اليوم بحثنا يتعلق بالتوكل.. قال تعالى (وَلِلَّهِ غَيْبُ السَّمَاوَاتِ وَالأَرْضِ وَإِلَيْهِ يُرْجَعُ الأَمْرُ كُلُّهُ فَاعْبُدْهُ وَتَوَكَّلْ عَلَيْهِ وَمَا رَبُّكَ بِغَافِلٍ عَمَّا تعملون) جمال هذه الاية الله عز وجل ربط التوكل مع العبادة (فاعبده وتوكل عليه) فاجتمع الاثنين مع بعضهما البعض.. فلا يكون التوكل الا بعد اقامة العبادة.. ولا تصح العبادة الا اذا وجد معها التوكل.. اثنين مرتبطين باية واحدة العبادة والتوكل.. قلن عن العبادة انها ليست فقط الصلاة والصيام.. الصلاة والصيام من العبادة لكن كل شرع امرنا به الاسلام فعملناه فهو عبادة.. وكل نهي نهى عنه الشرع وانتهينا به فهو عبادة..فلو جمعنا اذاً اوامر القرآن واوامر السنة المطهرة والنواهي فالعمل بالاوامر وترك النواهي كله ماذا يقال له؟ عبادة.. فالانسان يكون متعبد بهذه الاشياء.. في ناس اختصروا العبادة على الصلاة والصيام وهذا خطأ.. متل انسان اختصر السيارة على الدركسيون .. حمل الدركسيون وقال انا معي سيارة.. مين بيحب يطلع معي عالحج؟ انا معي السيارة.. اخي هي ليست سيارة.. اخي السيارة ما بتمشي بلاه.. صحيح لا تمشي بلاه لكنها ليست السيارة.. واحد تاني حمل الدولاب قال انا معي السيارة مين بيحب يطلع على الحج.. فالصلاة دركسيون .. الصيام بطارية.. الحج موتور.. فكل عبادة قطعة.. اما اذا اخد قطعة وقال انا معي سيارة فالناس تستهزئ به.. ما حدن بيمشي معه.. كذلك العبادة كل امر الهي امرنا الله به او امر به النبي ﷺ وكل نهي نهى عنه القرآن او نهى عنه النبي ﷺ فهو عبادة تتقرب بها الى الله.. وذكرنا اقل شيء وهي التبسم.. لو تبسمت في وجه اخيك المسلم فهي عبادة.. بدل ما تقابله وانت حاطت العقدة قابلته وانت مبتسم.. هذه البسمة عبادة.. عبادة تؤجر عليها وتأخذ عليها الثواب.. اسم العبادة لان فيها اجر وثواب من الله عز وجل... تركت الخطيئة لانها مؤذية لك في دينك وايمانك فتركت الخطيئة فأنت متعبد لله.. له اخ عم يلعب شيش بيش.. ترك اخوه وهو يلعب شيش بيش هي اسمها عبادة.. فاذاً العبادة تتلخص في كل امر الهي نعمله او كل نهي الهي او نهي من النبي ﷺ .. فهو تعبّد.. التوكل ما هو الا ان تجمع قلبك على الله عز وجل وتعمل بما اراد الله.. كثير من العلماء فصلوا التوكل عن الاسباب وهذا خطأ.. التوكل مرتبط بالاسباب.. منجيب مثال.. واحد نام باوضة مفتوحة الشبابيك.. ونام بلا غطا .. فز عبكرا معه اسهال بيقول اخي هيك الله قدر نقول له لا.. توكل على الله لكن بسكر الشبابيك ونام بلا غطا معليش.. اما مفتوحة الشبابيك وعم يلعب الهوا.. وبرد الصيف احد من الصيف.. فاذا اصابه بلاء يقول الله هيك قدّر نقول لا .. انت يلي جلبت لنفسك.. فالسبب تسكّر الشبابيك وتتغطا فاذا اصابك شي تقول هذا قدر.. فاذاً السبب دائماً.. واحد بده يسافر.. قبل السفر بدنا السيارة اولاً بتشوف الدواليب ثانياً بتشوف الردياتير ثالثاً بشوف البطارية معباية ولا ناقصة متى فحص هيدول الثلاثة نقول لك هلق توكل على الله حط البنزين وامشي.. اما ما حط البنزين ولا فحص الدواليب وتوكل على الله الله معين للمؤمنين.. ركب السيارة اول ما طلع انقطعت.. فهذا اسمه متوكل على الله ؟ لا ما توكل على الله.. التوكل تهيئة الاسباب والتوكل على مسبب الاسباب.. تهيئة السبب جزء من التوكل ومن فصل السبب عن التوكل فهذا ما فهم التوكل ولا درس معنى التوكل..
