وانت مذموم نعيدها يا ابن ادم ان رضيت بما قسمت لك ارحت قلبك وبدنك وانت محمود وان لم ترض بما قسمت لك سلطت عليك الدنيا حتى تركض فيها ركض الوحش في البرية قديش النمر بيركض وقديش الذئب بيركض كله مشان لقمة الأكل ركض الوحش في البرية وعزتي وجلالي لا تنال منها الا ما قدرت لك غير لقمتك ما بتأكل وانت مذموم يا ابن ادم ما تنصفني خلقتك من تراب ثم من نطفة ولم يُعْيِني خلقك خلقك ما تعب الله الله ما بيتعب جل جلال الله ولم يُعْيِني خلقك أفيُعْيِيني رغيف أسوقه إليك كل حين؟ خلقك ما تعب بخلقك إذا بعثتلك الرغيف بتعب؟ جل جلال الله يا ابن ادم ما تنصفني خلقتك من تراب ثم من نطفة ولم يُعْيِني خلقك أفيُعْيِيني رغيف أسوقه إليك كل حين؟ يا ابن ادم كما لا أطالبك بعمل غد لا تطالبني برزق غد، الصلاة الصباح بكرة فرض عليكم؟ لا. صلاة الظهر وعصر بكرة ؟ لا. الله ما بيسألك عن بكرة بيسألك عن اليوم فما دام ما عم بيسألك عن بكرة ليش عم تسألوا عن رزق بكرة؟ بكرة شو بدنا ناكل يوم الجمعة شو بدنا نتغدى يوم الثلاتاء لك لتعيش أولا لتعيش. يا ابن ادم كما لا أطالبك بعمل غد لا تطالبني برزقي غد يا ابن ادم لي عليك فريضة ولك علي رزق يا ابن ادم لي عليك فريضة ولك علي رزق إن خنتني في فريضتي لم أخنك برزقك على ما كان منك ما صلى ولا صام وارتكب الفواحش وارتكب معاصي بيرزقه ولا بجوعه؟ بيرزقه. يا ابن ادم لي عليك فريضة ولك علي رزق جل جلال الله إن خنتني في فريضتي لم أخنك في رزقك على ما كان منك هذا التوكل يا ابني الله ما بيخونك في رزقك الله عز وجل يرزقك ويعطيك من حيث لا تحتسب صلى الله عليك يا رسول الله. لذلك قال عليه الصلاة والسلام من انقطع إلى الله عز وجل كفاه الله تعالى كل مؤونة ورزقه من حيث لا يحتسب ومن انقطع إلى الدنيا راكض ورى الشغل راكض ورى الدنيا بده يلحق ومن انقطع إلى الدنيا وكله الله إليها. يعني غير لقمتك ما بتحصل. فالمؤمن إذًا يتوكل على الله التوكل مستسلم لأمر الله عز وجل وإذا استسلم على الله قال لا إله إلا الله بصدق هذا المتوكل لا إله إلا الله ما في غير الله الرزاق المعطي المانع المحيي المميت الله وحده فإذا آمنت بوحدانية الله الله عز وجل يرزقك من حيث لا تحتسب. الله عم يرزق الطيور عم يرزق الأسماك في البحر طيب هاي الطير عم ياكل الوحش بالبرية عم ياكل طيب هالجرثوم هذا هالجرثوم شو هو؟ هالجرثوم مخلوق يا ابني له رأس وله تم وله عيون وله مصارين وله معدة وله بيهضم الطعام جرثوم خلق كامل ما بينشاف بالعين هذا قديش رأسه قديش إيديه قديش المعدة تبعه عم يرزقه ولا ما عم يرزقه؟ يُرزق عم ياكل عم يعيش طلع أصغر من الجرثوم طلع الفيروس، الفيروس أصغر من الجرثوم هذا لازم نكبره عشرة الاف مرة لحتى يبين قد النقطة هذا الفيروس له رأس وعيون وأذان وتم ومعدة وإيدين ورجلين وين قديش المعدة تبعه هذا هو كله ما بينشاف بدك تكبره عشرة الاف مرة لحتى يبين قد النقطة تبارك الله قرأت في مجلة أوروبية بعض اللي عندن تحاليل بالميكروسيكوبات قال مسك بعوضة وضعها تحت الميكروسكوب والشاب عم يقول هااااا هااااا شو بك؟ أخذ صور بالميكروسيكوب هالبعوضة هي فيل صغير الفيل الفيل قديش كبير هي مصغرة خرطومها دنبها ايديها مثل الفيل تماماً خلق لكن عليها مصغرة هالقد الفيل له معدة عم ياكل وهي لها معدة عم تاكل هداك له تم وهي لها تم مين الخالق مين الرازق؟ لك يا ابني فكر اطعم النمل واطعم البرغش واطعم الدبان واطعم الطيور واطعم الوحوش واطعم السمك انت رح ينساك؟ اذا كان ماله مؤمن بالله لازم ما يكون له حياة. فالله الرزاق ذو القوة المتين توكل على الله فتوكلك على الله عز وجل سلم اليه الامر انزل إلى الشغل اللهم الفضل فضلك والكرم كرمك انا عملت اللي علي نزلت الى الشغل طلعت من بيتي وتوجهت على العمل الرزق منك يا ربي في واحد عم يجوع منكم؟ تعشيت عشية ولا ما تعشيت تعشيت مين اللي ما تعشى فيكم؟ في ناس بتنام بلا عشا اما في واحد عم يبات جوعان بلا عشا؟ خاصة هي الشام ما بيجوع فيها حدا. فمين المتكفل يا ابني؟ الله. فلا تظن انك اذا كان قعدت او مرضت او كده لح يروح الرزق تبعك. الانسان مسكين بيفكر اذا واحد فتح قدامه بيفكر ان لح ياخذ له رزقته لو انفتح خمسين واحد قدامك كل واحد الله بيبعث له رزقته كان بسوريا كان بالشام هنا عندنا في دمشق كان فيه دكتور طبيب واحد يركب الحمار ويمشي بالشوارع طبيب طبيب حكيم حكيم وما كان فيه غير اثنين صيادلي هذا يوصفوله ابرة الحمار مُرة وهذا يوصفوله الخشخاش وهذا يوصفوله الحنتيتي الحنتيتي ريحة شي مكربة والله وماشي الحال هلأ صار تمشي بالطريق صار في 700 – 800 طبيب. والله عم يرزق الكل كل واحد عم يجيه زبوناته وكل ما صدق اكتر الله بيبعث له زبونات اكتر كل ما اخلص في العمل الله يبعث له زبونات وكل ما اراد تعباية الجيبة بيهربوا من عنده بعرف طبيب بالطريق العيادة دايما مليانة لبره هلأ بمرق بالعيادة فاضية مافي حدا كانت لبره ليش ماعد حدا اجا؟ بده مصاري بده مال اذا بده المال على حساب خطأ لا حد يجي لعنده روح لعند غيره طلب الدنيا فخسرها ولو طلب الله لربح الله وربح الدنيا معه فالمؤمن يا ابني المؤمن بده الله ولما بتكون بدك الله الله بيزيدك في دينك ودنياك وبيعطيك الدنيا والاخرى الله عز وجل يرزقنا الايمان وهذا في حديثه ورد صلى الله عليه وسلم قال تداووا عباد الله تداووا عباد الله فإن الله ما أنزل داء إلا أنزل له دواء والحديث قال موسى يا رب ممن الداء والدواء؟ فقال تعالى مني قال يا رب فما يصنع الأطباء قال يأكلون أرزاقهم ويطببون نفوس عبادي حتى يأتي شفاء أو قضاء يعني يا بيشفى أو إلى الموت فلذلك نتوكل على الله بتسليم سلموا إلى الله توكل جسد هذا ما توكل الروح إذا الله أحيانا في الدرس الآتي يكون توكل الروح على الله كيف تتوكل روحا على الله اليوم هذا نتوكل الجسد كيف التوكل نعمل بالأسباب نعمل ونتوكل على مسبب الأسباب كل الأسباب بيد مين أسباب الرزق أسباب العطاء أسباب العافية أسباب القوة كلها بيد الله نحنا علينا نتوجه نتحرك أسباب الهداية جيت على الجامع جيت لعندكم قعدت معكم تكلمت بفضل الله عز وجل هذا سبب من أسباب الهداية فمن أراد له الهداية فهم شيء وقام ليعمل كتبت له الهداية هذا سبب أما لو قعد ببيته وطلب الهداية اهدنا الصراط المستقيم هو قعد ببيته ما بتجي الهداية الهداية بدك تسعى وراءها مين الهادي ؟ الله خاطب النبي عليه الصلاة والسلام (وإنك لتهدي إلى صراط مستقيم) لتهدي لتتبع الهادي حتى تهتدي أما قال بيعقد والله بيهديه وصار يدعي مسك المسبحة يا هادي يا هادي يا هادي اهدنا الصراط المستقيم يا هادي يا هادي لو بتقول مئة مليون مرة يا هادي الله ما بيهديك بيقول لك أنا حطيت لك رجل الهداية روح أحضر مجالس العلم حب أهل الله صاحب أهل الله تكتب لك الهداية. مريض يا شافي يا شافي يا شافي يا شافي يا شافي يا شافي يا معافي روح لعنده الطبيب ما بيروح يا شافي بيجيب مرضه كان مرضه حبة حبتين بيمشي حاله وصل مرضه صار بده عملية. مثل السيارة السيارة راكب فيها سمع فيها طأطأة دغري خدها عند المكنسيان بيكون برغي فلتان عشر ورقات بيحط لك برغي بيقلك مع السلامة ومشي حاله أما تركها طأطأت فلت برغي التاني سقط بوات الفيتاس كله نكسرت السيارة صار بدك تحط لك مئة ألف ليره ما بيكفوك من أول كان بمائة ورقة بيمشي الحال برغيين بيمشي حالك فدائما يا أخواني انتبهوا المرض في بدايته اعرض نفسك على الطبيب في البداية لا تترك الله الشافي وبتجي لحالك تاخد حبة اسبرين لحالك تاني بياخد حبة سريدون لحاله لك يا ابني راسك عم يوجعك روح لعند الطبيب لا لا عطونا حبة اسبرين ممكن حبة الاسبرين تضرب المعدة ممكن يكون حمضية كتيرها وانت معدتك حساسة تضرب المعدة روح لعند الطبيب بيسألك الضغط تبعك بيسألك الالام اللي معاك شلون عم تصير وجع الرأس قدام وجع الرأس من ورا وجع الرأس من جنب نص يا ترى في كل واحدة إلها دوا راسه عم يجعه هات عطونا دوا وراح لعند واحد من تبع الأعشاب قال له خد دوا الفلاني كمان أخد دوا الفلاني ممكن يعمل معه معاكسة فيا ابني السبب اتبعوا السبب لا يكون الواحد عالدروشة ما عالدروشة هاي اسمها جدب في الإسلام مافي جدب الإسلام عقل علم حياة الله جعل لك الأطباء لمداواتك جعل لك الخبز مشان تشبع جعل لك الطبق مشان تاكل أما تركها لله اجا لعند والدي رحمة الله عليه والله يرحم أباءكم كان واحد يجي عند والدي لكن كان مسكين مبتلى والله عز وجل يعافينا ويرحمه قعد عند الوالد قال له والله يا أبو سليمان والله اليوم أكلت أكلة ما حدا أكل مثل حكايتي قال له رغيفين خبز أكلت ما شاء الله رغيفين قال له والله رغيفين غمستن بضو القمر ضو القمر فايض من الصوبية فهو فكر صحن أكل عم يغمس وعم يأكل بضو القمر هذا شو هوي أكل رغيفين خبز بضو القمر. هذا الإنسان لازم يكون يا ابني عنده وعي دائما يا أخواني هاي وصيتي لكم الله يرضى عليكم وهذا من التوكل متى شعرت بتعب بمرض بألم لا تسكت عليه بيجي يقول لها ماما والله صاير معي ديقة نفس تقول له لكن لساويلك كاسة بابونج ديقة نفس ديقة صدر ممكن يكون معك ضغط ممكن يكون معك في القلب ممكن يكون معك شريان روح اعرض نفسك على الطبيب ساوت له فنجان بابونج شرب فنجان بابونج ماما دايق صدري ماما نام ترتاح المرض عم يزيد وأمه عم تقول له نام روح يا ابني على الطبيب دغري دائما المرض في بدايته يا أخواني المرض في بدايته سهل معالجته أما متى ما زاد تفاقم صار صعب فبعض الأوقات ممكن تاخد إبرة سنتم بيكون الشفاء فيها أما إذا زاد صار بدك عملية صار بدك شق بطن فليش ما بتداوي حالك من الأول عادة الناس دائما مصيبتين هدول بالناس هدول المصيبتين ممكن تكونوا أنتوا واقعين فيهم المصيبة الأولى إذا صابوا الألم ما بيروح بسيطة وماشي حال وما في شي وأنا ماشي ما بيروح على الطبيب تاني طبيب يعطيك دواء شرب حبتين تلاتة تنشط ترك الدواء وهي المصيبة كمان في أكتر الناس هذا الدواء اللي عطاك ياه من شان يوقف لك المرض كليا 20 حبة أنت أخدت 5 حبات وتركت 15 حبة بيرجع المرض مرة تانية هذا من التوكل يا ابني ما تظن التوكل أنه تركنا ونتوكل على الله والله بيشفينا