بين الله لنا في القرآن الداء والدواء نعمة من نعم الله عز وجل يتخذها الناس داء وبلاء وبين الله عز وجل لنا في القرآن الدواء من هذ الداء هناك داء يمرض الجسد داء يضعف القوة في داء يذهب البصر واما هذا الداء يأكل الحسنات ويميت القلب ويذهب الأجر هذا الداء وقع فيه بالمية مية من الناس الا ما رحم الله هو داء الغيبة . والله ذكر لنا أقبح الامثلة وأشد الامثلة حتى يبتعد الانسان منه قول الله عز وجل ولا يغتب بعضكم بعضا أيحب أحدكم ان يأكل لحم أخيه ميتا) يعني لحم ميت مأنتن يعني اوحش صورة ما ميت بس ميت ومأنتن اخوك والنبي صل الله عليه وسلم كان جالسا مع اصحابه فقام رجل واحد فز من الدرس من المجلس ومشي فوقع فيه رجل واحد من يلي قاعدين ما حسن يستنى ليخلص الدرس هيدا واحد منافق حكى عنه كلمة فوقع فيه رجل من بعده فقال النبي ﷺ تخلل يعني نكش اسنانك تخلل قالو يا رسول الله مما اتخلل ؟ مما اكلت لحما فقال انك اكلت لحم اخيك ص بين لنا هذا اللسان نعمة من نعم الله عز وجل علينا هذه النعمة اذا استعملها الانسان في مرضاة الله كانت رفعة له في الدرجات يوم القيامة وزيادة في الحسنات ومغفرة وإن لم يستعملها فيما خلقها الله له كانت عليه بلاء ومصيبة ونكبة أذهبت منه الحسنات وزادت له السيئات وخفضت له الدرجات اللسان نعمة من نعم الله عز وجل جعله الله اداة للنطق وللتعبير عن ما في النفس وبعض اوقات يصف الاشياء ونتخذه للموعظة والتبليغ والارشاد والتبشير تبشر به الخير وتذهب به الاحزان وبعض اوقات يتخذه الانسان لزيادة الحسنات بالذكر وتلاوة القرآن فاللسان له الفوائد والنعم العظيمة فاذا المسلم إتخذه فيما خلقه الله له من الاذكار والاوراد وتلاوة القرآن والامر بالمعروف والنهي عن المنكر يكون له مفتاحا لدخول الجنة قال النبي ﷺ كل كلام ابن آدم عليه لا له إلا أمر بمعروف ونهي عن منكر وذكر الله تعالى . هدول يكتبوا له اما بقية الكلام يكتبوا عليه فلو درس المسلم يلي عم ينكتب عليه اكتر او ينكتب له اكتر ؟ من هون بيعرف حاله انه ناجي يوم القيامة ولّا ما ناجي اذا كان ما يكتب لك اكتر مما يكتب عليك معناتها حسناتك اكتر من سيئاتك اما اذا كان ما يكتب عليك اكتر معناتها السيئات كثيرة لذلك الله يرضى ع ابائنا واجدادنا قبل ما يطلع من بيته يلبس 3 جيب كان المضربية فيها جيبة عاليمين وجيبة عالشمال ويحط جيبة قدام يجيب النصانية يعبيها حمص او حصى زغيرة وينزل عالسوق اذا تكلم كلمة اذا كانت صالحة يقيم حمصة ويحطها بجيبة اليمين وان كانت كلمة غير صالحة يقيم حمصة ويحطها بجيبة الشمال وطول النهار عم يحط حمصة هون او هون ويجي عشية يفضي الجيبتين ويعد الحمصات فاذا طلعو حمصات الجيبة اليمين اكتر من جيبة الشمال يصلي ركعتين لله شكر يلي الله وفقوا وكتر حسناته اكتر من سيئاته وان كان تبع الشمال اكتر من تبع اليمين يصلي بدل الركعتين 12ركعة كفارة للذنب يلي ارتكبه كفارة للخطيئة ويشتغل بالاستغفار الى منتصف الليل، بعد منتصف الليل يقوم الى التهجد حتى يغفر الله له ما ارتكبه من ذنوب كانوا فهمانين انه ادامن وقفة بين ايدين الله عرفانين بدن يتحاسبوا فكان يلقوا السيئات حتى يلقى الله طاهر من الذنوب فاللسان في له 62 خطيئة وردت في الاحاديث اذا خلص من خطيئة يقع في خطيئة تانية نسال الله السلامة من جملة الخطايا الغيبة النميمة الكذب اخلاف الوعد الاشارة الى انسان فلان كذا فلان طويل فلان قصير فلان هي كلها الشماتة نسال الله العفو والعافية التعيير ويلي بعيب عالناس هي كلها من ذنوب اللسان فاذا كان الانسان عرف اذا طريق الطعام الذي يؤذيه يتركه وعرف الطعام الذي ينفعه ياكل منه كذلك المسلم اذا عرف هذا الفعل بكتر حسناته وبيقلل سيئاته بيعمل فيه اما عرف ان هذا الكلام بيكتر السيئات وبيقلل الحسنات