درس اليوم عن صفات يوم القيامة قال الله تعالى.. ذَٰلِكَ يَوْمٌ مَّجْمُوعٌ لَّهُ النَّاسُ وَذَٰلِكَ يَوْمٌ مَّشْهُودٌ.وَمَا نُؤَخِّرُهُ إِلَّا لِأَجَلٍ مَّعْدُودٍ.
جل جلال الله ذلك اليوم اشارة الى يوم القيامة يوم القيامة مخيف لغير المؤمن .اما المؤمن فهو يوم المنى يوم السعادة يوم الكرامة ..يوم القيامة يبدأ من ساعة ان يكون الموت ساعة الموت متى ما خرجت روح الانسان من جسده انتهى من الدنيا وتبدأ الآخرة تبدأ بالدار الآخرة بيقولوا بينفخ طلوع ما بينفخ طلوع الروح ما بتطلع من فمه يا ابني الروح تخرج من الجبين ونفخ الروح هاي صورة اما الحقيقة تخرج الروح من جبهة الانسان لمجرد خروج الروح من الانسان بدأ اليوم الأخير اليوم الاخير هو اليوم التاني بعد أخر يوم من الدنيا .. الدنيا تعتبر الاول والاخير لان ما بقى فيه يوم تاني او تالت .. هذا اليوم الاخير الذي تبقى فيها ان كنت في النعيم فنعيم خالد وان كان في العذاب فعذاب خالد الا اهل التوحيد يعذبوا بمقدار الذنوب ثم يأذن الله بخروجهم بشفاعة الى الجنة في باب الجنة عين ينزل اليها المعذب فيخرج منها ابيض كمثل الثلج فيدخل الجنة .
اليوم الآخر هو اليوم الذي تحصد فيه ما زرعته في الدنيا لحديث النبي ﷺ الدنيا مزرعة الآخرة ..فتزرع في الدنيا من اعمالك الصالحة اعمالك الطيبة والمعاملات الصالحة بالايمان والخشية والتقوى نزرع زرع فاذا خرجت الروح من هون بدها تقطف ثمار الزرع انت تزرع والله يسقي بقدرته ينبت لك الزرع تزرع عبادات ينبت فيها الحسنات الاستغفار ينبت فيها التوبة الانابة. تزرع الخشية ينبت فيها كشف الغطاء تزرع المحبة ينبت فيها القرب اليه. فكل زرعة بتزرعها بتحصد الزرع في الآخرة.
من زرع حصد ومن لم يزرع لم يحصد .سيحصد عند الله ما كان زارعا فطوبى من كان عند الله يزرع. اذا انت لم تزرع وابصرت حاصدا ندمت التفريط في زمن البذر فما لك يوم الحشر شئ سوى الذي كسبته يوم الحساب الى المحشر.
اذا اخواني الدار الآخرة دار تتمة لهذه الدار .هالدار الي عملت فيها حتاخد نتيجته في الآخرة. غذائك في الآخرة من طاعتك في الدنيا. ورد في الخبر ان اهل الجنة في كل يوم تدخل عليهم الملائكة بخمسة موائد .مائدة صلاة الفجر ومائدة صلاة الضهر والعصر والمغرب والعشاء كل وقت في مائدة. تدخل الملائكة فيها عدة انواع من الطعام. لا يشبه نوع فيه متل التاني لا في الطعمة ولا في اللون هاي غير لون وهاي غير طعمة .. فإذا غذائك في الآخرة من طاعتك في الدنيا .. اما الاستغفار والاذكار والاوراد فهذه انفاسك في الآخرة تتنفس في الاذكار فكلما كانت اذكارك في الدنيا اكثر كانت مسيرتك في الجنة اكثر واستنشاقك لهواء الجنة اكثر .. الله يتقبل منا ومنكم.
