كان الاسبوع الفائت بحث ذكر الله عز وجل ونتمم اليوم هذا البحث مع ان ذكر الله لو بحثنا فيه سنة كاملة لما وفيناه حقه.. دائماً الحديث ان كان المتحدث عنه محدوداً فيكون الحديث محدوداً اما اذا كان الحديث عن غير محدود فالحديث غير محدود فاذا بدنا نتحدث عن انسان نتحدث ربع ساعة نص ساعة بينتهي.. عن عالم بينتهي.. اما الله فالحديث عن الله عز وجل لو تحدث الانسان في العمر كله لما وفى الحديث حقه.. واعظم ما يكرم الله العبد فيه ذكر الله عز وجل.. اعظم عطاء الهي يتفضل الله فيه على الانسان هو ذكر الله سبحانه.. من اعطي الذكر فقد اعطي الخير الكثير الذي لا حد له.. ومن لم يعط الذكر نسفت بركة الحياة من عمره لذلك نقول اكرم الله الذاكر بثلاث كرامات : اولاً – جعلك ذاكراً له هي كرامة من الله للانسان ان جعلك ذاكرا له ولولا فضله عليك لم تكن اهلاً لجريان ذكره عليك.. لولا الفضل منا اهل ان نذكر الله ولكن الله هو اهل التقوى واهل المغفرة جل جلال الله.. جعلك ذاكراً له.. ولولا فضله لم تكن اهلا لجريان ذكره عليك. تاني وحدة جعلك مذكوراً به.. عندما تذكره صرت مذكوراً بالله اذ حقق نسبته لديك.. جعل اسمه في قلبك في لسانك هذا قال تعالى : (فاذكروني اذكركم) وقال تعالى : (ولذكر الله اكبر) يعني لذكر الله لعبده اكبر من ذكر العبد لله سبحانه.. 3 – جعلك مذكوراً عنده.. يعني في الملأ الاعلى فتمم نعمته عليك . هالكرامات الثلاث التي عبّر عنهم سيدنا ابو يزيد البسطامي (رضي الله عنه) فقال : من ألهم الذكر فقد اعطي منشور الولاية.. يعني علم الولاية.. ومن سُلب الذكر فليس له في الولاية نصيب. ما بتذكر الله ما في ولاية ان يتولاك الله.. اما الذاكر فيتولاه الله بالعناية.. قال تعالى : (الله وليّ الذين امنوا) ثم وصف المؤمنين في اول صورة الانفال قال (انما المؤمنون الذين اذا ذُكر الله وجلت قلوبهم) معناتها الله يتولى الذاكرين لله.. من قام بذكر الله تولاه الله بالعناية حيثما كان في الدنيا او في الآخرة.. فجعلك ذاكراً له.. ما انت يلي بتذكره... ولكنه هو من يتجلى عليك فيلهمك الذكر فاذا ذكرت فمعناها اراد لك ان تكون من المقربين اليه من اوليائه الذين يتفضل الله عليهم بالعناية والفضل.. فجعلك ذاكراً له وهذا فضل من الله وجعلك مذكورا به (فاذكروني اذكركم) لما تذكره بيذكرك.. حسب نسبة الذكر لديك.. 3 – جعلك مذكوراً عنده لما تذكره يذكرك.. (فاذكروني اذكركم) .. فهي 3 كرامات للذي يشتغل بذكر الله عز وجل.. ثم اعلم يا اخي يا مؤمن يا ذاكر.. اعلم ما من يوم الا ولله فيه نعم ينعم الله بها على عباده.. وما انعم الله على عبد نعمةً افضل من ان يلهمه ذكره.. اعظم نعمة ربي يتفضل عليك فيها يلهمك الذكر.. تمسك المسبحة وتغمض عيونك وتنسى الخلق وتجلس بين يدي الحق تذكره وانت حاضر معه.. هي اعظم نعمة الهية يتفضل الله بها على الناس.. الانسان بيظن ان النعمة ان يعطيه الله المال يوسع عليه بالمال يوسع عليه بالبيت يوسع عليه بالنعم.. بيفكر هي النعم.. هي كلها نعم يا ابني زائلة اما النعمة الباقية هي ان يلهمك الله ذكره.. رضي الله عن سيدنا الامام البخاري لما كتب الكتاب ذكر فيه اول الكتاب نصف الحديث واخر الكتاب نصف الحديث.. ذكر حديث جمع كل علوم الدين بهالحديث هذا.. افضل ما قاله العبد : سبحان الله وبحمده سبحان الله العظيم.. هذا افضل ما يقوله العبد بحياته.. هذا الحديث الذي افتتح به الكتاب.. قال : كلمتان خفيفتان على اللسان ثقيلتان في الميزان حبيبتان الى الرحمن سبحان الله وبحمده سبحان الله العظيم. اولياء الله رضوان الله عليهم جعلوها بين سنة الفجر وصلاة الفجر فرض.. بين السنة والفرض ان تقال مائة مرة مع الاستغفار سبحان الله وبحمده سبحان الله العظيم استغفر الله.. جعلوها مائة مرة وهذا ثبت فيها الروايات من قالها 100 مرة غفرت ذنوبه وان كانت مثل الجبال.. سبحان الله وبحمده سبجان الله العظيم استغفر الله .. فهذا ذكر.. فان جعلك مذكوراً فهي نعمة الهية عم يتفضل عليك فيها.. اما اليوم ما فيك تذكر معناها سلبك هذه النعمة.. الله لا يسلب نعمه.. الله عز وجل يبارك لنا فيما رزقنا وارزقنا بالزيادة .. اللهم زدنا ولا تنقصنا واكرمنا ولا تهنا.. فتوفيق الله لك ان تجلس لذكره.. اما لما تقول والله اليوم ماني فاضي واليوم مشغول.. اعلم انك في هذا اليوم محجوب عن الله بعيد عن الله معنى ذلك بعدت عنك العناية الالهية وبعدت عنك الولاية الالهية بدل ما يتولاك بالعناية رفع عنك هذه العناية.. في الدول مثلاً لما بيكون الواحد وزير شو بيعطوه؟ حصانة الدولة.. فاذا الدولة رفعت الحصانة عنه صار واحد من الشعب.. معناتها اذا واحد اراد ان يتعدى عليه ما في عليه مسؤولية.. بيتعدى عليه بيضربه بيقتله ما في مسؤولية ليش لان رفعت عنه الحصانة.. اما اذا كانت موجودة حصانة الدولة اذا واحد اطلع فيه بعقدة المخابرات بتسحبه دغري بتعذبه.. فالولي في حصانة الهية.. هذه الحصانة الالهية الله عز وجل يحصنه من الشهوات او في الدنيا او ان تتسلط عليه الشياطين او ان تتسلط عليه النفس فهذا في عنايات الهية جل جلال الله .. ثم المؤمن الذي يذكر الله هذا عمّر وقته بالله.. الوقت تعمر بذكر الله.. وقد قال اولياء الله (رضي الله عنهم) قالوا : اذا عمّرت اوقاتك بذكر الله فعمرك طويل وان قلّت ايامه.. فهو عمر قليل آماده كثيرة امداده.. مدده كتير لو كان الايام قصيرة.. فهالايام القصيرة التي عاشها تعادل سنين من غيره.. واحد عاش 80 سنة غافل وواحد عاش 20 سنة ذاكر.. هال20 سنة افضل من 80 سنة.. 20 سنة بامداد الله وفيوضات الله واكرام الله افضل من 80 سنة في حب البطن وحب الهوى وحب الشهوات.. فاذا عمّرت اوقاتك بذكر الله فعمرك طويل وان قلّت ايامه.. ليش العمر طويل؟ لانك ستعيش يوم القيامة عمراً لا حدود له وانت مع الله.. دائماً الذاكر مع مذكوره يوم القيامة.. قاعدة ما ممكن تخيب مطلقاً .. كل ذاكر مع مذكوره.. لان الذاكر حبيب .. وكل حبيب مع حبيبه يوم القيامة.. المرء مع من احب.. فاذا ذكرت الله فانت محب لله.. وهي علامة الحب ان تكون ذاكراً فاذا ذكرت فانت محب وانت مع محبوبك يوم القيامة.. احببت رسول الله اكثرت من الصلاة على النبي ﷺ فانت معه يوم القيامة.. المرء مع من احب.. فاذا مانك ذاكر معناتها غافل والغفلة من الشيطان فانت مع من؟ كنت معه.. فالانسان لازم يحط الميزان.. البكالوريا بيدرسوا معادلات ما هيك؟ بي جيم تساوي جيم دال هاي تساوي هاي.. عال وين الميزان عندك يلي بدك تساوي فيه ذكر الله يعادل صلتك بالله.. ترك الذكر يعادل بعدك عن الله.. فانت هي ولا هي؟ حط هالمعادلة.. هالمعادلة هي ما عم يحطوها.. مسلم عرف الحياة والمادة والدنيا ولم يعرف الاخرة.. فلو كان المؤمن على حياة لكان قال كما قال الذي قال : كل وقت مع حبيبي قدره كألف حجة.. لذلك الذاكر يقول : اوقاتنا كلها ليلة قدر.. خير من الف شهر.. جلسة ذكر من اهل الذكر خير من الف شهر.. هيداك رأى انوار اما هذا حطوه وسط الانوار.. تكون انت مع نور الله جل وعلا.. كل وقت مع حبيبي قدره كألف حجة.. اذا اوقاتنا كلها ليلة القدر خير من الف شهر.. الله يجعل اوقاتنا كلها معمرة بالله يا ابني.. تتعمر بالله ما تعمرها بالكلام بالحكي.. يا ابني.. اذا بدنا نفسر هالاية هذه اذا بدنا نفسرها اقول لك يا ابني لقاءك مع شيخك ولو ربع ساعة خير من عبادة المتعبد 60 سنة.. هيداك تعبد ممكن يكون على غفلة.. انت بلقائك مع الشيخ.. كأنك التقيت بالحضرة.. دائماً حاضر مع الله عز وجل.. هذا الذاكر.. لذلك اهل الله رضوان الله عليهم اي لحظة نظرت اليهم وجدت قلبهم معتكفاً بالله.. في اي طرفة عين سواء في اي عمل في تعب في كذا تجده دائماً مع الله حاضر القلب مع الله.. ولو غاب القلب طرفة عين كما قال رضي الله عنه سيدنا الشيخ امين (رضي الله عنه وارضاه) قال : والله لو ان قلبي يغفل عن الله طرفة عين لاقتلعته من صدري والقيته للكلاب.. طرفة عين.. شو هالحضور مع الله عز وجل.. لاقلعه من صدري وارميه للكلاب.. ما خرج هالقلب يكون قلب محب.. القلب المحب لا يغفل عن حبيبه.. المحب لا يغفل عمن احب.. في حب فناء وفي حب هوا وفي حب البقاء وهو حب الله.. فاذاً الذكر يا اخواني ذكر الله عز وجل هذا عز هذا كرم هذا رفعة.. فلا تظنوا يا اخواني انه حبينا نحن الشيخ.. ليش حبيت الشيخ.. عطاك مال؟ لا.. عطاك وظيفة؟ لا.. طوبلك بيت؟ لا مشان ايش لكن عم تحبه كل هاد؟ يلي ما بيعرف ما بيعرف يا ابني.. بيقولوا يلي بيعرف بيعرف ويلي ما بيعرف شو بيقول؟ كف عدس.. شو عطاك الشيخ؟ عطاك الشيخ صلة لو بذل الانسان الدنيا كلها لا يدرك لذة مثل لذة ما ذاق هذا الاخ.. ذاق من لذة الحب.. طار نومه ما بقا ينام ما عاد نام.. مع انه الانسان لذته في الحياة ينام.. فقد النوم ما عاد في له لذة الا اذا نظر الى حبيبه وجالس حبيبه.. لانه راى من حبيبه قربه الى المحبوب الاول الله جل وعلا.. لذلك لما احب وعشق وتولّه السبب ان حبيبه مستغرق بمحبة الله تعالى.. فاي لقاء معه انت عم تلتقي مع ليلة القدر يا ابني.. افضل من ليلة القدر.. بليلة القدر بتلاقي كلهم واعيين قبل الفجر وجايين مشان ايش؟ ليحصّل ليلة القدر.. شو بدك تحصل بليلة القدر؟ بدي شوف السقف انشق السما انشقت الشجر سجدت عالارض.. هيدا حكي يا ابني.. يقول لك ليلة القدر .. قال جحي الله يرحمه كان راكب على الحمار وماشي قبل الفجر شاف ليلة القدر انشقت السماء والشجر كلها سجدت شاف ليلة القدر.. قام نزل ربط حماره بالشجرة اجا بدو يدعي انتهت ليلة القدر.. رجعت الشجر ارتفعت.. هذا حكي لك يا ابني.. ليلة القدر ليلة الشرف.. القدر هو الشرف واي شرف اعظم من شرف اللقاء بالله.. شرف ان تقعد تذكر الله في شرف اعظم من هذا الشرف؟ الناس يظنون الشرف انه يطول شواربه او الشرف يزبط طربوشه.. انه هذا الشرف؟ الشرف يا ابني الكامل ان يقبلك حبيبك تقعد معه.. هذا الشرف .. فاذا الله قبلك ان تكون ذاكر له وقبلك تقعد معه هذا يا ابني شرف الملوك ما حصلته.. لذلك الله يرضى عن الامام الجنيد لما ذاق هالذوق قال : والله لو تدري الملوك ما نحن عليه من اللذة لقاتلونا عليها بالسيوف.. انه الملك بده من لذائذ الحياة.. بده من النساء اجملهن.. بده من الاموال من المجوهرات.. لذة حياته من النعيم.. اما هذا لو شاف هاللذة الدنيا بما فيها بملكها وبمجوهراتها لا تساوي جناح بعوضة.. والله صدق رسول الله : لو ان الدنيا تساوي عند الله جناح بعوضة ما سقى منها شربة ماء لكافر.. لا تساوي جناح برغشة ما بتساوي.. فاولياء الله لما ذاقوا من حلاوة الحب ما ذاقوا ما عاد الهن دنيا.. ما له من حب الدنيا الا ليخدم عباد الله ويدلهم على الله.. هذا بتلاقي حبه للحياة حتى يدل عباد الله على الله.. لما الواحد بياكل اكلة طيبة وين ما قعد بيقول شو هالاكلة شو هالطعمة شو هالكذا.. بيصير بيذكر هالاكلة الطيبة.. ممكن يجتمع مع صاحبه بعد 20 سنة يقول له بعدها لذة اكلتك الطيبة تحت سناني.. 20 سنة.. معناتها عم يتذكر .. فكيف بمن ذاق حلاوة اسم الله؟ الله الله في له حلاوة بالقلب.. لو عرفها المسلم.. بعض اولياء الله رضوان الله عليهم شكوه للسلطان انه انسان متآمر على الدولة كذا فحكم السلطان بسلخ جلده وهو حي.. خي.. لو كان خروف ما بيجوز.. علقوه من رجليه بدؤوا يسلخوا جلده وهو حي وهو يترنم بأبيات حب لله سبحانه وتعالى.. الف بيت كتبوا عنه وهو عم ينسلخ وما أنّ انةُ ولا عنّ عنة.. وينه هذا؟ عم ينسلخ جلده.. وهو عم يذكر اشعار في حب الله في التقرب الى الله ما قال اخ.. يا ابني وين غرقان .. غرقان.. لما يكون العريس مع عروسته ليلة العرس .. اول ليلة العرس غرقان هو وياها ان قرصته زرقطة بيفز بيهرب بيعيط؟؟ غرقان ما حاسس فيها.. عشو يا ابني الحياة الله يكرمكن يا ابني بلذة حب الذكر.. الذاكر لما بيدوق الحلاوة الشيخ بيقول له نص ساعة بيقعد بيذكر .. بيطلع عالساعة اوف صارلي ساعة ونص والله انا مفكر نص ساعة.. ما حاسس. ساعتين ما بيحس.. استغرق في حبيبه مع حبيبه بدون ما يشعر.. واذا صار معك اللذة والله يا ابني بيمر عليك 8 ساعات وانت بجلسة الذكر ما بتحس بتعب دقيقة.. الحب يا ابني بينسي التعب بينسي الالم .. الله يكرمكن بالحب.. يلي بيعرف الحب بيعرف يلي ما بيعرف الله يدوقه .. الله يدوقك الحب.. يا ابني اهل الدنيا مشان محبة ما بتساوي جناح بعوضة بيسبوه بيقتلوه بيخانقوه بيهلك طول النهار .. بيجي للبيت ما عنده حدن ما قدران يتحرك.. تاني يوم بينزل عالشغل.. ما نمت مبارح كذا.. بدنا ننزل عالشغل.. حبه للدنيا نساه التعب.. فكيف محبة خالق الوجود يا ابني.. فبركة العمر يا ابني ان تدرك في عمرك القصير يقظتك مع الله.. بركة العمر ان تدرك في عمرك القصير يقظتك مع الله ما فات غيرك في عمره الطويل من غفلته عن الله.. عاش 70 – 80 سنة غافل عن الله.. انت بعمرك القصير تيقظ قلبك مع الله عز وجل.. شو هالبركة هي.. بركة العمر.. بيقولوا فلان عنده بركة بالعمر.. بتمر يا ابني 10 ساعات يلي بيعمله بالساعة غيره ما بيعلمه ب10 ساعات.. هي بركة العمر.. بركة العمر بالوقت القصير تاخد الاجرة الكتيرة.. لنجيب مثال.. العامل بيشتغل من عبكرا لعشية عم يزق الرمل والحجر والبحص بآخر النهار بياخدله 50 -100 ورقة .. مدير البنك بامضاية عم يقبض له 30 الف ليرة.. صح؟ امضي.. هذا بامضا هيداك عرق من عبكرا لعشية اخدله 200 ورقة.. في فرق بين هاد وبين هاد؟ هذا قاعد فنجان القهوة قدامه بشحبرة قبض 30 الف.. بتحسن تحط هذا متل هذا؟ هذا تعبان طول النهار مكنسيان بينزل تحت السيارة سقط البواط فوق منه على صدره على .. ما بيسأل .. بيقبض له 200 – 300 ورقة.. وهيداك بامضاية.. في منن ما بيمضي بيكون ماشي مشرف عم يطلع على عمل هذا وعمل هذا.. ماشي من اول الشهر عم يقبض له 30.. شو عمل ؟ عم يمشي.. هيداك عم يهلك وهيدا عم يمشي.. هذا قاعد وهيداك عم يتعب.. بيقعد مع الله دقيقة خير من عمر غيره 60 سنة.. ليلة القدر خير من الف شهر.. لذلك هلق لو قمنا كلامنا وحطينا كلام النبي ﷺ مجلس علم خير من عبادة 60 سنة.. طيب قعدنا بمجلس العلم شلون بدك تاخد خير من عبادة 60 سنة؟ قال نظرة الى وجه العالم خير من عبادة ستين سنة.. قاعد بالدرس ونظرت الى الشيخ شو صاروا؟ 120 سنة.. هالقعدة يلي قعدتها مع الشيخ افضل من 120 سنة .. ليلة القدر بتطلع 83 سنة و4 اشهر.. ليلة القدر خير من الف شهر الالف شهر بيطلعو 83 سنة و4 اشهر .. اي اعظم؟ ليلة القدر ولا جلسة مع الشيخ؟ جلسة مع الشيخ طلعت 120 سنة.. ليلة القدر 83 سنة اي اعظم؟ .. المسلم اذا ما عرف الواجب.. سيدنا يوسف صلوات الله عليه قال للملك "اجعلني على خزائن الارض اني حفيظ عليم" .. حفيظ للمال وعليم بخبرة الاقتصاد.. اجعلني على خزائن الارض.. بيجوز الواحد يطلب ويمدح حاله؟ نعم.. حتى يعرّف الغير بالمقام. نبينا ﷺ شو قال ؟ معه الصحابة قال : انا سيد ولد ادم ولا فخر.. حتى يعرفوا مقامه.. بدك تعرف مقام يلي قاعد معه مشان تنتفع منه.. اما ما عارف مقامه ولا شي واحد من الناس.. لا يا ابني.. انتفع بمن تجالس.. فلعل شهر رمضان يمر عليك ليلة واحدة ساعة واحدة افضل من كل الشهر يلي مر عليك.. مر عليك الشهر اكل وشرب ونوم .. ساعة حضرتها مع الشيخ في حضور قلب مع الله فيه نعم فهي خير من كل العمر يلي مر.. لذلك بركة العمر ان تدرك في عمرك القصير يقظتك مع الله.. تكون يقظ.. الله معي الله معي .. الله شاهد علي الله ناظر اليّ .. هي اليقظة دائماً تشعر ان الله شايفك مطلع عليك.. الله شاهد عليّ.. شايفك؟ نعم.. الله حاضر معنا نعم.. (ان الله بصيرٌ بالعباد) ( خبير بما تعملون).. عليم خبير بصير.. فهذا المؤمن يا ابني وين بقا ايمانك وين حالتك مع الله عز وجل.. فلذلك قالوا يا ابني المدد الذي يحصل للمريد مع العارف بالله في ساعة لا يحصل في ازمنة طويلة مع غيره.. لو تقعد 50 سنة مع غيره لا تحصل ما حصلته مع الوليّ الصالح.. مع غيره صلاة وصيام كتير ما بتحصل متل ما بتحصل مع الشيخ.. العبرة يا احبابي احفظوها.. العبرة بكثرة الإمداد لا بكثرة الأمداد.. بياع الفحم من عبكرا لعشية بيبيع قنطار فحم قديش قبض؟ قبض الف ورقة.. الجوهرجي بيبيع الماسة قد الفستقة بيقبض 50 مليون ليرة. هذا باع الماسة هلقد قد الفستقة ب 50 مليون.. هيداك قنطار طون من الفحم قبض الف ورقة.. العبرة بكثرة الإمداد ولو كانت صغيرة امدادها كبير.. لا بكثرة الأمداد.. باع بالطونات وقبض بالليرات.. هيداك باع بالغرامات وقبض بالملايين.. قديش في فرق بين هون وبين هون يا ابني.. فلا تجالس بياعين الفحم ولا بياعين الحطب.. جالس بياعين الالماس.. الماسة بيغنيك انت واولادك.. في الماسة في بريطانيا بتاج الملكة قدروها ب180 مليون دولار.. بالتاج قد الفستقة او اكبر من الفستقة.. كم ليرة سوري بيطلعوا هيدول.. يعني قريب المليار هالفستقة هي مليار؟ نعم.. اي والله انا بشتغل من عبكرا لعشية بيعطوني 70 ورقة .. يا ابني العبرة بكثرة الإمداد لا بكثرة الأمداد.. يا سبحان الله.. شوفوا هذا انزلوا بآخر المسكية في القبابية .. هون القبابية وهون الصاغة.. هذا الصاغة بيبيع بالغرامات والقبابية القبقاب هلقد قده قد قبقاب غوار الطوشة بيبيعك ياه ب10 ورقات.. هذا قبقاب هلقد بعشر ورقات وهيداك الماسة هلقد حقها قديه.. فهمتوا عليّ؟ العبرة بكثرة الإمداد لا بكثرة الامداد ولا بكثرة الاوراد.. ما شرط ان تكثر الاوراد ولكن الشرط ان تكون حاضر مع الله عز وجل.. ليش ذكرنا هالعبارة ؟ لقول النبي ﷺ : " ان الله لا ينظر الى صوركم ولا الى اموالكم ولكن ينظر الى قلوبكم واعمالكم.. " لذلك قال اولياء الله (رضوان الله عليهم) : ذرة من اعمال اهل القلوب توازي عمل الثقلين.. الانس والجن عم يعملوا .. ذرة من اهل القلوب توازي من عمل اهل الثقلين.. عم يزينوا بأي ميزان وزنوه؟ (رضي الله عنهم) عم يزينوا بميزان الحطب او بميزان ؟ .. الكفة هالقد ووزن قنطار ب30 ليرة.. قنطار حطب يعني الف كيلو ب30 ليرة.. هذا ميزان وميزان الجوهرجي ميزان.. قد القطايفة.. ميزان الجوهرجي بيحطلك ياه بالغرامات... والله انا مرة في جدة مبعرف اذا كان معي الاستاذ محمد ولا لأ.. في جدة شفت خاتم متل الشمس عم يعطي ضو وقفت قدامه قلناله بقديش هيدا الخاتم؟ اطلع فيّ قال لي روح يا حاج روح هيدا مو الكن.. قلت له ليش بتحتقروا عباد الله؟ بركي انا بدي اشتري؟ قال لي : يا شيخ هذا مو الكن.. قلت له قل لي هي بتساوي هيك.. قال لي : ان قلت لك ما تصدق.. قلت له مبلا بصدقك.. بس قل لي الحق.. قال لي: هذا حقه 50 مليون دولار. بقديش؟ قال لي : هذا للبنات يلي هونيك يا ابني مو الكن.. 50 مليون دولار..؟! سكت هيداك اطلع.. يا ابني هذا له اهله.. ما كل واحد بيشتريه .. في ناس بيدفعوا بيلاقوه رخيص.. اما انا لقيته غالي لاني ماني اهل لهالمصلحة.. كمان يا اخواني اهل الله اهل القرب اهل الحب اهل الشهود فأغلى من الاماس واغلى من كل الوجود.. في واحد بيتطلّع متلي متله شو الفرق يعني.. ما في فرق يعني.. هيك بعض الناس نظروا لرسول الله.. فالله عز وجل انزل (قل انما انا بشرٌ مثلكم ) لكن في شي خاص جوهر خاص (يوحى اليّ) منين بدك تجيب الوحي.. يوحى اليّ.. لما سألوا ابو جهل شو رأيك انت عم تسمع من النبي شو رأيك؟ قال له: اطعموا فأطعمنا وفعلوا ففعلنا وعملوا فعملنا فلما صرنا نحن وياهن كَفَرسي رهان.. نواجه بعضنا البعض قالوا منا نبي.. من اين ناتي بنبي يوحى اليه نحن؟ منين بده يجي هيدا؟ هي شغلة الهية.. فيا ابني لذلك قالوا الله يرضا عنهم : النظر الى وجه العارف خير من عبادة النوافل وشهود الغافل سمٌّ قاتل.. شهود الغافل تنظر لواحد غافل سم قاتل.. اذا نظرت له ومال قلبك دخلت الغفلة الى القلب فيموت القلب عن ذكر الله.. بمجالسة غافل.. بيع وشري ما بياثر.. بس مال القلب اذا مال قلبك للغافل مات قلبك عن الله.. شهود الغافل سم قاتل.. بينما النظر الى وجه العارف حياة للقلب.. حياة.. اسال الله ان يوفقنا واياكم.. اجمع اولياء الله رضوان الله عليهم والعارفين بالله.. قالوا : من أُكرم بمجالسة العارف على حب منه فقد حاز على سعادة الدارين.. الدنيا والاخرة.. ليش؟ عبارات ما بعرف اذا كان بتحسنوا تتحملوا .. عبارات اولياء الله رضوان الله عليهم الله يجعلنا واياكم من الذاكرين.. حتى يتحمل الواحد عبارات اهل الله.. قالوا : لسان العارف قلمٌ يكتب في الواح قلوب المريدين فربما كتب في لوح قلبك ما لم تعلم معناه .. لكن لما تكبر وبتدوق بتعرف شو كتب في قلبك.. قال الله تعالى : (كتب في قلوبهم الايمان.. ) شلون كتب الله في قلوبهم الايمان اقرأ قول الله تعالى (اقرأ باسم ربك الذي خلق) قال له ما انا بقارئ.. النبي ما عرف لا كتابة ولا قراءة.. اقرأ.. معناتها في كتابة.. بده يقرأ بكتابة ولا بلا كتابة.. اقرأ باسم ربك.. شو بده يقرأ؟ ما كُتب في قلبه باسم الله.. اقرأ باسم ربك.. ما كتب في القلب باسم الله كتب في قلوبهم الايمان وايدهم بروح منه.. الاية في القرآن .. فشو كتب في قلبك؟ لما الشيخ عم يقول لك يا ابني غمض عيونك ولاحظ قلبك يقول الله الله.. غرس اسم الله في القلب.. فاذا انت طلعت موفق وسقيت هالبزرة هي .. هالبزرة لح تتفتح وشروشها تمتد وتتفتح وتطلع (ومثل كلمة طيبة كشجرة طيبة اصلها ثابت وفرعها في السماء).. مددها من العرش.. (تؤتي اكلها كل حين بإذن ربها) هي السماء كل لحظة بتعطيك فتح جديد ومدد جديد وعطاء جديد.. هذا يا ابني الذاكر لله.. فيا ابني لا تفرحوا بمجالسة الشيخ اذا ما شتغلت بذكر الله لا تفرح.. اذا ما شتغلت بذكر الله لا تنتفع يا ابني.. اثر الشيخ للمريد يا ابني يظهر في الحب ويظهر في الاعمال ويظهر في الامداد والانوار تظهر فيك اسرار اهل الله بتشوف حالك انجذبت .. شو يلي صفي ما كنت هيك.. شو يلي جذبك؟ والله انا حبيت لا يا ابني.. حبك فجذبك الى حبه.. ولو ما حبك ما بتنجذب.. في كتار بيحضر وبيمشي.. ما صار له هالجذبة هي لذلك ما علق.. فشو يلي صار معك؟ اساله قل له اخي شو صار لك ما كنت هيك شو صار لك؟ لك والله ما عارف شو صايرلي.. والله صباحي ومسائي وحياتي كله عن الشيخ.. لك عطاك شي مصاري؟ لا.. لكن شو ؟ وظفك ؟ شو ؟ هيك حاسس بقلبي صرت حبه.. الله.. اقرأ قول الله تعالى (يحبهم ويحبونه).. لو ما حبك ما حبيته.. يحبهم واذا كان الكريم العظيم احبك معناتها ملكك ما عنده.. فاذا عطاك مفتاح الخزاين هذا حبه.. خزاين المال لك يا ابني كلها تفنى.. اما يعطيك مفاتيح القلوب تنجذب القلوب بدون تعب بدون .. انجذب القلب والفكر انجذب شو صار لك؟ هيداك سكران طيب وانت؟ يا محلا هيداك السكر بيصحا .. شارب الخمر يصحو بعد سكرته.. وشارب الحب طول العمر سكران.. ما بيصحا.. غرقان في بحر الحب.. الله عز وجل يوفقنا.. لذلك قالوا امور غريبة قالوا : قلب العارف بالله كالنار : "لا تبقي ولا تذر".. شو معناتها؟ لا تبقي غفلة ولا تذر حجاباً.. "لواحة للبشر" تدل الخلق على الله.. تلوح للبشر بالدلالة على الله.. سيدنا موسى شو قال ؟ اني انستُ ناراً... لعلي اتيكم منها بقبس.. طلعت ما نار.. طلعت فلما اتاها نودي يا موسى اني انا الله لا اله الا انا فاعبدني.. فقلب العارف كالنار لا تبقي ولا تذر لواحة للبشر.. لذلك لح انصحكن نصيحة.. الله يجعلكم من اهل الذكر يا ابني.. النصيحة يا ابني : الحّ على الكرام بالسؤال.. هي كلمة مخباية.. الحّ على الكرام بالسؤال.. اكرم الكرام .. النبي قال ﷺ : الا اخبركم عن الاجود الاجود؟ الله الاجود الاجود وانا اجود ولد ادم ﷺ.. اجود الناس بعد النبي قال : واجودكم من بعدي رجل علم علماً فنشر علمه يبعث يوم القيامة امة وحده.. هذا العالم الذي نقول : الحّ على الكرام بالسؤال.. السؤال هنا هو الرابطة.. الح على الكرام بالرابطة يلي بدك امدادك منها وان لم تكن اهلا للعطاء.. لو ما انت اهل خليك عالباب عم تدق.. عالباب انا عالباب عم تدق.. فانّ لهم اخلاقاً جميلة لا يردون طالباً. وهذا فضل الله.. في شرق الارض في غربها وين ما قعد المريد بمجرد ما تكون له الرابطة يكون له الامداد.. واذا الله احياني بالدرس الاتي عن الرابطة الدرس.. شو هي الرابطة شو سرها شو عطاءها اذا الله احياني الدرس الجاي.. اذكروا الله بس يا ابني حتى تفهموا عليّ بعض الكلمات .. بعض الاوقات في الشيخ بيحكي نص ساعة يا ابني ما بيفهم عليه ولا كلمة.. ليش ما فهم؟ عم بحكي بالعربي ليش.. بده يا ابني قلب.. بدكن تفهموا من قلوبكم ما من آذانكم .. يلي ما له قلب ما بيفهم يا ابني.. والله كلنا لنا قلب.. هذا القلب يا ابني هذا قلب الخواريف هذا قلب الدجاج.. اما بدك قلب حاضر مع الله ذاكر لله.. اذكر وتعال خود .. من طلب الله فليطلب نور اولياء الله.. اذا اردت الوصول الى معرفة نور الوليّ فاطلب الله تعالى.. ذكر الله بيكشفلك الغطاء عن حالة العارف بالله عن حالة الشيخ.. كلما ذكرت تنكشفلك الحالة اعظم.. لذلك بتزيد حب وعشق وتزيد حتى .. فهناك تجد الله في قلوب اهل الله لانهم ودائع غيبه وخبايا حضرته.. جل جلال الله.. هذا الذكر الذي نذكره لو حدا قال لك اخي هذا الذكر ما صحيح.. شو بدك تقول له؟ شو الجواب؟ نحن مقيدين يا ابني بالقرآن والسنة.. خذوا الدليل من القرآن والسنة.. اذا قال لك : انه قال الله تعالى ما بقا في شك.. قال الله تعالى (واذكر اسم ربك بكرةً واصيلا) واذكر اسم ربك شو اسم ربكن؟ الله.. بيجي بده يخربط عليك يقول لك الله قال : ولله الاسماء الحسنى فادعوه بها.. كلها اسماء الله قل له لا تخربط.. اسم الذات شو هو ؟ الله.. اما الاسماء التانية صفات : الرحمن الرحيم القادر المقتدر القهار الجبار هي كلها صفات.. اما اسم الذات : الله. (واذكر اسم ربك) اسم الذات الله.. الله اكبر.. طيب.. وفي قوله تعالى (في بيوت اذن الله ان ترفع ويذكر فيها اسمه).. اسمه جامع ما تعمر مشان تطج ال4 ركعات.. تعمر مشان تذكر اسم الله في الجامع.. (في بيوت اذن الله ان ترفع ويذكر فيها اسمه).. جل جلال الله.. هذا تحقيق اسم الله.. في هناك ايات للذكر (نسبحك كثيرا ونذكرك كثيرا.. ) (اذكروا الله ذكراً كثيرا).. الله خاطب سيدنا موسى قال له (اذهبا بآياتي ولا تنيا في ذكري) كلها .. (ان الصلاة تنهى عن الفحشاء والمنكر ولذكر الله اكبر )بالنهي من الصلاة.. لذلك المصلي يقع في الخطايا اما الذاكر ما دام الله معه لا يحسن.. (ان هو الا ذكر وقرآن مبين) (واقم الصلاة لذكري).. (ذلك ذكرى للذاكرين) (والذاكرين الله كثيرا والذاكرات) (واذا قضيتم الصلاة فاذكروا الله قياما وقعودا وعلى جنوبكم) هيدا كله ايات ذكر.. ايات الذكر بالقرآن بلغت تقريبا 300 اية.. الذكر ذكر ذكر كله.. نعم.. بعض اوقات الواحد بينشغل.. مين شغلك عن الذكر.. اقرأ قول الله تعالى (انما يريد الشيطان ان يوقع بينكم العداوة والبغضاء في الخمر والميسر ويصدكم عن ذكر الله وعن الصلاة ) يلي خلاك تنشغل الشيطان بعدك عن الذكر.. (ويصدكم عن ذكر الله وعن الصلاة) .. مفكر حاله عم يصلي والشيطان مبعده عن ذكر الله.. اكتر المصلين مفكر انه صلى صار مسلم.. يا ابني اذا ما بتذكر الله لسا ما صرت مؤمن.. الايمان ذكر الله.. ما بتذكر الشيطان بعّدك.. ويصدكم .. شو الصد؟ بعّده .. ويصدكم عن ذكر الله وعن الصلاة.. شو الحج؟ الله قال : (فاذكروا الله كذكركم اباءكم او اشد ذكرا).. فاذكروا الله في ايام منى.. ايام منى ايام اكل وشرب وذكر الله تعالى.. هي ايام منى.. (فاذكروا الله قياما وقعوداً.) كلها ايات ذكر في القرآن.. اما الذكر القلبي يلي علمتكن ياه الذكر القلبي لحاله قال الله تعالى فيه (واذكر ربك في نفسك تضرعا وخيفة) .. في النفس في حدن بيطلع عليها؟ والذكر ما حدن بيطلع عليه.. لما تمسك مسبحة وتذكر او تدخل في الحضرة الله الله الله .. هذا ما ذكر نفسي.. ذكر النفس ما حدا بيحس فيه.. قاعد... عم تذكر الله الله الله في قلبك ما حدا حاسس عليك.. هذا الذكر النفسي.. وبيّن الله تعالى ثمرة هذا الذكر قال (الذين اذا ذُكر الله وجلت قلوبهم ) بيصير عنده خشية من الله بيصير عنده خوف.. ما خوف العذاب.. الذاكر ما بيخاف من العذاب لكن بيخاف ان ينظر الله اليه وهو على غفلة.. ينظر لك انت تحبه بيطلع عليك وانت غافل عنه مشغول بغيره.. هذا الخوف.. (الذين آمنوا وتطمئن ) ألسنتهم ؟؟ (وتطمئن قلوبهم ) بالتسبيح ؟؟ (بذكر الله) (تطمئن قلوبهم بذكر الله ) القلب ؟ نعم يلي عم يحصل على الطمأنينة القلب والطمأنينة انس وهي روحانية الذكر هي انس بالله.. يستأنس بالله.. من هذا الانس لا يحس بتعب لا يحس بوقت لا بيحس بألم.. غرقان من دون احساس مع الله.. الذاكر لما بيخلص الذكر بده يفز.. آه.. والله مالي قلب قوم.. بيرجع بيمسك المسبحة صرلك ساعتين قوم.. متلذذ .. الله يدوقكن هالحلاوة يا ابني.. الله يدوقكن يا ابني حلاوة الذكر.. والله يا ابني والله للذة لحظة مع الله والله خير من ملء الدنيا ذهباً.. يلي بيعرف بيعرف .. ويلي ما بيعرف بيقول كف عدس؟ الله يوفقنا.. والاية العجيبة (رجال لا تلهيهم تجارة ولا بيع عن ذكر الله) يعني ولا اعمال ولا اصحاب ولا اهل ولا اولاد عن ذكر الله.. ذكر لك البيع والشري وقصد كل الحياة.. لا تلهيهم.. جيبولي واحد عم يذكر وعم يبيع ويشتري.. شلون بده يقول له هي المسبحة حقها 100 ليرة.. لا 90 لا 95.. عم ياخد ويعطي وهو عم يذكر الله.. عم يقول لا اله الا الله وشلون بده يقول له السعر.. يبيع ويشتري بلسانه وقلبه مع الله لم يغفل طرفة عين.. هذا الذاكر.. فانت يا ابني جزئين .. انت لك كم حاسة؟ الحواس كم حاسة؟ يلي بيعرفوها الناس 5 حواس : العين والاذن واللسان والانفس حاسة هي صاروا 4 واللمس هي 5 حواس.. عند اهل الله 6 حواس مو 5.. الحاسة السادسة : القلب.. لما بتحس فيه عم ينبض الله الله الله.. هذا غير لما بترتعب لما بتتعب .. الواحد لما بيركض كتير بيحس قلبه عم يخض هذا عم يخض من التعب.. دقة القلب زادت.. اما الذكر دقة غير دقة القلب.. دقة القلب يا ابني دقتين بدقة.. طب طب دب.. طب طب دب.. هي دقة القلب.. اما دقة الذكر : الله الله الله الله الله.. شوف هالدقة ما احلاها .. ولما بتطلع فيها نغمتها .. نغمتها الله الله الله.. يا الله.. وين.. الانسان (لا تلهيهم تجارة ولا بيع ) ولا اهل ولا مال ولا وظيفة ولا اصحاب ولا.. عن ذكر الله.. غرقان بذكر الله هذا وين عم يذكر بلسانه ؟ هذا ذكر القلب.. بده يعمل عملية بإيديه عم يشتغل وقلبه مع الله عم يشتغل.. واحد خيّط العملية بيومين لحم الجرح غيره خيط العملية بعد يومين فتق الجرح شو الفرق بين هذا وذاك؟ هيدا في سر الله بشغله هيداك ما في .. لذلك يا ابني قبل ما تروح عند طبيب اسال عنه .. في طبيب تاجر وفي طبيب منقذ.. في طبيب بده يعبي جيبته وفي طبيب بده ينقذك من المرض حبا في الله شوقا الى الله.. هذا متل هاد؟.. يا ابني الله يوفقنا واياكم.. سمعتوا ايات الذكر؟ قال تعالى (ألم يأنِ للذين آمنوا أن تخشع قلوبهم لذكر الله) .. الم يأن؟ آن الاوان؟ عم بيسألكن.. ألم يأنِ؟ للذين امنوا ان تخشع قلوبهم لذكر الله.. آن الاوان.. يلا قوم عالذكر اشتغلوا بذكر الله حتى القلب يمتلئ حضورا مع الله عز وجل واياك ان تكون ممن نهاك الله عن مجالستهم لقوله تعالى (ولا تطع من اغفلنا قلبه عن ذكرنا).. لا تمشي معه لا تقعد معه.. في اية تانية بسورة الزمر.. (فويل للقاسية قلوبهم ) ويل هلاك شقاء.. فويل للقاسية قلوبهم من ذكر الله.. الله عم يقول ويل وانت مانك حاسس بحالك.. قلبك ذكر ؟ لا.. اي ويل .. هلاك وعذاب.. نسألأ الله العفو والعافية.. وين ماشين الناس ؟ وين ماشين في الغفلات اشكروا الله انه الله دلكم.. بس والله يا ابني هالجلسة والله مسؤولية عليكم كلكم.. من لم يعمل بذكر الله سوف يؤاخذ يوم القيامة على هالجلسة هي.. صارت حجة عليكم عند الله .. سمعت؟ نعم.. تعلمت؟ نعم.. الشيخ قعد معك ساعة ساعة ونص.. فهمت؟ نعم.. شو عملت؟؟ ماذا عملت فيما تعلمت.. هذا السؤال بكرا يوم القيامة.. ماذا عكلت فيما تعلمت.. والله ما فضيت .. لا والله مو شغلة ما فضينا يا ابني.. مشغولين.. لا والله.. لكن الله ما بده ياك.. اكلك حرام وعملك حرام.. ولهوك كتير.. وشهواتك كتيرة.. ما بيليق فيك ان تقعد مع الله طالعوه لبرا.. يلي بده الله يطهّر لقمته يطهر قلبه لا حقد ولا حسد ويطهر بطنه من الحرام ويترك اللهو ويترك الانشغال عن الله بيلهمك الذكر بتقرب لعنده.. فويل للقاسية قلوبهم من ذكر الله.. هذا ما ورد في القرآن هذا جزء من الايات واما ما ورد في الحديث ﷺ.. روى البيهقي عن عائشة (رضي الله عنها) قال رسول الله ﷺ : "الذكر الذي لا تسمعه الحفظة يزيد على الذكر الذي تسمعه الحفظة سبعين ضعفاً".. 70 ضعفا.. واحد عم يقول لا اله الا الله وواحد عم يقول بقلبه الله الله .. اكتر ب70 مرة من الفم.. هذا بالقلب.. الملائكة لا تسمع الذكر ..ورد في بعض الاخبار ان ملكا يصعد الى الله فيقول يا رب ماذا اكتب لعبدك ؟ ارى نورا يهبد ونوراً يصعد.. نور نازل على القلب ونور طالع.. شو بدي اكتب؟ فيقول الله تعالى للملك : اكتب ما رأيت فاذا اتاني عبدي جزيته بما اعلمه منه.. نور عم يهبط باسم الله ونور عم يطلع من القلب .. الله اكبر.. هذا الذاكر يا ابني .. هذا ذكر القلب.. وفي حديث النبي ﷺ رواه ابن المبارك (رضي الله عنه) عن ضمرة ابن حبيب قال ﷺ: "اذكروا الله ذكراً خاملاً".. قيل وما الذكر الخامل؟ قال : الذكر الخفي.. وروى الامام احمد (رضي الله عنه في مسنده وابن حبان والبيهقي عن سعد (رضي الله عنه ) قال رسول الله ﷺ : خير الذكر الخفي وخير الرزق ما يكفي.. هي 3 احاديث على ذكر القلب.. واحد بيقول والله انا بحب اذكر بس ما عندي وقت. بقول لك اسمع يا ابني.. قال رسول الله ﷺ : "علامة حب الله حب ذكر الله وعلامة بغض الله تعالى بغض ذكر الله".. في رواية ترك ذكر الله.. ترك الذكر علامة انك تبغض الله لا تحب الله.. بيقول انا بحب الله لكن ما فاضي اذكر الله .. كذاب ما بتحب الله.. لو حبيت الله لحبيت ذكره.. علامة بغض الله ترك ذكر الله.. خليني معكم يا جماعة.. يا ترى يلي عم يذكروا اكتر ولا يلي تارك الذكر اكتر؟ انت بتحب الله ولا مبغض لله ؟ يقول والله انا بحب الله بس ما عم بفضى للذكر.. ما حدا علمني الذكر.. لازم تروح تتعلم اسال وين اهل الذكر وتعلم ذكر الله عز وجل.. منين بدي اتعلم ذكر الله ؟ النبي بيعلمك ﷺ.. علامة حب الله حب ذكر الله هذا الحديث رواه الامام البيهقي (رضي الله عنه) .. منين بدنا نتعلم الذكر ؟ اسمع.. قال ﷺ : "ان من الناس مفاتيح لذكر الله اذا رؤوا ذُكر الله".. دخيل النبي انا دخيل سيدي رسول الله.. يعني النظرة للشيخ مفتاح للذكر؟ لما تنظر الى وجهه تنظر الى ذكر.. بتصير انت بتشتغل بالذكر.. اول ما بتشوف الشيخ بتشتغل بذكر الله.. سكران اذا شاف الشيخ .. سكران يلي حكيتلكن عليه لما شاف الشيخ من بعيد : لا اله الا الله.. صار يروح ويرجع يذكر الله.. اذا رؤوا ذكر الله.. حديث تاني هذا الحديث رواه الطبراني.. حديث الترمذي (رضي الله عنه) : "ان اوليائي من عبادي " هذا حديث قدسي عن الله عز وجل.. الله عم يدلك على اهل الذكر.. "ان اوليائي من عبادي واحبائي من خَلقي الذين يُذكرون بذكري واذكر بذكرهم" .. ﷺ.. يذكرون بذكري.. لما بدك تذكر الله بتعمل رابطة ولما بتعمل رابطة ذكرت الله.. ما دليل هذا؟.. هذا حديث قدسي النبي ﷺ ذكرلنا ياه هذا كله مشان ايش؟ نعرف مين يلي بده يدلك عالذكر ؟ مين بده يعلمك الذكر.. ﷺ قال موسى يا رب وددت يعني تمنيت اني اعلم من تحب من عبادك فأحبه.. يا ريت اعرف يلي انت بتحبه مين لحتى حبه انا كمان.. نبي الله سيدنا موسى كليم الله.. يا رب وددت اني اعلم من تحب من عبادك فاحبه. قال الله تعالى : يا موسى اذا رأيت عبدي يكثر ذكري فانا اذنتُ له في ذلك وانا احبه.. الله.. واذا رأيت عبدي لا يذكرني فأنا حجبته من ذلك وانا ابغضه.. حديث رواه ابن عساكر عن عمر (رضي الله عنه) .. ما بس يذكرني.. يكثر ذكري.. الله اذن لك بالذكر حتى تذكره.. هيدا ذكر فاذا ذكرته ذكرك بالامداد والعطاء.. ذكرك الله مرتين حتى تذكره انت مرة.. دخيل الله.. مفكر حالك عم تصلي الله يبغضك ومانك حاسس على حالك.. الله يبغضك بعدك عن الذكر قال والله مشغول وماني فاضي.. والله بعده عن الذكر ابغضه.. مانه حاسس على حاله ايه روح ابكي على حالك بدال الدمع ابكي الدم.. الله ما حبني بعدني عن الذكر.. اذا بده ياك تذكره بيدلك على احبابه.. واذا جالست احبابه بيعلمك الذكر بتصير من الذاكرين.. الله عز وجل يوفقنا واياكم .. اللهم اجعلنا ممن يذكرك كثيراً ويشكرك كثيراً .. احاديث الذكر كثيرة.. عندي حول 50 حديث كله عن الذكر بس ما حاجتكن.. شو بدي اعطيك اكتر من هيك.. اللهم اجعلنا من الصادقين في محبتك المخلصين في طاعتك ووفقنا اللهم لما فيه رضاك عنا ظاهرا وباطنا انك على ما تشاء قدير.. وصل اللهم على سيدنا محمد..