لازم ينتبه لانه هذا المرض يعتبر جرثومة تاكل الحسنات وتزيد السيئات يا ترى هالجرثومة ابلغ او جرثومة السرطان ابلغ جرثومة السرطان اذا مات فيها الانسان بيموت شهيد اما جرثومة الغيبة اذا مات فيها الانسان يموت منافقا نسال الله السلامة ولا حسنات له هذا في الدنيا اما في الآخرة كيف يعامل هذا الانسان يؤتى بهذا الانسان الذي تكلم على صاحبه او اخيه او رفيقه فلان طويل فلان قصير فلان ما اخلاقه ما كذا حكى عنه بغيبته والغيبة ذكرك اخاك بما يكره بتحكي عليه بكلمة قدامه ما بتحسن تحكيها بيكره انه يسمع هالكلمة يؤتى به يوم القيامة يحمل الحسنات والسيئات حسناته على يمينه وسيئاته على يساره بيدخل الى الحساب زادت حسناته على سيئاته يغفر له لدخول الجنة فينادي مناديا هل من احد له عليه حق فيأتي رجل فيقول يا رب انه تكلم في بما ليس في حكي علي شي ما موجود في قال عني قليل اخلاق انا ما كنت هيك فيقول الله تعالى خد من حسناته بقدر مظلمتك ظلمك خد من حسناته ممكن ان ياخذ كل الحسنات يا رب ما بكفي فيقول له ضع عليه من سيئاتك اخد حسناته وعنده حسنات وحط سيئاته وهيداك عنده سيئات فهيدا صار كله حسنات وهاد صار كله سيئات فهذا يدخل الجنة وهادا يدخل النار هيدا من بعد ما انوزن لذلك قالوا لو ان انسان اكل من انسان دانق (قرش ) بغير حق لا يرضى به يوم القيامة سبعمائة صلاة مقبولة ما بيرضى بهيدا القرش لذلك النبي عليه الصلاة والسلام طلب منا هلق تسامحوا من بعض قبل ما يجي يوم ما يكون فيه مسامحة وفي حسنات وسيئات ف صلى الله على رسول الله بين لنا هالمرض الشديد والجرثومة المصيبة التي تصيب الانسان هلق ح احكي لكن حكمها واضرارها ومتى تباح الغيبة ومتى تحرم وكيف نتوب منها ان شاء الله نسال الله ان يتقبل منا. اولا الغيبة في ثلاث :
اللسان : الغيبة والبهتان والإفك هاي من امراض اللسان فالغيبة ذكرك اخاك بما يكره واحد بيعرج على رجله قلت هالاعرج هاد هو بيكره تقول عنه اعرج هاي غيبة واحد لابس اواعي وسخة بيكره تقول انه اواعيك وسخة بيكرها قلت فلان يلي لابس اواعي وسخة هي غيبة. الغيبة ذكرك اخاك بما يكره اي كلمة بيكرهها اذا بيسمعها هاي اسمها غيبة.
اما البهتان ان تقول فيه ما ليس فيه فلان قليل الشرف وهو غيور بيغار على اهله فيه شرف وانت قلت انه بلا شرف هاد بهتان ما غيبة
البهتان أشد من الغيبة ستنا عائشة الله يرضى عنها مرة النبي مدح قدامها صفية ضرتها وصفية كانت يهودية فلما النبي ﷺ تغلب على اليهود اصطفاها لنفسه من بنات سيدنا هارون بنت نبي فالنبي مدحها قدام ستنا عائشة ف قالت ستنا عائشة لسا بتمدحها اما يكفي انها قصيرة بكفي لو ما فيها عيب الا انها قصيرة بكفي عم تمدحها غضب النبي ﷺ وقال يا عائشة لقد قلت كلمة لو ألقت في بحر لأنتنته متل مائة جمل ميت لحشناهن بالبحر بأنتن البحر؟ ما بأنتن او الف جمل ما بأنتن الكلمة بتأنتن بحر بيكفي انه قصيرة قالت يا رسول الله ما قلت الا ما فيها هي قصيرة وقلت عنها قصيرة قال لو قلت ما ليس فيها لبهتيها ارتكبت البهتان والبهتان عذاب النار عذاب في النار دائم نسأل الله العفو والعافية
اما الافك ان تقول فيه ما سمعت قالوا لك فلان بيشرب كاس انا بلغني انه الدكتور حسام بيشرب كاس حملت الكلمة ورديت وقلت الدكتور حسام بيشرب كاس شو بيفهموا الناس من كلمة بيشرب كاس ؟ انانه بيشرب خمر هو بيشرب كاسة المي بيشربها بالكاس او بالطنجرة؟ سمع الكلمة وراح بلغها من غير ما يعرفها ما هي او ما هدفها هذا اسمه افك "ان الذين جاءوا بالإفك عصبة منكم لا تحسبوه شرا لكم بل هو خيرا لكم لكل امرئ منهم ما اكتسب من الإثم والذي تولى كبره منهم له عذاب أليم " نسأل الله السلامة فلا يجوز للانسان ان ينسب كلمة لا يدري ما هي. هالتلات امراض الغيبة والبهتان والافك الناس باي منهن واقعين؟ بالتلاتة يغتاب ثم البهتان يقول ما ليس فيه ينسب إليه كذا وكذا فيقول لهم بالجلسة بيرد التاني بقولوا بالله اسكت لو بتعرف يلي انا بعرفوا خلينا ساكتين هذا اغتاب اكتر من الغيبة معناتها فيه عيوب اكتر من هيك فقد اغتابه. واحد تاني قال شيلوني من سيرته الله يغفر لنا ويغفر له هذا مغتاب يغفر لنا ويغفر له معناتها واقع في ذنوب كثيرةما حكي شي لكن لبسوا كل الذنوب فلا يجوز هذا الكلام مطلقا ان يتكلم به الانسان (ح) فالنبي ﷺ سال مرة الصحابة قال اتدرون ما الغيبة؟ قال الصحابة الله ورسوله أعلم قال ذكرك أخاك بما يكره اي كلمة حكيتها بغيبة اخوك اسمه مغتاب اما اذا بوجهه في كتير من الناس بتقول لك انا هيك دغري ما عندي هيك وهيك انا بقول اعور اعور بعينه فلان كذا يا مسكين لو بتعرف لوين وصلت الله عز وجل قال ويل لكل همزة لمزة الويل . واد في جهنم تستغيث جهنم من حره اي من شدة حره هيدا الويل ل يلي بيتكلم هالكلام
همزة يلي بعيب عالناس من قفاهن هيدا هماز .. اللمزة يلي بعيب عالناس بوجوهن انت البعيد ما فيك دم انت البعيد ما فيك شرف انت البعيد فيك كذا هادا لماز نسب اليه نسبة لا يجوز له ان ينسبها ويل لكل همزة لمزة من لماز بعيب عالناس بوجوهن مفكر حاله صاحب دين يا اخي انا ما بقول الا الحق اعور اعور بعينه ما بيجوز تقولوا هيك مفكر حاله عم يقول الحق انت ما حكيت الحق صرت من الهالكين ويل هلاك وشقاء للهماز اللماز تلت الناس مساكين بفكروا حالن على دين وايمان وهو بيكون على جهل من هالكلمة في كتير مرة رحنا مع احد الاخوان نخطب بنت واحد حتى تعرفوا اديش الناس فتنا وقعدنا جابوا الشاي ف قالوا له ابدا بالشيخ فقال لا البداية من اليمين بالضيافة عرفت انه انسان جاهل بيبدا عن اليمين بعد ان يبدا بسيد القوم وبعدين عن يمين سيد القوم اما انه يبدا عن اليمين فهو انسان جاهل قلنا له بدنا نخطب اذا ممكن يشوف البنت قال انا بنتي ما بتظهر على حدا ما بيشوفها الا ليكتب الكتاب بده يخطبها بده يشوفها قال انا ما بخليه يشوفها سالته سؤال بنتك بالمدرسة او مش بالمدرسة قال لا بالمدرسة قلت له لما تروح عالمدرسة بتروح مغطاية او كاشفة؟ قال لا هاي مدرسة ما فيها شي قلت له كل الناس عم يشوفوها بالحرام معليه شي وهادا يلي بده يشوفها بالحلال حرام ما بيجوز هادا بالحلال قلت للاخوان قوموا يا ابني ماهو من اهل النا انتو بتروحو عالجامعة مع الشباب معليه شي اما الخاطب بده يشوفها بالحلال ما بده يفرجي ياها ما بشوفها؟ طيب النبي عم يقول انظر اليها بيقول بعد العرس بيشوفها ولا كلمة قوموا والسلام عليكم نسال الله السلامة لكن الله كافئه حبت ابنته واحد وهربت هي وياه هيك افضل اي الله يتوب علينا في ناس بيدعو فهم الاسلام وهو جاهل ما بقول عن حاله فهمان لا بده يقول انه هو افهم من العلم وافهم من المشايخ اي ذكرك اخاك بما يكره قالوا يا رسول الله ان كان افرايت ان كان في اخي ما اقول هو لابس اواعي وسخة وقلت له اواعيك وسخة قال ان فيه ما تقول فقد اغتبته وان لم يكن فيه ما تقول فقد بهته (بهته يعني ارتكبت البهتان) نسال الله العفو والعافية البهتان اشد عذابا يوم القيامة الله يحمينا بحماه طيب ليش الانسان بيغتاب ؟ شو السبب الغيبة اولا واحد غضبان من التاني زعلان منه بده يشفي غيظه ف بيحكي عليه اذا كان انت زعلان من فلان واذا كان بدك تفش غضبك بتخسر مالك معك عشرة الاف ليرة واذا فشيت غضبك بتخسرهن يا ترى بفش غضبوا ؟ وبيخسر العشرة الاف ليرة اي هدول اغلى او الحسنات اغلى بلا ما تفش غضبك واحد غضبان منه زعلان منه اشكيه الى الله وبس شكيته الى الله ما بدك اكتر من هيك لا بترتكب اثم ولا خطيئة والله عز وجل بينتصر للمظلوم ف بده يشفي غيظه غضب حكى حكي خرج من المجلس ولا حسنة الله يعفي عنا تاني وحدة قاعد مع رفقاته عم يحكو متى ما في رفقة وعم يحكو هيدا بيحكي وهاد بيحكي بيطلع هيك بيقولو البقرة اذا وقعت بتكتر سكاكينها كمان اذا واحد حب وحدة بصيرو كلن بيحكو عليه ف حديث النبي ﷺ اذا كنت في مجلس ووقعو في الرجل فكن للرجل ناصرا وللقوم زاجرا اخي ما بيجوز وقم عنهم قوم ما تقعد معهم قعدتك ب هالمجلس خطيئة ف صل الله عليك يا رسول الله فاذا كان تذكر حالته القبيحة وسيئاته معناتها نقولك اذا كنت صادق جبلنا شهود على كلامك.. ما في شهود معناها مغتاب وبهتان. ليه ينسب الانسان شيئا الى انسان ليس موجودا فيه لازم ننبه بعضنا البعض ممكن اخ مع اخ بيقول والله سلمنا عليه ما رد علينا السلام اخي الناس ما لها قيمة عنده هاي شو اسمها غيبة والا بهتان؟ بهتان لانه نسب له شي ما موجود فيه بيهتم بالناس بس قال عنه الناس ما لها قيمة عنده يعني متكبر على الناس هادا ارتكب بهتان اسال الله ان يغفر ذنوبنا في بعض اوقات بيكون من اللهو والهزل مع بعضن عم يمزحو هيدا بيحكي كلمة ع فلان وهادا بيحكي ع فلان كمان غيبة الله يرضى عن الامام الغزالي رضي الله عنه وارضاه قال الغيبة تكون تنقيص في البدن اذا نقصو في بدنو قال فلان اعرج او فلان اخرس او اطرش هادا تنقيص او في نسبه هو من عيلة فضيلة قال عائلته من اقل العيل بالحارة هيدا النسب او في خلقه انسان صادق ومخلص بيقول اخي والله عنده الكذب اهون من شربة المي هادا كله من انواع الغيبة او بفعل من الافعال عم يشتغل بيقول اي شغلته كلياتها ما يا ريت يشتغل زبال احسن من شغلته طعن بعملو طعن بفعلو هادا كله من الغيبة او في قوله هاد لما بيحكي بيعمل حركات بوجو او تمو وهو عم يحكي او في دينو او في دنياه هادا كله غيبة في طولو حتى في ثوبو لو قال ثوبو قصير لو قال بيته مهرهر لو قال الدابة تبعو كذا كله غيبة بكل هالامور يعتبر غيبة شو بدنا بذكر الناس فتش بحالك قبل ما تحكي ع غيرك اذا كنت انت بريء من العيب اذكر غيرك واذا انت فيك هالعيب ليش لتحكي ع غيرك سيدنا عيسى قال كلمة لا تنظر للقذاة بعين اخيك وتنسى الخشبة في عينك (القذاة القشة الناعمة الزغيرة يلي بتأذي العين) اخي في هالشعرة بعينك وهو عامود فايت بعينه ومانه شايفو واحد حكى للتاني اخي منك شايف شلون ايدك مغبرة انت موسخ ايدك وهو بنطلونو مفتوق ومبين ورا ما شاف حاله لان اكتر الناس بيشوفو الغير وما بيشوفو حالن فاولا انظر لنفسك كما قال بعض الصالحين اذا مددت يدك فلان تلات اصابيع عم تعود عليك يعني تلات مرات شوف حالك قبل ما تشوف غيرك تلات مرات هاد كمال الايمان يا ابني يفتش حاله ولما يفتش حاله ما بقى يشوف عيوب غيرو سيدنا ابراهيم ابن الادهم رضي الله عنه وارضاه مشى في الطريق ف شاف سيدنا مالك ابن دينار مشوا مع بعضن 3 ايام بعدها افترقوا كل واحد بده يروح ف سيدنا مالك التفت لسيدنا ابراهيم وقالو اخي 3 ايام صار لي انا وياك ما شفت علي ولا شي ناقصة تنبهني عليها يعني اتخلق فيها فقالو يا اخي عيوبي شغلتني عن عيوبك (عم اتطلع على عيوبي ماني فاضي اتطلع على عيوب غيري) اي سيدنا ابراهيم سلطان العارفين عيوبك شغلتك عن عيوبه قال سيدنا مالك الله عز وجل يعفي عنا لو كان الانسان عالم وتقي ولي وخاشع ومؤمن وماشاء الله اخد كل الكمالات هل يضمن نفسه بالنجاة يوم القيامة ؟ لا لا يا ابني فلو كان جايب عبادة الثقلين والله قال ما قبلت منك شيئا خذوه الى النار شو بيطلع بايدو لذلك رضي الله عن سيدنا ابو بكر الصديق قال لا تأمن ولو غفر لك ولو وضعت قدمك اليمين في الجنة لا تأمن ان يردك الله الى النار لا تأمن حتى تدخل رجلاك الجنة (اذا ما فاته التنتين لجوا لا تأمن على حالك متى ما فات لجوا ما في طلعة بقى )وما هم منها بمخرجين قبل الفوتة بيخاف لذلك ينضف حاله الواحد قبل ما يدخل .
