اخواني كثير واقع في ضيق واقع في شدة يا ابني استغفر الله اذكر الله توجه الى الله تنفتح الدنيا بكل أبوابها. ما عاد يا ابني ما عاد جيت ليش كنت دائما قبل عند الشيخ والله يا سيدي والله انفتحت علينا اذا انفتحت عليك ما بقا تأتي لعند الشيخ؟ ضليت اصلي حتى حصل لي لما حصل لي بطلت اصلي هذا يا ابني ما تذوق والله ونصيحة لكم لا تفكر في الدنيا لا تفكر بالرزق فكر بحب الله والله يرزقك من حيث لا تحتسب الا يؤمن احدنا بقول الله تعالى (ومن يتق الله يجعل له مخرجا ويرزقه من حيث لا يحتسب ) من اين تأتي لا نعرف كنت ادرس هنا في الجامع في رمضان الله يجعلها خالصة لوجه الله كان اظن في العشر الأخير فقلت للاخوان تصدقوا ويلي يتصدق بإذن الله اضمن له الله عز وجل يعوض عليه واضعاف واحد من الموجودين الله قذف في قلبه مد يده على الجيبة وطالع يلي بالجيبة وتصدق فيهم يلي معه كلهم لله انا ما عندي خبر شو في معه وقدي تصدق ما بعرف عرف الشيخ يقول تصدق والشيخ صادق طالعهم بعد رمضان اظن قبل الحج يأتي لعندي هذا الانسان والله انا لا اعرفه قال لي والله انت صادق خير انا ما بحب المدح خير؟ قال لي انت برمضان حكيت لنا انه تصدقوا وانا اضمن لكم العوض الله يعوض عليكم بسرعة قلت له انا عند كلامي انا واثق قال لي والله صحيح قال لي والله انا يوميتها مديت يدي على جيبي طلع معي 6 الاف ليرة قال لي دفعتهم كلهم. قال لي بتصدق؟ قلت له خير؟ قال لي من 3 أيام اتاني برقية انزل على البنك في لك دفعة قال لي نزلت على البنك ما الي حدا ولا حاطت بالبنك نزل على البنك فلان؟ نعم هويتك طالع الهوية قالوا له جاييك حوالة من كندا ب6 مليون دولار قال لي لما سمعت لح انفلج 6 مليون دولار؟ نعم تقبضهم هلق؟ قال له عم تضحك او؟ قال له ابني هلق مني فاضي مضاله ياها خذ 6 مليون دولار قال لي اشتريت محل وكل المحل عبيته وكل المحل يلي عباه طلع بمليونين بقي معه 4 مليون قال لي 6 الاف ب 6 مليون؟ قلت له لانك صادق مع الله صدقت طالعت يلي معك لله الله ما ضيعك يا ابني الله ما بيتجرب جرب ايمانك صادق مع الله؟ الله ما بيتجرب كلام الله حق فيا ابني يلي بيكون مع الله الله عز وجل يوفقه فاصحبوا يا ابني لله خلي مجالستك لله صحبتك لله حبك لله والله يعطيك الدنيا واضعاف اضعاف شو الدنيا يا ابني الناس يقولون الدنيا الدنيا لك يا ابني الدنيا كلها جناح بعوضة ما بتطلع والنبي قال: لو ان الدنيا تساوي عند الله جناح بعوضة لو تساوي ما سقى منها شربة ماء لكافر جناح برغشة ما بتطلع الدنيا شو عم بتفكر الدنيا والدنيا لك يا ابني اكبر ما في المجتمع بده يجي لعندك خاضع بدو يحط راسه تحت والله مرة وانا بالبيت الساعة 12 بالليل يندق الباب 12 بالليل طلعت فتحت وإذ رجل من كبار كبار اهل البلد قال لي تسمح لي دقيقتين؟ لما بيمشي 3 سيارات امامه و3 سيارات وراءه من كبار اهل البلد دخل ما رضي يقعد تفضل اقعد قال لي انا جاي لحاجة، خير؟ قال لي لا اقعد حتى تقبل مني الهدية جايب لك هدية بدك تقبل هديتي مقبولة الهدية تفضل ما رضي يشرب فنجان قهوة ولا كاسة شاي ولا حلو قبلت الهدية؟ قال لي خلص انا مكيف هلق وانبسطت اسمح لي لك يا ابني قال لي خلص انا روقت الشيخ قبل هديتي. فتحنا الهدية عباية حقها 50 الف ليرة. دخيلك يا ربي كبار يأتي بالليل مشان ما حدا يشوفه هدية نعم هدية بدل ما تشتري انت العباية ب10 الاف لح ابعتلك عباية ب50 الف يا ابني دنيا أي دنيا هي؟ الدنيا للغافلين اما يلي بيحصل يا ابني على حب الله الدنيا ما بقا لها وجود؟ اذكروا الله اصدقوا يا ابني في الصحبة ومن صدق في الصحبة الدنيا والله ستأتيه على اسهل ما يكون. مما يجب من حقوق أولا تعظيم الشيخ لا نعظم الشيخ لجسد الشيخ يا ابني انا واحد مثلكم وانا خادم لكم ولو يعرف الأخ ما خدمته لازم احكي لكم بعض أوقات لان النبي حكى ﷺ لازم احكي لكم بعض أوقات. الله يرضا عن شيخنا يلي علمنا مرة شيخنا الله يرضا عليه ويجمعنا به في الدار الاخرة قاعدين معه قال ابني حابب نطلع سيران مين فيكم بيطلع؟ ما في مين الكل بيطلع وين حابين نعمل السيران واحد قال بالبحدلية واحد قال بالفليجية شيخنا قال انا جاي عبالي نعمل السيران بحلبون حلبون؟ حلبون جبال ما فيها شي يعني خلص بحلبون بحلبون نحن معك. تهيؤوا بكرا ان شاء الله العصر منطلع. العصر منطلع سيران قريب المغرب؟ أي بحلبون العصر تهيأنا جبنا الباص ركبنا بالباص وركب الشيخ معنا توجهنا وصلنا لأول حلبون شيخنا قال مننزل من هنا منفوت مشي يا سيدي لسا باقي نصف ساعة مننزل نمشي مشي نزلنا قال للباص انت روح نحن نزلنا من الباص وطبقت الدنيا والكريم قال خود ونزلت المطر مزاريب وتراب حلبون دبق متل الغري لما ندعس تطلع رجلنا 10 كيلو ما عدنا حسننا نرفع رجلينا صار كل رجل 50 كيلو كله طين والمطر نازل فوقنا والشيخ يضحك عم يضحك بدنا نغطيه قال لا لا يا ابني قيم خلينا اهل البلد طلعوا استقبلونا المختار كذا وصلنا لكن كيف اواعينا عم تشرشر ورجلينا ما عم ترتفع طين اهلا وسهلا وصلنا لعند المختار نحن حول بين 65 او 70 واحد شلحنا على الباب وفتنا الشيخ قعد هيك 5 دقايق معنا قال انا طالع لبرا عشر دقايق لا حدا يطلع لا حدا يلحقني خليكم هنا عشر دقايق وبرجع لعندكم الدنيا غروب صار أي سيران بقا هذا قعدنا خمس دقايق عشر دقايق ربع ساعة تلت ساعة انشغل بالي على الشيخ انا الشيخ بدنا نشوف الشيخ الشيخ قال لا تطلعوا قلت لهم والله ما بقا عدت احسن بدي شوف الشيخ فتحت الباب بدي اطلع الشيخ قال ششش فوت لجوا يا سيدي قاعد عم ينضف النعال من الطين عم ينضفها من الطين وعم يمسحها وعم يصفها 65 – 70 صباط نضفهن من الطين وصفهن وقام الطينات وغسل وفات لجوا هشش فوت لجوا طلعنا لقينا الصبابيط مصفوفة ونضيفة مين نضفها شيخك يلي عم يطهر قلبك نضف لك صباطك سمعتوا هيك شيخ؟ هي الشيخ يا ابني. كم وكم يا ابني الشيخ ينضف لك صباطك وانت منك حاسس هي يا ابني الشيوخ ما بس تنضف القلوب من الغفلات بل تنضف لك قلبك وروحك وحياتك ووجودك فتعظيم الشيخ يا ابني تعظيم لدين الله تعظيم لشرع الله يا اخواني كلكم بتعرفوا هذا ما اسمه؟ مصحف اليس كذلك؟ لما انت تقرأ فيه ماذا تفعل ؟ تبوسه وتضعه على رأسه انت ماذا بست؟ بست الكرتونة لماذا احترمتها وقدستها؟ لانها حوت كلام الله المقدس صارت مقدسة فقبلتها فهذه الكرتونة اغلى ويلي حمل كلام الله ومعانيه واسراره اعظم؟ ايهما اعظم؟ بيقولوا لماذا يبوس يد الشيخ؟ كمان على تقبيل اليد محسودين الله يبارك لك ببوسة اليد منلف ايدي بالعباية ومنطلع مشان ما حدا يبوس ايدنا ما بدنا حدا يا ابني تعظيمك للشيخ تعظيم لدين الله تعظيم لشرع الله فلذلك (ومن يعظم شعائر الله فانها من تقوى القلوب) فيا ابني عليك ان تحفظ حرمة الشيخ حاضر وغائب في حضوره تكريم وفي غيبته ما بيصير تجيب سيرة او تسمع واحد يطعن بالشيخ وانت قاعد ممكن بعض أوقات يحكوا اسمعوا مني هذه الكلمة انا مسامح جميع الخلق أي مجلس قعدوا سبوا الشيخ حكوا على الشيخ لا تتداخل عندك استعداد بالحجة اقم الحجة ما في حجة اسكت وقم من المجلس (واذا رأيت الذين يخوضون في اياتنا فأعرض عنهم حتى يخوضوا في حديث غيره واما ينسينك الشيطان فلا تقعد بعد الذكرى مع القوم الظالمين) فلو حكى اتركه في مين يدافع عن الشيخ في مين يدافع الله موجود كم من واحد عشية يغتاب يطعن يقوم صباحا وهو مفلوج مشلول بيكون الشيخ فلجه لا يا ابني الله انا ما دخلني انا مسامح لا تتداخل متى ما شافوك لان اذا كان في واحد ما بيحب يحب ان يزاحم ويحرك المحب شيخكم كذا شيخكم كذا لا تحكي قم وامشي سلام عليكم اتركه لله. اما كلما رديت اكتر كلما يحرقك اكتر كلما يحركك اكتر اترك وضلك ماشي. بعض الاولياء رضي الله عنهم قال لبعض المريدين قال له يا ابني اذا ماشي بالطريق وهاجوا عليك الكلاب شو بتعمل؟ قال له اردهم قال بيردوا يلحقوك قال ارد اردهم بيردوا بيلجقوك هذا شغلة طويلة يا ابني ما بقيت تحسن تمشي قال له يا سيدي شو لازم اعمل؟ قال له يا ابني ليش ما بتشوف صاحب الكلاب احكي صاحب الكلاب يردهم عنك وانتهت الشغلة. بدنا نشتغل برد الكلاب دائماً؟ الله يرضا عن الامام الشافعي قال لو ان كل كلب عوى القيته حجرا لأصبح كل مثقال منه بدينار، مثقال الحجر يصبح بدينار ما بيبقى حجار لانهم كتار فلذلك خلي حرمة الشيخ الله تعالى يرد عنه. قال سيدنا الشيخ عبد القادر الجيلاني رضي الله عنه وارضاه قال : من وقع في عرض وليّ ابتلاه الله بموت القلب العرض يعني يحكي عن الشيخ ينقص الشيخ ابتلاه الله بموت القلب واذا مات القلب فمعناها ليس له الا جهنم نسأل الله العفو والعافية. صاروا الان ستة أشياء. السابع بدك تحب شيخك محبة فوق كل محبوب محبة الشيخ اكتر من محبة اهلك ومحبة اولادك حتى اكتر من محبتك لنفسك شو هيدا شيخ من وين جايبلنا ياها هي مزبوطة؟ نعم. ﷺ كان ماشي مع عمر فالتفت الى سيدنا عمر وقال يا عمر كيف أصبح حبك لي؟ قديش بتحبني؟ فقال والله يا رسول الله لانت احب اليّ من مالي واهلي وولدي الا نفسي التي بين جنبي اكتر من اهلي ومن مالي الا انا يعني اقتل حالي مشانك يعني هي صعبة ف ﷺ قال: ما كمل ايمانك يا عمر ما كمل ايمانك يا عمر والذي نفسي بيده لا يؤمن احدكم حتى أكون احب اليه من ماله وأهله وولده ووالديه والناس اجمعين ونفسه التي بين جنبيه فلما سمع سيدنا عمر ما كمل معناها ما بفوت على الجنة معي ما كمل فقال امدد يدك يا رسول الله فوالله لانت احب اليّ من مالي ومن اهلي ومن ولدي ومن نفسي التي بين جنبيّ فدق له النبي على كتفه وقال له الان كمل ايمانك يا عمر اذا ما كان حب الشيخ اغلى عليك من حبك لذاتك ونفسك لا تنتفع يا ابني لماذا؟ لا تظنوا هي مشان الشيخ انا ما بنتفع في الحب شيخك لا ينتفع بحبك يا ابني الولد لما يحب ابوه ابوه ماذا ينتفع منه؟ انت بصيرلك باب الحنان والعطف يبذل ماله لك يعطيك حنانه يعطيك عطفه النفع لك ليس له يا ابني. فلما انت تحب الشيخ يا ابني مشانك انت انت عندك محبوبات كتيرة يا ابني تحب الولد تحب الزوجة تحب الشغل تحب اهلك تحب ولادك تحب الكل هالمحبوبات لما تذكر الله تمسك مسبحتك وبدك تغمض عيونك قل الله الله يأتي الشيطان يجيب لك محبوباتك حبيب حبيب امك ابوك اخواتك ولادك كذا مشان يشغلك عن ذكر الله فتأتي لتذكر الله 50 واحد اتى لبالك ما عاد في حضور مع الله فالشيخ يقول لك يا ابني انت احب الشيخ لما تحب لك اعمل رابطة هالارتباط الروحي بالشيخ يضيع كل المحبوبات محبوب واحد اكل كل المحبوبات فلذلك الله يرضا عنهم قالوا محبة الشيخ نسبتها للمريد كنسبة عصا موسا مع السحرة كم واحد السحرة كانوا 70 الف ساحر اجتمعوا معهم عصي وحبال (قالوا يا موسى اما ان تلقي واما ان نكون اول من القى) (قال بل القوا فاذا حبالهم وعصيهم يخيل اليه من سحرهم انها تسعى) داهنينها بالزيبق عم تتحرك (فأوجس في نفسه خيفة موسى) بشرية (قلنا لا تخف انك انت الأعلى) (والق ما في يمينك تلقف ما صنعوا) تلقف يعني بسرعة تبلعهم رمى العصاية فبلعت الحبال والعصي والكل (خذها ولا تخف) رجعت عصاية رابطة الشيخ بهذه المثابة لما تشوف لح تكتر عليك الوساوس ارتبط بروحانية شيخك مجرد ما ترتبط بالروح تبلع كل هالمحبوبات ما بقى في ولا محبوب ارجع الى الله كن مع الله يحضر مع الله 5 دقايق 10 دقايق رد شرد اعمل رابطة صفي القلب رد ارجع الى الذكر فدائماً هالحب حتى ما يخلي محبوب يشغلك عن الله ما الفرق بين روح الشيخ وروح الغير روحانية الشيخ يا ابني كلها شغلت بالله كلها عاشقة لله فلما ترتبط بهذه الروح ستصير الكهربا واصلة لك وصلت الكهربا خلص كلهم تسكر الباب عنهم أصبحت مع الله في ليلك ونهارك فالحب يا ابني لك الشيخ لا ينتفع بالحب لو كل اهل الأرض احبوا الشيخ ماذا ينتفع الشيخ منهم؟ اما النفع لك يا ابني فمحبة الشيخ لكن انتبهوا يا ابني ما معنى حب الشيخ ان تنظر للمشايخ الاخرين انهم ناقصين انه هذا شيخ كذا هذا شيخ كذا لا يا ابني نحب شيخنا ولا ننتقص احد من اهل العلم كلهم على عيننا وراسنا كل واحد الله شرفه بهذا التاج تقدسه وتحترمه هذا تاج النبوة الان اغلب المشايخ مثلي جاي بلا لفة انا لابس طاقية مثل اللفة لكن المشايخ قاموا اللفة صاروا يحطوا حطة هي لا وردت بسنة ولا بشريعة ما بعرف من وين جايبينها وين اللفات يا مشايخ؟ راحت اللفات. ما هذا المهم اذا رأيت هذه العمامة على عصاية قدس العصاية واحترمها لانها تاج النبي ﷺ العمائم تيجان العرب فاذا نزعوها نزع الله عزهم. احترم يا ابني هي رمز الدين رمز الشرع رمز الايمان بدك تسأل عن دينك مين تسأل؟ كتار يلي عم يربوا دقون اسال الشيخ لما يكون في شيخ تسأل مسألة اما ما في عمائم ما عاد انعرف الشيخ من غيره. فلذلك يا ابني الحب له شرط شرط الحب ان يقيّد بالشرع انتبهوا عليه شرط الحب ان يقيد بشرع الله معنى شرع الله يعني ان يكون اللقاء لمحبة الله ومجالسة لذكر الله والصحبة لمحبة الله ورسوله علم وتعليم وتوجيه هذا الحب المطلوب اما اذا صار الحب فيه غير ذلك فحب باطل حب شرع الله لله وليس لغير الله عز وجل هذا الحب وعلامة الحب امتثال امر الشرع واجتناب نهي الشرع فما امرك الله به تمتثله وما نهاك عنه الله تجتنبه.
اما الثامن لما تجالس شيخك لا تلتفت لشيخ ثاني اما اخد طريق من الشيخ رجع اخد طريق من الشيخ الثاني رجع اخد من الطريق الثالث قال هذا رفاعي وهذا شاذلي وهذا بدو يتبارك بالطريق هذا يخسر الكل المريد الجالس بين شيخين كالمرأة بين رجلين وكالغنم بين شلعتين من الغنم مرة هنا ومرة هنا وبعدين يأتي الديب ياكلها وهي فلتانة بين هون وهون المريد شيخ التربية واحد شيخ العلم خلي يكون لك 50 شيخ معليش انا مشايخي اكتر من 50 شيخ شيوخ اللغة وشيوخ التفسير والحديث والأصول ما في مانع. الامام البخاري له اكثر من الف شيخ الامام الشافعي له اكثر من الف شيخ شيوخ العلم معليش اما شيوخ التربية واحد. قال الامام الشافعي رضي الله عنه قالك درست العلم في 18 سنة ودرست الادب في سنتين ويا ليتهما كانا بالعكس شريعة سنتين بيكفي وادب 18 سنة لا يكفي. تربية يا ابني عند اهل التربية شيخ واحد اما بين شيخين متل اذا واحد بدو يشعل التلفزيون وضع له فيش شعل التلفزيون هل يجب ان يضع له فيش تاني؟ طيب واذا جاب له فيش تاني شو بيصير بالتلفزيون؟ بيحترق فيش واحد كهربا واحدة بتكفي اما بدو يحط شيخين وتلاتة فيا ابني المشايخ ما مشان البركة بعض المشايخ يلي درست عندهم الله عز وجل يرحمهم درست عندهم لكن وانا عم بدرس عنده عم بحاكيه فقال لي بدنا نطلع لعند شيخك خذ لنا اذن نطلع لعنده حاكيت لشيخي انه سيدي قال لي أي جيبه قال لي بدي اخذ طريق من الشيخ طالعته لعند الشيخ الشيخ قاعد معه قلت له سيدي بده ياخد طريق قعد حكى معه انتهت الجلسة مع السلامة لما وصل للباب الشيخ قال لي تعال رجعت قال لي ابني بدو ياخد الطريق هذا للبركة نحن بركة ما في عنا ما حدا حكى له طلعنا قال لي أي جينا لعند الشيخ مشان ناخد طريق نتبارك فيه ما عطانا الطريق قلت له بدك تتبارك؟ قلت له والله رضي الله عنك يا شيخي خير؟ قلت له والله الشيخ حكالي انه انت جاي تتبارك الشيخ ما عنده بركة عنده ذكر عنده شغل بدك تشتغل بيعطيك طريق اما بدك تتبارك للبركة ما في، قال هذا اخر طريق قادري وشاذلي ورفاعي ونقشبندي ما شاء الله بأي طريق عم تشتغل؟ يوم القيامة بيجي لعند سيدنا شاه نقشبند يقول له انت مانك من عندي ما اشتغلت بذكر القلب بيروح لعند الشاذلي يقول له انت ما اشتغلت بذكري بيروح لعند الرفاعي يقول له انت ما اشتغلت بالذكر فبيضل فلتان من هون لهون ما حدا يقبله بدك يا ابني شيخ ترتبط فيه فيلي بيجي لعند الشيخ يا اخواني ما لازم يلتفت لغيره هذا كشيخ التربية اما شيخ العلم خلي يصير لك 20 شيخ معليش شيخ التربية واحد. هذه يا ابني 8 شروط باطنة لمجالسة الشيخ في الشروط الظاهرة وهي ست شروط لح نخليلكم ياها للدرس الثاني لحتى ما نطول عليكم والطريق ما يومين يا ابني الطريق طويلة شوي يلي بيحب يتمم عالخط ويلي بيحب يختصر نقول له كيفك. مين حابب منكم يتمم؟ يا رب ارجو الله ان يتمم لنا الفضل حتى تأتيكم الساعة وهي ارجو الله ان كنت حي أذكركم وتذكروني وان كنت ميت تترحموا ان شاء الله علي. يأتيك يوم ان شاء الله ان واصلتم ذكر الله يأتيكم يوم لا تضع لقمة بفمك ولا تشرب نقطة مي ولا تلتفت لفتة ولا تحرك عينك الا وترى قلبك يذكر الله، الله بكل لحظة؟ نعم بكل لحظة هيديك الساعة يا ابني انت لا تعيش بالدنيا جسدك في الأرض وروحك في العرش فيقولون عرشي فرشي روحه عرشية وجسده عايش في الأرض هذا يا ابني الذاكر واي لذة هذه اللذة لما يكون النبي ﷺ لما شاف حارثة قال له كيف أصبحت اليوم يا حارثة؟ هذا الذكر يا ابني شوفوا شو بيصير كيف أصبحت اليوم يا حارثة؟ قال يا رسول الله اصبحتُ مؤمنا حقاً النبي قال انظر ما تقول هالكلمة عظيمة شو مؤمن؟ قال مؤمناً حقا قال له لكل قول حقيقة فما حقيقة ايمانك؟ قال له اصبحتُ كأني بعرش ربي بارزاً شايف عرش الرحمن امامي الله اكبر وكأني انظر الى اهل الجنة يتنعمون وكأني انظر الى اهل النار يتعذبون شو هاد؟ شاف العرش في رواية كأني أرى الله على عرشه امتلأ قلبه من هيبة الله جلال الله الله اكبر شايف الجنة ونعيمها والنار وعذابها فالنبي قال: عبد نور الله قلبه بالايمان هي يلي بدك توصل لها عبد نور الله قلبه بالايمان عرفت فالزم عرفت هذا طريق محبة النبي وذكر الله فلازم على صحبة النبي وذكر الله فيصل هي لذة من اللذات يا ابني عايش بالأرض لكن شايف الجنة ونعيمها واهل الجنة ونعيمهم وشايف النار وعذابها هي كم معصية يعمل بالنهار؟ كم خطيئة يرتكب؟ هذا الايمان يا ابني هذا يلي بدك تصل له وهذا والله يا ابني في طريقنا هو اول الطريق لكن بعده كما قال بعض العارفين بالله تزينت له الجنة وتزخرفت له فرآها فأغمض العينين غمّض، الملك قال له ما عجبتك الجنة؟ نعيمها ولذتها غمضت عيونك؟ قال : قصدي وراك قصدي وراك انا ما بدي ياكِ بدي خالق الجنة ما بدي الجنة طالب الله ما بدو الجنة بدو الله نظرة الى الله بينسى ما دنيا يا ابني ما في لذة في الدنيا تعادل لذة النظر الى وجه الله قصدي وراك لا بدو جنة ولا بدو بس بدو الله. بعض المريدين اتى لشيخه قال له يا سيدي الليلة صار معي يعني بعد العشاء ذكرت قال له بعد الفجر كُشف لي الغطاء فرأيت العرش قال له ولما شفت العرش شو صار معك؟ قال له رجف قلبي وامتلأ قلبي من الجلال قال افّ لك اطلع عنا انت منك من اصحابنا ليش يا سيدي؟ رأيت العرش قال يا ابني رأيت مخلوقا فانت محجوب عن الخالق بالمخلوق يلي بدو الله بدو عرش؟ العرش خالق ولا مخلوق؟ مخلوق قال له انت بدك الله قال له انت محجوب يا ابني روح اذكر الله منيح لسا ما ذكرت الله اكبر مع انه الواحد اذا شاف العرش بيشوف حاله انه صار من الاولياء الكبار لك لا يا ابني القصد وراء ذلك تقول الله الله لا تقول لا عرش ولا جنة بدك الله فيلي بيصرله الله ما بقا يلتفت لغيره النعيم اسم الله واللذة اسم الله والطرب اسم الله والانس اسم الله كله يلي بده الله بكرا بيصير اذكروا الله يا ابني شغلوا المسبحة اشتغلوا شغل المسبحة حتى تاكل من اصابيعك شقف حتى تذوب المسبحة وانت تذكر الله هذا يا ابني الذكر ولما الواحد يذوق نقول لك ان عجبتك الكحلة دنبها وان ما عجبتك اقطمها واحد نزل للسوق ربح الف دولار نقول له ان عجبك انزل ان ما عجبك بينزل ولا ما بينزل؟ اذا اول يوم نزل الساعة عشرة تاني يوم أيا ساعة بينزل؟ الساعة 8 ربح الف تاني يوم أيا ساعة بينزل؟ من بكير فيا ابني ما في الذ ولا اطرب ولا احلا ولا اجمل ولا اعظم من اسم الله اذكر اسم ربك ارجعوا يا ابني اجعل وقتك في ذكر الله مرته بتكون قاعدة نقول لها بين ما تهيئي الاكل انا لح اقعد هيك ربع ساعة لحالي ماسك المسبحة الله الله الله مرته بتقول له حطينا السفرة يقرأ الفاتحة يقوم يأكل وهو يذكر الله والله يا ابني الله يدوقن ما بقول لكم الا الله يدوقكم لما تضع اللقمة يا ابني بفمك تضعها بسم الله باسم الله تعلكها الحنك كلما تحرك حركة القلب يقول معها الله اللقمة تمضغها 15 مرة قلبك يذكر فيها 10 مرات 15 مرة الله الله الله اكلت عشر لقم 150 مرة الله الله قلبك تعبا بنور الله اسم الله سكن سكن في القلب عم يطلع الدم الى الرأس يمر على اسم الله يتنور بنور اسم الله اتى للدماغ غذى الدماغ بنور الله اتى لعينك غذاها بنور الله اتى لاذنيك غذاها بنور الله والحديث فبي يسمع وبي يبصر وبي يبطش قوتك بتصير بقوة الله الله يوفقكم يا ابني الله يوفقكم اضل معكم على ذكر الله حتى قلوبكم تعشق الله الله يوفقنا واياكم ويجعل الله لي ولكم من هذا المجلس حضورا معه دائماً وذكرا معه متواصلا اللهم اجعلنا من اهل القرب اليك ومن اهل الشوق اليك ومن اهل الخشية بين يديك واجعلنا اللهم من اهل الصدق والإخلاص واللهم صل على سيدنا محمد والحمد لله رب العالمين.
فاعلم انه لا اله الا الله.... لا اله الا الله سيدنا محمد رسول الله ﷺ
اللهم تقبل منا هذه التهليلة المباركة واوصل ثوابها وانوارها الى حضرة سيدنا ونبينا محمد ﷺ ثم الى روح شيخنا واستاذنا وقرة اعيننا والى روح والده سيدنا الشيخ محمد امين وزوجته وولده زاهر ووالدته اللهم أوصل ثواب ذلك اليهم واجعلها نورا يتلألأ بين أيديهم اللهم زد في حسناتهم وارفع درجاتهم وانفعنا من بركاتهم واجعل يا رب مثل ثواب ذلك في صحيفة سيدنا الشيخ محيي الدين ابن عربي وسيدنا الشيخ عبد الغني النابلسي والى أرواح ابائنا وامهاتنا وسابقة الى قبورنا اللهم اشرح صدورنا لمحبتك والهمنا دوام ذكرك ووفقنا لكمال طاعتك واجعلنا من اهل الصدق في محبتك والإخلاص في طاعتك اللهم اغفر لنا ولآبائنا ولمشايخنا ومن جالسنا ومن صاحبنا ومن نظر الينا مغفرة عامة شاملة وصلى الله على سيدنا محمد والحمد لله رب العالمين الى حضرة النبي واله الفاتحة