لذلك فتسبيحة واحدة يتقبلها الله خير من ملك سليمان .خير من ملك الدنيا فاذا الانسان سينتقل من هذه الدار الى تلك الدار هالنقلة بدك تنتقلها .قدروا هلق انسان بدو ينتقل من بيته لبيت تاني شو بيحتاج؟ اول الكل بده يأمن البيت التاني .بيت عتيق بده ينفضه ويطليه ويبلطه وبده يغير مطبخه .. اذا كان بيت جديد بده فرش وسجاد وكنابايات وخزانة .. فانت حتنتقل الى بيت جديد ما بده تصليح ولا تجديد انت عمرته عمرت هالبيت بتلاوة القرآن كلما تلوت القرآن ينبت لك القصور في الجنة انت عمرت البيت بس البيت بده فرش .الفرش في الدار الآخرة من وين بدك تجيبه ما في خزانة تروح من هون لهونيك .هون اذا جبت مد في الجامع او حصير فتجده يوم القيامة حصير في البيت خط من حصير خط من ذهب وخط من الماس وخط من جوهر وخط من من الياقوت هكذا وصف النبي ﷺ هذا الوصف .جاب سجادة في الجامع يجد سجادة في الاخرة لكن كما قلنا خط من ذهب وياقوت وزمرد موجودة هكذا في الآخرة فمدك في الجنة من عملك الآخرة. في الدنيا سمع انه بدهن يعمروا جامع تبرع ب 10 ليرات شو بيجيبوا؟ زور رمل واحد تبرع ب الف ليرة هادا ما معه الا 10 ليرات تبرع بكل ماله هاداك معه عشرة الاف تبرع ب الف بالعشر من ماله. فزور الرمل تجده قصرا في الجنة بناه لك رب العزة. بناء يحير العقول مهما اتصورنا النبيﷺ يصور لنا ما لا عين رأت ولا اذن سمعت ولا خطر على قلب بشر . يا اخواني اذا كان النبي ﷺ عم يوصف هالوصف كيف انت بدك تشوف بكرا؟ هون اذا عنا شقفة الماس مننشغل فيها شقفة ياقوت مننشغل فيها كيف اذا شفنا بكرا؟ قال النبي ﷺ الَلبنِة في بناء الجنة رأيتها بعيني طولها خمسة وعشرون متر وعرضها خمسة وعشرون متر من ياقوت في الآخرة منشوفها لَبِنة من ياقوت وزمرد والماس بكرا بالآخرة بدك تقعد بقصر ما متخيل كيف قال النبيﷺ الغرفة في الجنة عرضها ستون ميلا هادا عرضها والطول دايما اكثر طولها مئة ميل جل جلال الله لَبِنةمن فضة وذهب وياقوت وزمرد هادا بناء الآخرة انت بدك تبنيه لا تظن انت بدك تروح لهونيك تلاقيه جاهز .. من لم يبنِ يعيش في الصحراء بدك تبني بحياتك بالصلاة بتلاوة القرآن والقرب الى الله بتعمر بيتك وكثرة الاذكار والاوراد تغرس الاشجار بدك جنينة واسعة اكثر من التسابيح في الارض هون معناتها المسلم ما عنده فراغ كل اوقاته عم يشغلها .بده ينتقل للدار الآخرة والله يا احبابي النقلة حلوة اسمعوا النبيﷺ كيف يوصف لك النقلة الى الآخرة عندما يقع المؤمن في النزع سيدنا عزرائيل مافي عزرائيل الناس بيقولوا هيك هو ملك الموت يرسل جنوده فتحيط حول التخت قاعدين عم يعالجوا الروح عم يسحبوها اول باول يقول لهم تلطفوا به وترأفوا كل سحبة يريحوه شوي كل ما جذبوا الروح جذبه خلوه يستريح بيردوا بيجذبوها حتى تصل الروح الى الغرغرة فيأتي ملك الموت فيأخذ الروح من وين خدوا هالكلام اسمعوا شو بيقول الله سبحانه وتعالى وَالنَّازِعَاتِ غَرْقًا .وَالنَّاشِطَاتِ نَشْطًا تلك التي تنزع روح الكفرة بيشدوا عليها من إجريه متل الشوك اذا كان معلق بالصوف شلون بيطلعوا؟ الشوك بيطلع الصوف منتف تنتيف اما المؤمن فقدروا وَالنَّاشِطَاتِ نَشْطًا . كلما ما جذبوا جذبة من الروح بيقول الملك دعوه يستريح حتى اذا وصلت الى الغرغرة اتى ملك الموت فيأخذها ويقول ايتها الروح الطيبة اسمعوا هالكلام النبي ﷺ عم يخبرنا في الجسد الطيب اخرجي الى روح وريحان ورب غير غاضب عليك ورضيان ..