ما حكم الغيبة اذا الانسان اغتاب ؟ اسال الله السلامة الغيبة في الاسلام محرمة بالاجماع عند جميع الفئات والاديان محرمة الغيبة ولا يستثنى منها الا بعض الاشياء مثلا انسان راح لعند القاضي قاله فلان اكل مالي واضاع واذاني وكذا كل كلامو للقاضي هل يعتبر غيبة لا سؤاله للمفتي عن عمل كذا كذا اصابني كذا من فلان هل يعتبر غيبة ؟ لا القاضي والمفتي لا يعتبر غيبة هذا من فضل الله عز وجل وتوفيق الله ان الله سامح الانسان اذا نبه على من اذاه متل حكايتها اذا انسان اشتهر بين الناس بالايذاء والضرر فرضا صارت معنا هون بالجامع بعرف رجل الله يتغمدو برحمته لفة ودقن بيفوت عالجوامع ويخلي الامام يبدأ وهو بالصف وهو بالصلاة يبلش يعطس اتشو اتشو يحط ايدو ع تمو ويطلع الناس شو يفكرو نزل منه دم او شي يطلع ومعو كيس ينقي صباط الجديد تنين تلاتي ويحطن بالكيس ويطلع داء نسال الله العفو والعافية الله يعافينا من البلاء اجا لهون عالجامع وبدنا نصلي الضهر قلت لهن يا جماعة كل واحد يجيب صباطو ويحطو جنب منه في واحد بيخلي صباطو عالباب مفكر انه الشغلة امان بيجي واحد بيقول المال الداشر بيعلم الادمي السرقة بياخد الصباط وبتم ماشي بيقول رحنا عالجامع سرقولنا الصباط ما بقول انا تركته عالباب قلت لهن كل واحد يحط صباطو جنبو خلصنا صلاة الضهر 4 صبابيط يلي راحو قلت لهن انا نبهتكن في كان واحد بيسرق صبابيط ما بيجوز قول فلان بس احفظو صبابيطكن ما حطيتوهن اي اصطفلو اطلعوا حوافى هيك يلي بيجي عالجامع بينسرق صباطو قلت لهم لانكن انته ما منتبهين الصحابة كانو يحطو صبابيطن وين ؟ بين اجريهن صباطه بين اجريه هادا بيحطه بين اجريه بيامن اما حطه عند الباب خاصة اذا صباط جديد ورايح عالعرس بيجي هيداك وبياخده ﷺ قال اذكروا الفاسق بما فيه كي يحذروه الناس واحد فيه علة بقولن يا جماعة في واحد في علة كذا انتبهوا كل واحد ينتبه حتى ما نقع في الغفلة في كمان عدة وحدات الغيبة اذا كان قاضي او مفتي او واحد بيرتكب شر بدنا ننبه ونبين ذنبه وخطأه او واحد متظلم وحدة راحت عند القاضي وقالت له زوجي بيضربني وبيعمل لي كذا هاي ما اسمها غيبة بيقولو جحا مسكين لما كان ينام يعملها بالفرشة مرته نبهته وكذا ما في فايدة فراحت عند القاضي وطلبت منه الطلاق سال شو السبب قالت له يا سيدي كل يوم بيعملها بالفرشة بلوت لي اواعي التفت القاضي ل جحا وساله صحيح يلي زوجتك عم تقولو رد جحا يا مولانا اسمع شو بصير معي وانت بعدين احكم قال القاضي تفضل قاله بشوف حالي راكب على جمل والجمل براس الجبل وعطشان الجمل بده يمد رقبته ليشرب من المي يلي تحت فلما بيهوي لتحت ومن خوفي انا بشو اسمه قاله ما مرتك طلعت روحها فالتظلم لا يعتبر غيبة والاستفتاء لا يعتبر غيبة والاستعانة بالغير واحد عم يتعرض بيسال شخص دخيلك جاري عم يظلمني اذا بتساعدني عليه كمان هاي ما اسمها غيبة حتى يبعد الاذى عن نفسه كم وحدة صارو نسال الله السلامة هذه الاشياء ما اسمها غيبة اما البقية ف بنقولو اغتاب وارتكب الامر الحرام فالغيبة اذا حرام عند جميع الاديان ذكر لنا عن بعض اولياء الله كان من كبار التابعين قاعد مع السلطان وقاعدين ف واحد حكى على واحد هو قاعد ساكت لا حكى خير ولا حكى شر خلص المجلس فز وراح عالبيت ونام قال فرايت في المنام جيفة زنجي اسود مأنتن ميت ومنتفخ وقائم على راسه واحد حامل السوط على راسه كول منه كول منه قلت يا عبدالله ولما اكل قال لما اغتبت اغتيب عندك فسكت عم يحكو عليه وانت ساكت كول من لحمو اي انا ماحكيت ولا شي اما سمعت النبي ﷺ يقول المغتاب والمستمع شريكان في الوزر الله يلطف فينا هلق اي مجلس عم يخلى من الغيبة ؟ متل تالي القران والمستمع شريكان في الاجر فلو انا قريت آية قرآنية وانت سمعتها نحن التنين شريكان في الاجر كمان اذا واحد اغتاب وسمعت الغيبة وما رديت انتم التنين بالاثم سواء .
