وسمعت سيدي علي الخواص (رضي الله عنه) يقول .. اليوم درسكن درس تربية للنفس.. لا ينبغي اظهار الاعمال الا للأكابر من العلماء والصالحين الغواصين بدسائس النفوس.. لا يظن احد ان الاكابر هم الاغنياء او الاكابر هم الرجال الكبار.. المراد بالأكابر هم اولياء الله الصالحين من عباده.. هؤلاء الاكابر اصبحوا على مستوى تربية النفوس وتزكيتها لقول الله تعالى : (قد افلح من زكاها) من زكاها المربي الذي يزكي النفوس.. فهؤلاء الاكابر الغواصين في دسائس النفوس.. يعرف خطرات النفس وما هي أخطاؤها وكيف يتجنبها ويصل الى الله.. واما امثالنا هيدا الشيخ عم يحكي عن نفسه (رضي الله عنه وارضاه) . واما امثالنا (امثال الشيخ الشعراني) – فربما يظهر الواحد منا اعماله رياء وسمعة.. وتلبس عليه نفسه وتقول له انت بحمد الله من المخلصين.. عم يعمل عمل نفسه تقول له انت مخلص بذلك.. فهون انتبهوا شوي.. قال : وانما تظهر هذه العبادة ليقتدي بك الناس فينبغي لمثل هذا ان يمتحن نفسه .. هذا يا هل ترى مخلص ولا ما مخلص؟ يمتحن نفسه بإيش؟ بما لو جاء احد يفعل ذلك الخير وتنقاد الناس له مثله او اكثر منه.. هيدا الدرس قائم لو اجا واحد غيري وجمعكم له بهالدرس جمعكم كلكم له وكلكم رحتوا له.. قال : فان انشرح لذلك فهو مخلص وان انقبض خاطره شلون تركوني وراحوا لفلان؟ اذا كان تأثر وزعل فهو مراءٍ دق المطرقة 100 % .. مرائي.. حضرتوا وان رحتوا واحد لو بيحضر واحد منعمل الدرس ما بيحضر حدا قاعد بوقت الدرس .. شغلة النفس المعلم بيقول انه انا مخلص وانا كذا نقول له اذا كان جماعتك راحوا لعند غيرك تفرح ولا بتزعل؟ هلق عم يتخانقوا.. هذا عنده حلقة وهذا عنده حلقة راح واحد من هاد لعند هالحلقة.. بيقيم القيامة.. بيسب الاخ ويتهمه بالخطايا لانه راح لعند حلقة تانية.. عم يخلصلي اخواني عم ياخدن من عندي.. وهي اكتر شي بالنسوان.. يا لطيف.. النسوان اذا واحدة عندها حلقة وواحدة من الحلقة راحت للحلقة التانية بتدعي عليها وبتسبها وبتحكي عليها وبتغتابها يلي كسبته من ذنوبها اكتر من يلي كسبته من طاعتها.. اخدتلي اخواتي يلي انا عم ربيهن.. هي اخدتلي ياهن هي كذا.. ما مخلصة هذا ما في اخلاص.. الاخلاص راح الاخ لعند الاخ راح يتربى عالايمان ولا عالفساد؟ عالايمان اشكر الله.. حمل مسؤولية عنك.. اما ليش راح لهونيك وتركني ما عرف قيمتي ما عرف.. هذا مرائي.. نقطة كتير ضرورية لازم ننتبه لها.. ولو انه كان مخلصا لفرح بذلك اشد الفرح الذي قيّض الله له من كفاه المؤونة.. يذكر ان بعض الشيوخ (رضي الله عنهم وارضاهم) كان لديه مريد وهذا المريد بده يصير شيخ يعني بده يوصل لدرجة المشيخة .. فالشيخ قال له اطلع اخطب بخطبة الجمعة.. طلع عم يخطب خطبة الجمعة فدخل فقير بقميص وبردان دخيلكن يا عباد الله دبروني.. فيلي طالع عالمنبر عم يخطب شلح الجبة ودحشله ياها.. فالشيخ اطلع عليه قال له انزل يا مرائي انزل ما بتطلع للخطبة.. بنص الخطبة انزل.. خير.. قال له مرائي.. يا سيدي بردان وكذا.. قال له : يا ابني كان لازم تصبر بركي احد الموجودين تبرع له بيكسب الاجر قبل منك.. فيكتب لك نية الصبر ونية الاخ يلي عطاه اما انت دغري تبرعت بدك تبين حالك انه انت فهذا رياء.. شو هالتربية هي.. اصطبر حتى غيرك .. اذا في غيرك تبرع بيكون اخد الاجر وانت صبرك عليه ورضاك الك الاجرين اجر مضاعف.. اما انت دغري تتبرع وتشلح جبتك وتعطيه ياها هذا رياء.. قديش اهل الله دقيقين على النية وعلى النفس.. رضي الله عنه وارضاه.. قال ثم اذا قالت له نفسه انما تشوشت بفوات الخير العظيم .. انه راح انت زعلت لان فات عليهم الخير الذي كان يحصل لك من حيث هو خير فليقل لها يحادث نفسه.. انه انت ما زعلت لانه رياء انت زعلت لانه فاته من الخير مشان توصل الخير لهم.. قال : فليكن لها اني معتمد على فضل الله لا على الاعمال.. العمدة مو عالعمل.. العمل لا يدخل الجنة .. لازم يتيقنها المسلم ان عملك لا يدخلك الجنة.. دخول الجنة بفضل الله تعالى .. والاعمال تنفع مراتب في الجنة.. بتصير تعطيك مراتب في الجنة.. اما دخول الجنة بفضل الله.. قال ﷺ لن يدخل احد منكم الجنة عمله، قالوا : ولا انت يا رسول الله ؟ قال : ولا انا الا ان يتغمدني الله برحمته.. في رواية برحمة منه.. فاذا الله تغمد بالرحمة ادخل اما العمل .. لكن ليش عم نصلي وليش عم نصوم؟ الصوم والصلاة والحج والصدقات وفعل الخير هيدول ما بيفوتوك عالجنة.. هول بيرفعوا درجاتك في الجنة.. اما دخول الجنة برحمة الله.. غفر الله دخل الجنة.. ما غفر ما في دخول.. فدخول الجنة تدخلون الجنة برحمة الله وتقتسمون فيها منازلكم على حسب اعمالكم.. فاذا النفس قالت له انت مانك مرائي انت مشان ما يفوتن الخير لما يضيع عليهم فنقول : اني لا اعتمد على العمل ولكني اعتمد على فضل الله.. ان قبل .. يعني انا ماني طالب يقبل العمل.. طالب يقبل مني كلمة.. كلمة سبحان الله.. يقبلها خلص.. اذا قبل مني كلمة سبحان الله انا راضي.. سعيد من السعداء.. المهم قبول العمل.. وليس العمل.. ورد في الحديث يلي عنده الترغيب والترهيب يقرأ الحديث .. ابو هريرة وهو يقرأ الحديث غط على قلبه 3 مرات يشهق ويغط على قلبه يرد يكرر الحديث يرد يشهق .. يؤتى برجال له اعمال وزن السموات والارض توضع في الميزان فلا تزن مثقال ذرة.. فيؤمر به الى النار.. يا ربي اعمال كلها انوار فيقول : انتم اطلعتم على ظاهر عمل عبدي وانا اطلعت على باطنه فرأيته مرائي غيري.. ويؤتى برجل له انوار تملأ السموات السبع والاراضين السبع اعمال من انوار.. يؤمر به الى النار .. هي اعمال وطاعات وانوار.. فيقول : كان يرائي غيري.. عم يعمل مشان الناس تشوفه مشان تمدحه.. لذلك الاعمال ما المهم كثرتها.. المهم قبولها.. اعمل عمل القبول وعمل القبول هو المخلص.. ان الله لا يقبل من العمل الا ما خلص له.. عمل مخلص لله يلي لا تريد منه جزاء ولا ثناء ولا مدحاً هذا العمل المخلص لله.. فمن وفق للاخلاص قُبل عمله والا نسأل الله العفو والعافية.. فيخاطب نفسه يقول لها : اني معتمد على فضل الله لا على الاعمال.. فان دخلت الجنة فانما هو برحمة الله تعالى لا بعملي.. دخول الجنة بالرحمة وليس بالعمل.. الناس تظن انه اذا صلى او صام او حج يدخل الجنة بأعماله.. الاعمال لا تدخل الجنة .. يلي يدخل الجنة اخلاص العمل.. اذا اخلص العمل قُبل.. واذا قُبل قال الله تعالى : انما يتقبل الله من المتقين... الذي يتقي الرياء ويتقي السمعة.. هذا الذي يتقبل الله منه.. شوفوا هالدقة يلي الله يرضا عنه عم يعلمنا ياها.. قال : فينبغي للعبد ان لا يصغى لدعوى نفسه بالاخلاص وذكرت لكم قاعدة انا : من رأى الاخلاص في اخلاصه فاخلاصه يحتاج الى اخلاص.. هي قاعدة عند اهل الله.. يعني اخلاصه باطل هذا منه مخلص .. فدائماً يتهم نفسه بعدم الاخلاص قال : وليمتحن الشيخ او المدرس نفسه.. بإيش الامتحان؟ بما اذا فرّت جماعته منه كله الى شخص من قرناؤه (من رفقاته) وبقي لوحده لا يجد احداً يتمشيخ عليه فاذا انشرح لذلك فهو مخلص وان حصل في نفسه حزازة فالواجب عليه ان يتخذ له شيخاً يخرجه من ظلمات الرياء والا مات عاصياً.. يروح يتربى يعني عند شيخ.. هذا ما تربى.. بين الاحباب دائماً هذا عنده حلقة وهذا عنده حلقة.. الاخوان بيحب ينطنط مرة عند هاد مرة عند هاد مرة عند هاد.. فراح مثلا من عند عبد الكريم لعند الشيخ ابو الخير من عند ابو الخير لعند هاني.. وين رحت ما عاد بينت .. شو .. نحن منمشي متل ما بدك.. كذا.. هو بده يمشي متل ما بدنا .. ما نحن منمشي متل ما بده.. عم يتلطفه.. ارجع.. والله نحن كذا.. هذا الشيخ عبد الكريم منه دارس الشيخ عبد الكريم ما كذا.. بيصير بيحكي عليه مشان يرجعه .. هالغيبة يلي اغتابها اسوأ من هالعمل يلي اراد ان يعلمه ياه.. اعماله كلها راحت بهالغيبة.. المفروض كان كنت احكي لكثير من الاخوان وهذا فضل الله عز وجل.. واحد عنده حلقة واحد راح من عنده لعند الحلقة التانية.. قلت له يا ابني انت مش بهالحلقة آخد اذن بالمجيء لعندي؟ لا .. اطلع ما بقبلك.. خود اذن وبعدين بتجي.. بده يستأذن رئيس حلقته.. انا سأنتقل الى عند فلان .. اذا ما اذن له ما بيصح ينتقل.. واذا اجا لعندي بقول له عند مين بأي حلقة كنت ؟ عند فلان.. استأذنته؟ استاذنت اهلا وسهلا.. ما استأذنت روح استأذن وبعدين تعا.. ما بدي كتّر جماعة انا بدي مخلص.. يتعلم للاخلاص ويعلّم للاخلاص.. ما يكون عنده طلب لذاته او لنفسه.. لا اله الا الله .. ما بيعرف هالامور الا الشيوخ.. قال : فاذا انشرح لذلك فهو مخلص وان حصل في نفسه حزازة فالواجب عليه ان يتخذ له شيخاً يخرجه من ظلمات الرياء والا مات عاصياً وذهب الى الآخرة صفر اليدين من الخير.. محيت اعماله كلها.. لأن الله تعالى لم يقبل له عملاً.. اذا ما في قبول معناتها ما في جنة معناتها في نار.. لذلك نسأل دائماً اللهم تقبل منا.. اللهم تقبل صيامي وثبت ايماني وارزقني لذة النظر الى وجهك الكريم.. انا اقول لكم يلي بيحب يروح لعند اي شيخ يروح يحضر ويتعلم.. ان لقى اطيب واحلا الله يبارك له.. ما لقى بيرجع لعندي.. ما فيا شي.. بدي ياه يتعلم.. واحد بده يتعلم فقه راح عند مشايخ الفقه بيتعلم.. غاب 5 – 6 سنين.. بعد 6 سنين رجع بتقبلني؟ اهلا وسهلا الباب مفتوح انا ما برد حدا .. الباب مفتوح الدرس مفتوح امتا ما بتجي اهلا وسهلا.. صرلي 6 سنين غايب.. شلون لقيت الدروس يا ابني؟ والله تعلمنا بس والله ما تعلمنا ولا قشة قدام يلي عم نتعلمه عندك.. اي تفضل .. هالدرس هذا افضل ما يقرأ 50 مكتبة.. اول شو؟ نفسك.. عم تحب انه الناس يشوفوها؟ حابة تظهر؟ روح ابكي على حالك.. صلى الله على رسول الله امامنا.. كان في درسه ﷺ يسمع منه اكثر من 70 مرة استغفر الله واتوب اليه.. هو وعم يدرّس.. استغفر الله واتوب اليه استغفر الله واتوب اليه.. شوفي للاستغفار ؟ شو عم يعمل؟ هلق نحن فهمناها.. بيكون عم يدرّس شاف الاخوان كلهم قاعدين كلن عم يسمعوا ما شاء الله.. اذا دخل لحظة شفت حالك انه كلن عم يسمعوا انت مرائي.. بده يستغفر.. لذلك الله يرضا عنهم ما كانوا يحبوا انه يكتروا الناس حواليهم.. متل ما جاي معنا.. فبده دائما ينتبه ما يشوف حاله.. بعدما نطلع من الدرس طول الطريق منستغفر الله .. استغفر الله مما خطر ببالي استغفر الله مما وسوست به نفسي استغفر الله مما وقع عليه بصري استغفر الله.. طول الطريق اتوب الى الله من المجلس يلي كان.. كنا بذنب ولا معصية؟ اذا النفس طرفة عين حبط العمل كله.. العمل لله.. بفضل الله هلق بتوفيق الله لما بفوت عالمكتب مشان انتو تتعلموها الله يرضا عليّ وعليكم لما بفوت عالمكتب بفضل الله بمجرد ان اشعل الضوء اللهم اني نويت طلب العلم لنفع عباد الله.. ما طلبنا مشان صير عالم او امام.. حتى انفع الخلق.. معناتها لنفسي ما في شي.. الله عز وجل يتوب علينا وعليكم.. هي نية طلب العلم.. مرقت معكم بالفقه شي مرة؟ ما مرقت بالفقه.. ولا بالاصول ولا بالعقيدة.. هذا فضل الله عز وجل.. كل يوم بمجرد ما اشعل الضوء اني نويت طلب العلم لنفع عباد الله.. ما مشان انا اتعلم.. انا عم بتعلم معكم.. قاعد معكم بالدرس انا عم بقرأ يعني انا عم بتعلم معكم متل ما عم تتعلموا انا عم بتعلم.. وان بكون قارين مدرسه هالكتاب قبل بمرة لكن نسيته.. هلق عم ارجع جدد اخلاصي وجدد توبتي مرة تانية.. وسمعته ايضاً يقول: ينبغي للعالم اذا درّس في مثل جامع الازهر.. هو كأنه كان بمصر .. هلق اذا هون درّس بالاموي، يجب ان يحرر نيته قبل ذلك .. اه بتعرفوا شو النية؟ .. استغفر الله واتوب اليه.. تعلموا.. وما انا الا تراب تحت الاقدام.. بدخل الى جامع الاموي اللهم اجعلني تراباً بين اقدام المستمعين.. تراب.. ماني معلم.. تراب اسال الله ان ينتفعوا فيّ.. ينبغي للعالم اذا درّس في مثل جامع الازهر ان يحرر نيته قبل ذلك ولو مكث سنين قبل الافراغ لا يعلم حتى يجد له نية صالحة.. وذلك لغلبة دخول الاكابر الذين تميل النفوس الى مراءاتهم.. من الامراء والاغنياء.. بيجوا عالجامع بيصلّح كلامه بيحكي كلام.. بيخطب خطبة جيدة بيصير يتكلم.. انه انوجد زعماء بده يعمل .. فهيدول يا ابني لما بيدخلوا الاكابر عالجامع مشان يشوفوهن العلماء بيصير بيختار العبارات بيختار الكلمات .. وكان الامام النووي (رضي الله عنه) اذا درس في المدرسة الاشرفية في دمشق يوصي الطلبة ان لا يجيئوا دفعة واحدة خوفاً من كبر الحلقة.. مشان ما تكبر الحلقة.. كان الامام الجنيد امام الطائفتين (رضي الله عنه وارضاه) كان اذا جلس ليدرس يقعد 3 حواليه.. اذا صاروا اربعة يفز يهرب.. يترك الدرس ويفز يمشي.. يا سيدي جايين نتعلم.. اكتر من 3 ما يحضر الدرس.. الله يجعلها خالصة لله.. اللهم لا تجعل لنفسي حظاً في مجالسي.. ولا في كلامي.. اللهم انا نسألك الاخلاص قولاً وعملاً ونية .. اسال الله ان يتقبل منا.. هي الامام الجنيد يلي انا ما بطلع جرثومة ببوله او بغائطه.. لكن ما يجي يدرس بالاموي .. ما بيفوت عالاموي.. الله عز وجل لا يجعل فيها حظ للنفس مطلقاً.. وكان (رضي الله عنه وارضاه) الامام النووي.. اذا درّس جلس في عطفة المسجد.. يقعد يدرس بالزاوية بالجامع - شو معنى عطفة المسجد بالزاوية - ويقول : ان النفس تستحلي رؤية الناس لها وهي تدرس بصحن المسجد او صدر المسجد.. يلاقي هيك الناس قاعدين حواليه .. والله يا ابني حضوركم وغيبتكم متل بعضها البعض.. نسأل الله ان يرزقنا الاخلاص.. لو حضروا المشايخ والاولياء وحضروا.. الدرس درس ما بيتغير.. لما نجلس مع الاكابر نعطيهم علم الاكابر .. جابولنا الله عز وجل يوجه له الخير.. الشيخ مفتي البقاع .. كان يدرّس بالتلفزيون.. من الصوفية المتعمقين .. متعمق بالتصوف.. جابولنا ياه مجرد ما دخل انفتح الباب لا اله الا الله ما عاد حكي ولا كلمة.. ضليت احكي تلات ارباع الساعة .. لما سكتت قال لي شو هاد ؟ خير؟ قال لي : مجرد ما فتت هجمت عليّ هجمة وحدة متل الاسد بلعتني.. قلت له والله ما قصدت.. كواجب بدنا نقوم بالواجب.. قال لي : والله 80% من يلي بنفسي حكيتلي ياهن واحدة واحدة.. حتى واحدة قال لي خطرت ببالي انه ما تكون كذا.. قال لي: واذ انت قلت لي ما تكون كذا وتساويها.. قال اي شو هي.. قلت له ذلك فضل الله.. قال لي: تلميذ واخذ طريق.. اخذ طريق عالذكر.. هو شيخ مشايخ يعتبر.. كل واحد بده.. انا والله ما قصدت .. مجرد ما اجا لا اله الا الله بدأت معه .. قال لي: هجمت عليّ هجمة الاسد بلعتني.. هذا ليش صاير هيك؟ قال لي: انا جاي لعندك بهدف.. انتبهوا ليش انا هجمت؟ والله ما عندي خبر.. قال لي: جاي امتحنك.. شيخ ولا ما شيخ.. قال لي : واذ هجمت عليّ بلعتني بلع.. قال لي: ما بقا عندي شي.. بدي اطلع.. شو اسمه هذا ؟ الشيخ اسامة الرفاعي.. الله يبارك فيه.. رجل فاضل من كبار الصالحين والاولياء رضي الله عنه.. فجاي يمتحن الشيخ.. فالفضل يا ابني ما فضل العلم .. انا عم بعطيكن الدرس من العلم يلي درسناه؟ درس الجمعة من العلم يلي درستوه؟ هذا ما شغلة كتاب وشغلة علم.. شغلة اذن شيخنا نستأذن بالدرس يا شيخي دخيلك فقير عالعتبة فقير عالباب جوعان.. منطعميك ومنطعمي الجماعة.. هذا يا ابني.. اوعى تشوف حالك والله لو صار قطب الاقطاب.. مرة اجوا لعندي يا ابني مشايخ مشان تفهموا شلون مجالسة الشيخ اجوا لعندي مشايخ عالبيت لهون.. ستة.. قعدنا تحادثنا.. واحد منهم قال لي : اي خليلنا مجال نحكي كلمة .. تفضل.. قال لي: الله عطاك والله نفعك والله فتح عليك .. طيب شو في هلق يعني شو مرادك؟ قال لي: انت هلق بالهمقام وبهالعطاء وبتروح بتحضر درس شيخك مع الاخوان تبعك؟ مع اخوانك بتحضر درس الشيخ؟ بتنزل مكانتك من عيونن يعني.. فهمان عليهم انا.. التاني قال لي: اي ما شاء الله الله نفع فيك الامم بيروت وحلب ولادقية وما شاء الله والشام.. وقرى الشام.. لا زلت تحضر لشيخك ؟ على هالمنوال كل واحد .. قلت لهم خلص انتهى فهمت عليكم.. اسمعوا مني.. انتم ادليتم بدلوكم شو عندكم حكيتوا اسمعوا مني.. والله الحيطان بتشهد عليّ بهالكلمة قلت لهم : وعزة ربي لو اهل السماء واهل الارض صاروا مريدين عندي اذا خدي بده يرتفع من تحت نعل شيخي الله لا يبارك فيّ ولا بعلمي.. مع السلامة تفضلوا.. شو تفضلوا قلت لهم مع السلامة خلص انتهت الجلسة.. جايين نشوفك كذا.. قلت لهم : ضيافتكم بالطريق مع السلامة.. كبست الباب وراهم مع السلامة.. عند الباب واحد عم يحكي للتاني : ما قلت لكم ما بتحسنوا عليه.. وين فايتين عليّ ؟ اخوان ما اخوان .. كل يلي شايفينن لك يا ابني كلن والله لولا غبرة نعل شيخي ما بسوا ولا قشة.. بعرف حالي مين كنت ومين انا هلق شو هلق يعني .. حطوني بالميزان اذا بوزن 5 مثاقيل خدوا يلي بدكن ياه.. 5 مثاقيل ما بطلع.. قدام اهل الله.. الله يتوب علينا.. لا تشوف حالك تعلمت ذكرت.. قرأت.. كلها .. حط خدك عالتراب وقل : يا رب الارباب.. ارحم من خده بالتراب.. الله يرضا عنهم.. فشو قال .. وبلغه يوما وهو يدرّس في جامع امية .. الامام النووي درس بالاموي.. الامام النووي بيعتبروه العلماء الشافعي الاصغر.. حافظ المذهب الشافعي كله.. (رضي الله عنه وارضاه ) .. بلغه بالدرس ان الملك عازم على الصلاة في الجامع بده يجي يصلي بجامع الاموي.. فترك الدرس وترك المجلس ذلك اليوم ما بده يجي عالدرس.. خشية ان يكون بالدرس يدخل بده يأهّل له ويمدّ له.. واهلا وسهلا ويتكلم له .. حتى ما يتكلم ما جاي عالدرس اليوم.. لا اله الا الله.. فإياك يا اخي ان تعقد مجلس علم او مجلس ذكر لله تعالى او صلاة على رسول الله ﷺ بحيث يراك الناس الا ان تكون سالما من هذه العلل والافات.. من علل الرياء وافات النفس.. اذا خلصت من علل الرياء وافات النفس ساعتها اقعد ودرّس الله يعفي عنا.. سجلوها .. ما تظن العلل المرض .. علل الرياء وافات النفس.. قال (رضي الله عنه) : لقد حضرت مرة الشيخ العالم العامل شمس الدين اللقاني امام مذهب مفتي المالكية بالجامع الازهر وهو يقول لشيخنا الشيخ نور الدين الشوني، الشيخ نور الدين الشوني معروف عنه انه كان يرى رسول الله يقظة.. كان يتحدث معه يقظة ويتعلم منه وكان له مجلس صلاة عالنبي خاص بالازهر.. يجمع الناس على مجلس الصلاة عالنبي ﷺ قال فسمعت الشيخ شمس الدين اللقاني عم يحكي للشيخ نور الدين الشوني شيخ مجلس الصلاة عالنبي ﷺ قال له : والله يا اخي اني خائف عليك .. من ايش خائف عليّ؟ قال له : من تصدرك في الجامع في هذا المجلس ليلة الجمعة ويوم الجمعة والامراء والاكابر ينظرون اليك .. مجلس الصلاة على النبي عم يحضره الامرا وعم يحضره الكبراء.. قال له خايف عليك.. ليش؟ قال : عم يعتقدوا فيك ويقولون شيل الله المدد .. عم يطلبوا منك المدد.. ما تشوف حالك انك عم تعطي مدد.. فربما مالت نفسك الى حب فرحها بذلك انه عم يطلبوا المدد فخسرت الدنيا والاخرة.. هاد عم ينصح الشيخ يلي يرى النبي يقظة.. خايف عليك نظرة اذا لحظة نفسي شافت حالها استغفر الله واتوب اليه.. استغفر الله واتوب اليه.. بدها فت خبز لسا يا شيخ محمد ما هيك؟.. بدنا نرجع اطفال ونفت خبز لحتى نعرف شلون يتخلص الانسان من النفس.. هذا اذا كان عم ينصح شيخ مجلس الصلاة على النبي ﷺ انه عم يشوفوك الامرا شيل الله.. مدد يا شيخنا.. المنشدين كانوا يقولوا يلي له شيخ كذا.. قلت لهم ما بقا تقولوها.. يلي له شيخ ينادي على شو.. قلت لهم ما بقا تقولوها قيموها.. سيدي رجب... لا رجب ولا مجب.. انا وياكم كلنا طلاب عند اهل الله.. انا هلق طالب على مائدة الامام الشعراني (الله يرضا عليه) وان كان الامام الشعراني مع قدسية مقامه وارتقاء منزلته كل ما ادركه (رضي الله عنه ) بيطلع عطاء مريد من مريدي شيخنا.. شيخنا كان يقول : والله يا ابني في عندي من الاخوان لو توجهوا على جبل لزالوه من مكانه.. وين .. اخوانه.. فهو شلون بقا.. الله عز وجل يتمم الخير.. رغم ذلك انا الان تلميذ الامام الشعراني معكم عم بسمع يلي عم تسمعوه.. وسمعته مرة اخرى يقول.. مين؟ شمس الدين اللقاني.. يقول : اذا فرغ الناس من صلاة الجمعة فاصبر على قراءة سورة الكهف حتى ينفض الناس ثم اشرع في القراءة فان النفس تستحلي رؤية الناس لها في ذلك المحمل العظيم.. هي كانت عادة المسلمين لما يخلص الخطيب من خطبة الجمعة كل واحد ياخد مصحف ويقرأ سورة الكهف.. سورة الكهف بالجامع. قال له اوعى تعملها انه قدام الناس والشيخ ما شاء الله بده يجي يقرا سورة الكهف فهيدا بده يسمع صوتك وهيدا بده يسمع قراءتك وهيدا ما شاء الله كان.. شافت نفسه خسر العمل كله.. قال له انتبه.. طيب فاعلم يا اخي.. مين هلق لح يسمع مني.. فاعلم يا اخي.. وانا اخوكم في طلب العلم.. فاعلم يا اخي ذلك واعمل به وبهدى هدي الصادقين اقتدي والله يتولى هداك.. اقتدي بالصالحين ونسأل الله ان يتولى الهداية.. بس النفس ما تشوف حالها.. سيدنا علاء حط القرآن قاعد عم يقرأ بالبيت زعل.. امه اخته كذا .. انا حافظ ما بتعرفوا انا حافظ للقرآن لا تشوشوا عليّ .. انا حافظ قرآن ؟؟ لاا... بيعرفوك حافظ قرآن .. ليش عم تشوشوا عليّ انا حافظ قرآن .. عم كررها.. بقول له: ارجوكم الهدوء.. بيرجع بيقرأ.. انتبهوا كلمة بعض اوقات بتمحي الباقي.. ممكن تصير؟ ممكن.. انتبهوا.. نبهتكن عليها.. انا حافظ.. كان بالبيت هذا يقول بيجوز وهذا ما بيجوز تقول انا عم صلي عند الشيخ كذا اسالوني حتى احكيلكن.. يعني انا افهم منكم.. خسر مسكين تزحلق زحليقة فك رقبته.. كلمة.. انا عم روح عند الشيخ.. اسالوني.. ايه اقعد على جنب مين انت لحتى نسألك.. الله.. لا اله الا الله.. سبحان الله شو بتذكر هيك بعض الاحكام الوالد يقول كذا بعرف انه غير.. يقول لي: درست انت هيك ؟ لك يا بابا انا درست غير هيك. .يقول لي: ايه سمعنا شو درست.. قراني الشيخ كذا كذا .. ما قول له درست.. فيقول لي: اي ارجع لعند الشيخ خليه يفهمك منيح.. مو هيك.. يلي انا قاريه حق .. هو أميّ.. ارجع لعند الشيخ خليه يفهمك.. برجع لعند الشيخ مو قلت هيك.. يا ابني ذا صح هو خطأ.. اقول له : خطأ ابي احسن من صوابي.. ماشي.. ولا برجع بحكيله انه انت مانك فهمان.. هذا العلم؟.. انتبهوا عالكلام يا ابني والله مرات كلمة بتخرب بيت الانسان.. سيدنا ابو بكر شو كان اخر حياته؟ ماسك لسانه عم يشده بده يقلعه.. دخل سيدنا عمر شافه ماسك لسانه عم يشده .. مه شو هاد يا سيدنا ابو بكر.. قال له : هذا الذي اورد بي الموارد.. هذا لح يحرمني دخول الجنة.. وهو ابو بكر الصديق.. ابو بكر الصديق.. صديق هذه الامة.. النبي قال : ما طلعت الشمس ولا غربت على رجل بعد النبيين افضل من ابي بكر.. مرة غضب من عبده لعنه .. بمجية النبي ﷺ .. وقف النبي وقال : أصديقين ولعانين؟؟ أصديقين ولعانين؟؟ أصديقين ولعانين؟؟ لا ورب الكعبة.. شي بيقطع القلب.. سيدنا ابو بكر قال دخيلك يا رسول الله.. بدك تلعن بتشلح بدلة الصديقية.. صديق ما بتلعن.. قال : يا رسول الله ان اعتقته يغفر الله لي؟ قال له : لعلك تنجو رأساً برأس.. وحدة بوحدة بتطلع.. لا الك ولا عليك.. ابو بكر.. نعم.. اعتق العبد حقه 80 الف دينار... 80 الف ليرة مشان كلمة حتى الله يغفر له.. لذلك شو رأيكم عند الغضب.. شو منحكي عند الغضب.. لعن ما في ابداً.. بتمدح حالك ما في.. الله يسترنا بستره الجميل.. وروى مسلم والنسائي وابن ماجه وغيرهم ان رسول الله ﷺ جاءه قوم من مضر مجتابي النمار – النمار توب مو مخيّط لابسه توب مو مخيط مقلم.. خيط ابيض وخيط اسود .. هي النمار اسمها.. اي لابسي العباءة الصوف المخطط.. فتمعّر وجه رسول الله ﷺ.. تغيّر وجه النبي ﷺ انه هيدوليك لابسين من الفقر لابس صوف على بدنه.. ايه نحن شعرة اذا كان ما منتحملها.. على بدنه لابس صوف.. تغير وجه النبي ﷺ لما رأى فيهم من الفاقة فدخل ﷺ يعني الى بيته فتوضأ ثم خرج فأمر بلالاً فأذّن.. أذّن بلال واقام فصلى ﷺ الظهر ثم خطب فقال : ( يا ايها الناس اتقوا ربكم الذي خلقكم من نفس واحدة وخلق منها زوجها وبث منهما رجالاً كثيراً ونساءً واتقوا الله الذي تساءلون به والارحام) الى قوله : (إنّ الله كان عليكم رقيباً ) .. اول اية في سورة النساء. والاية التي في الحشر آخر صفحة في سورة الحشر (اتقوا الله ولتنظر نفس ما قدمت لغد) آخر صفحة في سورة الحشر .. ثم قال : تصدق رجل من ديناره من درهمه من ثوبه من صاع تمر من صاع برٍّ حتى قال : ولو بشق تمرة.. اذا الله احياني وتذكرت الحديث بجبلكن دينار ودرهم .. عندي دينار وعندي درهم.. دينار ذهب والدرهم يلي كانوا يتعاملوا من زمن الاموي ان شاء الله بفرجيكن ياه قد الليرة هذا دهب وهذا فضة.. الفضة الدرهم ، والدينار دهب.. تصدق رجل من ديناره من درهمه من ثوبه من صاع تمر – صاع التمر هذا الصاع زور تمر او زور قمح.. من صاع برٍّ حتى قال : ولو بشق تمرة.. ما عندك اذا نص تمرة جيب نص تمرة صدقة بدك تتصدق ولو بنص تمرة.. قال : فجاء رجل من الانصار بصرّة كادت كفه تعجز عنها فتتابع الناس هذا جاب وهذا جاب حتى صار كومين من طعام ومن ثياب.. يلي عنده جاب اواعي ويلي عنده طعام جاب .. حتى تهلّل وجه رسول الله.. فقال رسول الله ﷺ : من سنّ في الاسلام سنة حسنة فله اجرها واجر من عمل بها من بعده من غير ان ينقص من اجورهم شيء.. ﷺ .. عمل خير .. لا تحتقروا صدقة وان كانت صغيرة.. النبي ﷺ عم يقول شق التمرة.. شق التمر لمين اخبر في حديث آخر.. قال : شق التمر يجعلها الله يوم القيامة كجبل احد.. بيبارك فيها على قد جبل احد.. وحديث آخر معنا ﷺ : من سنّ بالاسلام سنة حسنة فله اجرها واجر من عمل بها من بعده من غير ان ينقص من اجورهم شيء.. هيدا سنة حسنة كلما مر معنا حديث منطبقه.. هي سنة حسنة.. واذا واحد مع رفقاته يالله خلينا نجمع مشان نطلع غروب نطلع عالساحل ... هي سنة حسنة ولا سنة سيئة؟ مشان يضيعوا وقت ويغنوا ويرقصوا هي سنة حسنة ولا سنة سيئة؟ اما اذا قلت لكم تعوا نروح عاللادقية عند احبابنا ومنسبح بالبحر طاعة لله وتقليداً لرسول الله .. منسبح اتباع للسنة.. فهذه شو بتكون؟ سنة حسنة..ان شاء الله منعملكن ياها.. الله يهدي الاحوال وان شاء الله تصير باللادقية.. جمال الحديث العمل به.. يعني هلق الحديث الاول قديش حلو عملتوا كلياتكن يلي بجيبتكن طالعتوه لكن ثقوا ما بتكمل الجمعة ل الله بيعوضكن عليه.. بتوفيق الله.. طيب .. الحديث الثالث : من سنّ خيراً – الامام احمد والحاكم وابن ماجه – من سنّ خيرا فاستُنّ به كان له اجره ومثل اجور من تبعه من غير ان ينقص من اجورهم شيء.. الله يجعلها خالصة لله .. الله يتقبل منكم ما انفقتم .. من سنّ سنة حسنة فله اجرها ما عمل بها عامل بحياته وبعد مماته حتى تدرك.. هالسنة الحسنة لح حطها امانة عندكم .. لما تشوف ابوك قاعد ومروّق قل له : بابا انا معي 50 ليرة لح اتصدق فيها لفقير بتعطيني منك 50 ليرة لنتصدق فيها لفقير؟ رغّب ابوك رغّب امك لتعمل بهالحديث.. واولادك اذا عملوا فيه بيضل اجرك ماشي والى قيام الساعة.. فبتعملوها؟ بتعملوها.. بابا شو رأيك اعمل لك شمسية يوم القيامة من الشمس .. شلون بدك تعمل لي شمسية؟ قل له : قال النبي ﷺ يستظل المؤمن في ظل صدقته يوم القيامة.. ظل الصدقة بتجي شمسية بتخيمك من الشمس.. هي الشمسية.. فانا لح اعملك شمسية انا لح ادفع هات لنشوف شو بيطلع منك.. في واحد فقير عنده ايتام عنده اولاد بدنا نجبرله خاطره .. اعملوا هالخير مع ابائكم مع امهاتكم اجعلوا هالحديث امانة عندكم في حياتي وبعد مماتي حتى تُدرك.. هي سنة.. ما صار مع ابوك مع ولادك.. جمع ولاده يالله يا ابني انتو طالعتوا صدقة الفطر ؟ لا.. يالله طالعوا الصدقة.. انا بطالع صدقة وانتو كمان طالعوا صدقة.. اعطيها لفقير.. الله يوفقنا واياكم.. الحديث التالي.. قال ﷺ : من احيا سنة من سنتي قد اميتت بعدي كان له من الاجر منه ما عمل بها من غير ان ينقص من ذلك من اجورهم شيء.. الحمد لله هلق السنة يلي انتم فيها اميتت ولا لأ؟ عم يعملوا فيها ؟ لا.. انتم أحييتوها اشكروا الله.. ما ضاعت دغري اخدتوها.. من احيا سنة من سنتي قد اميتت بعدي.. ما حدا بيعملها بالجوامع.. كان له من الاجر مثل من عمل بها من غير ان ينقص ذلك من اجورهم شيء.. كلكم الله اكرمكم بالاجر بتوفيق الله هي سنة اميتت هلق لح نحييها.. مع ابوك مع امك مع عمك مع خالك.. رغّب هاد ورغّب هاد واياكم ان تكونوا ممن قال الله فيهم (ولا يحضّ على طعام) ما بيحضوا.. حضوا انتو .. حضّ على الخير يوصل الانسان الى يوم القيامة.. بأي سورة هي ؟ سورة الماعون .. اقراوها لنشوف.. بسم الله الرحمن الرحيم. (ارأيت الذي يكذب بالدين فذلك الذي يدعّ اليتيم ولا يحضّ على طعام المسكين فويل (= لهم وللمصلين الذين هم عن صلاتهم ساهون ) .. حضينا؟ حضينا بتوفيق الله.. اول مرة بتفهمها.. ولا يحض على طعام المسكين فويل .. لهم وللمصلين الذين عن صلاتهم ساهون.. ما بتخطر ببالكم.. فويل للمصلّين.. ما بيجوز نوقف عالمصلين.. فويل للمصلين الذين هم عن صلاتهم ساهون الذين هم يراؤون ويمنعون الماعون. المرائي ويل له.. والذي يمنع الماعون جيرانك بدن يستعيروا من عندك طنجرة صحن ابريق كذا وما عم تبعتلن.. انت منعت الماعون.. هذا منع الماعون.. هذا هالعمل ان شاء الله نعمل خير مع الجيران مع الاهل مع الاقارب مع الكل ان شاء الله.. كمالة الحديث : ومن ابتدع بدعة ضلالة لا يرضاها الله ورسوله كان عليه مثل آثام من عمل بها لا ينقص ذلك من اوزار الناس شيء.. كل واحد عمل منها فعليه الوزر .. البدعة التي لا توافق الشريعة.. قال لهم احسن ما عم نقعد قوموا خلينا نقعد بالقهوة نتفرج عالتلفزيون ومناخد نفس اركيلة.. اخد رفقاته ونزل عالقهوة هي بدعة ايش حسنة ولا سيئة؟ سيئة شرب الدخان اذى والفرجة عالتلفزيون ضياع وقت والقعدة بالقهوة ضياع وقت هذا سنّ سنة سيئة فنسأل الله العفو والعافية.. ومعنى لا يرضاه الله ورسوله اي لا يشهد لها كتاب ولا سنة في الصحة.. الحديث الاخير: ان لهذا الخير خزائن ولتلك الخزائن مفاتيح فطوبى لعبد جعله الله مفتاحاً للخير مغلاقاً للشر.. طوبى .. شجرة طوبى هي لهذا الذي مفتاح للخير مغلاق للشر.. مفتاح للخير كل ما بتشوف حدن من رفقاتك ذكره بالدرس ذكره بحضور مجلس.. ذكره انه في درس يوم التلاتا وفي درس يوم كذا.. هذا مفتاح للخير.. واحد بيكون جاي عالجامع بيقول له اخي لا تروح هلق الشيخ مو موجود الشيخ مسافر.. منعه من مجلس العلم هذا قاطع طريق وهذا واصل طريق.. الله يتقبل منا ومنكم.. وصلى الله على سيدنا محمد..