الله أكبر (( بكى سيدنا قليلا كالغصة)). الله يسمعنا هالنداء .شو بتسوى الدنيا بهالنداء لو خسر الدنيا كلها.. اخرجي الى روح وريحان ورب عليك رضيان .هاي ما بتكفي؟ هاي وغير غضبان؟ فاذا خرجت الروح اكتنفته الملائكة يخرجون وهم بأهازيج ..عاملينله عراضة بيطلعوا فيها لا اله الا الله والشهيد حبيب الله ويصعدون بها حتى يصلوا الى السماء الاولى بيدقوا الباب مين هاد مين معكم؟ معنا فلان .. اهلا بالروح الطيبة كان في الجسد الطيب بيفتحوا الباب ويستقبلهم اهل السماء الاولى ثم يصعدون الى السماء الثانية ثم الى الثالثة شو هالانسان ؟ ويصعدون به حتى الى العرش وكلهم مرحبا بالروح الطيبة كان في الجسد الطيب . الى رب غير غضبان ..يا ابني لو خسر الانسان الدنيا كلها وسف التراب وحصّل على هاي والله ادرك سعادة الآخرة .اما لو جمع الدنيا وما حصّل على هاي ما حصّل على شئ .. لذلك ورد في الحديث عن النبي ﷺ يا ابني يؤتى بأنعم اهل الدنيا( قديش كان منعم) فيغمس غمسة في جهنم فيقال له هل رأيت نعيما قط فيقول لا والله ما رأيت نعيما قط. ينسى كل نعيم غمسة واحدة في جهنم ويؤتى بأبس رجل مؤمن في الدنيا أفقر واحد فيغمس غمسة واحدة في الجنة فيقال له هل رأيت بؤسا قط فيقول لا والله ما رأيت بؤسا قط ..فاذا هاي اول نقطة في الآخرة فاذا حسن عملك ونال هالعطاء هادا سارع الى العمل .
كتير من الناس لما يحملوا الجنازة بيقولوا سبحان الله خفيفة لحالها عم تمشي ما هيك؟ حاملتها الملائكة طالعة فيها الملائكة .
لح نبدا من الاول لما توفى تصعد الروح الى الله تقف بين يديه للسؤال فالحديث أمر النبي ﷺ انه عجل في غسله ودفنه .ليه العجلة؟ لان الروح تبقى واقفة بين يدي الله تُسأل حتى يوضع الجسد على المغتسل بين ما حطوه عالمغتسل يأمر الله الروح ان تنزل تحضر تغسيل جسده .واقفة بين يدي الله حتى ما يطول وقفتها ..فالعوام شو قالوا؟ لما اخدو من الحديث قالوا اكرام الميت ترحيله ..من مات ضحوى فيدفن الظهر ومن مات عشية فلا يبيتن الا في قبره ...اما منخليه لتاني يوم .طولنا الوقفة بين يدي الله ...او لما يجي ابنه من السفر طيب لما يجي ابنه من السفر حيرجع له روحه ؟حيخفف عنه؟ فورا متى تحقق الوفاة غسله فالروح وقفت بين يدي الله أول سؤال عن شبابه فيما افناه ..فشبابك وين فنيته الشباب يبدأ من ال ١٥ لل ٤٠ سنة .وعن عمره فيما ابلاه منال ٤٠الى ٥٠ و ٦٠ وين ضيعت هالعمر وعن ماله من اين اكتسبه وفيما انفقه .. من وين جبته شو عملت فيه؟ شو صرفت لمين اعطيت لله ولغير الله؟ والرابعة عن علمه ماذا عمل به ؟ تعلمت ؟ نعم . شو عملت بالعلم .. والله ما عملت شي ..بلاء عليه .. العلم من ما قام به الانسان وعمل به. فالحاصل غسلناه كفناه حملناه .لما تحمله الروح فوق المغتسل تقعد وجهها للناس وظهرها لقدام هني وماشين ينادي يا اهلاه يا ولداه يا جيراناه اسمعوا لا تلعبن بكم الدنيا كما لعبت بي ..هاي روح غير المؤمن عم ينادي.. المال من حله ومن غير حله فالهناء لكم والحساب والعذاب علي والنبي ﷺ قال والذي نفسي بيده لو يسمعون كلامه او يرون مكانه لذهلوا عن ميتهم وبكوا على انفسهم ..هادا راح اخذ سيئاته ومشي. اما انت شو عم تعمل ..يا اخواني الي عم تعمله بدك تاخده الي بنيته بدك تسكنه.