عطاك علبة حب 20 حبة خد العشرين حبة والله تنشطت ما بقى بحاجة كمل المرض راح ثلاث ارباعه باقي الربع كمل الحبات حتى ينتهي المرض هذا أخواني من التوكل الناس معهم دكتور سنان الله يعيننا صار معه التهاب بحنكه مناخد نعنع ناخد كذا طيب سوس عم ينخر لح ياكل الحنك وهو لساته عم يتألم عم يجعه أو واحد قلع ضراسه هذا أكتر الناس كمان مساكين قلع ضراسه ركب أول بدلة ما مشي حالها ما بقا بدي أحط بدلة عم ياكل من غير بدلة لكن يا ابني لا الخبزة عم تنقطع ولا اللحمة عم تنقطع معدتك عم تتعب عم يصيبك التعب بعدين بكرا آلام حيصير أوجاع ركب بدلة تحمّل الوجع يومين تلاتي وبعدين ترتاح كل عمرك بصير حنكه لقدام يا سبحان الله الناس شلون هذا درس دين يا ابني درس دين هذا ولا درس ايش هذا دين ولا غير دين هذا دين يا ابني عم نتعلمه. أما واحد بيهمل وبيفكر حاله انه صاحب دين ومؤمن بيروح عند الشيخ ويقول له توكل على الله توكل على الله الله يشفيك ويعافيك وتوكل على الله وتعا لكبسك يلا بزق عليه شوي روح قل له روح عند الطبيب روح داوي حالك يعني صار أكتر الناس اتخذوا الاسلام جدبي قلة عقل الدين يا ابني في عقل الله لما خلقك يا ابني ما خلقك قليل عقل أكمل الخلق الذي الله خلقه الإنسان هذا أكمل الخلق الله خلق الإنسان بعقل يتغلب به على كل المخلوقات عقل ذكرت لكم قصة الأسد هذا قصة بتاخدوا منها يا ابني درس كان الأسد كل ما طلع بفوت يحكي للشبل ابنه شب قال له: يا ابني اوعا من بني آدم اصحى من بني آدم يا ابني ابن آدم ابن آدم هذا شاب صار بقوته شو أبي ملك الوحوش من هذا ابن آدم والله لا أطلع وشوف هذا ابن آدم لك يا ابني أبوك أكبر منك واللي ما له كبير ما له تدبير عم يقلك اوعى طلع من بكير على الصحراء وإذ رأى فيل هربان نط وقف مين انت قاله الفيل انا الفيل قاله ما انت ابن آدم قاله وانا هربا من ابن آدم انا هربان من ابن آدم اوب شوية خرج الكركدان اوب مين انت الكركدان ما لك ابن آدم قاله انا هربان من ابن آدم شاف الزرافة صاحبة الرقبة الطويلة قوله انت مين انا زرافة منك ابن آدم قال له انا هربان من ابن آدم فقال والله هذا من هالإبن آدم هذا ماشي في الصحراء شاف رجل قصير ماشي في الصحراء اتى عنده مين أنت ؟ قال له انا إبن آدم أنت إبن آدم ؟ قال له أنا إبن آدم قال له إيه أنا بدي صارعك شو خوفت الوحوش خوفت أنا أسد إبن أسد بدي صارعك قال له اروح واستر حالك هلا بتهرب متلما غيرك هرب مستحيل انا اهرب لابد من صارعتك قال له عم قول لك روح اكسب حالك قال له ابدا بدي اكسر هالاسطورة هاي انه ابن آدم كل الوحوش تخاف منه بدي اكسر هالاسطورة هاي قال له طيب على استعداد قال له على استعداد قال له استناني بس اقضي حاجة قال له عم بستنى قال له بركي هربت متلما هرب غيرك قال له ما بهرب قال له اي بربطك بهالشجرة بين ما اقضي حاجة وبرجع فكك وبصارعك قال له اربط طلع على الحبلة وربطه بالشجرة سلخ وطلع على الشجرة ايه وينزل سلخ سلخ انكسر اول عرق جاب عرق تاني سلخ دخيلك قال له لورجيك مين ابن آدم لورجيك مين ابن آدم دخيلك امان كسر العضام تبعه وتركه مربوط وضل ماشي قال له لورجيك مين هذا ابن آدم اجى ابوه عشية وين الولد ما موجود شم شم شاف الولد لحقه شاف الولد مكتف بالشجرة وعم يئن شو باك يا ابني قال له اه يا بابا ياللي ما بيسمع كلام الكبير ماله تدبير ما سمعت كلامك