فالتوكل اذاً اولاً تهيئ السبب ثم تسأل الله عز وجل.. طلاب عندهم فحص.. طالب قال والله انا نعسان لح نام بتوكل على الله بنام وبكرا الله بيفتح عليّ فاق عبكرا الساعة 7.30 دغري لبس وعالفحص.. رسب.. بيقول اخي هيك يلي بيتوكل على الله ما بينجحه ؟ نقول له انت لست متوكلاً.. المتوكل يلي بيدرس وبيراجع وبياخد راحته بينزل على مهله هيدا متوكل.. اما يلي ما عمل ما درس ولا راجع وقال متوكل على الله.. نقول انت تركت السبب وتارك السبب لا ينجح.. فنجاح التوكل بوجود الاسباب.. دائماً السبب .. مين خلق السبب؟ الله خلقه.. وامرك ان تعمل بالسبب حتى تصل الى العبادة الحقيقية .. فالتوكل مع العبادة يتقرب العبد فيه الى الله ويكون عبداً لله محبوباً.. فأولاً اذاً التوكل على الله جمع القلب على الله مع وجود النية مع السبب.. اي عمل بدك تعمله تهيئ نيته وسببه ثم تتوكل على الله عز وجل.. فهذا يكون العبد الناجح في طاعته وعبادته.. اما انسان ظن ان التوكل تفويض وترك الاسباب وترك الاعمال يقول اخي متوكل على الله .. متوكل على الله والله يخيبك.. شو مهيأ من السبب ؟ ما مهيأ شي.. بدنا نتغدا.. شو مهيأ للغدا؟ ما في ششي توكل على الله.. الله بيخليك جوعان لان ما عمل.. السبب بتنزل بتشتغل بتجمع مصاري بتشتري خبز بتشتري اكل بتقعد تاكل.. هيدا السبب.. اما قاعد لا بده يشتغل لا بده يعمل.. بينام او طول النهار على التلفزيون وبده الله يرزقه ويطعميه.. هيدا الله لا يطعمه.. فإذاً التوكل ربط الاسباب مع المسبب.. مين مسبب الاسباب ؟ الله جل وعلا.. فالتوكل على الله كلمة بسيطة لكنها تجمع الايمان كله .. كل الايمان مجموع بكلمة التوكل على الله.. بدك تنزل عالجامع تصلي على الجامع متوكل على الله؟ هيأت النية اولا؟ هيأت الاستعداد للنزول على الجامع؟ والله انا مني قدران تعبان اجريّ عم يوجعني مني قدران امشي.. هيأت مين يساعدك؟ هيأت عكازة تستند عليها ؟ هيدا من السبب .. ما هيأ عكازة ولا واحد يساعده .. وبده ينزل فوقع بالطريق.. هذا توكل على الله ؟ هذا غير متوكل.. فاذاً التوكل على الله عز وجل تهيئة السبب ثم الاعتماد على مسبب الاسباب.. فان كان اراد الله بك الخير يسّره الله لك.. واذا ما اراد بك الخير منعك .. فمنع الله عطاء.. اذا منعك هيدا من رحمته فيك.. لا يمنع وانت بحاجة.. الله عز وجل يمنع حتى لا تتضرر .. قال ان من عبادي من لا يصلحه الا الفقر.. ومن اذا اغنيته فسد.. وان من عبادي من لا يصلحه الا الغنى وان افقرته فسد.. فالله عليم بك وبعملك.. فاذا كنت مؤمن متوكل على الله عز وجل الله يهيء لك الاسباب كلها.. فمن احب ان يكون اقوى الناس فليتوكل على الله.. هذا كلام النبي ﷺ .. ومن احب ان يكون اكرم الناس فليتق الله.. ومن احب ان يكون اغنى الناس فليكن بما في يد الله اوثق منه بما في يديه.. حديث من احب ان يكون اقوى الناس فليتوكل على الله.. بده يصير اقوى الناس بده يصارع وهو ما بيحسن يشتغل شغلة.. ضعيف وبطيء وبده يصارع.. هيدا اقوى الناس؟ نقول له بدك تدخل النادي وتتمرن وسنتين وتلاتة واربعة لحتى يمرنوك تاخد الحزام الاول والثاني بعدين بيهيئوله المقابلة مع المصارعين .. اما انا متوكل على الله وبده ينزل يصارع وانا متوكل على الله والله ينصرني .. اذا بينزل بلطمة وحدة اذا لطمه ياها هيداك بيفرطه.. فمن احب ان يكون اقوى الناس فليتوكل على الله يعني بعدما يهيئ الاسباب.. نبينا ﷺ صنع من سيدنا علي اعظم انسان مقاتل.. سيدنا علي لما اجا عند النبي ﷺ اديش عمره ؟ 7 سنوات .. فالنبي عمل له سيف على قده فصار يتقاتل هو ورفقاته على قده والنبي واقف شايفن عم يتقاتلوا.. اضربه على مهلك انت اخطأت من هون انت من هون .. يتدربوا.. ﷺ .. لذلك سيدنا علي ما دخل معركة الا وتغلب فيها.. وما قاتل عدو الا وتغلب عليه.. فقالوا له يا ابا الحسن شو هالسر يلي عندك انت؟ ما قاتلت انسانا الا وتغلبت عليه.. شو يعني قوتك غير قوتنا يعني؟ قال لهم : لا.. انا عندي قوة والخوف يلي طالع من خصمي .. انا وخوفه اثنين غلبنا واحد .. فرضي الله عنه وارضاه. لكن النبي مرّنه على قتال السيف ورمي السهم والرمح فرضي الله عنه وارضاه النبي علمه فنون القتال لذلك نجح.. اما جاي من البرية وبده ياخد الاولية ما ممكن.. فلذلك التوكل مع تهيئة الاسباب (إِنْ يَنْصُرْكُمُ اللَّهُ فَلا غَالِبَ لَكُمْ وَإِنْ يَخْذُلْكُمْ فَمَنْ ذَا الَّذِي يَنْصُرُكُمْ مِنْ بَعْدِهِ)
ما في احد.. فالله ينصر لكن بسبب ولا بغير سبب؟ الله بينزل النصر على جيش كسول تنبل ام على جيش فيه الاستعداد ؟ فالجيش فيه استعداد.. مع انه مع النبي كانوا 313 او 316 واحد بغزوة بدر.. فالنبي رفع يديه : اللهم اللهم اللهم.. ان تهزم هذه العصابة فلن تُعبد في الارض .. اللهم .... وقع الرداء عن كتف النبي... سيدنا ابو بكر قال له يا رسول الله كفاك مناشدة لربك.. بيكفي.. الله ما بيخزيك.. النبي مع السبب رجال واقوياء عم يدعي.. فكان النصر.. ولما دخلوا الى غزوة حنين كانوا 12 الف.. واحد قال : لن نغلب اليوم عن قلة .. فالله هزمهم.. قال تعالى(إِذْ أَعْجَبَتْكُمْ كَثْرَتُكُمْ فَلَمْ تُغْنِ عَنكُمْ شَيْئًا وَضَاقَتْ عَلَيْكُمُ الْأَرْضُ بِمَا رَحُبَتْ ثُمَّ وَلَّيْتُم مدبرين) لو ما الله عز وجل اعان النبي ﷺ .. كان النبي حوله حوالي 12 واحد .. النبي قال للبغلة اقعدي بالارض اخد كمشة تراب ورمى فيها وجوه الاعداء قال : شاهت الوجوه.. ما بقي عين الا دخل فيها الرمل .. فالنبي قال له نادي الهربانين . .بين ما رجعوا كان مكتف الكل..
انزل الله تعالى (وما رميت اذ رميت ولكن الله رمى) انت رميت بيدك لكن يلي اوصل التراب لكل العيون مين؟ ولكن الله رمى..
فلما تعجز تلتجئ الى الله ، الله عز وجل يعينك.. اما اذا انت مقصر وما في شيء ما ممكن يصل الانسان الى مراده.. شو هو التوكل؟ الثقة بالله بان الله يعلم ما اريد.. كون واثق ان الله يعلم ما انت تحتاجه وما تريده وان كان الله يعلم ذلك حط ثقتك بالله بأن الله يعلم.. هلق نحن في الحياة لما يكون في الواحد له قضية نقول له وكّل محامي.. لما بيوكل محامي بيحكيله بعض الاشياء.. المحامي بيحط المخططات قدامه بيهيئ الدعوى.. لما انت بتوكل محامي ومحامي قدير بتتدخل بالحكم؟ صار المحامي هو عم يدافع عنك.. فهذا التوكل.. لما وكلته صار هو ادرى في الموضوع صار هو يدافع عنك.. حطيت ثقتك فيه.. اما وكلته وكل ما بده يحكي المحامي تقول له لا ليس كذلك.. شو بتقول له ؟ توكل انت لحالك دبر راسك.. ما بيرضى.. فمتى ما توكلت ضع ثقتك بمن توكلت عليه.. فالله عز وجل هل هو موضع ثقة؟ الله اكبر.. ثقتنا الله.. فاذا كنت مع الله في ضيق وشدة وهيأت السبب وقلت يا الله فالله عز وجل يحقق لك المراد.. هذا التوكل اذاً الثقة بما عند الله عز وجل.. الله عنده العلم عليم بك وعنده الخبرة.. الخبرة غير العلم.. الخبرة معرفة السر يلي بقلبك جوا.. قبل ما انت تعرفه الله بيعرفه.. الخبير بمعرفة الاسرار العليم بمعرفة الامور الظاهرة.. فالله عليم وخبير وسميع واذا كان سميع وبصير يراك ويسمع كلامك ويعلم سرك ونجواك اذاً ثق بالله واعتمد عليه واتبع السبب فالله عز وجل يهيئ لك المراد هذا اذا كان توكل على الله.. اما بدون ثقة.. المسلم ضاعت ثقته بالله.. يقول اخي عم ندعي ندعي والله لا يستجيب.. ضاعت ثقته بالله.. ليش؟ لانه ما صار له معلم.. لو صار له معلم يهيئ السبب يلتجئ الى الله بصدق واخلاص الله يحقق له الامال.. ما خيّب الله احدا.. الثقة بالله.. سمعنا من شيخنا قصة احفظوها والله بتنكتب بماء الدهب.. الله يرضا عن شيخنا .. الست زبيدة زوجة هارون الرشيد كان لها متل مسرح تنزل تقعد فيه هي والشعراوي يحكوا فيها يمدحوا.. ففي 2 فقراء.. طلعوا الصبح اجتمعوا .. وين رايح قال له انا لح اطلع وقف بأول الشارع خير ليش بأول الشارع؟ قال له اليوم بدها تجي الست زبيدة.. بضل نادي يا مال الست زبيدة لحتى تغنيني.. قال له والله انا ما بطلب غير من الله.. انا بنص الشارع هون لح اقعد اطلب من الله.. قال له هي الست زبيدة تعطي من دون مقابل.. قال انا ما بطلب الا من الله.. فواقف هيدا بالشارع اجا الموكب.. يا مال الست زبيدة يا كرم الست زبيدة يا جود الست زبيدة.. هيداك عم يقول من مال الله يا كريم.. فلما رجعت قالت لهم جيبو فروج اطبخوه وحطوا فيه 50 ليرة دهب .. وبتعطوه للي عم ينادي بأول الشارع للست زبيدة.. وهيدا يلي بنص السوق عم يقول من مال الله اعطوه 50 ورقة.. اخد هذا جابوا لهاد الفروح وجابوا لهيداك.... وهني مجتمعين قال له شو.. قال له بلا ست زبيدة بلا .. بتبعتلي فروج؟ اي انا شو بدي اعمل بالفروج؟ انت شو ؟ قال له والله انا بعتتلي 50 ليرة.. بتشتري الفروج؟ قال له اي بشتري.. خلي الولاد ياكلوا الفروج.. عطاه الخمسين واخد الفروج .. راحوا للبيت فتحوا الفروج واذ.. 50 ليرة دهب.. الله اكبر.. قال والله من مال الله ما بطلب الا من الله.. لما طلعوا تاني يوم شو قال له والله اليوم مهيئ لها قصيدة للست زبيدة .. قال له والله انا من غير الله ما بطلب.. تاني يوم هيداك من مال الست زبيدة وهيداك يقول يا كريم من مال الله..
تاني يوم قالت لهم جيبوا بطة حطوا فيها 100 ليرة دهب وهذا اعطوه 200 ورقة.. كمان بطة بدي اكل بطة انا ؟ لما اجتمعوا عشية بتشتريها؟ قال له والله انا عطتني 200 ورقة بشتريها ب200 .. هي 200 .. اخد البطة.. 100 ليرة دهب.. تالت يوم جيبوا ديك حبش.. حطوا فيه الف ليرة دهب وهيداك اعطوه 1000 ليرة سوري.. كمان عشية عم يتفتف ويسبسب.. شو باك؟ بتبعتلي ديك حبش ناشف؟ شو بدي اعمل بديك الحبش؟ شو عطتك قال الف ليرة بتشتريه بالف ليرة؟ هي الف ليرة.. رد اليوم الرابع قالت لهم جيبوه .. جابوه.. قالت له يخرب بيتك لك ما استغنيت من مال الست زبيدة؟ قال لها يا خانم على ايش بدي استغني؟ على الفروج ولا على البطة؟ هيدول بدها تغنيني شو بدي ساوي فيهم .. عم بيعهم لهيداك يلي عم بيقول من مال الله .. عم تعطي 50 و100 و200 والف.. قالت له عم تعطيه ياهن له؟ اي.. قالت له .. المعطي الله .. مال الله هذا ليس مال الست زبيدة.. يلي بده يستغني بيستغني من مال الله ليس من مال الست زبيدة. .قالت له يا مسكين.. اما الفروج حطيتلك فيه 50 ليرة دهب والبطة 100 ليرة دهب والديك الحبش حطيتلك 1000 ليرة دهب يخرب بيتك عم تبيعهم ب100 ورقة و50 ورقة؟ قالت له مشان تعرف المعطي الله .. ليس الست زبيدة.. خلي توكلك على الله وثقتك في الله.. فالله يعطي من يشاء ما يشاء كما يشاء .. لتخلي ثقتك بالله واعتمادك على الله عز وجل .. وتوكل الواثقين بالله سيدنا ابراهيم واثق بالله.. نبينا ﷺ واثق بالله.. سيدنا ابراهيم كتّفوه قذفوه بالمنجنيق عالنار بالمنجنيق.. والنار من حرها الطير عم يوقع من حرها.. قال : حسبنا الله ونعم الوكيل.. الله يتوكل فينا.. حسبنا الله ونعم الوكيل.. فقال الله للنار (يَا نَارُ كُونِي بَرْدًا وَسَلَامًا عَلَىٰ إِبْرَاهِيمَ) وقع في النار .. النار ما أثرت الا حرقت له الرباط يلي مربطين له ايديه ورجليه فقط وهو ما تأثر.. عايش احلا ايام عاشها في النار.. حسبنا الله ونعم الوكيل.. نبينا ﷺ لما رجع من غزوة احد ابو سفيان كان له فكر يرجع يكمل..