قال الله تعالى" واذا رايت الذين يخوضون في آياتنا فأعرض عنهم حتى يخوضوا في حديث غيره وان ما ينسيناك الشيطان فلا تقعد مع القوم الظالمين" معناتا متى ما جلس الانسان قالوا مجالس الغيبة مجالسة الموتى اذا في غيبة ينبه ويفز عنهن والا مجالسة الموتى افضل من مجالسة المغتاب بعض الصالحين سكن في المقبرة قالوا له ما لقيت تسكن الا بالمقبرة قال لهن بقعد معن لا بيؤذوني ولا بيحكو عليي ولا بيطعنوا فيي ولا بياكلو من مالي قاعد معن وانا مرتاح صل الله عليك يا رسول الله نزور القبور تذكركم الاخرة هيك كانو حتى ما ياخدو ويعطو بالكلام كان في يجي عالجامع الاموي رحمه الله ما يحكي بالنهار ابدا ما يحاكي حدا بالاموي مسبحة عم يسبح طول النهار الى قبل المغرب بساعة يروح عالبيت يقعد عالسفرة قبل ادان المغرب بساعة حطي الاكل النظر الى الاكل عبادة فلان يخرب بيته اليوم اجا عالجامع
شو عمل فلان كذا وفلان كذا يتم يقول فلان وفلان ليأدن المغرب ويقعد ياكل معناها حسناته اكتر او سيئاته اكتر نسال الله العفو والعافية
بحسبك ان اقواما موتى تحيا القلوب بذكرهم واقوام احياء تعمى الابصار والبصائر بهم واحد ميت تقعد قدامه بيحيا قلبك وواحد حي بتقعد قدامه بيموت قلبك خلي الواحد يجالس الشيخ محي الدين روح لعنده ويذكر الله بيحيا قلبه وخلي يقعد قدام واحد عم يغتاب بيموت قلبه فاموات تحي قلوب واحياء تميت قلوب لا اله الا الله
شو ضرر الغيبة عالانسان اول ضرر ياخد الحسنات بياخد حسنات مين اغتابه بياخد سيئاته وبيعطيه حسناته قال ﷺ اتدرون من المفلس قالو المفلس فينا من لا درهم له ولا متاع (لا عنده مال ولا اواعي ولا شي ) فالنبي قال لا ما هادا المفلس من امتي من ياتي يوم القيامة بصلاة وصيام وزكاة يعني اعمال صالحة وتقوى وياتي قد شتم هذا (لاقى واحد وقالو انت قليل خير هي شتيمة)وقذف هذا (القذف تطعن فيه جنسيا فلان بيحب فلانة فلان بيعمل مع فلانة هادا قذف) وحكموه اذا واحد اتهم انسان رجل مثلا اتهم زوجته او زوجة اتهمت زوجها بانه بيروح عند فلانة او بتروح عند فلان شرعا بدك تجيبي 4 شهود وهو بده يجيب 4 شهود يشهدو الميل بالمكحلة الدلو بالبير معقولة ؟ 80 خيزرانة بياكل بضهرو يا بجيب 4 شهود اي 4 شهود ما في ما ثبت الزنا بالشهود ابدا هادا القذف) واكل مال هذا تدين من واحد وما رجعلو وسفك دم هذا ضربو بوكس ونزلو الدم ولو كاسة حجامة اذا نزلو الدم لقي الله يوم القيامة مكتوبا بين عينيه آيس من رحمة الله بكاسة حجامة نسال الله العفو والعافية وضرب هذا عنده شغيل ضربو ليه كان بيمشي الحال بالكلام ضربو فيعطى هذا من حسناته وهذا من حسناته وهذا من حسناته قبل ان يقضى عليه ما كفت الحسنات فياخد من خطاياهم وطرحت عليه بناخد ذنوب هاداك وبنحطن عليه ثم طرح في النار وراح صلاته وراح صيامو وزكاته وعمله والى النار وهدنك اخدو حسناته وفاتو عالجنة بدي جيب لكن هالمثال منشان تنتبهوا واحد جارو بيسكر الله يتوب علينا ب بيته طلع جارو دريتو تاري فلان بنفكره صايم وانه تقي وطلع هو بيسكر عم يسكر ب بيته مستر ف جيت انت كشفته وفضحته هي بتعتبر غيبة ف يوم القيامة صلاتك وصيامك بتروح ع صحيفته فهو دخل الجنة وانت دخلت النار بغيبة انت اغتبته فيها موفية ؟بتوفي والله ما بتوفي عم يسكر ب بيته يسكر يصطفل لا يجوز ان تقول انه يسكر الا اذا طلع من السوق وبايدو الكاسة فضح حاله سقطت غيبته انا قاعد ببيته وبتفضحه بدك تعطيه حسناتك وتاخد سيئاته فهو الى الجنة وانت الى نسال الله العفو والعافية هاي اول مصيبة من مصائب الغيبة التانية كشف العورة ما العورة السواتين العورة تبين عيب اخوك اخوك فيه عيب ومستر جيت انت وكشفت العيب تبعه هاي اسمها كشف عورته
