاصي الله ﷻ اهلكه لما ابقى على وجه الارض منا احد. كلنا عصاة ومذنبين. لكنه ﷻ يحلم على عباده لا ينزل عليهم السخط ولا الغضب بل يحلم. وشدة الحلم خلى العاصي يتجرأ على الله لان عمل اول معصية الله ما عاقبه وتاني معصية ما عاقبه تالت معصية فصار يتجرأ على المعاصي من شدة حلم الله تجرأ العاصي. لذلك قال بعض الاولياء في دعائه: اللهم ان حلمك عليّ جرّأني على معصيتك. حلمك علي يعني شو بدك يعاقبك ؟ لو عاقبك مباشرة كان بيقدر. لكن حليم. والحلم هو الصفة التي تبرهن وتبين صدق الحب من عدم الحب. حلم عليك فإذا تأدبت وتبت بحلمه وجّهك الى الكمال. ولو كان رديت عدت المعصية ورد حلم بيبين انك غير مكترث بعظمته متفكر قدرته. فيجب ان تحلم الحلم الكبير. فسيدنا ابراهيم حليم. كذلك وصف الله ﷻ عباده قال : (وَعِبَادُ الرَّحْمَٰنِ الَّذِينَ يَمْشُونَ عَلَى الْأَرْضِ هَوْنًا وَإِذَا خَاطَبَهُمُ الْجَاهِلُونَ قَالُوا سَلَامًا) ما اعظم هالخلق هذا. هيدول يلي صارو عباد. الجاهل ما بيعرف المكانة ولا المستوى جاهل. كيف بدو يخطابه؟ بدو يقول له: يا حببي ولا يا سيدي ولا يا صاحب الكرامة ؟ ويا صاحب الفضيلة؟ الجاهل يخاطب بالسب بالشتم بالضرب . اذا خاطبهم الجاهلون باخلاقهم المنحطة قالوا سلاما لا نبتغي الجاهلين سلام سلام ما منرد عالجاهل. ما طلع من تمه كلمة فيها نقص. حلم حلما ان جهل عليه لا يجهل. بتحلم. هي يا احبابي نحن منحسن عليها ؟ خلي واحد منكن بالجامع ما بدي برا اجا واحد بالجامع طرقك بكتفه رماك. شو بتقوله منعرف شو بدنا نحكي ما هيك اقل واحد بيقول له هيه ياه وله مانك شايف؟ هو جهل عليك بكتفه طرقك بكتفه اما انت جهلت عليه بالسب. جهلك طلع اكتر من جهله. لكن شو بدنا نعمل فز وانا مبتسم الحمد لله اللهم اجرني في مصيبتي وعوضني خيرا منها جزاك الله خيرا على ايش؟ خليتني قول انا لله وانا اليه راجعون. خليتني قول لا حول ولا قوة الا بالله. وهي كنز من كنوز الجنة كسبتني كنز من كنوز الجنة. سبك متل يلي دخل عند سيدنا الحسن وشتمه سيدنا الحسن صار يبتسم. هيداك يشتم وسيدنا الحسن يبتسم. ما رد عليه بالشتيمة .قال له اذا كانت حسناتك رخيصة عليك فأنا حسناتي غالية علي واذا كنت بتحب السيئات فأنا بكره السيئات فإذا غضبت علي انا بحلم عليك. انت بتاخد السيئات وانا باخد الحسنات. نحن شو هون منقول ايه ما في دم؟ ما بيغضب؟ لك ابني هيدا حلم اهل الله. حلم الصالحين يحلمون على الجهلة (وَإِذَا خَاطَبَهُمُ الْجَاهِلُونَ قَالُوا سَلَامًا). سلام. ما بيجاوب ما بيخاطب حتى ما يقع في كلمة تسيء اليه. هيداك جاهل طلع منه نقص فإذا انت طلع منك نقص استويته بالجهل. صار نقصك متل نقصه.. اذا هو طلع منه النقص انت يطلع منك الكمال هو سب انت ادعليه هو اذاك انت اعطيه هدية. بيصير هذا ؟ نعم. بلغني عن سيدنا الشيخ بدر الدين (رضي الله عنه وارضاه) كان من اكمل اولياء الله . بعض المشايخ كان يكيل له بالمكيال الاوفى يسب الشيخ مسابات. بلغ الشيخ انه فلان عم يسبك مسبات كبيرة. فالشيخ بدر الدين (رضي الله عنه وارضاه) اخد مصاري بجيبته وراح لعنده مشي عالميدان. استدل على بيته والشيخ بدر الدين ما كان يمشي عرباية كان واخوان حواليه. مشي رايح تعجبت الناس وصل للبيت دق الباب. طلع هيداك فتح واذ الشيخ بدر الدين عالباب. الشيخ بدر الدين لرئيس الجمهورية ما كان يقوم. من كبار العلم. قال له السلام عليكم بتأذن لي ادخل؟ هيداك انهار ما بقا في عزم تفضل شيخ. فات. قال له الله يعينك ويعطيك العافية بلغني انك تبعان شوي وحالتك شوي فيا ابني انا جاي لعندك الي قضاء حاجة عندك بتقضيلي حاجتي؟ هيداك عدو عم يسب قال له سيدي أأمر . قال له قضاء حاجتي ما تطالعني خايب من عندك جاي طالب منك شيء. قال له يا سيدي شو بتأمر انا جاهز. طالع المصاري من جيبته بما يقارب بهالزمان بيطلعوا 50 – 60 الف ليرة سوري قال له تقبل هالهدية مني. هيدا طلبي. . يا سيدي قال له ما تكسر خاطري. قبل الهدية. الله يجزيك الخير. بتسمحلي امشي؟ فنجان قهوة. قال له لا. انا هيدا طلبي. طلبي انك جبرت خاطري وجزاك الله عني خيراً فهذا لما شاف هالشوفة هي وانه الشيخ جاي لعنده وعم يقدم له مصاري وجزاك الله خيرا. قال له سيدي هيك بتعاملني انا هاللئيم قليل الاصل انا عم احكي عليك وانت هيك بتعاملني ؟ قال له يا ولدي كل منا خطاء. فإذا كان خطاء والله يغفر الا نغفر؟ فنتخلق بخلق الله ونحن منسامح. فما حمل نفسه طخ على اجرين الشيخ بدو يبوسها قال له عطيتني درس ما بنساه. هذا الحلم بيطيق الرجل هيك؟ نعم اذا كان عنده استعداد هيك لازم يكون. ربي يتقبل منا. عملنا نحن بيوم من الايام يا مختار؟ عملتها. بعد فضل الله ربي تفضل وتكرم وتجلى. كان بعض المشايخ غفر الله لنا وله حكم علي ّ بالكفر واباح دمي. وقال لهم يلي بيقتله بيدخل الجنة وأعطى انسان مال 25 الف ليرة واعطاه رشاش على ان يجي يقتل الشيخ. انا عرفتها بعدين انه شافوه بالسجن وعم يحكي بالسجن شو صار. واجا فات لعندي عالبيت بدو يقتل الشيخ. حضر الدرس. لما سمع قال هيدا حرام ينقتل. رجع رجع له المصاري قال له هيدا ما بقتله. انا بلغني. اخدت معي شيخ او 2 وواحد من الاخوان ورحنا لعنده . السلام عليكم. قلت له انت تدعو الى الله وانا ادعو الى الله. انت عالم وانا عالم. اذا شايفني انا كافر انا جاي جدد ديني على ايدك. اشهد ان لا اله الا الله واشهد ان محمدا رسول الله. جددت ديني. قلت له اذا فت علي خطأ ابعت وراي بجي لعندك براسي واحكيلي برجع عن خطأي. قال لي يكون ذلك.. تركنا ومشينا ونزلت عالدرس وقلت لهم كنا عند فلان وكذا ما صار شي. لكن والله يا ابني منظر يلي حواليه متل ما بيقولوا بيقطع الرزق. حواليه جماعة نسأل الله العفو والعافية وجوههم غضب وشكلهم غضب. بدن يقتلوني خلين يقتلوني شو فيا.. ما دام انا لوجه الله. فيا ابني الحلم . بتحسن تحلم على خصمك ؟ على عدوك؟ هذا يا ابني خلق من اخلاق (وَعِبَادُ الرَّحْمَٰنِ الَّذِينَ يَمْشُونَ عَلَى الْأَرْضِ هَوْنًا وَإِذَا خَاطَبَهُمُ الْجَاهِلُونَ قَالُوا سَلَامًا) الحلم يحتاج الى عقل. والله سمى الحلم بالعقل . قال تعالى: (أمْ تَأْمُرُهُمْ أَحْلَامُهُمْ بِهَذَا) الاحلام العقول . يعني عقولهم عم تأمرهم بهذا. السيارة بتمشي عالشعرة. واذا كان بيضات الدركسيون دايبين بدو يصير الدركسيون بدو يفتل نص فتلة ليمشي، لبين ما يفتل النص فتلة بيكون صار الحادث. فدائماً العقل يا ابني هو دركسيون الغضب. فإذا غضبت. اتى رجل للنبي ﷺ قال له انصحني نصيحة تدخلني الجنة. قال له : لا تغضب. لا تغضب. لا تغضب. قال فرجعت ففكرت كلام النبي لا تغضب قال فعلمت ان الغضب سبب كل هلاك .ولما النبي عم يقول لي لا تغضب معناتها بدو يبعدني عن كل هلاك. فيا ابني الحلم يكون واسع الصدر. وخدوا درس يا اخواني من رسول الله ﷺ اي درس بدنا ناخده من الرسول ﷺ كان من صفة الرسول ﷺ كان عظيم الحلم لا يقابل السيئة بسيئة. بل يعفو ويغفر. وما انتقم لنفسه في شيء قط ﷺ الا ان تنتهك حرمات الله. ولما شجّ في رأسه ﷺ في غزوة احد وانكسرت رباعيته. هيدول السنان اجا حجر عالشفة انشقت الشفة وانكسروا سنانه ودخل السهم في خده. ما كان يطلع حتى ابو عبيدة مسكه بسنانه وسحبه. بالسحبة بالطبع السهم له ناحيتين شق خد النبي ﷺ ومن شدة الطلعة انكسروا سنان ابو عبيدة. نتشهم من خد النبي ﷺ . فخد النبي واحدة وشق الشفتين وانكسروا سنان النبي وانفج. قالوا له ادعي على قومك. فقال ان الله ارسلني رحمة ولم يرسلني هلاكاً. انا بدي ادعي على قومي؟ ﷺ ثم دعا فقال اللهم اهدِ قومي فانهم لا يعلمون. يعني ما عرفوا مقامي عندك ولا عرفوا منزلتي في النبوة. فلذلك اهديهم يا رب. في رواية اللهم اغفر لقومي فإنهم لا يعلمون. انما بعثتُ رحمة ولم ابعث لعاناً. ﷺ هيدي في اشد الحالات بماذا قابل؟ ما قابل قومه بالدعاء. ولا تظنوا ان نبياً يدعو من نفسه. سيدنا نوح ما دعا على قومه انتصارا لنفسه لا. لكنّ الله انزل عليه قوله (أَنَّهُ لَنْ يُؤْمِنَ مِنْ قَوْمِكَ إِلا مَنْ قَدْ آمَنَ) ما عاد في حدا يآمن. يعني اصلاب الرجال صارت عقيمة وارحام النساء عقيمة ممن يؤمن. ما بقا في. لذلك قال (لَا تَذَرْ عَلَى الْأَرْضِ مِنَالْكَافِرِينَ دَيَّارًا * إِنَّكَ إِن تَذَرْهُمْ يُضِلُّوا عِبَادَكَ وَلَا يَلِدُوا إِلَّا فَاجِرًا كَفَّارًا ) هل علم بالغيب؟ لا . الله تعالى قال له. انزل عليه. دعا عليهم لما الله تعالى اذن له انه ما عاد فيهم خير. مع هذا عندما يأتي اليه الخلق يوم القيامة للشفاعة يقول لهم: الله اعطى كل نبي دعوة وانا دعوتي دعيت بها على قومي. ما بقى الي دعوة ادعي فيها. اما نبينا ﷺ قال: ان الله اعطى كل نبي دعوة مستجابة. فتعجّل كل نبي دعوته. واما نبينا قال: وادخرتُ دعوتي شفاعتي لأمتي يوم القيامة. ﷺ ما دعا في الدنيا بشيء له خبالنا ياها ليدعيلنا فيها بالشفاعة. مشان هيك لما بيسجد بين يدي الله يوم القيامة قول له الله ﷻ له ارفع رأسك واشفع تشفع. ما اجمل هالخلق المحمدي يا ابني. لذلك ما خُلِق ولم يخلق منذ خلقت الدنيا والى قيام الساعة مثل خلق رسول الله ﷺ. اكمل الناس خلقاً. فهي خلق من اخلاق النبي ﷺ. تكسروا سنانه ما حكا. لكن في غزوة الخندق لما شغلوه عن صلاة العصر عن الدين قال شغلونا عن الصلاة الوسطى ملأ الله قبورهم نارا. مشان الدين دعا عليهم اما مشان حياته ما دعا على حدن. ﷺ غضب لله ما غضب لنفسه ولا لذاته. اذاً الحلم صفة من صفات الانبياء والاولياء وهي صفة من صفات الله تعالى. الحلم فضيلة بين رذيلتين. يعني بين ناقصتين ينبت الكمال من الزبل بيطلع الفل والياسمين. الرذيلتين: الغضب والبلادة. يا بيكون نزء غضوب كتير او بيكون بليد ما بيتحرك. بتنعره خمسين نعرة ما بيحكي. هيدا شو هوي بليد. سبوه ما حكا سب دينه ما حكا.. هيا بليد. والبلادة صفة من صفات الحمير. فعندنا الغضب . هذا نزاءة وعندنا البلادة. هي رذيلة وهي رذيلة. فاذا استجاب المرء لغضبه ذهب العقل والبصر. متى غضب ما عاد يوعى ولا عاد يشوف قدامه. انا بعرف بعض الاحباب الله يرضا عنهم ويعافيهم كان اذا غضب ما يخلي اطرميز بالبيت ما يكسره. اطرميز المكدوس والسكر والرز والزيتون كله فوق بعضه يكسّر. لما يروق يقول الله يلعن الشيطان. كله صار بدو كب. روح بقى اشتري مرة تانية مونة واطرميزات وغراض. ليش هالغضب؟ غضب . طيب اذا غضب ولا بد لو عض على شفته بيقطعها من شدة غضبه. لذلك منقول له حط محرمة وكز عليها حتى ما يقطع لسانه. ما عم يخلي شي بالبيت. الفرشات شرطتن وكبن والاطرميزات كسرهن والسكر كبهن. طب شو هالغضب هاد قال غضب. هي رئيلة يا ابني. والتانية على مذهب قصة حكالنا ياها شيخنا. واحد قال بدو يساوي حاله حليم طويل بال. اجا واحد فات عالبيت نفضه كفين وقفه على جنب فات عالاوضة لعند مرته. وسكر الباب. هذا قعد سمع بعض الحركات اي يمكن عم يركزوا الكنبايات. بدو يحلم. بعدين سمع اكتر من هيك.. يمكن كذا. يفز بدو يطرق.. يمكن يمكن.. سمع حركات بعدين صار في ريبة واشكال الوان.. انتهى الامر وخلص وهو لساته يمكن ويمكن بدو يحلم. هذا شو هوي هادا حمار. بليد. ما في دم. شو بدها ليجي الولد نستنى يمكن.. هي بلادة وهذه رئيلة . فبين الغضب وبين البلادة ينشأ خلق الحلم. خلق الحلم عندما ينشأ يحلم مع القدرة. اذا وجدت يك القدرة فهذا الحلم. اذا في ضعف هذا ما اسمه حليم هذا بليد. مع انه النبي ﷺ قال: قاتل دون مالك قاتل دون اهلك. قاتل. قاعد هيدا يلا ياخد حريته 5 دقايق. معليش.. يخرب بيته على هذا الدم. هذا يقال عنه بليد لا في نخوة ولا شرف.. الحلم على من يستحق الحلم. ليس الحلم على كل الخلق يا ابني. اذا حلمت