قالوا له لا محمد قتلتوه شو عملتوا يعني؟ بده يرجع بعت مين يوقع الخوف .. النبي مهيأ جماعة وجايين.. قال تعالى (إِنَّ النَّاسَ قَدْ جَمَعُواْ لَكُمْ فَاخْشَوْهُمْ) تجمعوا كلهم.. ( فَزَادَهُمْ إِيمَاناً وَقَالُواْ حَسْبُنَا اللّهُ وَنِعْمَ الْوَكِيلُ . فَانقَلَبُواْ بِنِعْمَةٍ مِّنَ اللّهِ وَفَضْلٍ لَّمْ يَمْسَسْهُمْ سُوءٌ) خلي دائماً حسبنا الله ونعم الوكيل بعد تهيئة الاسباب .. فدائما اذا كان الواحد مع الله عز وجل خلي ثقتك بالله واعتمادك على الله ولا تطلب الدنيا من غير الله.. طلب الدنيا من غير الله ذل وطلبها من الله كرامة وعز.. اطلبها من الله.. لان الدنيا ملك مين ؟ الدنيا ملك الله .. اطلبها من المالك الحقيقي.. لا تطلبها من الوكيل.. الانسان وكيل.. الله وكلك.. (وَأَنفِقُوا مِمَّا جَعَلَكُم مُّسْتَخْلَفِينَ فِيهِ) جعلك وكيل انت تنفق.. اما المالك الحقيقي الله.. فاطلبها من الله من المالك الحقيقي.. وعيب على الانسان عيب عليه ان يطلب الدنيا من غير الله عز وجل .. يقول الله تعالى في الحديث القدسي: يا داود وعزتي وعظمتي لا يعتصم بي عبد من عبادي دون خلقي.. اعتصم بالله وترك الناس .. اعلم ذلك من نيته.. من نيته ما بده غير الله.. فتكيده السموات السبع ومن فيهن.. عملوله مكيدة حتى يبعدوه.. والاراضون السبع ومن فيهن الا جعلت له منهن فرجاً ومخرجاً.. اهل السموات واهل الارض عم يكيدوا له الله بيجعل له الفرج والمخرج.. هذا لثقته بالله.. وعزتي وعظمتي لا يعتصم عبد من عبادي بمخلوق دوني اعلم ذلك من نيته .. معتمد على فلان ما معتمد على الله.. الا قطعت اسباب السموات من يده .. قطع صلتك وقطع كرامتك به.. وارضخت الارض من تحت قدميه ولا ابالي في اي واد هلك.. لكن انت ما مع الله وين ما هلك لا يسأل عنه..
ومن جملة ما علمنا النبي ﷺ هذا لازم كلكم تحفظوه.. علمنا لما بدك تطلع من البيت شو بدك تحكي؟ اول طلعتك من البيت تلتفت لعيالك تقول لهم : السلام عليكم ورحمة الله .. تفتح الباب وتطلع .. بسم الله .. اذا خرج الرجل من بيته هذا حديث النبي اكتبوا..
اذا خرج الرجل من بيته فقال : بسم الله توكلت على الله لا حول ولا قوة الا بالله...
بتنحفظ هي معكم ؟ شو بيقول؟ بسم الله توكلت على الله لا حول ولا قوة الا بالله.. هي امتا بده يحكيا ؟ سمعوني ياها لشوف.. هيدا فتح الباب وبده يطلع.. قال هذه الكلمة النبي قال : يقال حينئذ : هديت وكفيت ووقيت فتنحى عنه الشياطين فيقول له شيطان اخر كيف لك برجل قد هدي وكفي ووقي؟ .. شو بدك تعمل ؟ كلمتين انت حكيتن انت وطالع.. هديت الى الخير وكفيت حاجاتك ووقيت شر ذلك اليوم.. تلات كلمات .. لا تنسوهم.. كلما بدك تطلع من البيت..
في حديث ورد هذا بس مشان الثقة بالله.. لح كتبكن ياه بس مشان تثقوا بالله عز وجل .. حديث طويل شوي.. ورد هذا الحديث بالتوراة.. نحن مناخد من النبي ﷺ ما مناخد من التوراة .. لكن لما ورد معناها في له..
يا ابن آدم لا تخافنّ من ذي سلطان ما دام سلطاني باقياً وسلطاني لا ينفذ ابداً.. يا ابن ادم لا تخشى من ضيق الرزق ما دامت خزائني ملآنة.. وخزائني لا تنفذ ابداً.. يا ابن ادم لا تأنس بغيري وانا لك فإن طلبتني وجدتني وان أنستَ بغيري فُتّك وفاتك الخير كله.. الله... يا ابن ادم خلقتك لعبادتي فلا تلعب.. وقسمتُ رزقك فلا تتعب.. وفي اكثر منه فلا تطمع.. ومن اقل منه لا تجزع.. قلت بيدك لا تجزع.. فإن انت رضيت بما قسمته لك ارحتُ قلبك وبدنك.. وكنتَ عندي محموداً وان لم ترضَ بما قسمته لك فوعزتي وجلالي لأسلطن عليك الدنيا تركض فيها ركض الوحوض في البرية ولا ينالك منها الا ما قد قسمته لك.. مكتوب المكتوب بدك تاخده.. وكنت عندي مذموماً.. يا ابن ادم خلقت السموات والاراضين السبع ولم أعيا بخلقهنّ.. الله خلقهم حصل تعب؟ تعالى الله عن ذلك علوا كبيرا.. أيعيني رغيف اسوقه لك من غير تعب؟ بيعجزه؟ يبعتلك رغيف خبز؟.. يا ابن ادم انا لك محب فبحقي عليك كن لي محباً.. يا ابن ادم .. لا تطالني برزق غد .. بكرا شو بدنا ناكل شو بدنا نشتغل شو بدنا نعمل.. كما لا أطالبك بعمل غد.. صلاة الضهر بكرا مفروضة عليكم؟ صلاة الضهر بكرا مفروضة عليكم ؟ لا.. صلاة الصبح بكرا مفروضة عليكم هلق؟ لا.. ما دخل وقتها .. (إِنَّ الصَّلَاةَ كَانَتْ عَلَى الْمُؤْمِنِينَ كِتَابًا مَّوْقُوتًا)
قبل ذلك غير مكلف.. فلا تطالبني برزق غد كما لا اطالبك بعمل غد.. فإني لم انسَ من عصاني فكيف بمن أطاعني؟ وانا على كل شيء قدير.. وبكل شيء محيط.. جل جلال الله.. فلا تظن ان الله ينساك .. خلي ثقتك بالله.. قل الرزق او كثر.. خلي ثقتك بالله سبحانه وتعالى وكن متوكلا على الله بكل الثقة.. ﷺ نتعلم من سيرته الثقة بالله.. قاتل النبي ﷺ بعض الحروب ورجع هو والجيش نزلوا بوادي فيه شجر.. فالنبي ﷺ قال : من ينتظر براس الوادي حتى لا يدخل علينا عدو.. الصحابة كل واحد نام تحت شجرة والنبي علق السيف بالشجرة وتسطح.. واحد من العدو لاحق النبي.. خلاه لينام واجا اخد السيف وسحبه قال ما حب يقتل النبي غيبة حتى لا يُعيّب بين العرب .. نكش النبي يا محمد يا محمد .. النبي فتّح عيونه .. السيف فوق راسه.. قال له من يمنعك مني؟ فالنبي ﷺ بكل هدوء بكل ثقة.. قال له : الله يمنعني منك.. بكلمة الله يبست يده بالسيف ما عادت تحركت.. في رواية وقع السيف من يده والنبي اخد السيف قال له وانت من يمنعك مني الان؟ قال له يا محمد كن خير اخذ.. انا اخدت السيف طلعت لئيم لا تطلع متلي لئيم.. قال له : بتأسلم؟ قال له لا ما بأسلم لكن أعاهدك ان لا اعين عليك محارب.. ما بدل عليك ولا بعين عليك محارب.. قال له مع السلامة.. لا قاتله ولا .. مع السلامة.. فراح الى قومه قال لهم جئتكم من عند خير الناس .. افضل الناس.. كان مفروض شو يعمل فيه؟ يقطع رقبته.. فهي الثقة .. السيف فوق رقبته.. من يمنعك مني؟ الله يخليك الله يرضا عليك.. ما هيك بدك تقوله؟ الله يخليك الله يرضا عليك طول بالك .. نتفاهم سوا.. الله يمنعك مني.. يبست يده.. هي ثقة النبي ﷺ في الله.. ولما كانوا في الغار كمان سيدنا ابو بكر عم يبكي .. قال له ما على نفسي خايف.. انا اذا متت انا واحد من الناس اما انت اذا صابك شي.. راح الدين كله يعني.. خير؟ قال له لو واحد اطلع على اصابيع اجريه بيشوفنا .. العنكبوت من فوق معشعش لتحت .. فالنبي بكل ثقة قال : يا ابا بكر ما تقول في اثنين الله ثالثهما؟ شو رأيك؟ قال له خلص.. قال يا ابا بكر ان دخلوا علينا من هنا خرجنا من هنا.. الغار في له من اخره طاقة.. انا وصلت للغار بعد فضل الله طلعت له .. الطاقة اذا الواحد بيطلع منها بيشوف بحر جدة.. بيفوت من هون منطلع من هون.. هي زيادة الثقة.. فالله ثالثهما.. بدن يفوتوا عالغار.. من عهد نوح ما حدن فايت عالغار.. منكن شايفين العنكبوت .. ارجعوا ارجعوا.. لو كان الاسلاك شائكة كان اقتحموها.. خيط عنكبوت يلي بتنزل فيه .. لا تستخفوا فيه.. هذا الخيط مؤلف من 4 الاف خيط بيطلع من 4 اقنية كل قناة فيها الف خيط.. عم تلفن وتطلع عليهن وتتنزل عليهن.. انت شفته خيط هني شافوهن.. الله .. ما تقول في اثنين الله ثالهما.. ﷺ .. لذلك خلي الانسان عطول ثقته بالله تعالى متوكلا على الله عز وجل من غير ما تحن لحدا او تئن لحدا.. الناس ما بيطلع بيدهم شيء يا ابني.. مشان تعرف ما تحط ثقتك بأحد.. الناس كلها يا ابني.. الانسان ضعيف.. والله