نحن وصلنا لعند اية الاخلاص : (وَمَا أُمِرُوا إِلَّا لِيَعْبُدُوا اللَّهَ مُخْلِصِينَ لَهُ الدِّينَ حُنَفَاءَ وَيُقِيمُوا الصَّلَاةَ وَيُؤْتُوا الزَّكَاةَ ۚ وَذَٰلِكَ دِينُ الْقَيِّمَةِ) .. وما امروا الا ليعبدوا الله مخلصين .. الاخلاص مر معنا ان يقصد بعمله وجه الله تعالى.. حنفاء يعني مستقيمين غير مائلين ، ويقيموا الصلاة يعني من العِوج كالغفلة وغيرها ويؤتوا الزكاة تامة كاملة .. وذلك دين القيمة.. ان يقيموا الصلاة من العِوج كالغفلة عن الله تعالى.. الغفلة في الصلاة تعتبر الصلاة معوجّة بالتوجه الى الله.. بدل ان يكون مستقيم بالتوجه الى الله صار معوجّاً..ويؤتوا الزكاة يعني بلا علة ثواب ولا خوف عقاب .. بيدفع الزكاة ما مشان ياخد الثواب ولا خايف من العقاب انما ادى الزكاة امتثالا لامر الله.. كالوكيل في امر موكله.. اذا واحد موكلك شو بتملك من المال انت ؟ متل ما بيقول لك بتتصرف.. لذلك قال الله تعالى : (وَأَنفِقُوا مِمَّا جَعَلَكُم مُّسْتَخْلَفِينَ فِيهِ).. الله جعلك خليفة على المال هو الذي يتصرف وانت عليك تنفيذ ما اراد الله منك.. وسمعتُ سيدي علياً الخواص (رضي الله عنه) يقول.. انتبهوا على هالمثال .. مثال دقيق شوي بيظهر الانسان فيه نقص وهو كمال.. من اقل درجات الاخلاص ان يكون في اعماله كالدابة المحمّلة من الذهب.. اعرفوا كلمة من الذهب.. فهي تعبانة من ثقل حملها منكسة الرأس لا تعلم بنفاسة ما هي حاملة.. اديش غالي ما بتعرفه ولا بخسته اذا ما له قيمة ما بتعرف.. ولا تعلم هو لمن ولا الى اين ينتهي حملها ولا ترى لها بذلك فضلا عن غيرها من الدواب ولا تطلب على حملها اجراً.. هذا الاخلاص يلي الانسان بده يكون من اهل الاخلاص.. متل دابة حملت دهب تعبانة ودائماً راسها منحني.. معناتها اذا الله حمّلك الهداية اغلى من الذهب اذا حمّلك التوجيه والارشاد اغلى من الذهب .. اذا حمّلك الصدق والاخلاص اغلى من الذهب .. فخليك دائماً منكّس الرأس.. ما بتعرف شو عظمة هالعطاء الالهي يلي عطاك ياه.. ما بتعرف شو قيمة الذهب .. غالي رخيص ما بتعرف.. حمل تقيل.. لمين هو ؟ لوين بدها تاخده وين بدها تحطه ما بتعرف.. وانت كمان اذا تجلى الله عليك وتفضل عليك بدك تشوف هذا العطاء اغلى من الذهب بتضل منكس الرأس مستغفر تائب نادم ما بتعرف هالعطاء لمين.. ممكن العطاء يكون لواحد غريب ممكن لواحد قريب ما بتعرف.. الله افاض على قلبك عطاء لا تدري لمن هو.. لذلك ما بتشوف حالك بهالعطاء انه انا صار معي كذا وصار معي كذا.. حامل الذهب ما بتعرف لمين.. لمين بدك توصله ما بتعرف.. وبياخد عليه اجرة؟ ما في اجر.. اذاً نعود ان نقول الاخلاص ان تعلم ان العطاء من الله لا منك وان الفضل من الله لا منك..فما حمّلك لا تجد لنفسك فيه فضلاً.. هو يلي حمّلك وهو صاحب العطاء والامداد انت شو في الك؟ هذا درسنا.. ما في النا شي.. _وان الفضل بيد الله يؤتيه من يشاء).. اوعى تشوف حالك انت بعطاء او الك شي.. مثلنا كمثل الدابة يلي حاملة الذهب.. لا تطلب اجرة ولا تحس بثقل ولا تعرف قيمة يلي حاملته اذا عرفت قيمة يلي حامله اعرف مين يلي حمّلك ياه.. قيمة الهداية .. جعل الهداية في كلامك جعل التوجيه في كلامك .. مين حمّلك الهداية؟ مين جعل في كلامك قبول؟ في واحد بيحكي بيسبوه وبيقوموا مين جعلك مقبول الكلام؟ الفضل له.. فلا تشوفوا لحالكن شيء.. هذا الاخلاص.. وسمعته يقول (رضي الله عنه وارضاه) : اذا راءى العبد بعلمه وعمله حبط عمله بنصّ الكتاب والسنة، اذا راءى يعني بده يورجي حاله انه هو عالم متعلم عنده شيء.. هدفه الرياء.. الرياء ان يعمل حتى يراه الناس..اذا راءى العبد بعلمه وعمله حبط عمله بنص الكتاب والسنة.. لان رؤية العمل تحبط اجره.. هيدا خلاصتها.. تذهب الاجر.. فلا ترى لعملك عملاً.. بدك تشوف حالك دائماً انظر ماذا وضع في قلبك.. اذا اردت ان تعلم ما مكانك عند الله فانظر فيما اقامك.. شو مقامك عنده؟ انظر فيما اقامك.. اقامك في حفظ القرآن فانت اذاً من احبابه.. اقامك في التعليم اذاً انت من المقربين له.. اقامك للذكر انت من جلسائه فدائماً اشكر الله على ما اعطى وليس لك في العطاء شيء.. جينا بالزلط.. لما ولدنا بالزلط شو لابس كنت؟ ما في شي.. مين لبّسك ؟ هو.. مين انطق لسانك ؟ هو.. مين جعل النور في عينك؟ هو.. فالكل منه ليس لك شيء.. اذا كان هو المتفضل وهو المعطي فانت ما لك في هذا الوجود شيء.. فلا ترائي في عملك.. ليس الفضل لمن ظهر عليه هذا العمل ولكن الفضل من وضع فيك العمل .. (وان الفضل لله) وليس لك.. فلا تشوف حالك انت تعلم درس قرأ علّم .. اجتمعوا الناس حوله ذكّرهم.. لا تشوف حالك.. الفضل لصاحب الفضل.. اذا اراد اظهار فضله عليك خلق الفضل ونسبه اليك.. هو يلي خلق وهو يلي نسبه لك.. ما في شي ابني ما في شي.. خلي الواحد يكون على هالمعرفة هي بيعرف حاله مين انت وشو حملت مين حمّلك؟ ما في شي.. اذا بدك تشوف حالك انت شو في معك؟ شوف حالك عند الموت شو في معك؟ شو بينزلوا معه عالقبر؟ ما في شي.. هيدا انت ما في شي.. جيت ما في شي وبتطلع ما في شي.. اي طيب على ايش بده يشوف حاله؟ قالوا لبعض العلماء : ما اجل وما اعظم هذه الخطبة التي خطبتها يعني شو هالخطبة.. فقال : وايّ خطبةٍ تذكرونها؟ قالوا له يوم الجمعة حكيتها.. قال : ما تكلمتُ يوم الجمعة.. لقد كنتُ ماكثاً في بيتي ما صليت الجمعة هذه الجمعة كنت قاعد ببيتي.. قالوا: انت خطبت فينا يوم الجمعة قال : لعلها صورة من صوري.. الصورة يلي حكت ما انا يلي حكيت.. صورة ولا انت بالحقيقة.. قال لهم انا ما كنت.. لكن مين يلي حكى؟ يمكن خيالي اجا .. اما انا ما حكيت.. اخلاص ان تتبرأ من الكل.. الله الله.. قال بنص الكتاب حبط عمله اذا رأى ان له عمل حبط عمله واذا حبط عمله فكأنه لم يعمل شيئاً قط.. اذا انمحى العمل كأنه ما عملت شيء.. فكيف يرى نفسه بذلك على الناس؟ ما في شي .. شلون بدك تشوف حالك على غيرك؟ مع توعده بعد الاحباط بالعذاب الاليم.. بعدما حبط العمل له عذاب اليم.. فشلون بدك تشوف حالك.. وانت ما في عندك شي.. فليتنبه طالب العلم لمثل ذلك.. بيعرف طالب العلم هالشيء هذا؟ اليوم قرينا باب كذا.. اليوم قرينا المسألة الفلانية اليوم قرينا كتاب الفلاني.. انت قريت؟ شو حفظت؟ لا يقال ماذا حفظت يقال ماذا عملت.. الحديث يلي بتعرفوه لما قال النبي لابي الدرداء: اذا اوقفك الله بين يديه فقال لك هل تعلمت ام جهلت؟ شو الجواب؟ فان قلت تعلمت قال لك فماذا عملت فيما تعلّمت ؟ ماذا عملت .. ما المهم قرأنا مهم شو عملت .. وان قلت جهلت قال لك فما كان عذرك؟ الم ارسل لك انبياء وعلماء؟ ليش ما تعلمت؟ الحجة قائمة.. شو تعلمت؟ لا تقل ماذا قرأت ولكن قل ماذا عملت.. هذا الاخلاص.. قلت .. الامام الشعراني (رضي الله عنه) : وكذلك ينبغي للفقير .. كلمة فقير عند الصوفية يعني المريد.. المريد السالك يقال له فقير.. ليش سُمي فقير؟ سموه فقير لافتقاره الى الله.. اول فقر شو هو؟ يلي بتحتاجوه.. اول فقر واغلى فقر واخر فقر يلي بتحتاجوه ما هو؟ ان تسأل الله الثبات على الايمان.. هذا الفقر الحقيقي ان تفتقر الى الله بالثبات على الايمان.. وكذلك ينبغي للفقير المنقطع في كهف او زاوية ان يتفقد نفسه في دعواها الاخلاص.. يلي قاعد بالجامع لحاله عم يذكر الله او قاعد بخلوة لحاله اسال نفسك انت مخلص في عملك ؟ ولا قاعد مشان يقولوا : ما شاء الله حوله في خلوة في حالة ذكر.. قال : يتفقد نفسه في دعواها الاخلاص والانقطاع الى الله.. شلون بده يعرف؟ قال : فان راها تستوحش من ترك تودد الناس اليها وغفلتهم عنها فهو كاذب في دعواه الانقطاع الى الله.. بده ينقطع الى الله لكن ما في حدن عم يجي لعندي وين الاحباب وين الاخوان .. كاذب في دعوى الاخلاص ما دام عم يتفقد لهاد ولهاد كاذب في دعوى الاخلاص.. فإنّ الصادق يفرح اذا غفل عنه الناس ونسوه فلم يفتقدوه.. نحن فلان ليش ما اجا وفلان كذا.. بده دائماً يكونوا حواليه.. هذا ما اخلاص.. الاخلاص لو تركوه لحاله ما اجا بيقعد بيدرّس.. كان جامع دنكز كان يمتلئ لما درّست كان يمتلئ.. بحياة شيخنا.. لما سلّمت الشيخ الفلاني والشيخ الفلاني الله يرحمهم يدرّسوا فضي الجامع .. الشيخ قال لي: انت بتدرّس.. لما رجعت 3 الدرس كان.. ساويت درس عال3.. ال3 صاروا 30 .. ال30 صاروا 300 .. والله بارك.. فمرة شيخنا رضي الله عنه بالشتا كانت الامطار نازلة بشكل وسيول ماشية.. صار وقت الدرس.. الشيخ بينزل يا ترى ولا ما بينزل.. لبست ونزلت عالدرس.. ما في بالجامع الا 4 او 5 يلي جايين.. ما فكرنا انه الشيخ ينزل.. ما شفنا الا الشيخ فايت.. داخل ممتلئة اواعيه قال ابني الله يرضا عليكم انتو يلي جايين.. قعد عالكرسي وعمل لنا درس ساعة.. 4 نحن او 5.. جامع عم يحضر فيه 15 الف.. 5 ؟ قال ابني لو اجا واحد بساويله درس.. جلسة مخلص لله .. كتروا قلوا ما دخلك فين.. جاي علّم لوجه الله بيحضر واحد بعلمه.. هذا الاخلاص.. تعلموا الاخلاص.. الصادق قال يفرح اذا غفل عنه الناس ونسوه فلم يفتقدوه بهدية ولا سلام.. حتى ما حدا سلّم عليه.. مانه سائل سلّموا ولا ما سلموا ما حدا اجا يصطفل.. وقت الدرس بجي.. لو ما حدا اجا انا بجي.. الوقت بايعه لله.. والمريد هيك بيكون الوقت هذا بعته لله .. اي عمل كان لو الشيخ مسافر بجي.. هذا الوقت بايعه لله ما بصرفه لغير الله.. قال : ويفرح اذا انقلب اصحابه كلهم عنه واجتمعوا بشيخ اخر مرشد.. تركوه وراحوا لعند غيره.. الله يفتح عليهم ويجعلهم من المقبولين.. ما اخوانك راحوا؟ ما بزعل.. ما معلم مشان يكونوا عندي.. لذلك حكيتلكن كلمة قلت لكم الشيخ هو الذي يرفع اخوانه على كتفيه.. ما يلي بيرتفع على كتاف اخوانه.. هذا الشيخ.. ومما رواه الائمة في الاخلاص مرفوعا للنبي ﷺ قوله ﷺ الحديث : من فارق الدنيا على الاخلاص لله وحده لا شريك له واقام الصلاة واتى الزكاة فارقها والله عنه راضٍ.. رواه ابن ماجه والحاكم وقال الحاكم صحيح على شرط الشيخين (البخاري ومسلم).. معنى هذا الحديث بدنا نحفظه.. بينحفظ هذا الحديث؟ حطوا عليه : يُحفظ.. وروى البيهقي مرسلاً .. يعني ما ذُكر الصحابي في الحديث ، ان رجلا قال : يا رسول الله ما الايمان؟ قال : الاخلاص.. عم يسأله عن الايمان شو الايمان؟ قال الاخلاص.. قال فما اليقين ؟ قال : الصدق.. ان تكون صادقاً.. الصدق هو اليقين.. السؤال لنشوف انتو في اخلاص ولا في يقين؟ الله معكم؟ انتم صادقين ان الله معكم؟ اذا كنتم صادقين ان الله معكم فانتم على يقين من وجود الله معكم.. الصدق هو اليقين.. اما قال .. وين ما نروح وين ما كنا لما نفوت عالبيت لما نفوت.. (وهو معكم اين ما كنتم) فاذا كنت مؤمن بان الله معك فانت معك يقين بوحدانية الله.. اما اذا كان في شك خسر اليقين فما هو صادق.. على صدق ان الله عز وجل معنا ولا نغيب عنه طرفة عين.. (وهو معكم اين ما كنتم) جل جلال الله.. مين بيعطيني دليل ان الله معه؟ هات لشوف.. بدي دليل ملموس ان الله معك.. الدليل : ان الله معك في كل نفس.. النفس يلي عم تتنفسه منك ولا منه؟ لو اوقفلك النفس ما بقا فيك حركة.. فوجود هالنفس يلي فيك دليل انه معك.. بكل طرفة عين.. عينك يلي عم تنظر ، عم تنظر بعلمك وقوتك ولا بفضله؟ عرق ارفع من الشعرة اذا كان هزه هزة ما بقيت تشوف بعينك.. فاذاً من الذي يقوي البصر فيك؟ الله.. من الذي يحرك النفس فيك؟ الله .. من الذي يحرك الدماغ فيك؟ الله.. مين عم يحرك يدك.. هي تحريك اليد بقوتك؟ اذا بقوتك لما بينشل وين قوته؟ هات لشوف.. مين حركها.. فمنرجع ان ما من نفس تتنفسه الا ولله فيه عطاء بكل نفس بكل نظرة بكل سماع كلمة (وهو معكم) ولو غاب عنك طرفة عين لاصبحت جثة هامدة.. فالروح منه والنفس منه العقل منه والبصر منه.. شو بيطلع معك شو معكم؟ ماذا نملك؟ عم تلمسوها هي ولا لأ؟ موجودة؟ في ناس عندهم لسان لكن ما بيحكوا فيه.. معهم عين لكن ما بيشوفوا فيها.. في ناس عندهم عقل لكن ما بيعقل فيه.. مين جعل العقل برأسك؟ انت وهيداك وقف قدام المجنون شو بتختلف عنه او شو بيختلف عنك؟ خلقه كخلقك كامل بكامل.. الا انه الدماغ شوي فيه خربطة.. مين كمّل دماغك ومين خربطله دماغه؟ اعلموا ان الله معكم على كل نفس.. هذا المخلص يلي بده يعرف حاله مخلص ولا ما مخلص.. يرى ان الله معه على كل نفس من الانفاس.. وروى الحاكم وقال: صحيح الاسناد .. ان معاذ ابن جبل قال : يا رسول الله اوصني .. قال : ﷺ : اخلص دينك يكفك العمل القليل.. الكتاب نيتك.. هو الحديث : اخلص دينك .. او نيتك.. النية هي الدين كمان... يكفك العمل القليل.. رجل صلى ركعتين مخلصاً فيهما لله ورجلا قام الليل كله يصلي رياء.. ايهما افضل عند الله هذا صلى ركعتين وهيداك قام الليل كله.. هذا اخلص لله وذاك راءى.. فالمرائي في عذاب.. مع عدم قبول العمل وهذا قُبلت طاعته ..