اذاً كل المجموعة كم واحد طلع منها؟ طلع منها واحد. الله وهالواحد شايف حاله؟ لو ما فني عن وجوده ما بيصير بهالحال بدك تفنى عن كل وجودك. المعطي الله والمتفضل الله والله يا ابني ما في ولا ذرة اوعى تفكر حالك بذكرك او بعلمك والله يا ابني ولا ذرة النبي سيد الخلق قال اللهم لا يأتي بالحسنات الا انت ولا يدفع السيئات الا انت ولا حول ولا قوة الا بالله العلي العظيم اللهم انت الأول فليس قبلك شيء وانت الاخر فليس بعدك شيء وانت الظاهر فليس فوقك شيء وانت الباطن فليس دونك شيء هذا من دعاء النبي ﷺ لذلك يا ابني لا تحب المدح ولا تحب الثناء عليك كما ان اذا صار معك شي من الأحوال اوعى تنعجب بحالك الله عطاك الله تفضل عليّ بيفكر حاله انه عم يمدح انه الله تفضل عليّ النفس تدخل هنا يا ابني الله اعطاني الله تفضل علي يعني انا صرت منيح نفسك عم تذكر مفكر حالك عم تمدح الله انه الله اعطاني اوعكن يا ابني شغلة النفس لا يكشفها الا يلي عنده ميكروسكوب يكشف النفس ومداخلها ووساوسها وما هلك من هلك الا من النفس. لذلك الله قال: (ان النفس لأمّارة بالسوء الا من رحم ربي) لكن امارة كل اهل الله يخافون من النفس الامّارة. لازم ننبه المريدين من النفس لان النفس تأتي وانت مفكر حالك صالح وعم تصلي وتصوم تقول اللهم لولا انت ما اهتدينا ولا تصدقنا ولا صلينا فأنزل السكينة علينا وثبت الاقدام إن لقينا. اذا كان النبي يقول لولا انت هل انت تقول انا وانا؟ لذلك واجب على المريد ان يكتم احواله في كل حال على حال الذكر حال التلاوة حال الصلاة حال الحج صار معك خليك مخبى ما بيجوز اظهار الحال الا في حالة واحدة. المربي أراد ان يربي الاخوان او يدخل السرور على قلوبهم بالله فيقول بالله حصل كذا وكذا حتى يخلي الاخوان يشدوا همتهم بالله لا لنفس ولا لشوفة حال بل لله وحده. في هذه الحالة فقط يصح وخاصة للشيوخ اذا قالوا لا يقولون مع نفس. كل حال اذاً يذكره المريد لاخوانه او لغير شيخه يفقد هذا الحال ويسلب هذا الحال منه سلوا الله ان يرزقني واياكم الإخلاص. الإخلاص سر من سر الله بين العبد وبين ربه لا يعلمه مَلَكٌ فيكتبه ولا يطّلع عليه شيطان فيفسده. الملك ما بيعرف الإخلاص بده يكتب شو بيكتب بالاخلاص؟ ورد في بعض الاخبار ان ملكاً من الملائكة طار الى الله فقال يا رب ان عبدك فلاناً يعمل اعمالاً لا ادري ما هي أرى نورا يهبط عليه ونورا يصعد منه شو بده يكتب مني عرفان في نور ينزل ونور يصعد فقال الله تعالى اكتب ما ترى من عبدي فاذا اتاني عبدي جازيته بما عمل. نور عم ينزل انوار التجلي نور الذكر يطلع عم يذكر الله بقلبه الملك ما بيكتب الا يلي بتتحرك فيه الشفاه كل شيء تتحرك فيه الشفاه يكتبه الملك اما اذا ما تحركت الشفاه ذكر القلب لذلك قال ﷺ: الذكر الذي لا تسمعه الحفظة يزيد على الذكر الذي تسمعه الحفظة بسبعين ضعفاً. هذا كلام النبي ﷺ عم تذكر بالقلب الملك ما عم يكتب. الله قال (ما يلفظ من قول الا لديه رقيب عتيد) عم يسجل عليه اما ذكر القلب الملك لا يسجله. انوار تنزل وانوار تطلع شو بدي اكتب؟ اكتب يلي شايفه هذا الذكر. وفي حديث قال ﷺ: خير الذكر الخفي وخير الرزق ما يكفي. الإخلاص في الاقوال والاعمال والاحوال. ذكر الاقوال اذا بدك تعلم ان يكون لله بدك تعلم لله مش مشان يقولوا ما شاء الله حوله شو هالدرس هيدا كله ما له قيمة. لو كلكم مدحتم وما قبل العمل شو الفائدة؟ الله يرزقنا الإخلاص وقبول الاعمال يا ابني المراد قبول العمل يا ابني فلذلك لا تفكروا بالمدح ولا تفكروا بالثناء خلينا نسأل الله تعالى ان يتقبل منا. فلو مدحك اهل الأرض ولم يقبل منك ما بتسوى شي ولو ما حدن مدح والله قبل فانت من اهل الكرامة عند الله سبحانه وتعالى. فلذلك الإخلاص أولا في اعمالنا هي حالة الإخلاص لازم كل مريد يبذل جهده عليها اذا عملت فلا تذكر لأحد وان مُدحت فإياك ان تفتخر بمدح وان ذمك احد فلا تتأثر بذم. الإخلاص ان لا تفرح لمدح ولا تحزن لذم. هذا الإخلاص. والإخلاص اذا اخلص الانسان لله أربعين صباحاً قال مكحول رضي الله عنه مكحول كان امام التابعين، التابعين بعد الصحابة قال مكحول هذا الحديث اكثر اهل التصوف يعتبرونه حديث عن النبي ﷺ هو قول مكحول من التابعين. قال رضي الله عنه وارضاه: من أخلص لله أربعين صباحاً او أربعين يوماً ظهرت ينابيع الحكمة من قلبه على لسانه بالاخلاص يتفجر من القلب الحكم يتفجر من القلب العلوم بالاخلاص لما يريد الله. ما بدي طوّل الإخلاص عليكم اذكروا الله لله. صلوا لله اقرؤوا لله قراءة القرآن الصلاة الذكر لله. يعني لا تطلب مدحا من احد ولا ثناء من احد ولا اجراً من احد ولا الأجر من الله. بدك تذكر ليس لأجل الاجر ما مشان يعطيك الثواب بدنا نذكره حباً فيه بدك تحب الله من حبه بتذكره اما مشان الله ينور القلب مشان الله يفتح عليّ مشان طيب واذا ما فتح عليك ما بتذكر الله انت يا ابني عبد الفتح ما عبد الفتاح انت عبد العطاء ما عبد المعطي فالذاكر يا ابني لله اعطى ما اعطى لو قسى قلبك تبقى على باب الله ذاكر لانه ورد الله تعالى يقول يا جبريل صلى الله عليك يا رسول الله، ﷺ امرنا اذا واحد نعس بمحل يغيّر المحل نام هون يقوم من هون لمكان تاني يضل يقوم من هنا لهنا يصحى اما طول منا قاعدين غفي محله متى ما سهي راحت عليه يقول الله تعالى: يا جبريل انسخ الحلاوة من قلب عبدي حلاوة الايمان انسخها من قلب عبدي الله اكبر نسأل الله السلامة واحد عايش لذة ونعيم انقطعت عنه اللذة شو صار بده وين صفي؟ واحد قاعد بلذة بطرب راحت منه قديش بيصير حياته الام واوجاع قديش بيصير في تعب انسخ الحلاوة من قلب عبدي قال فيصبح العبد ولهاناً الولهان عطشان وما في عنده نقطة مي نقطة مي دخيلكن لح تطلع روحي نقطة مي هذا الولهان. الولهان بده لحسة طرب شوية انس مع الله انسخ الحلاوة من قلب العبد فيصبح العبد ولهاناً طيب ولهان شو بده فإن كان يريد الله لم يطلب غيره بده الله قطع عنه الماء يقول ها انا على بابك خليني موت على بابك عطشان ولا ادق باب غيرك. عطشان موت عالباب وانا عطشان ولا ادق باب غيرك أقول لهم اسقوني نقطة مي. الفضل من عندك والفتح من عندك الكرم من عندك قاعد. ما غيّر حاله ما غيّر ذكره ما غيّر توجهه هو مع الله فيقول الله تعالى يا جبريل كيف رأيت عبدي؟ قطعنا عنه الامداد قطعنا عنه الحال شلون رأيته؟ فيقول جبريل يا رب رأيته خير عبد ما تغير عبدك في حال. ما في شي منعه قاعد عالباب لسا عم يذكر ما قطع؟ ما قطع ما انشغل بغيرنا؟ ما انشغل . فيقول يا جبريل رد الى عبدي ما نسخت من قلبه فإني رأيته عبدي حقا بده ياني خالصا ما بده يشوف غيري. هذا يا ابني المحب اما يلي بيحب العطاء ما بيحب المعطي يعطيه اول مرة لكن تاني مرة لا يعطيه. لان هذا يأتي للعطاء لا يأتي للمعطي فلذلك الإخلاص يا ابني بدنا الله تذكر الله لله ليش عم تذكر الله؟ شو الأحوال شو الانوار شو المقامات لا انوار ولا مقامات انا بدي الله الله بدك الله؟ والله الطلب غالي بدي الله بدك الله؟ يفقرك بدي الله يبتليك بده الله يسلط عليه ما انشغل لا بلاء ولا فقر ولا ابتلاء بده الله اكشف عنه كل هذه الأمور وتقرب اليّ هذا المخلص لله. اما صار معه شوية واحد خكى عليه تخربط واحد اذاه انقلب قسي قلبه ترك الذكر هذا ليس عبد الله يا ابني. بدكن تصيروا عبيد لله يا اخواني هذه الجلسة صرتوا كلكم مسؤولين عليها بين يدي الله هذه الجلسة ما كل مرة بتصير ويلي لا ينتفع معناتها لا بده ايمانه ولا بده دينه هذه الجلسة يا ابني بدكن تنتبهوا ما يكون للنفس حظ وتكون دائما بدك الله الله. في الحال والترحال في السفر والحضر في القيام في المنام في الطعام في الشراب الله هو الأول والآخر والظاهر والباطن بدنا الله. فلا نريد أحوال ولا انوار ولا تجليات ولا انس لا بدنا قرب.. بدنا الله شو معنى بدنا الله؟ يعني بدنا اعمالنا كلها تكون خالصة لله بدك تحكي يكون قصدك بالحكي الله ناوي دل العباد على الله ناوي ذكّر العباد بالله ما لي حظ نفس. اذا الله اعطى اعطى ما اعطى بضب كتابي برجع على بيتي. الفتح من فضله والعطاء من فضله وانا والله يا اخواني يلي عم بحكيه والله ماني مأمن منه ولا كلمة. طول الطريق بفكر شو بدي احكي والله ولا كلمة. لما آتي الى هنا الله ببركة قلوبكم عم يفتح نحكي بما يتفضل الله به علينا. الفضل فضله والجود جوده والتعليم من كرمه قلوب بدها وصول الله يعطيها نفوس عم تلعب الله يداويها قاعدين بمستشفى مداواة للنفوس وتوجيه بفضل الله وبكرم الله عز وجل. لنجيب معنى الإخلاص اذا جماعة راكبين بالبحر راكبين شختورة بالبحر اعتماد يلي راكبين بالبحر على مين؟ يلي راكب بالشختورة ايمانه على القبطان عالملاّح على ربان السفينة. اوعى هاه دخيلك انتبه فاذا طلع الهواء وهاجت السفينة وين بيصير ايمانه؟ يلتجئ الى الله يقول يا الله ما بقا يقول له اوعى لانه هو ما بقا يطلع بيده يمسك الدفة صار الدفة بفضله يلتجئ الى الله هذا الإخلاص. الاخلاص ان تلتجئ لمن بيده القدرة وتنسى الكل يلي من دونه. وسط بحر؟ الدنيا كلها بحر.. بحر الهوى وبحر الشهوات وبحر النفوس وبحر المال بحور وكلها أمواج فاذا كنت بهذه الباخرة خلي اعتمادك على الله هذا الإخلاص. فهمتوا عليّ؟ راكبين بالباخرة بالبحر اعتمادنا على مين كله يكون؟ على القبطان قاعد حاطت قدامه الرادار يطلع في صخور ما في صخور يكشف كل يلي حواليه طيب لكن لما يطلع الريح وبتصير السفينة بالبحر متل الريشة تتقلب يمين وشمال كل الركاب ماذا يقولون؟ يا الله يا الله.. (حَتَّىٰ إِذَا كُنتُمْ فِي الْفُلْكِ وَجَرَيْنَ بِهِم بِرِيحٍ طَيِّبَةٍ وَفَرِحُوا بِهَا جَاءَتْهَا رِيحٌ عَاصِفٌ وَجَاءَهُمُ الْمَوْجُ مِن كُلِّ مَكَانٍ وَظَنُّوا أَنَّهُمْ أُحِيطَ بِهِمْ ۙ دَعَوُا اللَّهَ مُخْلِصِينَ لَهُ الدِّينَ لَئِنْ أَنجَيْتَنَا مِنْ هَٰذِهِ لَنَكُونَنَّ مِنَ الشَّاكِرِينَ) فاذا انقلبت كلهم يلتجئون الى الله بالاول اوعى الربّان لما تقع كلنا نلتجئ الى الله عز وجل هذا علامة الإخلاص. فاذا كنت بكل واحدة تسأل الله انت مخلص. اما اذا تعتمد على فلان وفلان وفلان وتنسى الله وقال ذاكر لله والله ما عرف من الذكر شيء لسا. هلق المريض لما يروح لعند الطبيب وين حاطت ثقته كلها؟ بالطبيب. يقول له دخيلك يا دكتور دخيلك. قل له انا وياك نقول دخيل الله نلتجئ الى الله انا وياك نقول دخيل الله
قل دخيلك يا الله الله يضع لك الشفاء اما معتمد عليّ والله انا ما بيدي الشفاء لك. انا اكتر شي بنفخ البالون لأوسع لك هالشريان اما يلي يجري الدم من؟ الله يجري الدم. فلو نفخه واجت جلطة سدت النفخة شو بيعمل فيها يعني؟ قل له يا الله. انا واياك نلتجئ الى الله فالمريض والطبيب وصاحب الحاجة نلتجئ كلنا الى الله في كل الأحوال هذا الإخلاص الى الله عز وجل حتى الله يكرمك ويعطيك في ايمانك قبل دنياك. الايمان اذا صار في اخلاص الدنيا تصبح كلها ذليلة لك. اخلص العمل تاخد اجرة ما فيها شيء اخد اجرة وهو مخلص لله. ما بيشتغل لله؟ ما تظنوا انه اشتغل لله معناها ما بياخد اجرة. نبينا ﷺ يا ابني انتبهوا على هذا الحديث نهى عن إجرة الحجّام. الحجام الذي يسحب الدم للحجامة نهى ان نعطيه اجرة لكن النبي لما احتجم دفع للحجام أعطاه الثمن واعطاه أغراض كيف نهى وكيف أعطاه؟ ﷺ ليعرّف الشغل لما يكون لله تاخد اجرة عليه. الأجرة خاصة لغير لله. لله نيتك ان يكون العمل خالصاً لوجه الله بتاخد اجرة عليه. اما في ناس بيفهموا انه لله انه ما بياخد اجرة يا ابني خود اجرة هي الأجرة ما دخلت في الإخلاص لله. الإخلاص لله نية ما ترك للمال هذا لازم تصححوا هذه المفاهيم. هذا المفهوم خطأ بده يشتغل لله اجا المريض لعنده فحصه داواه مع السلامة اجا المريض التاني فحصه مع السلامة خود دكتور لا لا لله عم نشتغل لله ما شاء الله عشية شو بدك تتعشى؟ نام تعشى هوا. هذا جهل. فلا تظنوا يا ابني الإخلاص انه يمنع الأجرة او يمنع الانسان العمل الإخلاص هذا حال بقلبك تتوجه الى الله. اما حالة الدنيا مال تاخد اشتغل يأخذ الأجرة كاملة. حبيت تراعيه راعيه اما ما مناخد اجرة؟ عم يشتغل لله. هذا اكتر إخواننا الله يرضا عنهم أطباء نبعت لعندهم مرضى الشيخ بعته ما باخد منه اجرة. هذا خطأ خد منه بعتلك ياه تاخد اجرة متل الغريب لكن انصحه واخلص معه واطلب الله الله يحط الشفاء على يدك. هذا الإخلاص يا ابني يلي اكتر الناس يخطئون فيه. ما هيك فهمانين؟ انه اذا بدنا نشتغل لله ما مناخد اجرة خليه لله. انا عم علّم. لح اعطيكن درس الله يجعلها خالصة لله، لما الأخ بيجيب لي كاسة مي او كاسة نسكافيه هل اشربها او لا اشربها؟ اشربها هذه دخلت بالاخلاص تمنع الإخلاص؟ لا يا ابني. واحد جاب لي مسبحة هدية انت لله تشتغل. لله الله يبعت الهدية شايف الكل منه اما مشان الدين ترك الدنيا النبي قال: ليس بخيركم من ترك دنياه لآخرته ولا من ترك آخرته لدنياه ولكن يصيب منهما جميعاً. فموضوع الإخلاص لو حكينا يا ابني الإخلاص بده درس كامل لكن اذا انسان اخلص لله سبحانه اخلاصه لله تتوسع الدنيا معه والله يبارك له بالمال وبالحياة وبالانتاج ما دام مخلصاً لله سبحانه. النبي ذكر لنا قصة في الإخلاص.
القصة ﷺ اظن اكثركم صار حافظها الثلاث يلي طالعين عاملين سيران نزلت المطر فاشتدت المطر فدخلوا على مغارة بسفل الوادي وكلما نزلت الامطار كترت السيول فالسيل جرف من جملة ما جرف صخرة كبيرة اجت على باب الغار سكرت باب الغار. مع الطين يلي عم ينسحب طيّن عليهم. ثلاثة صارواا بالمغارة قبر بالغار فالتفتوا لبعضهم يا جماعة شو عاملين؟ الله دفننا ونحن احياء. ما حدن بيعرف فينا لا أهلنا ولا أولادنا ولا في جوال نتصل ثلاثة قاعدين بالغار ما في احد بيعرفنا الا الله. فخلينا نلتجئ الى الله كل واحد شو عامل عمل صالح يلتجئ فيه الى الله بركي الله يفرّج عنا. مين عم يحكي لنا القصة؟ النبي ﷺ يحكي لنا القصة مشان تنتبهوا رسول الله يتكلم معكم الان ثلاثة بالغار ما حدا عم يعرف ما في غير الله فكل واحد عامل عمل يقوم يحكي مع الله قام اول واحد قال يا رب بالغار يا رب انك تعلم انه كان لي ابوان شيخان كبيران ام واب ختيارية وكنت لا اغبط حتى اسقيهما كان يشتغل راعي ياخد غنم يرعاها وعشية يحلب الحليب ويجي يسقي امه وابوه أولا بعدين يسقي مرته وأولاده هي عادة فليلة من الليالي نأى عنه المرعى يعني بعّد المرعى شوي حلب الحليبات اجا لقى امه وابوه نايمين. بفيقهن؟ لا نوم 5 دقائق احسن من اكل خاروف خليهم نايمين. معبي الحليبات بالطشت وماسك الطشت وواقف فوق راسهم. اجت مرته جوعانة أولاده صغار بابا اسقينا. يقول لهم لا والله لا اسقي واحد منكم حتى يشرب ابواي أولا الاب والام أولا بعدين المرأة والأولاد. يا ابني الحلال ما اكلنا شي من عبكرا بس شوية حليب لا حتى اسقيهما حامل الطشت واقف فوق راس امه وابوه أولاده على الأرض بين اجريه ناموا على الأرض ومرته نايمة على الأرض وهو حامل الطشت وواقف تأخر بالمرعى نيّمهن بلا عشا لازم يعاقب نفسه ضل حامل طشت وواقف الى الصباح لما قام امه وابوه شافوه واقف شو هذا يا ابني؟ ولادك نايمين بالأرض بدن يشربوا ما سقيتهم ومرتك نايمة على الأرض نايمين على الأرض الدنيا شتي ما بيصير حتى تشربوا انتو فسقى ابوه وسقى امه بعدين سقى أولاده قال اللهم ان كنت فعلت هذا ابتغاء مرضاتك ففرج عنا مين سمع الدعاء؟ من لا تخفى عليه خافية فأوحى الله يا جبريل ازح الصخرة من طريقهم قليلا. دفشها دفشة راحوا الطين والبحصات دخل الهوا صار في متنفس لكن ما في طلعة. قام الثاني اللهم انك تعلم انه كانت لي ابنة عم وكنت احبها كثيراً وصار بالبلد قحط وجاعت اول يوم تاني يوم تالت يوم اجت لعند ابن عمها يا ابني عمي 3 أيام صار لي بلا اكل دخيلك شقفة خبزة قال لها وقعتي او رماك الزمان؟ لا اطعمك الا ان اخد حصتي. يا ابن عمي قال لها بحبك اريدك قالت له اما الى الحرام فلا. تركت ورجعت. رابع يوم بلا اكل ما في اكل ابن العم بدها تاكل استسلمت فلما أراد التقرب منها بكت قال لها ليش عم تبكي؟ قالت له مخافة من الله ما فعلت الخطيئة مشان اكل لقمة اقع في معصية الله؟ قال لها انت كل هلقد خايفة من الله انت امرأة وانا الشاب لا أخاف من الله؟ قومي كلي لله خذي من المال قومي لله تركها لله واطعمها لله قال اللهم ان كنت فعلت هذا ابتغاء مرضاتك ففرج عنا. بيستاهل؟ يا جبريل ازح الصخرة الا قليلا طلع راسهن لكن الجسم ما طلع. قام الثالث اللهم.. هذا يا ابني الإخلاص ينفعك في وقت الشدة. اذا عامل عمل مخلص حبيت ذكرت قرأت القرآن صليت خدمت والديك بوقت الشدة قل له يا رب ببركة هالعمل. قام الثالث اللهم انك تعلم انه كان عندي عمّال كان يشتغل بالبناء يعمّر ويبيع عمال عم يشتغلوا عنده من عبكرا اجا شارطهم كل يوم وكل واحد ياخد 150 ليرة شرط وافقوا. الضهريات اجا اثنين عمو تشغلنا والله ما كنا نلاقي شغل قال لهم فوتوا اشتغلوا فاتوا اشتغلوا اجا واحد العصر يا عمي والله من عبكرا عم دوّر ما لقيت دخيلك شغلني قال له فوت اشتغل ورزقي ورزقك على الله. اشتغلوا لما عشية بده يعطيهم الأجرة اعطى الكل اجرة واحدة 150 و150 وواحد من يلي اشتغل من عبكرا قال له هذا ليس عدل واحد اشتغل من العصر ساعتين زمان ياخد 150 وانا عم بشتغل من عبكرا لعشية تعطيني 150 هذا ليس عدل. قال له انا شارطك او ما شارطك؟ قال له شارطتني. قال له انت ليس لك عندي شي قال له لا ليس عدل هو اشتغل العصر ياخد 150 وانا من عبكرا باخد 150 ما بدي. تركهم لا حول ولا قوة الا بالله ترك أجرته وراح. انتظره تاني يوم تالت يوم رابع يوم ما اجا. نادى للمرابع يلي عنده قال له يا ابني تعال هذا ترك 150 ليرة تبعه كم ثمن كيلو القمح؟ قال له 15 ليرة 150 ليرة كم كيلو يشتري فيهن؟ قال 10 كيلو قمح قال له اشتري 10 كيلو قمح وازرعهم على نية هذا العامل. 10 كيلو قمح بدهم ارض حرث الأرض زرعها الله بعت الخير طلع سنابل طلعوا ال10 كيلو 100 كيلو ما اجا قال له ازرع له ال10 كيلو كمان زرع كمان طلع الزرع كمان قال له ازرع له فيهن كلهن اشترى له خواريف اشترى له ما مضى 15 سنة الا كان صار عنده طرش من الخواريف البقر الجمل هذا العامل مسكين بعد 15 سنة طفر ما في معه مصاري رجع لدفاتره العتاق عرف انه له عند فلان اجرة يوم اتى اليه هذا كله يحكيها بالمغارة اتى اليه بعد 15 سنة قال له يا عم هل تعرفني؟ تذكرني؟ لا والله مين انت يا ابني قال له انا العامل يلي شتغلت عندك وما اخدت الأجرة تبعي يا ابني وينك عم ندور عليك قديش صار لنا يا ابني وينك انت قال له ممكن تدفع لي اجرتي؟ قال له طيب يا ابني تعال اخد بيده قال له شوف طرش الغنم شوف طرش هالبقر شوف هالجمال وهالارض المزروعة كلها هيدول كلهم اجرتك يا ابني قال له عمو لا تضحك علينا اذا الله اغناك وافقرني يعني جاي تستهزئ فيّ قال له شوه الحكي هيدا قال له والله يا ابني هيدول اجرتك منك مصدق هات ايدك اتى لعند راعي الغنم يا ابني هالغنمات لمين؟ قال له تقول لنا انه واحد اجا اشتغل عندك وما اخد أجرته سمعت يا ابني؟ لعند راعي البقر لعند راعي الجمال لعند الفلاح يلي عم يزرع. صدقت يا ابني؟ الله يبارك لك اخد الغنم والبقر والقمح كله هذا الأجرة تبعه اللهم ان كنت فعلت ذلك ابتغاء مرضاتك ففرج عنا ما بيستاهلوا؟ يا جبريل ازح الصخرة عن طريقهم فخرجوا يتحدثون. معناها اذا اخلصت يا ابني في عمل ازرع عملك المخلص عند الله واطلب من الله بإخلاصك للعمل ان يفرج عنك والله يفرج. اللهم اجعلنا من عبادك المخلِصين المخلَصين واغفر لنا ولآبائنا ولأمهاتنا وللمسلمين اجمعين والحمد لله رب العالمين.
اخلصوا بقول لا اله الا الله..
فاعلم انه لا اله الا الله..
سيدنا محمد رسول الله صلى الله عليه وسلم اللهم تقبل منا هذه التهليلة المباركة واوصل ثوابها وانوارها الى حضرة نبينا محمد ﷺ ثم الى روح شيخنا واستاذنا وقرة اعيننا والى روح والده سيدنا الشيخ محمد امين والى روح والدته وولده زاهر والى روح سيدنا محيي الدين ابن عربي وسيدنا الشيخ عبد الغني النابلسي اللهم أوصل ثواب ذلك اليهم واجعله نوراً يتلألأ بين أيديهم اللهم زد في حسناتهم وارفع درجاتهم وانفعنا من بركاتهم واجعل مثل ثواب ذلك في صحيفة ابائنا وامهاتنا وبناتنا وسابقة الى قبورنا اللهم نور قلوبنا بالايمان واشرح صدورنا بالاحسان واجعلنا من اهل الصدق في محبتك والإخلاص في طاعتك اللهم ثبتنا بالقول في الحياة الدنيا وفي الاخرة اللهم اغفر لنا ولوالدينا ولمن جالسنا وللمسلمين اجمعين وصلى الله على سيدنا محمد وعلى اله والحمد لله رب العالمين.