تعالى لما قال : (وَخُلِقَ الْإِنْسَانُ ضَعِيفًا) مشان يعرفك بحالك لا تستقوي بحالك لا تشوف حالك انك شاب وقوي وعندك الشباب والقوة كلها بشوكة يرميك.. ما شوكة عصب من اعصابك اذا حركه.. تبرك بالفرشة ما بقا تحسن تهز.. عصب من الاعصاب.. فخلي دائماً ثقتكم بالله.. توكلوا على الله في اموركم كلها فلا تدري بهذا التوكل الله عز وجل كم يصرف عنكم من السوء.. من جملة ما حصل في التوكل قصة حصلت مع سيدنا عمر بن العاص وسيدنا عمر بن الخطاب.. لازم المسلم يعرف هذه الاشياء هي كلها من باب التوكل على الله.. يلي فتح مصر مين؟ عمر بن العاص.. ارسله سيدنا عمر فتح مصر.. اجوا لعند عمر بن العاص قالوا له : نحن في عنا عادة .. النيل نهيئ له بنت بكر نلبّسها كل الالماس والدهب والكذا ونرميها بالنيل مشان يجي النيل والا النيل لا يمشي بينشف.. فعمر بن العاص قال لهم لا هذا لا يجوز في الاسلام انتظروا لنسأل امير المؤمنين.. بعت لسيدنا عمر انه هي العادة عندهم وما بيمشي النيل اذا ما رميوها هالمسكينة شو دخلت هي.. بنت عمرها 17 -18 سنة وبكر واجمل وحدة لبسوها تموت غرق مشان يجي النيل لهم؟ ارسل رسالة لسيدنا عمر.. سيدنا عمر قال له : احسنت بما صنعت انه منعتهم برافو عليك .. كتب له ورقة.. من عمر ابن الخطاب الى نيل مصر.. ان كنت تجري من عندك فلا حاجة لنا بك.. هلق انت عم تمشي لحالك لسنا بحاجتك.. وان كان الله هو الذي يجريك فنسأل الله الذي يجريك ان يجريك.. بعتها لسيدنا عمر انه هذه ارميها بالنيل.. ليلتها كانوا يريدون ان يرموا البنت .. رما الورقة بالنيل.. فزوا عند الصباح واذ النيل مرتفع 17 رفعه
نسأل الله الذي يجريك.. فتوكله على الله وثقته بالله اجرى النيل.. فخلي ثقتك بالله لا تظن ان الله نسيك او ضعفت قوته او شغل بغيرك.. فالله تعالى موجود كن مع الله ترى الله معك.. وكثير من اولياء الله واحباب الله كتير يقعون في ازمات وهموم .. فالذي ينجيهم الله بتوكلهم على الله.. بعض العارفين بالله رضي الله عنهم.. كانوا في سفر بعده اخوانهم بعد يومين تلاتة بلا اكل.. فالشيخ اطلع على واحد قال له شايفك جوعان .. والله يا سيدي متل ما شفت.. قال له اعطيني ورقة وقلم.. جاب له ورقة وقلم .. اخدها وكتب عليها.. بسم الله الرحمن الرحيم.. انا شاكرٌ.. انا حامدٌ .. انا ذاكر .. انا جائع انا ضائع انا عاري.. هي ستة وانا الضمين بنصفها فكن الضمين لنصفها يا باري.. ستة .. انا جوعان وعريان وضايع.. وبنفس الوقت انا بشكر وبحمد وبذكر.. انا متكفل 3 وانت بتتكفل 3.. قال له خود هالورقة واطلع اول واحد بتشوفه اعطيه ياها.. اخد الورقة وطلع برات البلد اول واحد شافه واحد راكب على فرس بهالهيئة .. ناوله الورقة.. فتح الورقة وقرأها صار يبكي .. قال له وين صاحب الورقة؟ قال له بالمكان الفلاني.. طلع عالسطح جاب 700 ليرة وقال له اعطيه ياهن.. راح اشترى بضاعة.. حط البضاعة .. شو هاد قال له والله اول واحد طلع عطيناه الورقة طلع نصراني .. قال له يا ابني لا تمدوا ايدكم على شي هلق بيجي يأسلم.. حتى يجي يأسلم.. هيداك عم يراقبهم من بعيد لبعيد شافن انه جوعانين وما حدن اكل.. فاجا دخل عليهم.. لماذا لا تأكلون؟ نحن لا نأكل حتى تجي انت.. دغري اسلم.. اسلم واكلوا.. انا جائع انا ضائع انا عاري.. بتحسن تشكي ل الله تعالى بهيك شكوى؟ بس قال له انا كمان من عندي ذاكر وشاكر وحامد.. هي ستة وانا الضمين بنصفها فكن الضمين لنصفها يا باري.. انت جرب ايمانك.. جربوا ايمانكم يا ابني بهالاية القرآنية. .يا ترى ايمانك صحيح ولا غير صحيح؟ ايمانك ثابت او لا؟ منجبلكن قصة على التجريب .. بعضكم سمعانها مني لكن... اوعى تجرب الله .. الله ما بيتجرب.. جرب ايمانك..