فكان سيدنا ابن عمر يقول : ليتني يتقبل مني ركعتين او تسبيحة واخسر الدنيا بما فيها.. تسبيحة.. اخلص نيتك.. النية هي الدين.. كل عمل تحتاج فيه الى نية.. هيدا لازم انتو يكون معكم طبيعة.. كل حركة بدها نية.. لا تتحرك حركة بدون نية.. من هون لجوا.. اللهم اني نويت تلاوة كتابك مع الاحباب.. من هون لجوا بتنوي.. تلاوة الكتاب.. اللهم اني نويت تعليم عبادك وتوجيههم الى محبتك.. من البيت لهون.. خطوة اذا بدك تخطي بدك تنوي.. اخلص نيتك يكفك القليل العمل القليل.. عمل قليل مع نية خير من عمل كثير بلا نية.. واحد عم يشتغل عنده عمل.. نزل عالدكان نص ساعة زمان بنية يقضي حوائج الخلق.. واحد نزل عالدكان من عبكرا لعشية ما في نية.. ايهما الاربح يلي ربحان اكتر؟ نصف ساعة بنية قضاء حوائج الخلق افضل من طول النهار عم يشتغل مشان يعبي جيبته مصاري.. هيداك لديه نية قضاء الحوائج.. كُتب له من الاجر بعدد الخلق.. ليس بعدد يلي انتفعوا.. بعدد الخلق.. لانه نوى قضاء حوائج الخلق.. اخلص نيتك.. بدكن النية تساووها معكن ورد.. كيفما تحركت بدك تنوي.. نويت نويت نويت.. اما دين او دنيا.. والواقع النية تقلب المباحات الى طاعات.. بدك تزور اخوك .. زيارة الاخ شو حكمها ؟ مستحبة.. مندوبة.. نويت زيارة اخوك صلة للرحم.. او اداء لحق الاخوة في الله.. هالزيارة هي وان كانت 5 دقايق رضي الله بها عنك واذا كان راح وقعد عندن ساعتين وتلاتة واكل وشرب ودار ضهره ومشي ما كُتِب له شيء.. النية.. لذلك احدث عند كل عمل نية.. هذا المؤمن يلي بده ينتبه للحياة.. كل عمل بده نية.. يا رسول الله اوصني.. قال : اخلص نيتك يكفك العمل القليل.. ما هو اخلاص النية؟ ان تكون النية لله.. ليس لك فيها حظ ولا مصلحة ولا غاية تكون لله.. يلي رايح يزور اخوه لله والله بعت له الملك على طريقه.. وين رايح؟ قال له : ازور اخي في الله.. قال له: هل لك عنده مصلحة؟ بدك مال او شي ؟ قال : ابدا الا انني احبه لله.. قال : ان الله ارسلني ابشرك بان الله رضي عنك او احبك لحبك لاخيك.. بالنية.. ﷺ وروى البيهقي مرفوعاً .. عم يجيب الادلة على الاخلاص.. طوبى للمخلصين تنجلي عنهم كل فتنة ظلماء.. طوبى لها معنى هنيئاً، ولها معنى الشجرة التي تحت العرش.. شجرة طوبى تحت العرش سعة السموات .. هذه الشجرة لاهل الاخلاص.. طوبى للمخلصين يعني يأوون تحتها يوم يقف الناس تحت الشمس.. طوبى للمخلصين.. شو صفتن؟ اولئك مصابيح الهدى.. يا الله.. مصباح ومصباح ومصباح جمع مصابيح.. هلق وين المصباح عنا هون؟ هذا مصباح.. اليس مصباح هذا اسمه؟ المصباح يطرد الظلام.. يطرد ظلام المكان.. اما هؤلاء يطردون ظلام القلوب.. مصابيح الهدى .. مصابيح الهداية.. شو بيخرج معنا بدل الهداية؟ بيخرج معنا غير الهداية فهي ظلام.. اذا كان توجه الى قلب اذهب عنه الظلام فنوّر القلب بنور الله اهتدى الرجل الى مرضاة الله.. اولئك مصابيح الهدى تنجلي عنهم كل فتنة ظلماء.. اصبنا بالفتنة و ظلماء؟.. الله وين اكرمكم؟ تنجلي عنهم.. شو تأثرتوا بهالفتنة؟ الحمد لله.. تنجلي؟ تنجلي عنهم كل فتنة.. هذا الاخلاص.. جاي عالجامع بدك الله.. الشيخ مفتاح من مفاتيح الوصول الى الله.. يلي بيجي لعند الشيخ ما جاي لعند الشيخ مشان جسمه ما جاي مشان عيون الشيخ وشفة الشيخ.. جاي لهداية الشيخ.. فالشيخ هو مفتاح الوصول بينك وبين الله.. فاذا عرفت الشيخ انه مفتاح الوصول جاي اذاً لله.. ما جاي للشيخ.. جاي طالب الله ما جاي طالب الشيخ.. يلي جاي مشان الشيخ اذا كان الشيخ تعب ما بقا يجي اذا الشيخ مرض ما عاد يجي.. اما جاي لله.. الشيخ موجود منحكيلكن عن سيدنا الشيخ يوسف الهمداني (رضي الله عنه وارضاه).. قال لاخوانه : لا تظنوا ان الشيخ معكم ان غاب الشيخ عنكم فهو معكم لا يترككم.. قالوا له : وكيف؟ الشيخ غايب وهو معكم.. نعم.. فكان لسيدنا الشيخ يوسف الهمداني صفة خاصة بين اولياء الله كان يظهر متى شاء ويغيب متى شاء.. يكون قاعد معهم عم يحكي ما يشوفوه.. يكونوا قاعدين عم يحكوا يشوفوه بيناتهم.. شو هالحال هذا.. الشيخ لا تظنه غاب .. روحانية الشيخ لا تفارق المريد.. لو المريد تذوق هالحلاوة هي لرأى الشيخ معه في كل حال.. هي حال من حالة اهل الله (رضي الله عنهم وارضاهم) في كل لحظة المريدين بلغوا 100 الف مريد.. كان سيدنا الشيخ احمد الرفاعي (رضي الله عنه) كان يحضر في درسه 80 الف مريد.. فواحد سأل الشيخ قال له : هيدول اذا كان غابوا عنك شلون.. قال : والله ما غاب عني واحد منهم.. 80 الف هم في صحيفتي كل واحد بأشّر عليه بيصرله الفتح على حسب.. انا بجيب هالمثال.. الشيخ متل يلي قاعد على لوحة السنترال .. بتعرفوا السنترال الشيخ محمد.. السنترال تبع التلفونات لوحة فيها 300 تلفون.. قاعد وحاطت السماعة بودنه.. اتصل الاول بيوصله الخط.. اتصل التاني بيوصله الخط.. التالت بيوصل الخط.. عم يوصل الخطوط هو وقاعد.. 