عليه بيأدب نفسه وبيتوب وبيرجع اما اذا الحلم بدو يزيده ما اسمه حلم. كلما طولت بالك عليه كلما دندل اجريه اكتر كلماله عم يتعدى وانت عم تحلم. هذا يا ابني ما بيستحق الحلم. هيدا انفضه بعصايتين تلاتة بيبرك. لئيم ما بيجي الا بالضرب. فلذلك الحلم على من يستحق الحلم. متل لما راح لعنده عالم الشيخ بدر الدين لما عطاه وشاف الحلم ركض ع اجرين الشيخ بدو يبوسن. اللئيم لا يكون الانسان معه حليما. اللئيم بدو كفين وبدو عصاية فوق منها بتشوفه خنس وبرك. دخيلك. اي من الاول شايف حاله لسا عم يضرب جواز ويعنفز ويسب.. صبرنا مرة ومرتين وتلاتة . لذلك يا ابني الله ﷻ انزل القرآن كامل (وَلَمَن صَبَرَ وَغَفَرَ إِنَّ ذَٰلِكَ لَمِنْ عَزْمِ الْأُمُورِ ) طيب صبر وغفر لكنه ما ارتدع ولا ترك قال وجزاء سيئة سيئة مثلها اذا بدو يضل عهالسيئة قوم انفضه عصايتين تلاتة. الحلم على من استحق الحلم هيدا اسمه فضيلة. اما انسان لئيم غليظ جاف الطبع لا يطيع لا ينقاد لا يسمع بده انانيته. هذا ما بيصير تحلم عليه. فالواحد بيفهم معناة الحلم يحطها واطية لكل الناس. لا يا ابني. منحلم مرتين وتلاتة واربع وخمسة. اذا كرماله عم يتعدى شو بيكون لئيم. بدو جزاء سيئة سيئة مثلها. ومنقول لك الله يعطيك العافية بس بمثلها وحدة بوحدة عصايتين تلاتة كرباجين على بدنه هالعنفظة كلها شو بيصير بينخ. دخيلك مشان الله. فما اجمل يا ابني الحلم مع العلم. هلق انتم عم تتعلموا. فلازم يكون الحلم معنا صفة من الصفات. ﷺ اتى اليه كذلك اعرابي بدوي. لا عرفان العلم ولا عرفان النبوة ولا الرسالة. النبي ماشي. فهجم عالنبي ﷺ وامسكه من تلابيبه وفتل ايدتينه لح يخنق النبي ﷺ وصار يهز النبي ويقول له اعطني من مال الله هالجملين حمّلني ياهن. ليس المال مالك ولا مال ابيك. المال يلي معك لا الك ولا ل ابوك. حملني هالجملين. يا سبحان الله جملين بدو يحملوا ياهن. على مستوى هالزمان هلق صار. كان الفقير من اول يطلب 5 ورقات. الفقير يعني بحاجة يطلب له رغيف خبز. هلق بيقبل 5 ورقات ؟ بدو 50. واذا كان الك عندو دين بيعمل حاله 50 عنتر عليك. لك يا ابني حلال. . بيقول له ببوس ايدك حقي. 50 عنتر بيعمل. فهيدا فبيقول له اعطيني من مال الله. فقال النبي ﷺ لا لا استغفر الله لا مالي ولا مال ابي. المال مال الله وانا عبده . لا واستغفر الله. لا احملك يعني ما بحملك الا ان تقيدني. بدي اخد حقي منك متل ما سحبتني هالسحبة بدي اسحبك متلها وحدة بوحدة. قال له تحمل لي ولا تقتص لنفسك. انت تمسكني هالمسكة ما بخليك وبدك تحملني. قال له هذا حقي. قال له لا ما بمكنك. قال له النبي ﷺ لم ؟ قال له لانك لا تعامل السيء بالسيء انت معروف عنك لا تقابل السيئة بالسيئة . فضحك النبي ﷺ والتفت لعمر قال ياعمر احمل له على بعيريه. بعير شعير والبعير التاني تمر. حمله ياهن. مع انه هذا ابني لو واحد بدو يعملها مع الشيخ شو بتعملوا متل قش الدبابير بتهجموا عليه بدكن تسلخوا رقبته لا ابني احلم. بتتذكروا لما كنا بالدرس اجا واحد مسكني وما عدت حسنت اتحرك. والله يجزيه الخير يعني.. قال لي : استغفر الله. استغفر الله. اطّلع يظهر على حالي شافني مذنب او خطاء او أخطأت. استغفر الله. الاخوان فزوا. ومشيت شو صار.. قال له ما بيصير تاخد حقك. لانك لا تكافئ السيئة بالسيئة. حمل له ومشي. اذا هي اخلاق النبوة. من حلم النبي ﷺ خلينا ناخد 10 بالمية ما عم قولكن 40 - 50 - 60. طوّل بالك 5 دقايق. بعدين بيصيروا 7 دقايق بعدين صاروا 10 دقايق. بعدين خلص فترت وبيمشي الحال. وخاصة لما يكون بالبيت. والله يا ابني النساء الله يرضا علينا وعليهم جميعاً لكن والله بعض اوقات يا ابني المرأة بالبيت بتخلي ما الانسان يغضب بتخلي احسن راس يصير بالسقف. من كلام ومن .. ايه احلم .. طول بالك بدنا نمشّي القافلة يا ابني. ما بدنا نقعد نتخانق وكل يوم حردة وكل يوم بيت اهلها ودخيلكن جيبولنا ياها من الاول طول بالك وما تلخليا تطلع. ما بيصير هيك. بيصير الانسان بعض الاوقات في حالة غضب. لذلك خلينا ناخد ولو 10 بالمية من سيدنا رسول الله ﷺ فهالحلم يلي نحن عم نحكي عليه في 3 انواع من الحلم. شوفو انتو اي نوع بتحبوا تاخدو. الحلم على ثلاثة. حلم العام يعني العوام وهو العفو عن الجاني مع اضمار الغضب باطنا. عفا عنه ظاهرا لكن قلبه غضبان. عفا عنه لكن القلب معبى غضب عليه قلبه عم يغلي هيدا حلم العوام. وحلم الخواص. وهم العلماء وهو العفو عن الجاني مع اضمار الخير له باطناً. عفا وعم يضمر له الخير سامحه وان شاء الله بكرا بدي اعزمه عالغدا بكرا ان شاء الله بدي اعطيه هدية. هي صفة من صفات العلماء. وخواص الخواص وهم اولياء الله وعباد الله هو العفو عن الجاني مقروناً بالبر والاحسان اليه. عفا عنه واحسن اليه. كما فعل مين؟ سيدنا رسول الله ﷺ وكما فعل سيدنا الشيخ بدر الدين (رضي الله عنه وارضاه) عفا مع البر والاحسان. هي كمال الكمال. هذا الكمال الذي اتصف فيه اولياء الله. اخذوه من كتاب الله تعالى (وَإِذَا خَاطَبَهُمُ الْجَاهِلُونَ قَالُوا سَلَامًا( وهذا الحلم ان تحلم على من عندك. الحلم مثلاً معلم عنده اجرا مفتش تحت ايده عمال موظفين. انت بالحلقة عندك احباب بالحلقة 30- 40 -50 واحد بالحلقة هيدا طلعت منه ناقصة زاحلة.. بدك تحلم على من حولك ولا تظن الحلم بس انه صبرنا عليه. لذلك اتى الى النبي ﷺ وفد مأسلمين. لما وصلوا الى المسجد تركوا جمالهم وحمالهم وتركوا الكل وبأواعيهم الوسخة ركضوا على النبي ﷺ بدن يسلموا عليه. اميرهم اكبر واحد فيهم يلي هو امير الرحلة كلها ما طلع خلقه عقل الجمال ونزل الحمال واتغسل ولبس اواعي بيض وراح عند النبي عم يمشي على مهله النبي قاعد ما لح يهرب هوليك دحشوا حالن فيه وريحة العرق واصلة للسما. فلما اتى الى النبي ﷺ النبي عم يطلع فيه ابتسم وقال فيك خصلتان يحبهما الله ورسوله. قال يا رسول الله اتخلقت بهما ام فطرني الله عليهما؟ قال بل فطرك الله عليهما. الله يلي خلقهم فيك. فطرة. فقال الحمد لله الذي فطرني على خلقين يحبهما الله ورسوله. بس شو هني هالخلقين يا رسول الله؟ قال له : الاناة والحلم. تأنيت بالمجيء عند النبي ﷺ حتى اغتسلت وحتى لبست اواعيك النضاف هيك لازم يجي المريد متوضئ نضيف و باواعي جيدة. هي الاناة من الله قال له والحلم. ما غضبت على جماعتك. وينكن تركتو جمالكم قبل الكل نزلوا حمالكن. فانت حلمت عنهم كلهم وصفة الحلم من الله وكذلك صفة الاناة من الله فطرك الله عليهما. ما قال لهم وين تركتو حمالكن انا زعيمكم بشتغل خادم الكن؟ لا يا ابني. سيد الرجال من خدم الرجال. وقال النبي ﷺ ويح خادم القوم هو سيد اهل الدنيا والآخرة. هيك يا ابني تخلقوا بهالخلق مع الاحباب بيطلع منهم بعض النقائص والرذائل.. في بعض اخواتنا الله يسامحهم بيكون عندها حلقة واحدة اخطئت حاربوها لا تحاربوها بتحط القعدة بوجها بتقلعها. اي طيب اخطئت شو بدها ياها ملك. اي انت مانك ملك حتى تصير ملك. انت خطاءة فبتعاملها بالقسوة والشدة. ليس هذه صفة الدعاة يا ابني . صفة الدعاة الحلم طويل بال صبور. وكان من اعظم الحلماء يلي التاريخ سجلهم. سجل التاريخ عدة حلماء كان من اعظمهم قيس بن عاصم ضُرب به المثل بحلمه. هذا ما نبي ولا ولي لكن تخلق بخلق الحلم. كان قاعد محتبي الحبوة بيرفع اجرتينه بيحط ايدتينه على اجرتينه. قاعد والجماعة قاعدين حواليه. وهو قاعد واذ ضجة جاية. فأجوا فاتوا لعنده. واحد مكتف وواحد مقتول. جايبين 2. المقتول ابن قيس يلي قاعد ومحتبي. والقاتل اخو قيس. اخوه قتل ابنه. قالوا له هذا اخوك قتل ابنك. قال والله ما حل حبوته. لساته على حبوته. والتفت الى ابنه يلي قاعد قال له قوم فك وثاق ابن عمك وخود 100 جمل لام الولد. لان هي غريبة. ديته 100 جمل. والتفت الى اخوه قال له قتلت قرييبك هذا سندك وقطعت رحمك. الكل صار بدن ينظرولك نظرة انسان قاتل. ما بقا في حب الك . واقللت عددك. لا يبعد الله غيرك. يعني ان شاء الله ما بتصير هالحالة على ايد غيرك. واحد انقتل ابنه ما فك الحبوة تبعه. حلماً وخدولها 100 جمل وانت قطعت رحمك وقتلت قريبك.. هيدا الحلم يا ابني. لذلك يلي بدو ياخد ياخد حديث النبي قال ﷺ: هذا الحديث رواه سيدنا الحسن ابن سيدنا علي. قال " اذا جمع الله الخلائق يوم القيامة نادى منادٍ أين اهل الفضل؟ فيقوم ناس وهم يسير قلال. فينطلقون سراعاً الى الجنة. من غير وقفة ركضة واحدة عالجنة. فتتلقاهم الملائكة فتقول لهم انا نراكم سراعاً الى الجنة وين راكضين دغري عالجنة يعني لسا لا صار ميزان ولا حساب وين دغري؟ فيقولون نحن اهل الفضل. فيقولون لهم الملائكة ما كان فضلكم ؟ فيقولون كنا اذا ظُلمنا صبرنا واذا أسيء الينا عفونا. واذا جُهِل علينا حلمنا. عند جهل الجاهل نحلم نصبر. فيقال لهم : ادخلوا الجنة فنعم اجر العاملين. كم صفة اتصفوا فيها ؟ ثلاث. فشو رأيكم بهالاخلاق. اذا ظلمنا ظلموك ما عطوك حقك ما عطوك كرامتك ما دللوك. شو بتعمل. اذا ظلمنا صبرنا. ويلي بيصبر يا ابني عالعجرة شو بياكلها مستوية. ويلي بيصبر عالقرعون بياكلها مشمش. اصبر مرة مرتين تلاتة الله بيلهمهم بيعطوك اد الكل وبيرفعوك اكتر من الكل. الله يرزقنا الفهم عن الله ﷻ. اما عن ابوك بتعفي عنه اذا اساء الك؟ انت بدك تطلب العفو منه ولو اساء الك ولو ضربك. الله يخلقنا باخلاق الايمان. انا هيك ربتني والدتي رحمة الله عليها. كان والدي لما يغضب انا بحياتي ما اكلت الا كف واحد من والدي واكلته ظلماً .. غفر الله له. عم روح عند الشيخ واتعلم قال لي شو تعلمت. عم بقرأ تجويد قال لي قول الله اكبر لشوف. شلون بتبدا بالصلاة بترفع ايدك الله اكبر. ما هيك . الله اكبر . ضربني كف. وكان الكف الوحيد. قلت له شلون. قال الله اكبررر. قلت الله اكبررر. قال اي هيك. واذا اسيء الينا ما عفونا هون كتر خيره انه صحاني. مشان ما انه الله اكبر اذا ما بيتنها بتطلع اكبا .. باطلة الصلاة. لذلك من غير كف ههه الله اكبرر.. اذا ظلمنا صبرنا واذا اسيء الينا عفونا واذا جهل علينا حلمنا. والجاهل ما بيعرف وبيقولوا يلي ما بيعرفك بيجهلك. واحد شافنا بالطريق شيخ شيخ تعا لقولك تعا.. ايه جيت السلام عليكم امر. قال لي انتو المشايخ ما نفعانين. ليش ما نفعنانين؟ قال لي انتو شغلتكن بطونكم. بس عبي بطنك. قلت له والله اذا كان بعبيه مشان يتقوى على طاعة الله. قال لي انتو صحاب سلتي. قلت له اي كتر خيرك غيره عايز شي؟ قال لا. قلت له طيب سلام عليكم. قال لي ما زعلت؟ قلت له لا قال لي انا قصداً عملتها معك. قصداً؟ ايه سامحك الله. قال لي والله طلعت متل ما بدي. ايه الحمد لله يلي طلعنا متل ما بدك. فشوفوا شلون .. شيخ شيخ تعا لهون.. هيك بينادو؟ لو انا بدي عامله معاملة المشايخ شو بقول له؟ قليل ادب ما هيك لازم نقوله ؟ بدك شي انت بتجي لعندي انا ما بجي لعندك. انا جيت لعندو واتهم وحكا.. قال واحد اشترطو مين بيحسن يغضب معاوية كان شديد الحلم. واحد قال لهم انا . اجا لقدام مسك لجام الفرس تبع معاوية قال له حابب اسالك سؤال سأله جاوب معاوية. قال له بس يا امير المؤمنين كل شي عرفناه بس جناب الوالدة منين ما عرفنا امك منين. امه كان سبية وابوها وطأها واجا معاوية. قال له على الخيبر سقطت. وابي بات معها فأتيت انا. قال له من هيك. وركك متل ورك امك عريض. قال له: لهذا احبها ابو سفيان. قال له اذا كان حاطينلك جحر مشان تغضبني روح خود الرهن.. ما بغضب. يا سلام ما احلا الحلم يا ابني اللهم خلقنا باخلاق رسول الله ﷺ اللهم ادبنا بآداب رسول الله اللهم اجعلنا من اهل الحلم في الدنيا اللهم كما عاملتنا بالحلم فخلقنا بالحلم. وصلى اللهم على سيدنا محمد والحمد لله رب العالمين.