حكيت لكم قصة قبل بمرة حارجع احكيها منشان تحفظوا انه عملك انت بدك تنتفع فيه ما غيرك رجل شاب توفى والده وهو ما بيعرف يشتغل بده ياكل اضطر بده يشتغل نزل عالسوق من محل لمحل يدور عشغل ما حدا عم يشغله شاف مكتوب شركة فات صاحب الشركة قاعد قله بتشغلوني بس منشان آكل لقمتي استروني. والله يا ابني عنا شغيلة ..شاف الصفاء عليه قله شو بتشتغل ..ما بعرف شو بتشغلوني بشتغل بتحب امسح بلاط اغسل شو ما كان حن عليه صاخب الشركة نادى المعلم الي بالبناء قله خود هاد و شغله معك علموا مصلحة البناء شافه مخلص ضل يشتغل ٥٠ سنة وهو كان عمرو ١٥ سنة وقت بلش صارو ٦٥ اجى عند صاحب الشركة قله انا تعبت حابب قدم استقالتي يتقبلها قله نعم على شرط قله خير قله بتعمرلي بيت ٤غرف وصوفا وبمضيلك الاستقاله ..بس هيك نعم بس هيك وافق وقام اشتغل بسرعة متل ما بيقولوا شبلوا شبل عالبركة لا اعتنى فيه ولا شي اجى عند مدير الشركة هاي المفتاح قله خلص البيت قله خلص هاداك اخد المفتاح وقدم له ياه وقله هادا المفتاح هدية الشركة الك
((دمع سيدنا )) اذا البيت لمين؟ ((دمع سيدنا)) طلع صار يضرب بحاله قال لو كنت اعرف كنت صححت كنت مديت التمديدات كنت عملت كذا ..لكن خلص ما بقى فيه. هادا مثالك يا ابني هادا مثالكم ..الله عز وجل عطاك الحياة وقلك بمضيلك استقالتك من الحياة لما بدك تتطلع الى الاخرة شرط انه تبني بيتك هونيك ..فأنت شو بنيت؟بيتك الي بدك تطلع له اذا ما كنت بانيه بناء جيد انت حتسكنه والي بيسكن ببيت بواريه ضيقة ومصاريفه ضيقه بده كل يوم يخلع البلاط وكل يوم يمدد هونيك ما في تخلع وتمدد بدك تبقى فيه كل حياتك لذلك بعد الموت بدك تسكن بيتك الي انت عمرته وبدك تتجول ببستانك الي انت غرسته بدك تاكل من عملك الي انت عملته ..
الدنيا مزرعة الآخرة بتزرع بتاكل ما بتزرع ما بتاكل الله يعينك على الدار الآخرة شلون بدك تشتغل.
طيب هلق خرجت الروح وصعدت الى الله عز وجل وقوبلت بعفو الله ومغفرته ردوها غسلوه وكفنوه ودفنوه .دفن الجسد في التراب وصعدت الروح الى البرزخ ..البرزخ بين الدنيا والآخرة تعيش هناك الارواح تلتقي بالارواح الي كنت تحبها في الدنيا .ارواح مين كنت تحب؟ ارواح الصالحين ارواح الذاكرين تلتقي بهم يلي من اخواننا بيتوضى بفضل الله يلتقي بالسلالة الطاهرة ويعيش مع السلالة الطاهرة الى يوم القيامه ويبعث مع العارفين في الله هادا مش اخ أخين تلاتة بفضل الله بالعشرات الى عند الموت يلتقي بالسلالة الطاهرة ويقف مع العارفين في الله ..