300 واحد عم يوصلهم وهو قاعد.. هذا محسوس .. اما في الروح اكتر من هيك.. 300 الف اذا كانوا موجودين يوصلهم وهو قاعد.. وتظنه قاعد وهو عم يشتغل وانت منك عارف.. فسّر الاية سيدنا الامام الجنيد (رضي الله عنه وارضاه) قول الله : (وترى الجبال تحسبها جامدة وهي تمر مر السحاب صنع الله الذي اتقن كل شيء.) بتشوف الشيخ قاعد كأنه جبل والحقيقة عم يطوف على قلوب اخوانه وانت مانك حاسس.. وليس هناك بين الشيخ وبين الاخوان بعد.. الروح ليس فيها بعد.. ذكرتها اليوم ان الاثير يطوف على الكرة الارضية كم مرة بالثانية ؟ 7 مرات.. واما الروح تطوف الكرة الارضية كلها بالثانية كم مرة؟ 17 مرة.. لذلك الله يرضى عن شيخنا ذكرنا عن سيدنا الشيخ امين (عن والده) قال : يا ابني بتغميض العين يطوف الكونين.. الدنيا والاخرة بتغميضة العين.. هذا يا ابني حال من احوال الشيوخ..فاذا كان دائماً رابطتك بشيخك معك لما تقوى الرابطة في اخوان يستأذنون الرابطة وبيطلع الاذن صحيح بيعمل كذا؟ نعم.. من جملتهم في اخ مسيحي في لبنان جابوه لعندي عنده مطبعة وعنده غنى يعني ما شاء الله عشق الاسلام فأسلم وجاب اولاده فأسلموا اولاده ومع زوجته كمان اسلمت زوجته.. لما اسلم هو وعائلته اهله منعوه من كل شيء حرموه من كل الاموال.. وهذا حق .. بين دينين ما في توارث.. قطعوه عن كل شيء.. اجا لعندي قال لي : اهلي حرموني من كل شيء.. بدي اسألك سؤال في اذن استعمل الرابطة في اعمالي؟ قلت له مأذون. بالرابطة اجا على باله يشتريله دولارات بشتري؟ اشتري.. اشترى دولارات.. بيع باع.. اشتري اشترى .. بالرابطة.. انا ما عندي خبر.. هو.. فيوم من الايام هو وقاعد عم يذكر شاف الشيخ عم يقول له هلق قوم اشتري 500 الف دولار.. هلق.. 500 الف؟ نزل للبنك وقف 500 الف دولار.. اشترى الدولار يوميتها ب15 و20 قرش.. قاعد عم يذكر.. يومين تلاتة اربعة بعد اسبوع ارتفع الدولار.. هو وعم يذكر قوم بيع قوم بيع.. باع ب62 ونص.. اجا لعندي قال لي: بيطلعلك انت عندي نسبة.. قلت له الله يبارك لك بكل النسبة.. خليلي ياهم معك.. والله اغناه ورفعه .. مسيحي اسلم.. لكن سبحان الذي خلقه واعطاه جبلي اكتر من 10 خوارنة عالبيت بده يدخّل الخوارنة في الاسلام.. في منهم وقع في شك.. وغالباً بدن يأسلموا ما في مجال.. فهذا يا ابني الواحد اذا قويت رابطة الشيخ مع الاخ يستطيع يستعملها في كل احواله وتعطيه حق ؟ نعم.. الروح لا تكذب.. بس يكون على رباط.. ناحية تانية ان يكون مع الرباط مقيّد بشرع.. موافقة للشرع ؟ بسم الله .. ما في موافقة للشرع نوقف.. هذا يا اخواني .. طوبى للمخلصين اولئك مصابيح الهدى الهداية مثلها كمثل المصابيح.. الانسان بيجي لعند الشيخ بيجي مظلم اعمى لا يعرف الحلال من الحرام.. فالشيخ بالهداية يفتح له عيونه يحيي له قلبه يكشف له الظلمة فيرى الحقائق في الحياة.. كلمة الشيخ يا اخواني ليست معروفة لدى الناس.. بيفكروا الشيخ انه له دقن ولف لفة وعنده كم كتاب يقرأه .. اما الشيخ رباطه بسيدنا رسول الله تقيده بشرع الله مشيه على صراط الله هي ما عرفها الا النادر القليل.. طوبى للمخلصين اولئك مصابيح الهدى تنجلي عنهم كل فتنة بفضل الله بتوفيق الله .. اللهم لا مانع لما اعطي ولا معطي لما منعت كل ما حصل بهالسنتين تلاتة بفضل الله في حدن منكم اصيب بشيء؟ في احد منكم تعسرت عليه حياة؟ بفضل الله عز وجل قاعدين تحت خيمة الله.. خيمة ذكر الله في حماية الله.. الحمد لله.. صدق رسول الله تنجلي عنهم كل فتنة ظلماء.. صلى الله عليك يا رسول الله.. سر الاخلاص سر غريب.. اليوم عندكم الاحاديث في الاخلاص.. وروى البيهقي مرفوعاً ان الله تبارك وتعالى يقول : ان خير شريك جل جلال الله فمن عمل عملاً اشرك فيه غيري فهو لشريكي وانا منه بريء.. شلون تشرك فيه الغير؟ قاعد عم تذكر ماسك المسبحة ومغمض عيونه عم يذكر.. حس انه في حدا دخل من الباب وهو عم يذكر.. زادها شوي مشان يشوف انه زاد.. هذا راءى فخرج من الاخلاص.. اشرك مع الله.. عم تذكر الله.. شو دخل هيدا يلي دخل تحرك حالك وتتحرك زيادة مشان يشوفك؟ هذا شرك.. خاطر مرق على قلبه انه في واحد دخل ممكن يكون الشيطان هز له الباب وحس انه دخل حدا فبيتحرك هالحركات هذا راءى فخرج من الاخلاص الى الرياء اشرك مع الله غير الله.. بالصلاة الله اكبر .. الله اكبر.. الله اكبر من الحزن والهم والضيق والشدة والبلاء والمصائب والفقر ... اذا قلت الله اكبر ما بقا في حدا.. اذا قلت الله اكبر واجا لبالك انه والله فلان بيقضيلنا هالشغلة.. متى ما صليت بدي روح عند فلان ليقضي لنا هالشغلة.. انت مشرك.. مشرك في الصلاة اشركت.. انا خير شريك فمن عمل عملاً اشرك فيه غيري خطر ببالك غير الله هذا شرك في الصلاة.. لذلك المصلي بده يتفرغ قلبه للصلاة.. بده يفرغ قلبه يفرغ تفكيره يفرّغ ميوله ما في بالوجود الا واحد وهو الله.. الله اكبر.. ان صلاتي ونسكي ومحياي ومماتي لله رب العالمين.. لا شريك وبذلك امرت وانا اول المسلمين.. ﷺ اول المسلمين في عصره واول المسلمين الى اخر العالم.. نحن نقول اول المسلمين ولا من المسلمين؟ عند العلماء وانا من المسلمين .. اما اذا قال وانا اول المسلمين.. اول المسلمين في بيتي.. اول المسلمين بالصف اول المسلمين في الحي.. فبياخد الاولية بيطبق الاية.. طيب فهو لشريكي وانا منه بريء.. يا ايها الناس اخلصوا اعمالكم لله فان الله لا يقبل من الاعمال الا ما خلص له.. العمل المخلص لله هذا يلي الله يقبله.. ونبّه ﷺ.. ولا تقولوا هذا لله ولوجوهكم.. انه انا والله اخي كرمال خاطرك جيت لعندك .. قال فانها لوجوهكم وليس لله منها شيء.. انت مانك جاي لله.. يقول والله انا جاي كرمال خاطرك .. والله وين صفي؟ نسي الله.. كتبلك جاي بس لعند اخوك.. اما اذا جاي تزوره لوجه الله .. جاي لله ما مشان خاطرك.. وفي رواية تانية : ولا تقولوا هذه لله وللرحم.. قرايبيني .. القرايب لله .. لكن مشان خاطركم جيت لعندكم فانها للرحم وليس لله منها شيء.. العمل لله وحده.. بدنا نجي نحضر الدرس.. مرة في حياتي سألت نفسي مشان انتو تنتبهوا.. كنت في سعيد باشا بدي انزل للدرس درس التلاتا درس شيخنا بعدما لبست ليش نازل؟ شو نيتك بالنزلة يعني نازل احضر الدرس مشان فلان موصي على غرض فلاني ومشان فلان اوف .. يخرب بيتك .. شرك بالدرس؟ انا نازل لله مشان احكي مع فلان وشوف فلان وشوف .. اي ما في نزلة اليوم.. ممنوعة من النزلة.. الدرس بيقعد ساعتين.. ساعتين ضرب 4 ثمان ساعات .. بتضلك 8 ساعات قاعدة للذكر .. 8 ساعات ما بتتحركي.. عم تدخلي بالنية؟ والله صليت فرض العشاء وقعدت على الركب.. قعدة وحدة لادان الفجر.. لما اجريّ تقطعت.. والله لو بتتقطع ما بتتحركي.. تأديب مرة تانية شو النية؟ لله وحده.. صليت الفجر وذكرت وفتت نمت.. انا في المنام رأيت امرأة مزينة بكل انواع الزينة وانا في المنام لا اله الا الله قلت المرأة في المنام هي الدنيا.. وانا بالمنام عم فسر المنام انه هذه هي الدنيا اقبلت عليّ قالت لي يا حرام عليك.. يعني تلطف شوي بهالمخلوق قلت لها يخرب بيتك لو ما تكوني شيطانة متل حكايته ما غرتي عليه.. وعزة ربي وانا في المنام والله يا ابني.. وعزة ربي يا بيقعد ادمي يا بدوبه متل ما بيدوب الملح بالمي.. انطفت وراحت خلص ما عاد بيّن شي.. وين نازلة؟ للدرس لوجه الله.. في حدا بدك تشوفيه؟ لله.. حتى ما يدخل النية وحدة تانية.. لما يكون نازل عالدرس مشان في بيني وبين فلان .. ما بوعد واحد بالدرس.. مشان اذا نزلت ما يكون في لقاء بحدا.. يكون خالصاً لوجه الله.. هي بتنتفعوا فيها انتو.. يعني بعد فضل الله يلي مر معنا بحكيلكن ياه لحتى تنتفعوا.. فالنية .. النفس في القلب.. لكن دخل الها مشان فلان وفلان هلق بشوف فلان.. نزل من اجل الله ودخّل مع النية لفلان وفلان.. هذا الشرك.. قدي بدكن تنتبهوا يا ابني ما يكون الشرك.. فهو لشريكي وانا منه بريء.. نازل عالدرس مشان فلان وفلان .. بريء ما لك مع الله بشيء.. لا تقولوا هذا لله وهذا لوجوهكم فانها لوجوهكم وليس لله منها شيء ولا تقولوا هذه لله وللرحم فانها للرحم وليس لله منها شيء. هي كلنا منعملها.. بيزوره بيقول له والله انا جاي مشان خاطرك.. مشان خاطري ولا لله جاي؟ مشان خاطري اذاً ليس لله خسر الثواب كله مشان هالكلمة.. يقول له انا جاي لله احببتك لله جاي جالسك لوجه الله.. شو معنى لوجه الله جاي انتفع في ديني شي نصيحة او تذكرة او وصية انتفع بها في ديني.. هي لله.. لا اله الا الله.. الاحاديث بتقروها كتير لكن ما تقولوا عم دقق عليكم انا لا هذا الواقع.. النية لله فقط.. لا تدخلوا فيها احد لا للرحم ولا لوجوهكم ولا مشان خاطرك ولا مشان ابدا .. رايح يزور بيت عمه لله.. رايح يصل الرحم بركي بشوف بنت عمي كمان.. رايح يشوف بيت عمه لله لكن بركي بشوف بنت عمه .. دخل ؟ دخلن النية دخل الشرك.. لذلك بيروح ما بيشوفها وخسر النية.. انتبهوا لهالناحية هي.. هي كتير بتصير في الحياة.. بتحب اخ التقيت انت وياه احبك لله .. بس جاي لعندك مشان متضايق شوي اذا فيك تساعدني شوي .. شرك ولا؟.. دخل .. اخلصوا نيتكم لله.. اخلص نيتك يكفك العمل القليل.. (صلى الله عليك يا سيدي يا رسول الله).. اليوم نحن مع النبي ﷺ ما مع المشايخ .. اليوم ما الشيخ عم يحكي.. حكالنا كيف لازم يكون الاخلاص وعم يجبلنا حديث النبي ﷺ وفي رواية لابي داوود وغيره باسناد جيد مرفوعاً : ان الله لا يقبل من العمل الا ما كان خالصا ً وابتغي به وجهه.. انا لح جيب هلق مثال.. انا لا اشرب الماء الا اذا كان الاناء صافياً.. صح؟ لما بيكون الاناء صافي بشرب الماء.. واذا كان الاناء معكر؟ ان الله لا يقبل من العمل الا ما كان خالصاً اما اذا كان داخل فيه نية تانية فهذا غير مقبول.. مزبوطة الكاسة؟ انا ما بشرب من كاسة وسخة.. الله بيقبل العمل اذا كان فيه شريك لغيره؟ بدنا ناخدها نطبق حياتنا على الحديث.. لا يقبل من العمل الا ما كان خالصا طاهرا نقياً وابتغي به وجهه .. وجه الله فقط.. والواقع اخواني.. خلينا نقيم كل شي متل ما بيقولوا حطهن على جنب.. خلينا نحكي الواقع يا ابني.. اللهم لولا انت ما اهتدينا ولا تصدقنا ولا صلينا.. والله لولا الله ما اهتدينا.. فاذا كان الله وحده هداك ليش لتدخل معه غيره؟ هون في بعض الناس بيوقعوا في بعض الشك.. انت تقول الله الهادي وبيده ملكوت كل شيء فشو دخل الشيخ بقا؟ حتى ما يدخل فيكن بعض الاشكال.. فنقول : كل ما دلك على الله فهو من الله وكل ما اوصلك لله فهو من الله.. في خلاف بقا؟ فلو ماشي في الطريق واجا ولد عمره 5 – 6 سنين.. اطلع فيك وقال لك : اتقِ الله.. قبّل يده فهذا من الله.. دلّك على الله.. طفل قال لك اتق الله.. ما دلك على الله فهو من الله.. فلذلك كل من دلك بدك تقدره ان هذا وصلك الى الله .. فهو مما يوصلك الى الله.. هذا جسر.. الشيخ يا ابني جسر بتمشي عليه حتى تصل لشاطئ السلام.. والا نهر الدنيا مخيف.. نهر الدنيا وشهواتها وملذاتها واغواءها وفتنها ومحنها نهر عميق هلك فيه الكثير.. فالشيخ جسر تطأ على هالجسر حتى تصل الى دار السلام.. فمنقول الجسر شرك؟ نقول هو الموصل.. عم تفهموا الامثلة هي ؟ الله يوفقنا واياكم.. لا يقبل من العمل الا ما كان خالصاً وابتغي به وجهه.. فكل ما يدلك عليه فهو منه .. وكل ما يعرفك عليه فهو منه .. من الله .. موصل الى الله.. رسول الله بشر .. لكن الله جل وعلا امر الصحابة بمحبته.. (ان كنتم تحبون الله فاتبعوني يحببكم الله) ما بتحب ما حبيت الله.. فحب الاخ لله لله.. وحب الشيخ لله فهو تقرب الى الله.. فهيدول مساكين الله يهدينا الوهابين بيقولوا حبوا الشيخ هذا شرك قاموا للشيخ هذا شرك.. مشان تعرفوا شلون الجواب كل ما دل على الله فهو من الله.. حتى بعض اهل الله رضي الله عنهم وارضاهم.. قالوا : لو كنت ماراً في طريق فرأيت شجرة مثمرة والاولاد يضربوها بالاحجار مشان تنزل الثمر فاخذت مثال من هذه الشجرة تقول لك : كن مع الله عز وجل مثلي : يضربوني بالاحجار واعطيهم الثمار.. فالشجرة استاذة توصلك الى الله.. لذلك سيدنا الشيخ محي الدين اساتذته بالالاف .. شاف المزراب اتخذه استاذ .. مزراب مي مطر نازلة والمزراب عم ينزل فسمع المزراب يقول له : يا محيي الدين اعتبر بي.. قال له : بشو بدي اعتبر؟ قال : انا اجمع الماء ثم اصبها الى الارض.. فانت اجمع الحكم وصبها في قلوب الخلق.. مزراب؟ نعم.. استاذ.. الساعة؟ استاذ.. تقول لك انظر اليّ بعقلك.. انا بضبط الثواني والدقائق.. فان كنت تحب الله فاضبط الثواني تبعك والدقائق على محبة الله.. فالساعة استاذ.. الكاسة استاذ.. تقول لك : لما طهرتُ وملئت الماء قُدّمتُ الى احباب الله.. فانت اذا طهر قلبك وامتلأ بنور الله تتقرب الى الله.. كل شي في الكون يدلك على الله .. ما دام رفعت حجاب الانا بتشوف كل الكون بيدلك على الله.. ما في ذرة بالكون الا وتدلك على الله.. هذه الورقة تدل على الله.. هالورقة للطباعة طبع فيها كلام رسول الله وكلام الله فتقول لك اذا استسلمت لله طبعت فيك حكم الله.. كن مستسلم لله.. فكل شي في الكون يعطيك مثال.. بس الله يجعلنا في قلب نحسن ناخد هالامثلة من الكون كله لنتقرب بها الى الله.. واما الميل الى المال والدنيا فالنبي قال : الدنيا ملعونة ملعون ما فيها الا ما ابتغي به وجه الله.. ملعونة يعني مطرودة.. شو هي الدنيا؟ في ناس بيظنوا العمل في ناس بيظنوا المال في ناس بيظنوا المرأة.. بيقول لك: ما دخل دنيا لسا.. يعني لسا ما تزوج.. الدنيا هي المرأة عنده او المال .. لا يا ابني.. لا المرأة ولا المال .. الدنيا ما شغلك عن الله.. بدك تذكر.. هذا الوقت وقت الذكر بدك تذكر لكن تذكرت ان شعرك ما مسرح.. وقفت على المراية عم تسرح شعرك.. هي الدنيا تبعك شغلتك عن ذكر الله.. هي الدنيا.. تذكرت ان الصباط تبعك وسخ بدك تنضفه تركت الذكر وقعدت تحطله بويا هي الدنيا تبعك.. الدنيا تبعك صباط شغلتك عن الله.. رفيقك قعدت انت وياه شغلك عن ساعة الذكر.. هي الدنيا تبعك.. المؤمن لا يُشغل ساعة الذكر للذكر.. لو بتقوم الساعة ساعة الذكر قائم فيها.. الدنيا ملعونة مطرودة من رحمة الله ليش؟ لانها تشغل عن الله.. سيدنا عثمان كان صاحب دنيا؟ جهز جيش العسرة لحاله.. رضي الله عنه وارضاه.. كان صاحب دنيا ؟ لا.. عبد الرحمن ابن عوف كان صاحب دنيا؟ لا.. لو كان صاحب دنيا كان النبي قال له طالع مالك .. لكن اجمعوا فانتم كنز للاسلام.. بغزوة تبوك بينوا.. هذا جاب 100 جمل والتاني جاب 200 جمل والتالت.. جهزوا الجيش كله.. فاذاً ليست الدنيا المال وليست الدنيا النساء وليست الدنيا الاعمال.. انما الدنيا ما شغلتك عن الله ولو كانوا شعراتك.. شغلوك بدك تجي عالدرس هات لنتسرح.. ضليت واقف عالمراية 10 دقايق وانت عم تتسرح هي الدنيا تبعك.. وقت الدرس لله ما في شي يشغل.... سيدنا الشيخ امين رضي الله عنه كان صايبه برقة مبروق بضهره ما عم يحسن يتحرك.. قاعد بالتخت.. الاطباء يا سيدنا ريح حالك. صار وقت الدرس قال لهم يا ابني حطولي القبقاب عالباب كانوا يلبسوا القباقيب.. يعني حطوا الشحاطة عالباب.. خير.. حطوها عالباب.. ما شافوا الا مسك اللحاف ونطّ نطة واحدة لبس القبقاب ونزل عالدرس.. مبروق ما عم يحسن يمشي.. نزل الدرس خلص الدرس قال لهم نحن شفاءنا بالدرس.. فز من الدرس ما في شي.. هذا لله.. هي الشغل.. لا اله الا الله.. رضي الله عنهم وارضاهم.. الدنيا ملعونة ملعون ما فيها الا ما ابتغي به وجه الله.. طيب مناخد الحديث الاخير ومنخلي الباقي للدرس الجاي.. روى البيهقي مرفوعا عن عبادة ابن الصامت قال : يجاء بالدنيا يوم القيامة فيقال : ميزوا ما كان منها لله عز وجل فيمتازوا ويرمى ما عداه في النار.. ما كان لله حطوهم عجنب والباقي كله في النار.. فشوف اعمالك كم واحد فيه لله وكم واحد لغير الله؟ يلي لله هيدا الناجي والباقي كله في نار جهنم.. اي بيطلع اكتر ؟ لله ولا للحياة والدنيا؟ دنيا ما في.. انتو مجالسين الشيخ بفضل الله دنيا ما في.. بدنا نحول الدنيا الى آخرة.. كيف بتتحول؟ بالنية.. انوي النية الصالحة.. بدك تاكل بدك تاكل وهذا مباح لكن اذا نويت فيها التقوي على طاعة الله صار عبادة.. بدك تنام؟ النوم نوم.. طاعة النوم ما في.. اذا نويت بالنوم التقوية على طاعة الله وعبادة الله صار النوم عبادة وطاعة.. تقربت به الى الله.. اذاً في الدنيا ما في شي للدنيا.. كلها لله.. واذا كلها لله فانتم من اهل الاخلاص واسال الله ان يتقبل مني ومنكم وان يجعلنا من المخلصين.. والنتيجة من رأى نفسه من المخلصين كان من المرائين ومن رأى نفسه من المرائين كان من المخلصين.. هي النتيجة انه اذا بتشوف حالك مخلص اخلاصنا يحتاج الى اخلاص.. وصلى الله على سيدنا محمد والحمد لله رب العالمين..