قال النبي ﷺ يا معشر من امن بلسانه ولم يدخل الايمان قلبه لا تغتابه المسلمين ولا تتبعوا عوراتهم (لا تتبع نقائص الناس هادا عمل كذا هادا عمل كذا )فانه من تتبع عورة اخيه المسلم تتبع الله عورته الله بيفضحو الله بيكشف له نقائصو الناس مخباية بيقولو الناس مخباية بتيابها لا تكشف عورات الناس ومن يتبع الله عورته يفضحه في جوف بيته لو جوات بيته الله بيفضحه نسال الله العفو والعافية اذا الله بده يفضح واحد مهما تستر الله بيفضحه لا تعيب عالناس لا تشوف عورات الناس الله يرضى عن الامام الشافعي ونفسك ان ابدت اليك معايبا فصنها وعينك ان ابدت اليك معايبا فصنها وقل يا عين للناس اعين متل ما انت عم تتطلع ع عيوب الناس كمان الناس بتتطلع ع عيوبك استر عيوب الناس حتى الناس تستر عيبك. هاي اول الكل أكل حسناته فلّس. ثانيا، اذا كشف العورة عيوب الناس الله يكشف عورته قال ﷺ الغيبة عذاب القبر لما مر على قبرين كان راكب بغلته دلدل ودلدل كانت بغلة راكزة مرت على قبرين فجفلت حتى كاد النبي ان يقع عن ظهرها ﷺ فالنبي نزل وقال ان صاحبان هذان القبران يعذابان وما يعذبان في كبير ثم قال بلا انه عند الله كبير اما احدهما فكان يمشي بالنميمة نمام ومغتاب واما الثاني فكان لا يستنزه من بوله اذا بال ما بينشف حاله من البول بيضب حاله وبيلوت كيلوته ف البول عذاب القبر والغيبة عذاب القبر ف صل الله عليه وسلم جاب عرق نخل وشقو بالنص وحط ع كل قبر شقفة وقال ارجو الله ان يخفف عنهما ما لم تيبسا ومن هون اخذ انه القبر نحط عليه عرق اخضر فالعرق الاخضر يسبح وبالتسبيح يغفر للميت ف هذا عذاب القبر نسال الله السلامة
واما في الاخرة ف عليه الصلاة والسلام قال لما عرج بي مررت بقوم لهم اظفار من نحاس يخمشون وجوههم وصدورهم فقلت من هؤلاء يا جبريل قال هؤلاء الذين يأكلون لحوم الناس ويقعون في اعراضهم نسال الله السلامة هذا عذابو بالاخرة اضافيرو من نحاس عم يجرح وجوو وصدرو لانه كان يتكلم عن الناس طيب نحن الان قاعدين واحد حكى على واحد ونحن قاعدين شو واجب علينا ؟واجب علينا نحافظ على المؤمن انه اخي لا يجوز هذه غيبة والغيبة حرام بدك تغتاب انا بمشي ما بقبل ااقعد بده يزعل يزعل بعض المشايخ قالو له هذا غيبة والغيبة حرام قال لو كانت الغيبة حرام انا بدي اغتابه تحدي لدين الله تحدي قال هيدا شيخ لو كانت حرام بده يغتابه فعوقب بتلك الليلة ب فالج رباعي فالج كامل لجسمه بده يتحدى دين الله هاي النتيجة نسال الله العفو والعافية قال صلى الله عليه وسلم من قال في مؤمنا ما ليس فيه (نسب الى انسان نسبة ليست فيه الله عز وجل يبارك فيكن واحد اجا وحكى عن دكتور حسام قام الدكتور حسام وقال قيمونا من سيرته الله يتوب علينا وعليه ما قال شي غير هالكلمتين نفضوا اواعيهم الله لا يجعلها غيبة ما حكى شي بس هالكلمتين لبّسه ذنوب وتهم اسكنه الله ردغة الخبّال الله يوم القيامة سكنته فيها وهي عصارة اهل النار حتى يخرج مما قال وهاي حصلت واحد قال للتاني يا بعيد يا حمار قدي بنحكيها بين بعضنا يؤتي به يوم القيامة يسكن في هذا المكان ردغة الخبال جيب اثبات انه ابن حمار ممكن ويبقى محبوس في هذا المكان حتى يخرج مما قال.
ما ممكن يجيب دليل الله يرضى ع سيدنا مكي الكتاني اكتركن بتعرفو كان رئيس رابطة العلماء رضي الله عنه وارضاه عم يحكي لشيخنا قالوا له الله ليلة مبارح فزيت واذ المخدة مي تعصر من كترة البكاء يلي بكيانه بالليل سالوا خير؟ قالوا كنا في جلسة مشايخ قاعدين فجابوا سيرة واحد فالسيد الله يتغمدو برحمته قال لهم انا قلت قيمونا من سيرة هالكلب هادا ما بصلي هالكلمة قال بالليل نمت فرايت ان القيامة قد قامت والناس كلها فزت من القبر وجايه اكتر من عشرة الاف كلب كلاب ماشية شوفي وين رايحين قال رايحين الى بين يدي الله بدنا نشتكي على السيد الكتاني خير ليه شو في؟ قال بينسب الكلب النا شاف فينا تارك صلاة؟ شاف فينا عاصي لله؟ فينسب النا واحد تارك صلاة بدنا نشتكيه لله الكلاب رايحين يشتكوا الى انه نسب الن تارك صلاة. شوفو اهل الله قديش توبن نضيف ليلتها الله فرجاه ياها فاستغفر الله واتوب إليه انه كلمة كلب نسب كلب الى تارك صلاة كلام كله مسجل "ما يلفظ من قول الا لديه رقيب عتيد " من قال في مؤمن ما ليس فيه أسكنه الله ردغة الخبال حتى يخرج مما قال والله شي صعب قديش ننسب هادا ابن كلب هادا في زمن النبي ﷺ تخاصما رجلان فواحد قال للتاني يا ابن الكلب عيروا وقالوا امك رضعانة من كلب ومرضعتك من كلب ف بلغ الخبر للنبيﷺ فقال من عير أخاه ولو برضاع كلبة لم يمت حتى يرضعها فابتلي هذا الانسان بمرض فما وجد له دواء الا لبن كلبة شرب لبن الكلبة حتى يطيب من المرض صدق رسول الله ﷺ نسأل الله العفو والعافية الله يغفر لنا ويغفر لكم لكن في ناحية كتير من الناس مساكين بيتعدى عليه واحد ياخد ماله فاذا او واحد سب او شتمه هل يغتاب ويعتبر مغتاب؟ واحد دينه دينة اكل عليه المال فصار يحكي عليه لا يعتبر مغتاب عليه الصلاة والسلام قال (لَي الواجد يحل عرضه) انسان غني وعنده مال وبيحسن يدفع لكن شافو فقير اكل عليه المال فلو حكي عليه يحل عرضه، عرضه حلال نسأل الله السلامة وفي رواية مطل الغني ظلم. هلق بجي وبسال وسام ابو اليسر اللهم صل على النبي اجا واحد عم يسالك اجا لعندي فلان يخطب بنتي شو رايك فيه؟ شو بتقول له شو رايك فيه؟ المشاورة في امر الزواج والاخبار فيه لا تعتبر غيبة بتقول الرجل صايم مصلي واسال حدا عنه غيري بالله عليك اذا بتعرف شي عليه احكي لنا اخي انا بعرف انه بيلعب بالشدة بس بعرفو بيشرب سيجارة هذه لا تعتبر غيبة ليه؟ مشاورة بالنسبة للزواج فيها حياة اذا بيشرب سيجارة معناتا بلاء البنت بدها تبتلى انه يلي بيشم الدخان متل يلي بيشرب الدخان هادا يبتلى بالسرطان وهادا يبتلى بالسرطان بس الموجود بالشخص بنذكروا النبي ﷺ اجت لعنده فاطمة بنت قيس قالت يا رسول الله خطبوني اتنين معاوية وابو جهم ايهم بتفضل اقبل؟ صلى الله عليه وسلم قال : اما ابو جهم فلا يضع عصاه عن عاتقه واما معاوية ف صعلوك(فقير ما عنده شي) فالنبي ذكر هذا وذكر هذا معنى ابو جهم ما بيقيم العصاية عن كتفو كتير السفر بيسافر كتير او بيضرب النسوان. بتحبي تاخدي الفقير او بتحبي تاخدي هادا والافضل ما يذكر عيوب يقولو بيشرب دخان وانا اذا اجت وحدة تسالني فلان خطبني عم يشرب دخان بقول لها ما تتزوجيه ما بدك ياه. اي ما في شب الا بيشرب دخان اذا ما بيترك الدخان لا تتزوجيه لانه هي بدها توصل للمصيبة عم تشم كل يوم وكل السهرة بيقيم سيجارة وبيحط سيجارة وهي عم تشم ف بصير معها بالحنجرة والصدر فقلت لها بعدي عنو.
كيف بدنا نتوب من الغيبة لح نذكر كلمتين التوبة من الغيبة اذا اراد ان يتوب عليه الصلاة والسلام ذكر :الغيبة أشد من الزنا أن الرجل ليزني ثم يتوب فيتوب الله عليه وان صاحب الغيبة لا يغفر الله له ما لم يغفر له صاحبه. بدك تروح لعنده السلام عليكم قولوا له يلي ما بيعرفك بيجهلك انا كنت في مجلس ذكروك وحكيت عليك سامحني هاي انا قدامك بتحب تضربني هاي خدي الك بتحب تاخد مصاري بدفع لك بتحب تسامحني سامحني شو حكيت قولوا انا حكيت وبس وجاي لعندك بدك اخدمك لاخدمك قد ما بدك، بس المهم تسامحني ان سامحه غفر له في حدا بيحسن يعملها؟ والله في من اخوانكن عملوها الله يرضى عليهم راح لعنده وقال له حكيت عليك شو حكيت قال جاهل وحكيت سامحني او بدك مصاري 10الاف بس سامحني قال له الله يغفر لك ويسامحك وهاي مني الك الف ليرة قال انا جاي ادفع لك بس تسامحني. بده يستسمح صاحب الغيبة الله يعفي عنا تحللو الان قبل ما يجي يوم ما في سماح حسناتك بدن يروحو له فصل الله عليك يا رسول الله وغفر الله لنا ولكم وتاب الله علينا وعليكم لو واحد ندم وتاب هل يكفي الندم ؟ واحد ما سامع وبعدين سمع درس الغيبة وقال استغفر اللّه العظيم واتوب إليه والله انا ندمان اللهم اني اسالك العفو والعافية بنقول له الندم توبة هاي بينك وبين الله اما بينك وبينه لسا في معاملة لا تمحى المعاملة ما لم تدعي له مقابل ما حكيت عليه خدو هالدرس هادا قبل الفجر ورد في الحديث عن النبي ﷺ من استغفر اللّه في وقت السحر آخر الليل 70مرة فقال استغفر اللّه واتوب إليه ثم قال 27 مرة اللهم اغفر للمؤمنين والمؤمنات والمسلمين والمسلمات كان ممن يستجيب بهم الدعاء ويكشف الله بهم البلاء ببركته ويصرف بهم عن الامة النقمة. واحد صلى التهجد قبل الفجر وقال استغفر الله واتوب اليه 70 مرة و27 مرة اللهم اغفر لي ولشيخي ولوالدي وللمؤمنين والمؤمنات والمسلمين والمسلمات واسال الله ان يتقبل منا ومنكم ويغفر الله لنا ولكم وللمسلمين أجمعين (ومن حفظ لسانه نجا من الشر) كله هاي اخر عبارة احفظوها
بسم الله الرحمن الرحيم والحمد لله رب العالمين وصلى الله على سيدنا محمد وعلى آله وصحبه أجمعين اللهم اغفر لنا جميعاً مغفرة عامة شاملة اللهم اغفر لنا ولمن تكلمنا عليه ولمن ذكرناه بسوء اللهم اغفر لنا ولهم جميعاً مغفرة عامة شاملة وارحمنا واياهم رحمة واسعة وتقبل منا الحسنات وتجاوز عنا السيئات والحمد لله رب العالمين