اللهم اجمعنا بهم يا ارحم الراحمين. هاي نعمة من الله عز وجل فبالدار الآخرة من بعد ما تندفن بتطلع عالبرزخ والروح متى ما قعدت بالبرزخ في الها طلعة ارواح المؤمنين العامة يأذن الله لهم من عصر الخميس الى صباح السبت تنزل الى القبر تستقبل اهلها تشوفهم ولما تشوفهم سلمت عليها بترد عليك سلمت على ابوك بيرد عليك سلمت على امك بترد عليك لكن انت ما بتسمع حاكيتها بترد عليك فاذا ارواح المؤمنين من عصر الخميس الى صباح السبت ينتظرون زيارة الاهل .. قال النبي ﷺ من زار والديه في كل جمعة وقرأ لهما ياسين كتب عند الله باراً .. في رواية في كل الجمعة هاي المؤمنين عامة ابوك امك كانوا يصلوا كانوا يصوموا من عصر الخميس الى صباح السبت. اما اولياء الله العارفين بالله العلماء الصالحين منهم مأذونين كل الاوقات الله بيعطيهم انطلاقة عامة ما دام الدهر. اي ساعة تزوره تجده موجودا ..الله يرضى على سيدنا الشيخ بشير الباني كانت روحه صافيه كان يطلع يزور سيدنا الشيخ رسلان وين مدفون؟بباب شرقي صار له ٧٠٠ سنة متوفي يزوره يسلم عليه ..فمرة طلع سلم عليه مارد السلام قعد عنده ما في حدا يا سيدي يا شيخ رسلان ما في. لا حس ولا انس فظن انه انا ماني نفعان مشي زعلان حكالي ياها هو .رجع على بيته قبل الفجر عم يندق الباب مين حيجي بهالوقت مين واذ صاحبه وأخوه في الله جايين بالليل من حلب فتح الباب قله ممكن ٥ دقايق احكي معك جاي بس ٥ دقايق قله تفضل .قله انا شفت الشيخ رسلان بالمنام زارني وحكالي انه انت زرته وما حسيت انه سلم عليك كان مشغول مع الانبياء فما استطاع ان يرد عليك وهو بيشكرك عالزيارة وبيسلم عليك…. جاي من حلب منشان تبلغوا المنام. انشرح صدره الشيخ بشير ..ما حسن يرد في جلسة مع الانبياء بيسلم عليك لان ما كان حاضر معك ..اذا حس شعر انه زاره اهل الله لو مر عليهن الف سنة يبقى موجود ..الله يعطيهم الوقت المطلق.. ليش الهن وقت مطلق؟لانهم في الدنيا اطلقوا روحهم في حب الله فما علقوها بشي غير حب الله لذلك اخذوا انطلاقة مادام الدهر ..ايمتى ما بدك تزوره بتلاقيه قدامك. الله يرضى عن اهل الله شيخنا ايمتى ما بتزوره بتسلم عليه بيرد عليك السلام بيقابلك بالبسمة المعهودة بيسلم عليك اذا ما شفت يا ابني كحل عيونك بذكر الله لتشوفه اذا تكحلت العيون اصبحت في حالة روحية يمكن تشوفه .انا لما توفت والدتي رحمة الله عليها كنت باللاذقية عندي دروس عم درّس انا وبالدرس اجى الشرطي بلغني انه الوالدة توفت والدرس عندي أغلى من والدتي كملت الدرس الناس صاروا يبكوا خلصت الدرس بعد العشاء دورت عسيارة انزل فيها ما لقيت ضلينا للصبح وقبل ال ٨ ما بتمشي السيارة عبال ما وصلنا كان اخي الشيخ رمضان يجزيه افضل جزاء مغسل الوالدة ودافنها قلتله بس دلني عالقبر .دلوني قعدت قدام القبر والله اول ما قلت السلام عليكِ يا أماه لا تواخذينا والله رأيتها قاعدة قدامي بشكلها وهيئتها قلتلها لا تواخذيني قالت لي انا رضيانة ومسرورة والله يرضى عليك( ((بكى سيدنا)) ضليت حوالي تلت ساعة قاعد انا وياها. بعدين سلمت عليها وغابت فزيّت ومشيت سألوا شلون عم تسلم عليها؟ نعم لا تستغرب يا ابني اذا كان التلفزيون تبعك الشاشة محروقة شو بيبين فيها لو شغلنا التلفزيون ؟واذا كانت الشاشة صحيحة بيبين لك كل شي… الله .
