كنت اليوم اريد ان أكمل لكم التفسير لكن اشار عليّ بعض الاحباب ان يكون مجلسنا اليوم عن الاسراء والمعراج. لح نشرح الاسراء بناحية علمية ومنذكر بعدين الناحية الشرعية التي وردت في صحيح بخاري ومسلم. من المسلّم عند كل مسلم من المسلمين ان حادث الاسراء والمعراج حادثة معجزة لا يمكن لاحد من البشر ان يأتي بمثلها او بشبهها. وهي جزء من سيرة النبي ﷺ.. سيرة النبي ﷺ سيرة طويلة من سيرته ﷺ الاسراء والمعراج. فهذه رحمة يتيمة في تاريخ البشر. يعني لن يكون مثلها ولن يأتي احد بمثلها.. يتيمة متل الجوهرة اليتيمة بتاريخ البشرية. هذه الرحلة جمعت افضل البشر مع افضل الملائكة ﷺ.. ليعرج به الى اي طريق؟ ليعرج به الى سدرة المنتهى حيث ينتهي عندها علوم الخلق وعلوم الحق.. ما نزل من السماء وما يصعد من الارض.. فهي قصة عجيبة وهي من اغرب ما يكون من سيرة النبي ﷺ.. هذه القصة ربطت الارض بالسماء هذه القصة ربطت الاحياء بالاموات وربطت القريب بالبعيد.. وربطت الانسان بالملائكة.. قصة من اعجب ما يكون ﷺ.. كما انها ربطت الحاضر بالماضي والمستقبل بالحاضر وهذا كله برحلة بسيطة ما تعدت الدقائق.. يعني ربع ساعة نص ساعة ما تعدت.. هذه الرحلة جعلت قريش تنكرها انكرت هذه الرحلة لانه اذا بدنا نطبقها على العقل غير منطقية العقل هنا يتعطل ولا ما بتسمعوا لا يبقى للعقل مستوى ان يبحث في هذه القضية ﷺ.. لذلك هلق نحن لو جينا بعصر الناتو والذرة وبينا لهم انه عرج لكذبوها.. بعصر الناتو والذرة.. وقال الله تعالى : (وما جعلنا الرؤيا التي أريناك الا فتنة للناس) امتحان بيمتحن الايمان هل ايمانك بقدرة الله ايمانك قوي ولا ضعيف؟ ممكن ولا ما ممكن؟ قدرة الله عز وجل لا يعجزها شيء. لح اضربلكن مثال بسيط مشان العقول شوي شوي تتفتح.. اولاً المسافة بين مكة المكرمة وبين القدس حوالي 1200 كلم. خلينا نقدّر انه 1000 كلم. الانسان اذا بده يمشي مشي بيقطعها ب200 ساعة متواصلة تقريباً بسرعة 5كلم بالساعة.. اذا مشي 5 كلم بالساعة بده 200 ساعة حتى يصل من مكة الى القدس. اما اذا مشي عالدراجة الهوائية عالبسكليت او عالطقطيقة بده 50 ساعة. بسرعة 20 كلم بالساعة.. هذا متواصل.. بينما لو ركب السيارة.. السيارة تقطع هذه المسافة ب10 ساعات بسرعة 100 كلم بالساعة.. شايفين عم نتدرج هلق ماشي بعدين دراجة هوائية بعدين السيارة. اذا كان بدنا نقطع بالقطار السريع بتقعد معنا 3 ساعات وتلت من مكة الى القدس بسرعة 300 كلم. اما بينما الطائرة تقطعها بساعة واحدة بسرعة الف كلم بالساعة.. بساعة واحدة تقطعها.. بينما طائرة الميراج تقطعها ب50 دقيقة. لما تكون سرعتها 1200 كلم بالساعة .. 50 دقيقة.. هي السرعات الآن انتهت.. سيارة وطيارة كلها بالنسبة للجو ما بقا لها فراضية.. الان سرعة مكوك الفضاء الى الارض 36 الف كلم تنقطع المسافة بين مكة والقدس بدقيقتين. اعلى سرعة اخترعها الانسان سرعة سفينة الفضاء هي اعلى سرعة تبلغ 692017 كلم بالساعة.. تستغرق الرحلة بين المدينة وبين القدس دقيقة واحدة.. هذا اذا كان سفينة الفضاء.. تركونا من هالمقاييس هي خلينا ندخل بالمقاييس الحاضرة.. الان ما في كيلومترات بالنسبة للجو في سرعة الضوء. سرعة الضوء بالثانية بيمشي قديش ؟ 300 الف كلم بالثانية الواحدة.. المسافة بين المدينة وبين القدس تقعد معنا 6 بالمليون جزء من الثانية.. يعني اسرع من لمح البصر.. سبحان الذي بيده ملكوت كل شيء.. لا اله الا الله ملكوت السموات والارض.. سرعة الضوء هنا اذا بدنا نستخدم هالسرعة لو استخدمها الانسان جدلا من مكة الى نيويورك (بامريكا) لو بده يسافر بتقعد معه 10 الاف كلم بسرعة الضوء تقعد معه 6 بال100 الف جزء من الثانية.. يعني اسرع من لمح البصر.. بينما لو استخدمت السرعة نفسها السفر للقمر لنطلع لفوق شوي اذا كان السرعة الى القمر بمعدل بعده عن الارض 381706 كلم. هذا البعد بيننا وبين القمر.. لو ركبنا بهي سرعة الضوء تنقطع المسافة بيننا وبين القمر بثانتين. لو سافر الانسان بسرعة الضوء الى الشمس الشمس تبعد عن الارض متوسط 149,600,00 كلم. هذا الرقم القياسي.. لو سافر الانسان الى الشمس بيتحمل الطريق معه 8 دقايق .. للقمر دقيقتين.. للشمس 8 دقايق.. يعني قديش تبعد الشمس عن القمر 4 اضعاف.. بينما الرحلة بين كوكب الارض وابعد كوكب في المجموعة الشمسية التي نعيش عليها تقعد معنا 59 مليار كلم.. على السرعة نفسها.. تستغرق 3 ساعات و28 دقيقة.. هذا لساتنا بالمجرة الارضية يلي نحن فيها ما طلعنا منها.. هي اذا كان بدنا نطلع الى اقرب كوكب بيننا وبينه.. خلينا نتخيل نحن هالبينية قديش بين هي وبين هي.. شلون المسافة البعيدة بين هالكوكب وهالكوكب.. بين الارض وبين بلوتو هذا نجم من النجوم السرعة يلي بدها تحملك من مكة الى نيويورك سرعة الضوء تستغرق معها لمح البصر.. من هون لنيويورك قدي لح تقعد معنا ؟ 6 من 100 الف. اما بين الكوكب وكوكب بين الكوكبين 3 ساعات و28 دقيقة.. قديش في فرق بين الكوكبين .. لا اله الا الله (أأنتم اشد خلقاً ام السماء).. السماء جل جلال الله.. قديش نحن ضعاف بجسمنا وقديش ضعاف بتفكيرنا .. طيب نحن سكان الارض لو سافر الانسان بسرعة سفينة الفضاء كما قدرنا وتبلغ 692017 كلم بالساعة ، لو سافرنا وقدرنا هالرحلة بين الكوكبين 650074 ساعة يعني 2711 يوم.. هذا اذا كان بدنا نسافر الى كوكب بلوتوث.. ابعد من الشمس بكم مرة؟ جل جلال الله.. منحسن نقول (ربنا ما خلقت هذا باطلا سبحانك) لا اله الا الله.. كلياتها هي جوات مجرة الارض يلي نحن فيا المجرة الشمسية.. اذا بدنا نطلع من المجرة الشمسية اقرب نجم الينا مو مشهور هذا النجم يقال له فاقناقوس هذا اقرب نجم لنا يبعد حوالي 4 سنين و24 دقيقة بسرعة الضوء.. 4 سنين ما باليوم ما بالساعة ما بالدقيقة.. بسرعة الضوء.. والله ابعد من بري وابعد من قابون.. جل جلال الله.. نلاحظ هنا اننا استخدمنا السنة الضوئية كوحدة قياس بدال الكيلومتر ما بقا في كيلومترات هون.. كلما كثرت السرعة كلما ينعدم الزمن.. على سبيل المثال اذا اردنا ان نعبر عن المسافة بيننا وبين نجم فاقناقوس بالكيلومتر فان المسافة تعادل اكثر من 40 تريليون اي 40 مليون مليون مليون كلم. (فلا اقسم بمواقعد النجوم وانه لقسم لو تعلمون عظيم) مع انه هذا النجم مو مشهور مو معروف.. بيبيّن بالسما قد العدسة.. لح نقيس المسافة بيننا وبين نجم لامع مشهور اسمه نجم الشعرى اليماني.. (وانه هو رب الشعرى) الشعرى هو نجم تصل المسافة بيننا وبينه الى 8 سنين و6 بالعشرة سنة ضوئية. يعني 8 سنوات ونص وشوي.. بمعنى اخر نحتاج للسفر الى هذا النجم 81 تريليون كلم. جل جلال الله.. (وسارعوا الى مغفرة من ربكم) سارعوا بأي قوة؟ بسرعة الضوء؟ واذا في اسرع من الضوء.. جدلا لو الانسان سافر لهالنجم بسرعة المكوك الفضائي يحتاج الى 102 بليون سنة بسرعة الضوء. رقم طويل.. فأي مسافة هذه واي بعد هذا واي نظام يحيطنا جل جلال الله.. واي سماء تظلنا.. (بديع السموات والارض) جل جلال الله.. الله اكبر.. الله اكبر.. لح نترك الشعرى اليماني لانه هذا نجم قريب منا.. مناخد مثل لعنقود الثريا.. يبعد عن الارض هذا النجم 440 سنة ضوئية.. انتبهوا الضوء بالثانية الواحدة عم يمشي 300 الف كلم.. من هون لمدينة الف كلم.. 300 مرة سفر من هون للمدينة هذا بالثانية الواحدة.. لا اله الا الله.. هلق اكترنا بيشوف نجم الثريا بالسما عم يضوي عم يلمع .. ضوؤه من 440 سنة لحتى وصل الضوء النا هلق عم نشوفه.. واستمر مسافة بسرعة الضوء الى الافاق حتى وصل الى ابصارنا بهالمسافة 4162 تريليون كلم حتى وصل ضوؤه لنا.. (فسبحان من له ملك السموات والارض ومن فيهن وهو على كل شيء قدير) هي هالسرعات نحن عم نحكي مشان نعرف قديش النبي اسرع ووصل.. قديش السرعة يلي النبي قطعها.. هذه السرعة بتفكير الانسان.. طيب لح نترك مجرتنا وننتقل لفوق شوي.. مجرتنا شو اسمها مجرة التبانة.. نرى من اقرب المجرات لنا مجرة المرأة المسلسلة . هذه المجرة مجرة وحيدة تشاهد بالعين المجردة نحسن نشوفها تبعد عن نظامنا الشمسي عن مجرتنا حوالي 2.5 مليون سنة ضوئية. قديش هالفراغ صار.. كنا منفكر السماء شايفينها .. وين هالفراغ مليونين ونص سنة ضوئية حتى نصل الى المرأة المسلسلة.. يا سبحان الله.. لحتى وصل ضوءها لنا صرله 2365 تريليون يعني مليار مليون مليار كلم حتى وصل الضوء لعنا.. تحسب انك جرم صغير وفيك انطوى العالم الاكبر.. هذا العالم كله مشانك الله خلقه كله.. هالمسافة العقل ما بقا يتحمل وهي اقرب مجرة لمجرتنا تبعد عنا بليون سنة ضوئية.. بليون قديش الف مليون.. الف مليون سنة ضوئية.. الالة الحاسبة ما بقا تشتغل هلق هون .. لا اله الا الله.. اكتشفها مرصد في تشيلي حيث يخترق الضوء مسافرا من تلك المجرة حتى يصل الينا بليون سنة ضوئية يقطع مسافة الف ترليون يعني الف مليار مليون مليار سبحانه وتعالى وسع كرسيه السموات والارض لا اله الا الله والله اكبر.. لما نقرأ هالايات نقول : اللهم اني اشهد واشهد كل من سمع هذه السطور اني امنت بالله رباً وبالاسلام دينا وبمحمد ﷺ نبيا ورسولاً وان السموات السبع حق فاحشرني يا رب مع المؤمنين.. وين بده يوصل الانسان مفكرين انه بربع ساعة منوصل لفوق.. هلق بعض الفلكية لا تمثل الا جانباً من المسافات البينة.. بينما بيننا وبين المجرات التي تعج بها السماء حتى يقدر علماء الفلك عددها 100 بليون مجرة تسبح في بحر السماء الدنيا هي السماء يلي نحن شايفينا 2 بليون مجرة يعني مليون مليون مجرة. اقرؤوا قول الله (انا زينا السماء الدنيا بزينة الكواكب وحفظاً من كل شيطان مارد). هذا التصور انه يتخيل عن المسافات.. لنفترض ان المسافة بين كوكب الارض والقمر 381760 كلم تعادل جدلاً المسافة بين عينك اليمين وعينك الشمال.. 10 سنتم.. فان المسافة بيننا وبين الشمس ستصبح 39 متر. والمسافة بيننا وبين كوكب بلوتو 1.5 كلم.. هذا اذا كان صغرنا المسافات.. بيننا وبين اقرب نجم لنا بيطلع 10 بليون و508 مليون و192169 كلم.. فما بالك ما هو ابعد.. هذا من هون لبلوتو و لاقرب نجم لنا.. فقصة المعراج اذاً قصة عجيبة بأي سرعة حدثت؟ خلينا نتدبر شو هالاعجاز الالهي جل جلال الله.. في ضوء ما سلف.. فلو كان رحلة المعراج بأقصى سرعة عرفها البشر وهي سرعة الضوء لاستغرقت رحلة المعراج 440 سنة.. ببلوغ نجم الثريا.. حتى يصل لنجم الثريا.. فان اراد زيارة المرأة المسلسلة لاستغرقت الرحلة 2.5 مليون سنة.. حتى يبلغ زيارة المراة المسلسلة..ف قدي السرعة يلي مشي فيها ﷺ؟ فكيف اذا سافروا الى ابعد من ذلك يحتاج الامر الى بليون سنة. فكيف اذا سافروا الى ما لا يبصرون؟ (فلا اقسم بما تبصرون وما لا تبصرون) هذا ما ابصروه بالتلسكوبات فشلون يلي فوق التلسكوبات .. هلق بدن يطالعوا التلسكوب عالمريخ مشان يطلعو من المريخ لفوق.. التلسكوب بيكشف بالفراغ 10 بليون سنة بيطلع دقيقتين يعني.. لا اله الا الله.. فاذاً العلم والعلماء وكل ما درس لا يعلمون حدود السماء الدنيا فضلا عن غيرها.. هيدا كله سماءنا قريبة علينا .. اذا سماء الدنيا ما عم يعرفوا .. فكيف يصلون الى سماء الثانية والثالثة والرابعة جل جلال الله.. لذلك وقف العلماء في حيرة مما يبصرون وفي افاقهم.. وبالمية 60 من علماء الفلك امنوا بالله وامنوا برسول الله لانهم شافوا شي غير منطقي وغير معقول.. شلون هالسرعة.. السؤال الكبير الذي يكمن في التفكير والتدبر والتأمل في خلق الله عز وجل بأي سرعة ﷺ عُرج به؟ سرعة الضوء بده 440 سنة .. بأي سرعة حتى تجاوز السماء الدنيا بكواكبها واقمارها ومجراتها لوصل للسماء الثانية.. وما لا نعلم في خلق الله فيها.. بأي سرعة مذهلة معجزة اختصرت بلايين السنين اختصرت بهالدقائق جل جلال الله في لحظات كلمح البصر.. كلمح البصر واذا به سيدنا ادم.. وجد سيدنا ادم في السماء الاولى وسلم عليه وبلمح البصر صعد الى السماء الثانية فرأى سيدنا عيسى وسيدنا يحيا.. بلمح البصر انتقل للسماء التالتة عند سيدنا يوسف.. وهكذا حتى وصل الى السماء السابعة عند سيدنا ابراهيم صلوات الله عليه وسلامه عليه.. اذاً وصل سيدنا رسول الله ﷺ الحبيب على قلوبكم ﷺ الى نقطة كونية لم يبلغها قبله احد ولن يبلغها بعده احد.. وسار بسرعات وقطع مسافات لا تستوعبها العقول البشرية.. عقولنا محدودة.. اما هالمسافات غير محدودة.. فلا سرعة كيلومترات ولا سرعة ضوء.. الله اكبر.. بأي سرعة عرج بالحبيب المصطفى ﷺ ؟ انما هي سرعة من يقول للشيء كن فيكون سرعة من يدبّر الامر جل جلال الله .. سرعة تتوقف كل نواميس الطبيعة امام هذه السرعة وتتلاشى كل المعادلات الرياضية.. صدق الله (وما أمرنا الا واحدة كلمح بالبصر) ( تعرج الملائكة والروح اليه في يوم كان مقداره خمسين الف سنة) ضوئية .. جل جلال الله.. شو هالكون لا حدود.. فخالق الكون الذي لا حدود له هو الذي امرك بالطاعة.. هو الذي امرك بالعبادة بالذكر ليكون جليسك ليجالسك وانت من انت .. شو بيطلع الانسان امام هالسرعات هي؟ ما بقا لك وجود .. فاذا ما كان لك وجود.. والله ما فضيت صلي انشغلت.. انشغلت عن صلاتك ؟ انشغلت عن التوجه الى الله؟ رب العزة خالق هالكون طلب منك ان تقوم بالطاعة والعبادة مانك عم تفضى؟ فلو الله عز وجل قال حطوه بسقر (وما ادراك ما سقر.. لا تبقي ولا تذر لواحة للبشر عليها تسعة عشر (من الملائكة) بيقولوا له ما سلككم في سقر.. قالوا لم نك من المصلين.. ) هي اول وحدة.. كانوا من قبل الله يرحمهم اذا واحد فايته صلاة ما عم يصليها كانوا يقولوا عم يرقعها يعني يلي فاته عم يقضيها.. هلق عم يفخّت ما عم يرقع بدل ما يقضي الفائت عم يروّح الحاضر.. وين انت يا ابني.. انت استهنت بعظمة الله ما عرفت قدرة الله هذا جزء من الاجزاء يلي وصل العلم له.. اما ما وراء العلم شو في؟ ما وراء السماء .. ﷺ.. لما صعد الى مكان.. الملك وقف.. سيدنا جبريل قال ما بدعس.. لو تخطيتُ خطوة لاحترقت.. طيب وانا وين بتتركني هلق؟ قال له انت مأذون لك تفضل امشي روح لحالك.. سيدنا جبريل ما استطاع يتحدى هالخط.. قديش مشي سيدنا النبي ﷺ قديش قطع بهالمسافة بحر الظلمات وبحر الانوار وبحر وبحر.. لحتى وصل الى الله عز وجل.. كل ذلك حتى يجبلك الهدية العظيمة من طرف الله.. هدية كبرى الصلاة.. الله ما بحاجتك تصلي.. مانك فاضي؟ بكرا بتشوف جهنم فاضية لك.. الله ما بحاجتك تصلي.. الصلاة مشان انت تتشرف بامتثال امر الله.. الصلاة شرف يا ابني.. شرفك ان تكون واقف بين يدي عظمته.. لو حطك واحد مدير على بابه ما بيسعك عقلك.. بواب على باب الوزير.. بواب.. واذا كان شي سلطان او ملك حطك عالباب.. اذا رب العزة عم يقول لك انا كل يوم بدي حاكيك.. انا وياك بيني وبينك 5 مرات باليوم.. 5 مرات .. ما بدك؟؟ مانك فاضي ماهيك؟.. مشغول.. شو يلي شاغلك؟ ما هو اعظم من الله شغلك؟ انتبه الى دينك وايمانك يا ابني.. انشغلت بما هو اعظم من الله؟ الكون كله ما له قيمة يا ابني.. اذا كان من هون للشمس عم تاخد معنا هالمسافة انت وين صفيت ؟ وين مكانتك؟ وين قاعد؟ ما بقا لك وجود.. لذلك استقم على شرع الله استقم على طاعة الله حتى تعرف ان النبي ﷺ بهالمعراج يلي عرجه جاب لك هالهدية العظمى كل احكام الشريعة اتت من طريق سيدنا جبريل الا الصلاة فهي من الله مباشرة الى النبي ﷺ.. فهي الفريضة الوحيدة التي الله عز وجل اوجبها على النبي ﷺ واوجب 50 صلاة. لكن نبينا ﷺ كان يتردد بين سيدنا موسى وبين الله قال له ما بتحسن امتك 50 صلاة ما بتحسن.. راجع الله.. رجع يا رب.. قال له نزلنالك 5 رد رجع ما بتتحمل رد نزل 5 رد 5 .. حتى صارت 5 صلوات. فقال الله تعالى : هي خمس في العمل وخمسون في الاجر. سيدنا موسى قال له كمان ارجع اسال التخفيض امتك ما بتتحمل.. قال له والله استحيت.. استحيت من ربنا.. فأتى الامر (ما يبدل القول لدي) 5 عملا و50 اجرا.. 5 وما عم تحسن تصليون.. لو كانوا 50 صلاة شو بتعمل بحالك؟ فيا اخواني الصلاة ما هي الا صلة بينك وبين الله مشان ايش؟ ان كان لك هم بيفرج همك.. شلون بده يتفرج؟ دخلت الصلاة الله اكبر من الهم الله اكبر من الغم الله اكبر من الضيق الله اكبر من الفقر الله اكبر من كل شدة.. اذا الله اكبر ما بقا في شي.. الوجود كله ما بقا له وجود.. لذلك بتفرج همك بتكشف غمك بتجعل في قلبك انس مع الله.. يا رب .. لبيك عبدي سل تعط.. يا ربي بدي كذا.. تكرم.. ما طلب عبد طلب من الله الا والله لباه اليه.. الا لما انت بتكون مانك على مستوى الطلب.. ما عرفت تطلب او ما اديت حق الطلب لذلك بتتاخر.. شو حق الطلب حتى الله يستجبلك ياه؟ اول وحدة تكون على وضوء مستقبل القبلة تبدأ بسم الله الرحمن الرحيم.. اللهم صل على سيدنا محمد الحمد لله رب العالمين والصلاة والسلام على سيدنا محمد وعلى اله وصحبه اجمعين. اللهم.. وبتختم بكلمة امين امين.. هذا الدعاء لا يرد ابدا,.. اما اللهم نسالك العفو والعافية والمعافاة الدائمة في الدين والدنيا والاخرة الله اكبر.. فز ومشي.. هذا لا يتقبل دعاءه.. لا يلتفت لدعائه.. الدعاء له اصل.. اصل الاصول كلها يا اخواني ان تأخذ اللقمة الحلال.. لو اكل لقمة فيها شبهة او حرام لا يستجاب دعاؤك.. النبي ﷺ قال : ان الرجل ليطيل السفر حتى يكون اشعث اغبر يرفع يقول يا رب يا رب النبي قال : وانى يستجاب له ومطعمه من حرام ومشربه من حرام وغذّي بالحرام منين الله بده يستجبلك وانت عم تاكل لقمة حرام.. كول اللقمة الحلال وادي الحق ابدأ بسم الله والحمد لله والصلاة على رسول الله وتختم بكلمة والصلاة والسلام على رسول الله امين امين.. هذا الدعاء المقبول الذي لا يرد.. ما ختمته بهالختم لا يرفع.. كلمة امين بالنسبة للدعاء متل ورقة الطابع على السلعة .. قدمت السلعة شو بدها ورقة طوابع اذا ما في ورقة طوابع وانت مانك ماضي عليها ما بيقبلولك ياها.. ختم الدعاء بكلمة امين.. منه متعلم شلون بده يدعي.. يقول اخي الله ما استجاب.. لا يتسجاب بشيئين: اولا لقمتك ما طيبة تانيا ما عرفت تدعو.. ثالثا استعجلت. والنبي ﷺ قال : ان الله يستجيب لاحدكم ما لم يتسعجل وفي رواية ما لم يعجل. قالوا : وكيف يعجل يا رسول الله ؟ قال: يقول : دعوت فلم يستجب لي.. الله لن يتسجيب له.. هو سكر باب الاجابة على نفسه.. فاذاً الدعاء له اداب حتى الله يستجب لك.. فالصلاة باب للوصال بينك وبين الله.. اخواني خلينا نكون نحن على واقع.. واحد منا حب ان يزور وزير ما منقول اكتر.. بتفوت لعنده صدرك مفندق؟ بتسكر الجاكيت وبتربط الجاكيت بتركز الكرافة بتفوت تحياتنا.. بتحسن تفوت بلا اذن يلي عالباب؟ في بواب ولا ما في ؟ في بواب.. بتحسن تفوت بلا بواب؟ اذا فتح الباب بده يفوت شو بيعملوا فيه بيسحبوه من جوا عالسجن. بدك بواب. الا باب واحد بتفوت من غير بواب. هو باب الله... باب الله لا بدك اذن ولا بدك تزرر اواعيك.. بمجرد ما تتوضأ الله اكبر ارتفعت البرادي بينك وبين الله.. ما عاد في بينك وبين الله ما عاد في ستار.. خاطب الله وناجي الله واطلب ما شئت.. صليت بعد الصلاة مد ايديك.. الدعاء بعد الصلاة لا يرد.. مقبول لا يرد.. النبي شاف واحد صلى بعدما صلى رفع ايديه وقال اللهم اني اسالك العفو والعافية وصلى الله على سيدنا محمد وفز. فالنبي ﷺ قال له : لقد استعجلت.. عجلت.. الله عز وجل فاتحلك الابواب وسامع دعاءك كلمتين وتفز؟ قال : ان الله يحب اللحوح في الدعاء. ﷺ .. خليك على باب الله.. من طرق الباب ولجّ ولج.. خليك عالباب ودق مرة ومرتين وتلاتة وشهر وشهرين وسنة.. اللهم فرج عن المسجونين.. اللهم فرج عن الموقوفين.. يا رب بتضل عالباب.. الا بيجي ساعة بيقدموا الاستدعا تبعك امتين مابعرف.. جل جلال الله.. اما تستعجل؟ فلا يا ابني.. فصلى الله عليه وسلم اذاً معراج النبي ﷺ كان مشاننا نحن .. النبي ﷺ كُرّم بالمعراج كرامة النبي مشان ايش كانت؟ ﷺ كرامة النبي ﷺ كانت بسنة توفت زوجته خديجة وتوفى عمه ابو طالب بسنة واحدة بيناتن ما في شهرين تلاتة توفى.. فالنبي كان سند برا وسند جوا.. برا كان ابو طالب وجوا كانت ستنا خديجة.. وطلع عالطائف بالطائف رموه بالحجار دموا له اجريه وما حدن سمع منه.. رجع كمان ما بدن يفوتوه على بيته.. منعوه من الفوتة على بيته.. فشدة فوق شدة فوق شدة فالله عز وجل بارادته اراد ان يخفف عن نبينا ﷺ عمله هالرحلة الترفيهية ترفيها لروحانية رسول الله ﷺ فعرج به الى السماء.. طيب هالعروج الى السماء شو هالاستعداد هذا .. قبل ما يعرج حصلت امور فيها امور ربانية خاصة.. ﷺ قال : كان نايم في الحرم ﷺ قال: بينا انا في الحطيم- يلي رايح منكم عالكعبة المشرفة هي النصف دائرة يلي حول الكعبة هي اسمها الحطيم ، كان النبي نايم جوا .. هي يقال لها مقام اسماعيل.. سيدنا اسماعيل مدفون تحت مزراب الكعبة. هيدي ما حدن بيعرفها.. والصلاة فيه كأنه صلى جوات الكعبة. لأنه هيدا من اصل الكعبة. لما عمروا الكعبة ما كفت المصاريف فاختصروه لانه ما بقا في عندهم ضل هذا برا، فيلي بيصليه فيه كأنه صلى جوات الكعبة. فالنبي كان نايم في الحجر مضطجعاً قال اتاني آتٍ فقال : فقدّ يعني شقً ما بين هذه الى هذه.. شق الصدر الى السرة.. فاستخرج قلبي.. عملية القلب المفتوح مين يلي عملها اول واحد؟ سيدنا محمد مين عمله ياها؟ سيدنا جبريل.. فاستخرج قلبه ثم اتيتُ بقسط من ذهب مملوءا ايماناً فغسل قلبي بالايمان.. ثم حُشي ايماناً ثم اعيد وخيطله ياه.. اثر اللزقة كانت موجودة ﷺ.. ثم اعيد ثم اتيتُ بدابة دون البغل وفوق الحمار. اقصر من البغل شوي واعلى من الحمار بشوي.. ابيض وهو البراق ﷺ.. يضع خطوه عند اقصى بصري لوين بيوصل البصر الخطوة تصل.. يعني صاروخ فحُملتُ عليه. في رواية لما اراد النبي يركب عليه اهتز.. فسيدنا جبريل قال له اهدأ أتدري من سيركب عليك؟ خير خلق الله اجمع.. افضل مخلوق خلق بالوجود كله لح يركب.. فخجل البراق.. ركب النبي ﷺ على البراق فانطلق بي جبريل.. مسافر مع صاحب ما بيصير سفر لحالك بدك صاحب.. فانطلق بي جبريل حتى اتى السماء الدنيا.. هو وصل الى القدس صلى بالقدس ومن القدس الى المعراج .. المعراج سلم.. لما بتطلع من الطابق الاولاني للطابق التاني على ايش بتطلع ؟ بالسلم.. هذا معراج اسمه.. عرج من الطابق الاول الى الطابق التاني للطابق التالت هذا اسمه معراج.. باللغة العربية الدرجات اذا كانوا لفوق يقال له درج .. واذا كانوا نازل لتحت يقال له درك بالكاف. درك نازل .. درج طالع او منسميه معراج.. قال فعرجنا الى السماء وصلنا الى السماء قال فاستفتح.. دق باب السماء .. سيدنا جبريل؟ نعم.. ما بيدخل بدون اذن.. وهذا يلي اخدنا منه الحكم الشرعي لا يجوز للانسان ان يفتح باباً بغير استئذان.. هذا حكم شرعي لو بيتك .. بدك تفوت عالحمام مسكر الباب بتنقر الباب عالمطبخ بتنقر الباب.. بيتك.. بدك تفوت على بيتك بتدق الباب قبل ما تفوت.. بترن الجرس قبل ما تفوت.. هذا يا ابني ادب شرعي.. لا يجوز للمسلم ان يدخل باباً مغلقاً ما لم يستأذن.. فاذا دخل بدون استئذان ارتكب الكراهة.. يعني ارتكب خطيئة اثم انه دخل بغير استئذان.. اتى رجل الى الرسول ﷺ قال : يا رسول الله اني اكون في بيتي فهل عليّ من حرج ان دخلت من دون استئذان؟ فقال النبي ﷺ : اتحب ان تدخل فترى امك عارية؟ بركي امك عم تغير اواعيها فتحت بتشوفها عارية.. اعوذ بالله.. قال له اذاً لا بد لك من الاستئذان.. بيتك .. شو هالادب اكتر الناس ما بتعرف هالادب.. بيفتح وبيفوت دغري.. عالحمام عالمرحاض فتح وفات دغري قاعد ببيته.. يا ابني.. ممكن يكون ابنك ممكن يكون اخوك ممكن تكون اخت زوجتك.. ممكن تكون ام زوجتك بدك تنتبه تستأذن قبل ما تفوت.. بيتي ؟ نعم.. بيتك.. هي سيدنا جبريل.. سيد ملائكة السماء.. ما دخل حتى استأذن .. طرق باب السماء.. من ؟ قال : جبريل.. قال : ومن معك؟ قال له: محمد .. قال : وقد اُرسل اليه؟ وصلت البطاقة له؟ نعم.. فتحوا الباب.. نعم المجيء جاء.. يا مرحبا اهلا وسهلا.. استقبله اهل السماء وشيّعه اهل السماء الى السماء التانية .. مع سيدنا جبريل. طلعوا بالنبي ﷺ للسما التانية.. بالسما التانية طرق الباب: من ؟ جبريل .. من معك؟ محمد.. ﷺ.. ارسل اليه؟ نعم.. ما بيصير تدخل بدون استئذان.. هي بدنا ناخد منها حكم شرعي ببيوتنا نحن وعلموا بناتكن واولادكم هذا يا اخواني اكتر الشعب نسي هالحكم الشرعي.. علم ولادك ان لا يدخل بيت حتى يستأذن.. والله انزل اية بالقرآن آية الاذن.. 3 اوقات لا يجوز للولد ان يدخل غرفة امه او ابوه.. 3 اوقات. من قبل صلاة الفجر وحين تضعون ثيابكم من الظهيرة ومن بعد صلاة العشاء.. ثلاث اوقات لكم ثلاث عورات.. 3 اوقات ممكن تكون كاشف فيها.. قبل الفجر ممكن الانسان يكون متعري.. بعد الضهر ممكن لما ينام مع عياله يكون متعري.. بعد العشا.. الولد بيكون عم يتزاعلوا الولاد مع بعضن بيجي بيفتح الباب بابا اخي ضربني.. هيدا بيفتح ماما اختي ضربتني.. علموا اولادكن لا يجوز ما لم يستأذن انه اذا بتفتح الباب بتاكل اطلة.. بتضرب الباب والاستئذان ثلاث مرات. اول مرة ما سمعنا صوت وقف. بدك تستنى مقدار صلاة ركعتين. قديش بيعملوا ركعتين؟ اعتبرن 5 دقايق.. بدك تضل واقف بتدق دقة تانية.. كمان بتستنى 5 دقايق.. بركي عم يصلي؟ بده يخلص صلاته بعدين بيجي بيفتحلك الباب.. نحن منجي مندق عالباب منضل عم ندق ورا بعضه.. طيب واحد عم يقضي حاجة بده يفز ينجس حاله مشان يفتحلك؟ طول بالك شوي.. بيحط يده عالجرس بيضله عم يكبس ليحترق الجرس.. هذا ما في ادب ما في احترام.. هذا ما منفتح له.. اذا واحد ما في ادب ما منفتحله.. بدك تضل تستنى.. اول دقة ما فتحوا.. اول دقة سمعوا تاني دقة بيتهيأ تالت دقة بيفتحلك. ما فتح دير ضهرك وارجع.. والافضل يا احبابي كمان خلينا نكون دينييّن على دين.. ما تجي بدون موعد.. بيكون عنده موعد يا عنده ضيوف يا بده يمشي بيدق الباب السلام عليكم اهلا وسهلا والله لا تواخذني عندي موعد .. طيب جاي 5 دقايق.. اخي عندي موعد ماني فاضي.. لح نغني عليك خبز الشام نحن؟ ارجعوا ارجعوا ما بده يستقبلنا.. الله قال : (وان قيل لكم ارجعوا فارجعوا هو ازكى لكم).. انت جيت بلا موعد عاطي وقت لغيرك المسلم ما وعيان.. امتا ما اجا بيدق الباب بده ياه يكون واقف ورا الباب عم يستنا ما دام دق الباب يفتحله.. كل واحد منا عنده شغل عنده بيت عنده اهل عنده اعمال.. اعتبر انه لحاله ما في حدن بس شربان شربة وبده يطالعن لبرا.. وجنابك جيت حطيت ايدك عالجرس وطنننن افتحولنا.. اجاني اخ الله وكيلكن الساعة 1.15 بالليل وشيخ حاطت على راسه.. اول سهوتي.. فزيت.. فتحت الباب اهلا وسهلا نعم قال : والله انا ما بعرفك فاضي الا بهالساعة فجاي اتبارك فيك .. جاي تتبارك؟ ايه.. قلت له : طلعت من السينما سواريه وجاي هلق لعندي؟ قال لي : شو عرفك؟ كان بالسينما مغطي حاله وجاي لعندي هلق بده يتبارك بالشيخ .. قلت له : الله لا يبارك فيك.. طبشت الباب مع السلامة. بده ياها ولا لأ؟ مع انه انا بستقبل كل واحد بس يكون في موعد .. اوقاتي يا ابني ما اصبحت الي.. انا ما عادت حياتي الي يا ابني.. صارت حياتي للمسلمين.. انا لحالي لنفسي لبيتي ما عاد عندي وقت.. فخود اذن وعلى عيني امتا ما جيت بستقبلك وبقضي لك حاجتك وما بقول لا.. لكن بيجي بدون وعد وامتا؟ 1.15 بالليل.. انا بتوفيق الله بصلي العشا وبنام.. بعد العشا ما بستقبل حدا.. الساعة 12 بكون قاعد ورا مكتبي. 12 بالليل بتوفيق الله وفضل الله.. بتجي الوقت انا عندي مطالعاتي وعندي دراساتي جاي بوقت اي وقت هذا؟ فعمل سيدنا جبريل تشريع النا طرق الباب.. مين معك.. ما بيصير تجيب حيالله واحد معك .. كل يوم بتجيب واحد جديد سلام عليكم خير.. سيدنا بده البيعة.. يا ابني البيعة على عيني وراسي .. البيعة للكل لكن يا اخواني اول الكل يتصل بأخ من الاحباب يلي جالسوا الشيخ قبلك احبوا الشيخ قبلك.. تتعلم منهم الذكر بتقعد بتذكر الله بتجي بعدين لعند الشيخ يبايعك.. اما جاي من الطريق لعند الشيخ هذا خطأ يا ابني.. وهذا كان خلاف بيني وبين الشيخ اسامة الله يوجه له الخير.. انا بجيب الاخ بحكيله عالشيخ بحببه بالشيخ شهر وشهرين بعدين بجيبه لعند الشيخ ياخد الطريق.. اعرف مين هذا الشيخ اما ما عرفان شو هي البيعة تعى بايعه.. هذا خطأ يا ابني.. كان واحد الله يهدينا ويهديكم متصل بالجامع شيخي انا حابب التزم عندك.. قلت له : انت وين ساكن؟ بالمنطقة الفلانية.. مين فيه من الاخوان هونيك قلت له تلتقي بالاخ بتذكر انت وياه وبتجي لعندي.. فبدك تسافر السفر وحده ما بيجوز للواحد.. قال ﷺ بالنسبة للسفر: الواحد شيطان واثنان شيطانان وثلاثة ركب.. تلاتة. السفر بده يكون 3 .. واحد امير وواحد خادم وواحد حارس.. هذا هدف الشريعة يا ابني.. اما ركب سيارة وبده يمشي لحاله.. بركي دخت في الطريق.. ممكن ولا ما ممكن؟ بركي حصل معك مغص بركي عملت حادث ما بده حدن يخبر عنك؟ ﷺ.. فسيدنا جبريل كان يطرق الباب.. من؟ جبريل. كمان هي فيها ادب.. نبينا ﷺ اجا واحد دق الباب. النبي قال من ؟ قال له : انا.. النبي قال له : انا انا.. انت انت وانا انا.. فقال لانس قال له : اطلع علمه شلون يستأذن .. فطلع سيدنا انس طرق الباب.. السلام عليكم ورحمة الله اادخل؟ بسلم اادخل؟ قال له ادخل. قال له : هكذا تصنع. ما بتدق الباب دغري حتى تفوت استاذن حتى تفوت. اولا اذاً بتسافر معك رفيق السفر . 2 اذا وصلت بدك تستاذن للدخول.. جايب معك واحد تقول جايب معي فلان وقد ارسل اليه؟ نعم ارسل اليه.. اما واحد عزمك بتاخد معك ابنك واخوك.. ما بيجوز هذا.. دعاك بتروح لحالك.. تقول له انا بجي انا وفلان نبينا ﷺ بدنا ناخد الاحكام الشرعية من حادثة الاسراء. نبينا ﷺ دعاه رجل قال له : ومعي عائشة. قال لوحدك يا رسول الله قال له اذاً لا اتي. دعاه مرة تانية قال له: ومعي عائشة قال له : وحدك يا رسول الله. قال له : اذاً لا اتي. دعاه تالت مرة قال له مع عائشة قال له اذاً آتي. اخد عائشة وراح ﷺ.. ومرة لحام دعا النبي ﷺ لعنده عالبيت. قال له يا رسول الله تكون خامس خمسة. يعني 4 وانت الخامس. النبي هو وماشي واحد لحقهم.. لما وصل للباب التفت خمسة يلي معه وهو السادس. قال له : انت شو جابك؟ قال له : شفتكن ماشيين لحقتكم. فلما فتح الباب قال له: ان هذا تبعنا بغير دعوة فان شئت فاذن له وان شئت رده.. ما دعيناه نحن قال له ما دام اجا معك يا رسول الله فوته.. هم القوم لا يشقى بهم جليسهم.. اما لو رده في عليه اثم؟ لا.. فيا ابني واحد دُعي ما بيصير ياكل معه واحد. انا بكون الاخوان معي ما بحكي لواحد امشي معي.. ابني بعض اوقات ما باخده معي.. مدعو لحالي.. الا اذا يلي دعاني يقول اذا بتجيب معك واحد او 2 معليش.. باخد 1 او 2 .. اما لحالك.. لحالي ما بروح.. هذا ادب من اداب الشريعة. ومن معك؟ قال: محمد.. قال نعم المجيء جاء اهلا وسهلا ارسل له؟ نعم.. تفضل.. ﷺ فدخل .. قال ففتح فلما خلصت فاذا انا بآدم. اول سماء سيدنا ادم عم يستقبل ذريته.. ﷺ.. فقال : هذا ابوك ادم فسلِّم عليه.. فسلمت عليه.. اخد معك ابنك بدك تقول له : سلم على عمك سلم على خالك سلم عليه.. حتى يتعلم كيف يسلم.. فرد السلام ثم قال : مرحبا بالابن الصالح والنبي الصالح.. اهلا وسهلا مرحبا .. قال ثم صعد بي حتى اتى الى السماء التانية قديش المسافة عالسما التانية.. قال فاستفتح.. معروف سيدنا جبريل بالملأ الاعلا.. طرق الباب فاستفتح.. قيل من هذا ؟ قال : جبريل . قال : ومن معك؟ قال : محمد ﷺ قيل : وقد ارسل اليه؟ قال : نعم. قيل : مرحبا به.. فلنعم المجيء جاء.. ففتح .. فلما خلصت ودخل للسماء التانية اذا انا بيحيا وعيسى ولاد خالين. سيدنا عيسا وسيدنا يحيا ولاد خالين لبعضن. قال : هذا يحيا وعيسا فسلم عليهما. عم يعرفه عليهم.. لما نفوت عالبيت بيقعد لا بيعرف عن هيدول ولا بيعرف عن هيدول.. تعريف عرفن فلان وفلان وفلان.. فات وقعد.. بيقعد متل الغريب.. وهيدوليك قاعدين متل الغريب.. هني بيطالعوا فيه وهو بيطالع فيهن.. عرفه فيهن.. الانسان ما بيعرف على نفسه.. والله فلان الفلاني الدكتور الفلاني.. لا ما بيصير.. انت ما دام جايبه بدك تعرف عليه.. فلان اسمه كذا اسم ابوه كذا معه شهادة كذا شغلته كذا حتى نعرف شو كرامته شو مكانته اما جابه فلان اي تفضل اقعد لما يكون دكتور منقول له تفضل لهون.. اما اقعد وين ما كان معليش.. مين بيكون الحق على مين ؟ على يلي جابه .. فسيدنا جبريل عم يقول له : هذا يحيا وهذا عيسا فسلم عليهما فسلم عليهما. ثم صعد بي الى السماء التالتة كمان فاستفتح. من؟ جبريل. من معاك؟ محمد ﷺ.. ففتح فلما خلصت الى يوسف (صلوات الله وسلامه عليه) قال : هذا يوسف فسلم عليه.. فسلمت عليه فرد ثم قال : مرحبا بالاخ الصالح والنبي الصالح.. بيعرفوا بعضهن.. مع المعرفة سيدنا جبريل عم يعرفه.. بيقول لك اخي بيعرفوا بعضن مع المعرفة بدك تعرف.. ثم صعد به حتى اتى السماء الرابعة.. فيها سيدنا ادريس.. ثم صعد الى السماء الخامسة فاستفتح فيها سيدنا هارون.. سلم عليه سلمت عليه.. ثم الى السماء السادسة.. مين يلي فيها؟ سيدنا موسى.. سلم عليه قال فسلمت عليه.. فلما تجاوزت ترك سيدنا موسى بده يطلع.. فبكى.. قيل ما يبكيك؟ ليش عم تبكي؟ قال : ابكي لأن غلاماً بُعث بعدي يدخل الجنة من امته اكثر مما يدخل الجنة من امتي.. ﷺ.. النبي عارف سيدنا موسى محلي لليهود فقط.. فقط اما سيدنا محمد لكل الخلق.. صلوا عليه لنشوف.. اللهم صل وسلم عليه.. طيب ثم صعد به الى السماء السابعة فاذا سيدنا ابراهيم.. (صلوات الله عليه) قال له هذا ابوك ابراهيم سلم عليه قال فسلمت عليه فقال : مرحبا بالابن الصالح والنبي الصالح.. ثم رفعت لي سدرة المنتهى.. سدرة المنتهى شجرة وصفها ما بتفوت بالعقل بكرا بالاخرة بتشوفوها.. اما اجا واحد سأل النبي قال يا رسول الله هي سدرة المنتهى في بالحياة متلها؟ فالنبي قال له : هل زرت الشام؟ قال لا.. قال ان فيها شجرة يقال لها الجوزة تشبه شجرة طوبى بيطلع ساقها وبتبرز من فوق. هي شجرة طوبى .. بالشام في شجرة اسمها شجرة الجوز كرمال كلمة النبي جوز لازم تحب الجوز.. ما جرى اسمها على لسان النبي ﷺ ؟ والجوز منفعته وفائدته بيخفف كولسترول.. يعني لو اكل الواحد كل يوم حبتين جوز وبصلة عشية بصلة صغيرة.. البصلة الصغيرة ما بيصير معك جلطة بتميّع الدم.. والجوز بينزل الكولسترول بتضل عافيتك تمام.. ﷺ.. جوزة؟ نعم.. واذا اربعة انهار نهران باطنان ماشيين تحت العرش ونهران ظاهران. فقلت ما هذا يا جبريل؟ فقال : اما الباطنان فنهران للجنة واما الظاهران فالنيل والفرات.. هيدول يلي مبينين انه مي كتيرة وحلوة.. معناتها اديش بتروي اشجار وبساتين.. فهيدول النهرين قال من الجنة.. هنا نقطة بسيطة يعني من الجنة معناتها ماء حلوة نافعة للزرع ونافعة للانسان.. بيننما كنت بالاتحاد السوفييتي التقيت ببعض المشايخ قلت لهم بدكن تاخدوني على نهر سيحون او جيحون قالوا هذا بعيد.. قلت لهم ايه شو بتعرفوا عنه؟ قال : هذا نهر من الجنة. شلون من الجنة؟ قال : ينزل من الجنة الى سيحون.. ليس هو فقط.. وفي الفرات ونيل مصر.. سيحون والفرات ونيل مصر ينزلون من الجنة .. كيف ينزلون؟ قالوا هذا شلال في علم الغيب ينزل الى الارض.. ما شاء الله قلت له طلعوا بالاقمار الصناعية كشفوا المي كلياتها ما شافوا نازلة من السماء.. يعتقد اعتقاد جازم انه ينزل من الجنة ينبع من الارض ماء حلو من كترة الثلوج يلي بتكون بيطلع ماء حلوة باردة. نزل من السماء نعم بس مو شلال نازل .. سألته سؤال تاني مشان اعرف شو.. قلت له مياه البيار البئر ليش بالصيف بتصير باردة وبالشتا بتصير حامية؟ بالشتا دافية .. بالصيف شو بتكون ؟ باردة. قال لي: هذا من عظيم قدرة الله.. بالشتاء الشمس بتقعد تحت الارض اطول منها من الصيف لذلك بتسخن المي.. بالصيف ما بتقعد كتير تحت الارض بتضل باردة.. قلت لهون وبس.. الله عز وجل يعفي عنا.. طيب.. فبعد ما الى سدرة المنتهى ثم رفع لي البيت المعمور .. البيت المعمور فوق الكعبة مباشرة لو سقط حجر من البيت المعمور لاصاب الكعبة .. البيت المعمور يدخل اليه في كل يوم 70 الف ملك يطوفون به.. اذا راحوا ما بيرجعوا.. فالنبي قال لهم مين هيدول؟ قال : لا اعرفه عجيب ملك السماء ما بتعرفهم؟ قال : لاني لا اراهم الا مرة واحدة الي عم يروح ما بقا يرجع.. مرة واحدة اسال واحد منهم .. نادى واحد فالنبي سأله كم عمرك؟ قال له : لا ادري.. لكني اعي ان الله في كل اربعين الف سنة يخلق كوكباً وانا اعي ان الله خلق 400 الف كوكب.. احسبوا اديش عمره.. هيدا وقت الوعي .. شو كان.. الله اكبر.. القدرة يا احبابي.. قال ما بشوفن الا مرة وحدة الصف يلي عم يروح ما بقا يرجع.. هذا البيت المعمور.. بتستغربوا انا مر معي حديث.. ان الله عز وجل جعل لكل واحد من بني البشر ملك مثله في السماء يعمل عمل الانسان في الارض شو بتعمل عم يعمل هالملك فلذلك اعمالك عم تسجل واحد واحد الملائكة عم تذكر هون هيداك عم يذكر.. بتقرا قرآن هون هيداك عم يقرا قرآن فلذلك اعمالك كلها محسوبة عليك.. وقت الدرس بيكون عم يطوف بالبيت المعمور .. الله يتقبل منا ومنكم يا احبابي .. اصلحوا اعمالكم ارجو الله ان يغفر لنا ولكم .. فهذه الرحلة يلي النبي ﷺ رحل اليها ورجع ﷺ بحادثة الاسراء رجع بالصلاة التي امره الله عز وجل فيها ولما رجع النبي ﷺ .. اللهم صل عليه اديش تحمل مشان خاطرنا.. اديش تحمل وما حدا منكم عم يصلي عالنبي.. ﷺ.. مشان خاطرك.. لما رجع ﷺ طلع عبكرا من الباب .. ابو جهل عم يستناه.. كان ابو جهل كل يوم يسأله استهزاءً شو عندك اليوم يا محمد؟ شو خبرك اليوم؟ قال له : والله اليوم اسري بي.. الاسراء يعني المشي بالليل قال له لوين؟ قال له : الى بيت المقدس.. الليلة واصبحت بيننا؟ رحت لبيت المقدس ورجعت واصبحت بيناتنا؟ قال له : نعم...قال له اذا دعيت قومك بتحكيلن يلي حكيتلي ياه؟ قال له : ايه بحكيلن معليش.. فنادى.. يا بني فلان يا بني فلان تعوا.. تعوا اسمعوا.. فكر اليوم يعني انتهى .. قال له : احكيلهن.. قال : لقد اسري بي الليلة .. لوين ؟ قال : الى بيت المقدس.. قالوا : أوصبحت بين اظهرنا.. قال لهم: نعم.. واحد صار يصفق وواحد صار يصفّر.. رحت ورجعت الليلة.. واحد حط ايديه على راسه.. تعوا اسمعوا يا جماعة.. واحد قال له : ايه مين شفتلنا هونيك؟ قال له : اجتمعت بابراهيم وموسى وعيسى قالوا له : اي اوصفلنا ياهن. قال لهم: اما عيسى ففوق الربعة ما كتير مربوع اطول شوية ودون الطول لا طويل ولا.. عريض الصدر ظاهر الدم مبين على وجهه جعد الشعر تعلوه صهبة يعني بياض على احمرار كأنه عروة بن مسعود الثقفي واما موسى فضخم آدم طوال اسمر طويل كأنه من رجال شنوءة هيدول بيسموهن العمالقة كانوا.. متراكب الاسنان مقلّص الشفة خارج اللثة عابس.. واما ابراهيم فوالله انه لاشبه الناس بي خلقا وخلقاً ﷺ.. لما اجاه ولد شو سماه؟ سماه ابراهيم ع اسم والده ﷺ.. قالوا له رحت وصلت عالقدس اذا كنت صادق اوصفلنا القدس... قال لهم انا رحت بالليل ورجعت بالليل.. اوصفلنا ياه.. بالليل الدنيا عتمة شو بده يشوف.. فالنبي ﷺ كأنه شوي انحرج.. واحد بالليل.. هلق مثل يلي عم يجي عالجامع يلي صرله 5 سنين عم يفوت عالجامع اذا قلنا له بالله عليك كم شباك بالجامع؟ شو بيقول ؟ ما بيعرف.. صرله 5 سنين.. كم عضاضة؟ ما بيعرف.. النبي بالليل راح.. اوصفلنا ياه.. تضايق.. فسيدنا جبريل حمل له اياه وحطه قدامه صار يوصفه باب باب شباك شباك.. بيعرفوا انه النبي ما طلع برات مكة.. عم يوصفه.. قالوا: والله لقد احسن وصفه.. ما فات شي.. حكى في كل شي.. حكالن شو في من الاحجار شو في من الشبابيك شو في من كذا .. قالوا له : هي صدقناك فيها.. طيب صار معك شي بالطريق؟ قال لهم: اي في اشياء صارت معي بالطريق.. شو هي؟ قال لهم : اول واحدة في قافلة لبني فلان قد اضلوا ناقة لهم .. ناقة ضايعة.. فانطلقوا في طلبها فانتهيت الى رحالها وصلت للرحال ليس بها منهم احد.. تاركين رحالهم وعم يدوروا عليها قال : واذا قدح ماء فشربت في اناء ماء فاخدت وشربت منه فاسالوهم عن ذلك.. شوفوه نقص.. قالوا هذا والاله اية .. هي علامة.. قال ثم انتهيت الى عير بني فلان.. قال : فنفرت مني الابل هربت الجمال وبرك منها جمل احمر عليه جوارب يعني عليه حمال معباية.. مخطط ببياض كمان وصفلن ياه.. ولا ادري اكسر البعير ام لا فاسالوهم عن ذلك.. قالوا هذه والاله اية.. فقال الوليد بن المغيرة ساحر.. فانطلقوا فنظروا فوجدوا الامر كما قال.. يلي اجوا اول شي شافوا الاناء ناقص مين شرب منه ما منعرف.. التاني قال البعير هرب وهذا برك.. متل ما قال النبي ﷺ قالوا: ساحر.. ثم انطلقوا الى سيدنا ابي بكر.. تعى اسمع صاحبك.. خير.. قال صاحبك عم يقول انه الليلة راح عالقدس ورجع قال لهم : هو حكى؟ نعم قال : اذا هو حكى صدق فهو صادق.. قالوا له بلا عقل الواحد بده شهر ليروح وشهر ليرجع بليلة وحدة راح ورجع شلون بتصدق؟ قال لهم : انا بصدقه لو قال لي طلعت عالسما ورجعت بصدقه.. ما بصدقه من هون للقدس؟ فسُمّي بذلك اليوم الصديق.. يا ابني الله يهني اهل الحب.. اهل الحب لا يرى في محبوبه نقص.. ان قال فقد صدق.. معقول ؟ ما بتفكر ؟ ما بيفكر.. المحب ما بيفكر مع حبيبه.. المحب عنده حبيبه هو الصادق هو المخلص هو .. وبذلك ما بيقول نعم ولا.. لا اله الا الله.. طيب لح اعطيكن هلق 10 دقايق خلينا ناخد بعض الفوائد من المعراج.. بعد كل محنة منحة.. هي اول وحدة.. توفى ابو طالب وتوفت ستنا خديجة.. هي محنة بعد المحنة اتت المنحة الالهية.. ورد ذلك بالحديث : ان لله بعد كل محنة منحة.. فقديش النبي ﷺ تحمل محن.. توفت خديجة اول بعدين عمه.. وقديش حاربوا النبي ﷺ وشدوا عليه فالنبي ﷺ صبر وتحمل فالله عز وجل بعتله هالسفرة هي حتى يخفف عنه.. طيب.. اخدنا منها ان الواحد اذا بده يسافر بدو يكون دائما معه رفيق.. الرفيق قبل الطريق . هذا حديث.. 2 صمود النبي ﷺ امام قريش.. يلي عم يصفر ويصفق .. صحيح ما صحيح.. صبر النبي ﷺ وكان بتوفيق الله عز وجل ما حصل اية من الايات العظيمة.. هذا معراج النبي ﷺ.. انتو شو اخدتوا؟ كل سنة منعيد المعراج.. انتو شو اخدتوا؟ النبي ﷺ فتح لنا الباب طلع الى السماء وفتح باب السماء وقال يلي بيحب منكم يعرج العروج مفتوح.. العروج ما سنة؟ ما كل فعل عمله النبي هو سنة؟ وين المشايخ ما يقوموا بهالسنة.. لازم تطلع نعرج الى السماء .. النبي خلالنا الباب مفتوح وقال ﷺ : الصلاة معراج المؤمن.. بتؤدي صلاة بحضورها وخشوعها تعرج روحانيتك فتقابل رب العزة جل وعلا تسال فيعطيك وتدعو فيجيب وتستغفر فيغفر ونسأل الله ان يتقبل منا ومنكم ويغفر الله لنا ولكم وللمسلمين اجمعين والحمد لله رب العالمين.