قال له والله ابن آدم عمل فيك هيك ما نبهتك لك يا ابني قال له يا ابني ابن آدم ما بيقاتل بعضلاته ابن آدم ابن آدم بيقاتل بعقله لا تشوف حالك بعضلاتك ابن آدم بعقله قال له عمل معك حيلة وكتفك وكسر العضام تبعك ايه لازمك ياللي ما بيسمع الكلام فيا ابني ابن آدم ابن آدم عقل فلا تضيع يا اخواني لا تضيعوا شبابكن لا تضيعوا حياتكن لا تضيعوا قوتكن واحد صار معه انفجار زايدة وحاطت ايده اخ اخ اخ اخ واخ ولسه بده كاسة بابونيج تسمم الدم سلمها ومات ولسه بده كاسة بابونيج ولا امه فقيرة ارتفع درجة الحرارة صار معه الام صار معه وجع لك حملوه خدوه على الطبيب على المستشفى الناس ما هيك صاير اكترها يا مساكين يا ابني الاسلام لا تظنوا صلاة بس لا تظنوا صيام وحج عقل الاسلام الله عطاك العافية امانة عندك هالجسم هذا امانة بدكم تحافظوا عليه ما بتحافظ عليه مسؤولية بين ايدين الله اول ما يسأل العبد يوم القيامة بتعرفوا على ايش اول سؤال الله بيسألك عليه يقول الله تعالى لك الم نروك من الماء البارد ما عطيتك عافية وسقيتك ماء بارد هاي عافية نقطة ماء باردة تسري بكل عروقك ما قالك اشرب من ماء سخن صلى الله عليه وسلم كانوا يعبوا له الجود يعلقوله إياه لعلى بكره يبرد يفز يشرب ماء باردة صلى الله عليه وسلم هاي من النعيم اما الله يرحمه بعض المشايخ قال من كبار الاقطاب قطب ايه شو القطبية تبعه قال من 20 سنة ما نزل لسوق الحميدية ما شاء الله كان وما بيعرف الليرة من الفرنك ما شاء الله هالولاية هاي وما بيشرب مي بنوب لكن شو بيشرب؟ قال بيشرب شاي يعني اذا ما شرب المي ترك المي لله لك الله ما بحاجة الك يا ابني ما شرب مي قال هذا زهد كمان في بعض المشايخ ما من اهل السنة مساكين شواربه لازقين بدقنه والله شفايفه ما مبينين. شوارب نازلة الى هون قلت له قم توضا قالي انا من 80 سنة من 80 سنة ما بليت جسدي بالمي من 80 سنة ما كت نقطة مي على بدانه ليش قال ايه زهدا تضرب شو قليل فهم بده ياها ولا لا حمار هذا طالعة ريحته انتن من الجيفة من 80 سنة ما كت نقطة مي على بدانه زاهد هذا الإسلام؟ ايه هذا بده استغفر الله العظيم واتوب اليه لا تخلونا نكمل والله شحاطة عتيقة قليلة عليه الله وكيلكم ما حسنت وقف قدامه عم تسلم عليه ما حسنت سلم عليه ريحة انتان بشكل نسأل الله العفو والعافية شو صار اذا ما تشطفت بتتسلخ شلون هذا 80 سنة شو صار 80 سنة ما بليت بدني بالمي لكان بايش بليت ما في المي زاهد يا ابني بدنا نفهم الاسلام فهم الحياة بدي اياكن اغنياء فهموا مني بدي ياكن اغنياء بمالكن اقوياء باجسادكن وعقولكن اولياء بقلبكن وإيمانكن اتقياء بطاعتكن وعبادتكن هيك بدي ياكن كونوا مالكين الدنيا هذا دين اما اسلام فقر اسلام وتعتير ما في مسلم معتر مسلم غني عزيز كريم صلى الله عليه وسلم قال تنظفوا وتطيبوا وتزينوا حتى تكونوا كأنكم الشامة في عيون الناس دخيل النبي انا دخيل النبي روحي فداه شامة شلون يا اخي لما ابو صياح بيحط الشامة على خده شلون تطلع عم يقلك تزين وتطيب حتى تزين مثل الشامة في عيون الناس الناس تعشق المنظر الك هذا الدين مع اواعي مهرية وسخة والطواقي فوق بعضها البعض والله زاهد الله عز وجل يعيننا ويعينكم يا ابني مهم تتوكلوا على الله أي توكلوا على الله قوموا على صلاة الضحى الله يعيننا ويعينكم الله يغفر لنا ولكم اللهم اغفر لنا وارحمنا ولوالدينا.