فالحاصل توفى دفناه ما انتهت بدأت الحياة تبعه هو الآن بدأت السعادة الحقيقية.وَتَتَلَقَّاهُمُ الْمَلَائِكَةُ هَٰذَا يَوْمُكُمُ الَّذِي كُنتُمْ تُوعَدُونَ. يوم الكرامة يوم العطاء يوم الفضل الالهي شو بعدها نحن اوليائكم أُمرنا نتولى شوؤنكم واحوالكم نحن الملائكة اوليائكم في الحياة الدنيا وفي الاخرة هون وهونيك الله أذن لهم يتولوا شأنك قايمين عليك بخدمتك الله أكبر. هلق حنكرمكم وَلَكُمْ فِيهَا مَا تَشْتَهِي أَنفُسُكُمْ شو بتشتهي؟ان ارى أهلي وولدي فإن كانوا اموات جمعهم الله معهم وان كانوا احياء أذن الله له ان يزورهم ..ولك يا ابني والله الآخرة شي حلو الموت شي حلو لا تظنوا بيخوف نحْنُ أَوْلِيَاؤُكُمْ فِي الْحَيَاةِ الدُّنْيَا وَفِي الْآخِرَةِ ۖ وَلَكُمْ فِيهَا مَا تَشْتَهِي أَنفُسُكُمْ وَلَكُمْ فِيهَا مَا تَدَّعُونَ ما تدعون شو بتطلب نحن جاهزين بيأمنلوا كل طلبك طيب ليه هالكرم؟ قال هاي كرامة ضيافة نزلا شو نزلا؟ نُزُلًا مِّنْ غَفُورٍ رَّحِيمٍ. هاي ضيافة الله الذي غفر لكم الذنوب ورحمكم بدخول الجنة بالله عليكم حلوة ولا ما حلوة هاي الحياة إِنَّ الدَّارَ الْآخِرَةَ لَهِيَ الْحَيَوَانُ ۚ لَوْ كَانُوا يَعْلَمُونَ .هي الحياة الحقيقية لو كنتم تعلمون لذلك ما في تضييع وقت يا ابني أو تنبل او كسلان وما عندي استعداد شدو همتكم مرض برد تلج لو نازل من السما متل ما بيقولوا عرايس بلحف ما نتأخر عالدرس منجي هاي حياتكم في الدنيا.
فإذا انتهت واذا الشمس كورت قامت القيامة يموت الخلق كلهم ونفخ في الصور أول نفخة فصعق من في السموات ومن في الارض حتى ملك الموت يقول له الله سبحانه وتعالى مُت فيموت. لمن الملك اليوم فيجيب ذاته جل جلاله لله الواحد القهار. قهر الملوك الجبابرة الاكاسرة الفراعنة ثم يأذن الله لسيدنا محمدﷺ ان يقوم. سيدنا موسى الملائكةالكل يخرج للحشر فينبتون من الارض كما ينبت البقل. كل الناس من هون وهون الله ينزل مطر تشبه مني الرجال كلما انزل المطر تنبت بذرتك .. في بذرة بالعصعوص سماه النبي ﷺ عُجب الذنب. متل حبة الخردل لا تفنى ولو مر عليها ملايين السنين متى ما نزل عليها المطر تنبت وهاي كمان لازم ينتبه عليها الانسان البزرة لا تنبت الا اذا كانت يابسة لو اخدت بزرة بطيخ تزرعها ما تنبت بدك تيبسها وتزرعها وتسقيها بتنبت ..متى ما فنيت ونزلت نقطة مطر تنبت. وَاللَّهُ أَنبَتَكُم مِّنَ الْأَرْضِ نَبَاتًا. ثُمَّ يُعِيدُكُمْ فِيهَا وَيُخْرِجُكُمْ إِخْرَاجًا. خرجنا من الارض بعد ما خرجنا هادا البعث. بعد البعث في الحشر يساقون الى ارض المحشر .ارض المحشر ارض بيضاء نقية ما في عليها علامة لأحد الخلق كلهم من عهد آدم الى قيام الساعة كل في مكان واحد وهم كما وصف النبي ﷺ عراة حفاة غرلا. قالوا يا رسول الله حفيانين عريانين فهمنا شو غرلا قال ﷺ تعود اليه جلدة الطهور الي الك. كل شي خرج منك بالدنيا شعراتك اظافيرك يعود اليك .. لذلك لا تخلي شي بينفصل منك على غير وضوء. هاي ما واجب هادا من الادب اذا على طهارة بيرجعوا منورين اذا عغير طهارة بيرجعوا مظلمين سود فتحب اضافيرك يرجعوا سود ولا نور شعرك يرجع منور ولا مظلم من باب الادب اكتر الناس ما عارفين السنة اذا حلقت لا تخلي شعرك تحت اجرين الحلاق شعراتك جمعهم وحطهم بكيس نايلون تاني وتالت حلاقة تعبى الكيس هادا الكيس لما تموت بيحطولك ياه مخدة تحت راسك بدل الحجرة ..المرأة هيك كلما تسرحت بينزل شوية شعر تلفهم وتحطهم بكيس بتوصي حدا يحطوا تحت راسها بالقبر بيفنى شعرها ما حدا رآه .هلق المسلم الي بيحلق عند الحلاق بيدعس عشعر هاد وعشعر هاد الله يهدينا.