قاعدين ولا مننهي الدرس؟ قاعدين.. اسمعوا هالقصة.. الامام البهلول (رضي الله عنه وارضاه).. ماشي في الطريق شاف في ساقية قاطعة الطريق دخل من الساقية شاف واحد مدبوح طازة والسيف معلق برقبته .. رجل ضخم والسيف برقبته.. مسك السيف وقف فوق راسه.. مر اول واحد شو هاد يا بهلول ؟ قال له : عم جربه.. كان عم يقرأ اية القرآن (وَلَا يَظْلِمُ رَبُّكَ أَحَدًا) فلما قرأ (وَلَا يَظْلِمُ رَبُّكَ أَحَدًا) ضب المصحف وقال لجرب ايماني بهالاية.. الله بيظلم احد؟ فشاف الرجل مدبوح حمل السيف.. قال له عم جربه.. ركض عطا خبر للشرطة.. اجوا .. شو هاد يا بهلول؟ السيف عم ينقط دم وهيداك عم يلعبط .. قال له عم جربه.. قال له : واحد بيجرب السيف ببني ادم ؟ بجرب السيف بخاروف بالبقرة.. قال له عم جربه.. اخدوه الى المحكمة امر بالسجن هارون الرشيد.. قال لهم بركي مخربط شوي اسالوه.. كلما يسألوه يقول لهم : عم جربه.. لك يا بهلول.. شلون ؟ قال : عم جربه عم جربه عم جربه.. الحاصل انعقدت المحكمة بوجود هارون الرشيد .. وصدر الحكم ان القاتل يُقتل.. وأتي بالامام البهلول ومد النطع .. نطع جلد جمل كبير حتى اذا انقطع الرأس بينزل الدم على الجلد حتى ما ينزل على الطرقات بيقيموه.. جابوا الامام البهلول مكتفة يديه قعدوه عالجلد وقدام منه السياف واقف السيف بيده.. ما بيقطع لحتى يقول له اضرب يضرب له راسه.. وقف بالمحكمة.. الاستنطاق الاخير : ما تقول يا بهلول؟ قال له : عم جربه.. بينه وبين الموت شو بقي؟ اضرب.. بيوقع راسه.. عم جربه.. التفت هارون الرشيد للقاتل شو رأيك تنفيذ الحكم.. عم يتشاور هو وهارون الرشيد اذا بيقتلوه.. واذ واحد من اخر الشارع انا القاتل انا القاتل انا القاتل.. وعم يصرخ.. هارون الرشيد قال افتحوله طريق.. قرب لحتى وصل لقدامه .. ولد عمره 22 سنة متل الفلة.. قال له انا يلي قتلته.. ليش يا ابني انت قتلته؟ قال له انا من ابناء الامراء الفلانية الفلانية يعني ابناء الاعزاء دخلت الحمام لاتغسل فشفت الاختيار عم يتغسل .. طلب مني فرك له ضهره فعيلتي وعائلتي.. انا فرك له ضهره؟ ثم فكرت انه ازرع هالعمل بركي بحصده بكبري.. العمل يلي بتعمله الله بيخبيلك ياه بكبرك.. بيجي مين بيحن عليك بكبرك.. قال فبدأت فرك له ضهره كلما فرك له ضهره يطخي راسه ويرفع فخذيه .. قال له فوقع بصري على فخذيه كاتب اسمين مقدسين ملوتن بالنجاسة.. قال له فايماني ما تحمّل.. تركت وهربت واشتريت السيف وسنيته بهالمحل لحتى طلع.. لما فات من هالمدخل.. بهالاسمين المقدسين ضربته.. من قوة جسمه طلع السيف برقبته.. قال له اجا البهلول حمل السيف.. اول شي قال لهم شوفوا اكشفوا على فخذيه شو موجود .. موجود.. ملوتين بالنجاسة.. ما تقول يا بهلول ؟ قال له عم جربه.. انعرف القاتل .. شلون عم تجربه؟ قال له : كنت اقرأ كلام الله : ولا يظلم ربك احدا فقلت لجرب ايماني بهالاية يا ترى ايماني صادق بهالاية ولا لأ؟ عم جرب ايماني.. شو طلع الايمان؟ صادق؟.. وصل بينه وبين الموت لحظة حرف.. هي الثقة بالله يا ابني.. هي الثقة بالله.. افحص ايمانك جرب ايمانك وهذا الايمان يا ابني لا يكون اذا ما في ذكر الله.. بتفكروا انه هيدا الايمان بيصير بقراءة الكتب .. لا يا ابني.. لا بقراءة كتب ولا مجالس.. بده يا ابني ذكر الله.. حتى اذا امتلأ القلب بذكر الله بيصير عندك التوكل والثقة والحقيقة.. هيدا الايمان.. اما واحد بده يصير مؤمن وما في ذكر الله ما ممكن يا ابني.. ممكن يا اخواني يكون في شبع بدون طعام؟ تشبع من دون اكل؟ ممكن ترتوي من غير ما تشرب مياه؟ ما ممكن يا ابني.. كذلك ما ممكن تصير متوكل اذا ما كان قلبك ذاكر لله.. بدك تتعلم ذكر الله .. تقعد تذكر الله كل يوم .. الك جلسة مع الله .. كل يوم .. اقعد وغمض عيونك بينك وبين الله .. 10 دقايق ربع ساعة لاحظ ان الله معك.. فهذه الجلسة التي تعطي هذا الايمان يا ابني.. فلو كل جلسة اخدت نقطة من الثقة .. كل جلسة نقطة.. بالسنة كم نقطة بتاخد ؟ بتعبي كاسة.. صار عندك يقين.. صار عندك ثقة.. فأسأل الله ان يوفقني واياكم الى الثقة بالله عز وجل..