فالحاصل يساق الى المحشر ارض صحراء الشمس فوق الرؤوس تدنو الشمس من الخلائق حتى تكون بقدر ميل وفي رواية حديث لو مد احد يده لامسكها من شدة ما هي قريبة وبتعطينا وجهها هلق وجهها لوين للسما بكرا بدها تعطينا وجهها النا حرارتها علينا فلذلك اهل الموقف بيشتد عليهم العرق واقفين عرؤوس اصابيعهم مع الازدحام وعرق مليانين عرق ستنا عائشة تقول شو هاد يارسول الله الرجال والنساء سوا بدهن يكونوا؟ قال لها ﷺ ليس الامر كما تظنين لا احد شاعر بشهوة ولا بشي كلهن هون قلوبهم خايفة من الحساب. قديش بيضل هالموقف؟ اربعين سنة فمنهم من يصل العرق الى ركبتيه ومنهم الى فخذيه ومنهم الى حقويه ومنهم الى صدره ومنهم من يلجمهم العرق الى فوق هادا كلو ذنوبك وخطاياك خفف الخطايا بيخف عرقك يوم القيامة خفف ذنوبك بيخف عرقك يوم القيامة. فالناس بيقولوا يا جماعة لايمتى بدنا نضل هيك روحوا شوفوا انبياء الله بركي بيشفعولنا. بيروحوا عند سيدنا آدم دخيلك اشفعلنا بيقول نفسي نفسي ، أمرني الله وخالفت روحوا عند ابراهيم بيروحوا عند سيدنا ابراهيم بيقلهم انا مابحسن كذبت ٣ كذبات روحوا عند موسى بيروحوا عند سيدنا نوح بيقلهم انا دعيت على قومي في الدنيا ما بقى الي دعوة روحوا عند عيسى بيروحوا عند سيدنا عيسى بيقلهم نفسي نفسي روحوا عند سيدنا محمد. قديش عم يدور الناس شوفوا هالموقف وكل الخلق مجموعين كم مليون؟ شلون انت بدك تجتمع بشيخك هونيك؟ هاي النقطة فكر فيها شلون بدي شوف ابي امي شيخي وين؟ يا ابني انت من وقت الي كنت بالبرزخ كانت روحك معهم .كنت عايش مع شيخك لذلك تنبت مع شيخك .وَسِيقَ الَّذِينَ اتَّقَوْا رَبَّهُمْ إِلَى الْجَنَّةِ زُمَرًا الذاكرين زمرا المتقين زمرا المصلين زمرا . وكمان زمرة الكذابين المنافقين زمرا. فبتكون مع زمرة اهلك تلتقي مع شيخك مع هالجمع. الله يرضى عن الشيخ صالح السقا .. الشيخ صالح رأى في المنام انه يوم القيامة قامت والناس كلها واقفة وهو داير بين الناس وين بدو يروح ملايين من البشر عم يدور قام شاف شيخنا دخيلك يا شيخي قله شو يا شيخ صالح الجنة بدها هز كتاف قله هلق عم تقول الجنة دخيلك ((ضحك سيدنا)) اخده وفات ومشي هو وياه هلق هونيك الشفاعة.
فصلى الله عليه وسلم يسجد بين يدي الله ويطلب الشفاعة فيشفعه الله عز وجل الشفاعة العظمى لجميع الخلق .. شو الشفاعة ؟ ينتصب الميزان وينشر الصراط يشفع نبينا لجميع الخلق ﷺ سيدنا ابراهيم وموسى وعيسى ما شفعوا الا سيدنا محمدﷺ يا مساكين الي ما عم تصلوا عالنبي يذكر اسم النبي وما بتصلوا عليه .. صلى الله عليك يا رسول الله. فيشفع للخلق هاي الاولى حصل الحساب دخل اهل الجنة الجنة واهل النار في النار والنبيﷺ في الجنة يسمع صريخ اهل النار فيقول يا رب امتي امتي فيقول الله سبحانه وتعالى ادخل النار واخرج من كان في قلبه حبة من ايمان مقدار حبة قمح فيدخل ويخرج من النار ثم يسمع صريخ فيقول الله سبحانه وتعالى ادخل واخرج من كان في قلبه مقدار نصف حبة من ايمان فيدخل فيخرج من النار وبعدين مثقال حبة من خردل من ايمان فيخرج فيقول الله تعالى شفع النبيون وشفع المرسلون وشفعت الملائكة وشفع المؤمنون وبقيت شفاعة ارحم الراحمين فيقبض قبضة من النار لم يعملوا خيرا قط ويقول هذه الى الجنة ولا ابالي سبقت رحمتي غضبي فالحياة الحقيقية حياة الجنة .
نحن عايشين حياة الالم والوجع والمرض الله يحمينا بكرا من الاخرة. لذلك يا ابني هادا اليوم. ذَٰلِكَ يَوْمٌ مَّجْمُوعٌ لَّهُ النَّاسُ وَذَٰلِكَ يَوْمٌ مَّشْهُودٌ.فكلٌ بدهن يجتمعوا بهذا اليوم .وَاسْتَمِعْ يَوْمَ يُنَادِ الْمُنَادِ مِن مَّكَانٍ قَرِيبٍ . يَوْمَ يَسْمَعُونَ الصَّيْحَةَ بِالْحَقِّ ۚ ذَٰلِكَ يَوْمُ الْخُرُوجِ .إِنَّا نَحْنُ نُحْيِي وَنُمِيتُ وَإِلَيْنَا الْمَصِيرُ . يَوْمَ تَشَقَّقُ الْأَرْضُ عَنْهُمْ سِرَاعًا ۚ ذَٰلِكَ حَشْرٌ عَلَيْنَا يَسِيرٌ . يوم الحشر مش بس للناس للحيوان كمان قال سبحانه وتعالى وَإِذَا الْوُحُوشُ حُشِرَتْ كمان الطيور بهادا الحشر كل المخلوقات كان النبيﷺ ماشي هو وابو ذر فوجد خروف عم ينطح نعجة فالتفت النبي ﷺ وقال يا ابا ذر اتدري لماذا ينتطحان ؟ قال الله ورسوله اعلم قال اذا كان يوم القيامة اوقفهما الله بين يديه فاقتص للسلحاء من القرناء يسألهما فيما تنطحنان فيأخذ الحق من الي ما الها قرون من الي الو قرون ثم يقول لهما كونوا ترابا. وَيَقُولُ الْكَافِرُ يَا لَيْتَنِي كُنتُ تُرَابًا .. وهناك يا اخواني الحساب سوغروا حالكم لها الساعة هاي كل بكفة وهالساعة بكفة .. الساعة لما بدك توقف بين يدي الله الدوسيه تاعك كله مفتوح اعمالك كله مطلع عليها واحدة واحدة لا تخفى على الله خافية فالله يسألك يوم القيامة عن اعمالك عن اخلاقك عن الي حكيت عليه عن الي اذيته عن الي اشرت عليه بايدك كله بدك تعطيه من حسناتك .. واحد قلت عنه فلان ما بيفهم هاي اساءة بدو ياخد حسناتك ممكن ما يرضى فيها بالف حسنة هاذا اذا قلت ما بيفهم اما اذا قلت فلان هالقليل الحيا لح اقرأ الحديث واختم الدرس.
قال النبي ﷺ يحشر الناس يوم القيامةعراة غرلا بُهما قلنا وما بُهما يارسول الله قال ليس معهم شئ بايديهم ما معه شي ثم يناديهم بصوت يسمعه من بُعد كما يسمعه من قرب .
انا الملك انا الديان شو معنى الديان؟ الي بدي آخد الدين منك للي حاكي عليه للي مغتابه الي آذيته هادا اله دين عندك بدك تعطيه دينه. انا الملك انا الديان ولا ينبغي لاحد من اهل النار ان يدخل النار وله عند احد من اهل الجنة الحق حتى أقصه منه .. هادا من اهل النار ما عم يفوت عالنار وله حسنة عند اهل الجنة ولا ينبغي لأحد من اهل الجنة ان يدخل الجنة ولأحد من اهل النار عنده حق حتى أقصه منه حتى اللطمة لو لاطمه على خده بده ياخد حقه منك قلنا كيف؟ انما نأتي الله عز وجل عراة غرلا بُهما ما معنا شي . بإيش؟ قال بالحسنات والسيئات رواه الامام أحمد
ختاما يا احبابي اكثروا من ذكر الله ولازموا على الطاعة والجماعة واكثر من ذكر الله ويلي عم ينام كتير يخفف نومه والي عم ياكل كتير يخفف اكله اكثروا من العبادات اكثروا من الطاعات ما بينك وبين ان تلقى الله الا نفس واحد.
اسال الله ان يتقبل مني ومنكم وان يغفر الله لي ولكم وللمسلمين اجمعين وصلى الله على سيدنا محمد وعلى آله وصحبه أجمعين والحمدلله رب العالمين