عندما يعرف ادلتها وموادها واقوالها ويقف على ام الكتاب الذي يتفرع منها كل قول فيشتغل من يريد الاخلاص في اعماله بذكر الله عز وجل حتى ترق حجب بشريته.. بذكر الله بيرق حجاب البشرية .. البشرية حجابها غليظ.. البشري جسد.. من الميول والاهواء والشهوات والاحزان والافراح كلها حجب.. فبذكر الله يرق الحجاب.. ويدخل حضرة الاحسان التي يعبد الله تعالى فيها كأنه يراه.. هذا روحانية الاخلاص .. ان يرق حجاب البشرية حتى يصير ممن يعبد الله كأنه يراه.. وهناك .. اذا حصّل على هالرقة هي .. يشهد العمل كله لله تعالى خلقا لله تعالى عز وجل.. ليس للعبد فيه مدخل الا كونه محلاً لبروز العمل لا غير.. يعني الانسان ليس له من العمل شيء (والله خلقكم وما تعملون).. خلقك الله خلقك وعملك الله خلق العمل فأنت فقط مظهر ليظهر فيك العمل.. محل يظهر فيك العمل فقط اما الفضل من الله والعمل من الله والتوجيه من الله والتوفيق من الله.. فاياك ان ترى لنفسك عملاً.. فاذا ذكرت الله فرق حجابك لا يشهد العمل الا انه خلقاً لله تعالى.. الله عز وجل خلق الانسان وخلق اعماله.. كل الاعمال مين خلقها ؟ الله تعالى.. مين وفقك لهالعمل؟ الله جل وعلا مثلا خلق الطين .. الله خلق الانسان يشتغل طيان يطيّن الحيط.. مين وفقك انت تشتغل طيان؟ الله.. فانت اذاً مظهر لهذا العمل.. ما تقول انا الطيان قول الله يلي اختارني صير طيان الله اختارني صير كاتب الله اختارني صير عالم.. الاختيار فضل الله .. انت مظهر للعمل.. منجيب مثال هالكاسة مظهر للماء.. بتحطو مياه صافية بتطلع صافية.. بتحطوا عرق سوس بيطلع ماء ملون.. بتحطوا تمر هندي بيطلع ماء بني.. حسب ما بتحط فيها بيظهر.. فانت متل هالكاس.. يلي عم يحط مين؟ الله.. والملون مين؟ الله.. فانت عم بتبين هاللون.. معناتها اوعا تشوف حالك بعمل.. هي النقطة يلي اهل الله امتازوا فيها عن اهل العلم.. اهل العلم بيقول لك درسنا وقرينا ودرّسنا الكتاب الفلاني وقرينا وكذا وساوينا.. نحن كله نحن انا وانا.. معناته قل بفضل الله .. الله الهم الله وفق الله علم الكل .. الكل منه.. منرجع دائماً اذكروا قصة شيخ منه.. كله منه كله منه.. وهذا حقيقة.. اذا بدنا نرجع لحقيقة الامر هذه الحقيقة.. ماشي بالطريق واحد عطاه رغيف خبز كله منه.. مشي شوي واحد ضربه كف.. كله منه.. من اين لك هالرغيف؟ قال من يلي ضربني كف.. المعطي واحد.. نحن ايماننا لا اله الا الله اله واحد خالق رازق معطي مانع.. بدك تشوف ان المعطي الله والمانع الله والمحيي الله والمميت الله.. هذا بيخلي الانسان دائماً في راحة.. والا مثلاً مرض ابوه اخده عالمستشفا توفى.. بده يقيم دعوى عالاطباء عالممرضين ما اعتنوا فيه.. اعتنوا ولا ما اعتنوا .. (لا يستأخرون ساعة ولا يستقدمون).. فالمؤمن يرتاح لما يشوف الكل منه.. كله منه كله منه.. بتعرفوها هالقصة؟ ما بتعرفها.. الشيخ احمد ما بيعرفها.. هذا كان بالصالحية.. رجل مبارك من الصالحين اسمه منه.. وين ما مشي ينادولوا شيخ منه شيخ منه.. يحط بجيبته سكاكر يلحقوه الولاد شيخ منه طعمينا شيخ منه طعمينا يعطي هاد سكرة هاد سكرة.. الولاد تعودوا عليه يلحقوه.. شيخ منه طعمينا.. طعمينا.. واحد من اهل الحي منافق يظهر ليس بمؤمن.. سمع عن الشيخ كله منه كله منه والله لاحرق نفسه واخلص منه.. راح ساوى كبي قرصين كبي حشاهم سم مع اللحمة.. خلي يقول كله منه لشوف.. شيخ منه قال له : حبيتلك قرصين كبي قال له هات كله منه.. حطن بالجيبة.. ما مشي شوي ولدين لحقوه شيخ منه طعمينا .. سحب قرصين الكبي وعطا لكل ولد قرص.. هالولاد عم ياكلوا ما وصل لنصل القرص انتفخ واندحش بالارض .. الولدين ماتوا.. ركضوا الناس ولاد مين هيدول ولاد مين؟ ولاد فلان.. دقوا عليه الباب .. تعى شوف ولادك .. اجا شاف كل ولد بيده قرص كبي الكبي هو مساويها شو جابن لولاده؟ هو عطاهن للشيخ منه.. ترك ولاده بالارض وركض عم يدور عالشيخ منه.. لك شيخ منه انا عطيك قرصين كبي شو عملت فيهن؟ قال له : كله منه كله منه.. لحقوني ولدين طعمتين ياهن.. طلع كله منه ولا؟ الكل منه.. فهذا المراد اذا الانسان عمل عملاً لا يجد العمل منه.. شوف الفعال هو الله.. يلي الهمني ادرس المشيخة مين؟ الله.. مع انه شفت عوائق كتير.. مشايخ منعوني ادرس.. والله عملولي جلسة يا ابني ساعة او ساعة ونص.. صحيح مصدق حالك بدك تصير الشيخ؟ لك اي نحن ما مصدقين امتى نقيم اللفة ونحلق الدقن.. واحد قال لي: لو بصير كارسون بالملاهي.. التاني قال لي ما مصدق امتى قيم اللفة ولو بصير شوفير.. الاولاني قام اللفة وصار كارسون بالكاباريات.. يقدم كاسات العرق للنسوان.. التاني صار شوفير.. انا الله عز وجل اكرمني صرت شيخ.. مين الفعال؟ هو.. هذا اختار هيك انا اخترت يلي الله عز وجل وفقني له.. لذلك من كرامة ذكر الله عز وجل يرقق حجاب البشرية فيرى انه مع الله في كل حال فعند ذلك يشهد الفعال واحد.. لغير الذاكر ما بتصير.. غير الذاكر يقول لك اخي شو نحن قاعدين بخيمة كذا.. عم نشتغل وعم نجيب وعم كذا.. اب عم يمن على ابنه قال له : لك يا ابني لو ما انا طعميتك لو ما انا كسيتك لو ما انا شو كان صار فيك كانت الكلاب سحبتك.. قال له يا بابا لا تمن عليّ فلست برازق انما انت مناول .. الرزاق هو الله.. انت مناول للرزق.. الرزاق هو الله ليس انت.. المتفضل هو الله.. هي صفة من صفات الذاكرين اصحاب الصفاء الذي يصل الى مقام الاحسان ان ترى ان الله معك كأنك تراه فترى الفعال هو الله. هي واحدة.. قال لان الاعمال اعراض.. الوان.. والاعراض لا تظهر الا من جسم.. اللون بده جسم.. حتى يظهر عليه.. في تفاح احمر وفي تفاح اصفر.. في موز اخضر في موز اصفر.. اللون بده جسم يظهر عليه.. فالاعمال اعراض .. الاعراض الوان .. والاعراض لا تظهر الا من جسم.. وهناك يظهر للعبد الرياء والكبر والعجب.. متى ما شفت الفعال هو على ايش بدك تشوف حالك بقى؟ ما بقا انا ساويت كذا وفعلت كذا.. الفعال هو.. خلص من الرياء خلص من العجب يشوف حاله بالعمل.. يلي وفقك هو ويلي الهمك هو.. فبيخلص العبد من الرياء والكبر والعجب وسائر الافات التي هي من الكبائر النفسية لان هذه الافات انما تجيء للعبد من شهود كونه فاعلاً لذلك العمل.. العبد شاف حاله انه هو عم يعمل هالعمل.. من هون بيجي العجب والكبر والرياء.. مع غفلته عن شهود الخالق له.. غافل ان الله هو الرازق هو المعطي هو .. غفل فشاف حاله هو يلي عم يعمل.. عملنا وجبنا وعطينا ودفعنا.. وفعلنا.. بيشوف دائماً انه هو الفعال .. بالحقيقة منك فاعل شي.. هلق لح جبلكم مثال.. واحد ماشي في الطريق او انا بالجامع قاعد فات واحد عالجامع سب الشيخ وشتم وذكر عبارات سافلة.. بعد شوي اجا واحد مدح وكرّم وعز ورفع.. مين بعت الاول ومين بعت التاني؟ لما بتشوف انه هيدا هو جاي عم يسبلك بدك تردله بدك تسبه صرت ناقص متله اذا سبيته متل ما سبك صرت ناقص متله.. فشو الفرق بين الايمان وغير الايمان.. ويلي مدحك ان صدقته بيكون ما فيك عقل.. انه مدحك بما ليس فيك.. انت ادرى بنفسك من يلي مدحك.. فليش هذا تسلط وليش هذا اجا.. الاول اتى فشتم لانه انسان مذنب وعاصي.. متى ما امتلا كيله الله بده ينتقم منه.. فسلطه عليّ ليمتلئ كيله والله ينتقم منه والله يغفر لي بمسباته.. ويلي مدح الله بده يزيده اكرام.. مدحني حتى الله يغفر له.. فهذا حتى الله يغفر لي وهذا حتى الله يغفر له.. فاذاً الفعال مين؟ لا انا مدحت ولا انا ذميت.. الدرس العام سمعتوها مني.. لو كلياتكم مدحتوني وكان في شوية غبرة عالطاقية بتروح؟ لا.. ولو كلكن ذميتوني والطاقية بيضا تتلوت ؟ اذاً لا مدحك بيزيد ولا ذمك بينقص.. يلي سلطه الله حتى يغفر لي ذنوبي.. سألوا الامام ابو حنيفة (رضي الله عنه) بعد الموت قالوا له ما فعل الله بك؟ قال : غفر لي.. بإيش؟ قال : بقول الناس فيّ ما ليس فيّ.. حكوا عليّ شي ما موجود فيّ فالله غفر لي.. اذاً كلام الناس نعمة ولا نقمة؟ شايفين ما احلا حياة اهل الله؟ ما بيتاثر من حدا ولا بيزعل من حدا ولا حدا بيزعل منه.. الله يرضا عن سيدنا الشيخ عبد القادر القصاب.. من كبار اولياء الله كان ماشي في النبق واذ واحد عم يسبه هيك هيك بدقنك يا عبد القادر هيك هيك كذا.. عم يسب.. الشيخ ماشي ولا كأنه في حدا.. واحد من الاخوان قال له: سيدي فلان عم يسب كذا شو عم يسب يا ابني.. قال له ما في غيري اسمه عبد القادر؟ عبد القادر كتار.. بركي عم يحكي لغيري.. ولا كأنه حصل شيء.. هذا حالة الذاكر لله .. هذا الذكر ابني.. اما يذكر ويسب هذا ويشتم هذا .. هذا ما عرف الذكر .. اذاً الذكر ما هو تحريك مسبحة .. الذكر تشهد ان الله هو الفعال لما يريد.. هذا حالة الذكر.. لذلك قال هذا حصلت هالافات معه لكونه فاعل لذلك مع غفلته عن شهود الخالق له.. انفهمت العبارة الاولى؟.. ومعلوم انه لا يصح الرياء والتكبر والعجب من العبد بعمل غيره ابداً.. بتشوف حالك بعمل غيرك انت ؟ لا.. بتتكبر على غيرك بعمل غيرك؟ لا.. فلما شفت حالك انت العامل وقعت في العجب.. والعجب يحبط الاعمال.. لما كان العمل منك تكبرت على غيرك.. انا ذكرت انت ذكرت؟ انا ذكرت اكتر منك.. متكبر.. هذا من نفسه.. اما من غيره ما حدا بيشوف العجب من غيره.. انت عملت بشوف حالي على يلي عمل انا؟؟ منكن وعيانين.. انت الله وفقك وكنست الجامع.. بشوف حالي انا بهالتكنيس؟ بقول انا كنست؟ لكن لما انا بكنس بشوف حالي انه انا كنست الجامع فلذلك قال العمل لا يكون الرياء ولا يكون التكبر والعجب من العبد بعمل الغير ابداً.. لكن بعمله.. لما هو عمل هو بيتكبر هو بيشوف حاله.. وما رأينا احداً نام الى الصباح واصبح يرائي او يعجب او يتكبر بفعل جاره القائم طوال الليل .. جارك طول الليل قائم الليل عم يقرأ قرآن وانت طول الليل نايم .. لما بتفز الصبح بتقول والله انا قمت طول الليل ؟ ما بيشوف حاله.. لذلك بتشوف حالك بعملك.. فاذا صار في عجب معناتها انت شايف حالك بعملك.. شو سببه ؟ نسيت الله.. ان الفعال هو الله.. الله الملهم الهمك الذكر ذكرت الهمك التلاوة تلوت.. الهمك العمل عملت بفضل من الله.. حطوا الطعام قالوا له تعى كول قال لهم والله ما في قابلية.. بعض اوقات ما بيقولوك بتقول اخي انا جوعان هاتوا الاكل.. مين حط فيك الشهية ؟ بتقول مني؟ ليس منك بل منه.. اذاً العبد الذاكر فاني عن وجوده.. باقٍ بربه.. سيدي محمد سلام عليكم.. العبد الذاكر هذا بيطلع معنا.. الله الفعال لما يريد..قال فعُلم ان من لم يصل الى دخول حضرة الاحسان ويشهد اعماله كلها خلقاً لله تعالى كشفاً ويقينا لا ظنا وتخميناً فهو معرض للوقوع في الرياء ولو حفظ ألفي كتاب.. الفين كتاب قرأ.. لما شايف حاله انه هو فعال معناتها مرائي.. مرائي ولا لست مرائي؟ العمل منك او منه؟ اذا شايفه منه لست مرائي اذا شايفه منك انت مرائي.. نقطة كتير هامة في الحياة ما بينتبه لها الا اهل الله.. الرياء يحبط الاعمال والعجب يحبط الاعمال.. انتبهوا لذلك كل عبارة من العبارات لها مدلولها.. فعُلم ان من لم يصل الى دخول حضرة الاحسان.. شو الاحسان؟ ان تعبد الله كأنك تراه.. تشوف الله قبل كل عمل.. بدك تشرب.. هلق لاحظتوا هلق لما اخدت شفة سعلت شفيت شفة من غير ما قول بسم الله.. تشردقت.. مرة تانية بخنقك فيها.. نسيت بسم الله؟ بدك تذكر الله عند كل واحدة.. فكل واحدة بتلاحظ دائماً الله هو الاول بكل عمل هو الاول والاخر والظاهر والباطن.. جل جلال الله.. فعُلم ان من لم يصل الى دخول حضرة الاحسان ويشهد اعماله كلها خلقاً لله تعالى.. الله خلق الاعمال ؟ نعم. الله قال في القرآن : (والله خلقكم وما تعملون) خلقك وخلق العمل وهيّأك للعمل وارشدك للعمل.. طالع واحد طبيب واحد مهندس واحد تاجر.. فضله.. واحد يا رسول الله .. انتبهوا يلي حكى للنبي (ص) يا رسول الله لو ان الله خلق الخلق كلهم على عمل واحد ما كان يعني احسن؟ فقال (ص) : لو ان الناس تساووا هلكوا.. نذكر فيها قصة سيدنا موسى وقد ورد عن سيدنا موسى صلوات الله وسلامه عليه كان في قرية فقراء.. فسيدنا موسى حنّ عليهم قال : يا رب لو اغنيت هذه القرية.. فقال الله تعالى : يا موسى اني عليم بخلقي.. بفقرهم بغنيهم انا عليم فيهم.. يا رب اغنيهم يا رب اغنيهم فاغناهم الله.. الطيان باع العدة مشان ايش بقى صار في مال.. النجار باع العدة ما عاد يحتاج للنجارة صار في غنى.. اجت شتوية قاسية نزلت الامطار دلف السقف تبع سيدنا موسى والبلاليع انسطمت.. ركض لعند الطيان الله يرضا عليك قال له والله يا نبي الله تركت الصنعة من سنة.. بعت العدة.. المي تعبت.. والله تركت الصنعة من سنة التاني تركت الصنعة.. شو تركت الصنعة؟ مين بده يشتغل بالبلوعة مين بده يشتغل بالطينة؟ مين بده يشتغل.. دخيل الله.. قال يا رب ردهم الى ما كانوا عليه.. ما مشي الحال.. فلذلك الحديث (ص).. بمعنى الحديث ان الله خلق الناس متفاوتين فلو استووا لهلكوا.. اذاً ترتيب الله كل واحد لشيء.. هيدا بجهد ولا بفضل؟ لا تفكر منك.. كله منه .. بدك تساوي حالك استاذ منه.. التاني بده يساوي حاله معلم .. منه.. قبلك بيساويك ما قبلك.. اذا اراد الفضل منه.. لذلك المؤمن في راحة.. ما شاء الله كان وما لم يشأ لم يكن.. المؤمن دائماً في راحة يفعل ما يشاء.. لا معقب لحكمه .. جل جلال الله.. هي حالة الذاكر يا ابني.. لذلك بتلاقي الذاكر دائماً عايش في هناء وبساطة وسرور دائماً ما بيزعل.. تجارة راحت منه.. اجا فلان اخدها منك.. مكتوبة له ما مكتوبة لك.. واحد عم يركض يشتغل واجا التاني اخد المرابح كلها مكتوبة له ما مكتوبة لك.. لقمة الخبز عم تغمسها بدك تاكلها اندق الباب واحد بيعز عليك بتناوله اللقمة بتحطله ياها بفمه.. هي غمستها ليس لك بل له.. لذلك آمنوا بأن الله يفعل ما يشاء.. سلّم.. سلّم تسلم.. قال بيصير يشهد اعماله كلها خلقاً لله تعالى كشفاً ويقيناً من طريق اليقين لا ظنا وتخمينا.. انه يمكن هيك ويمكن .. لا.. يقين.. بأن الخلق منه قال فهو معرض للوقوع في الرياء ولو حفظ الفي كتاب.. شلون بدك تصل لهالمقام؟ قال فاطلب يا اخي شيخاً صادقاً ان طلبت الترقي الى مقام الاخلاص.. ولا تسأم من طول طلبك له فإنه اعز من الكبريت الاحمر.. الكبريت الاحمر الياقوت.. اعز من الياقوت.. الياقوت انواع في ياقوتة بتسوى 10 قروش.. في ياقوتة اد منها بعشرة مليون .. الياقوت جماله وغلاوته بصفاؤه.. كلما كان اصفا كلما بيكون اغلا.. لذلك بيمسكها بيحطها تحت الناضور اذا فيها سحبة غيم ناعمة بترخص.. بدها تكون صافية.. حطيت الشعرة وراها بتشوفها.. فالشيخ بهالايام اعز من الكبريت الاحمر اعز من الياقوت.. يمكن الياقوت تلاقي ويمكن الشيخ ما تلاقيه.. فانه من اقل شروطه التورع عن اموال الولاة.. اقل شرط ما بيقبض من الولاة مصاري.. الوالي كان يكرم الشيخ مشان الشيخ يدعيله.. على مذهب الشيخ يلي طلع عالبدو قال لهم شيخ وامام وخطيب.. يا هلا بالخطيب.. في عشيرة ابراهيم وعشيرة موسى وعشيرة محو.. 3 عشاير.. فالشيخ يقرا بسورة سبح اسم ربك الاعلى .. صحف ابراهيم وموسى.. الله اكبر.. اجا له محو جايب بيده الدبسة (دبوس بيسموه كلها هيك شوك) .. شو ابراهيم وموسى؟ وين محو.. ؟؟ قال له هذا قرآن .. قرآن ما قرآن ما بعرف.. محو .. ما في محو بهاي على راسك بضربة واحدة.. فصار يقرأ بالقرآن .. صحف ابراهيم وموسى ومحوو.. الله اكبر.. والا شو في.. بالدبوس على راسه.. فهذا ابني عايشين على اموال الولاة.. الشيخ ما بيمد يده.. الله يرضا على سيدنا ابو حنيفة.. كان رجله فيها تعب كان يمدها لما يدرس .. فالوالي بعت له مبلغ.. انه هذا عطوه خلي يتصرف فيه.. قال له ابني ردن له وروح احكيله قل له يلي بيمد اجره ما بيمد يده.. هي ابني.. فلذلك عليكم بهالشيخ هذا اذا في شيخ.. فانه اعز من الكبريت الاحمر فانه من اقل شروطه التورع عن اموال الولاة.. 2 وان لا يكون له معلوم في بيت المال.. ما يكون له وقف .. الحمد لله ما في وقف.. ولا مسموح ولا هدية من كاشفٍ .. ولا شيخ عرب ولا شيخ بلد بل يرزقه الله تعالى من حيث لا يحتسب.. اكتر الاحباب عم يدخلوا في شك في هذه الاية.. شلون "يرزقه من حيث لا يحتسب" ؟ اذا شل ما في شلون يرزقه؟ الك رزق في الحياة؟ مين المتكفل برزقك؟ الله.. عالم فيك؟ نعم .. بيبعتلك رزقك.. والله صارت عندي كما انني متقين بوجودكن صارت عندي يقين.. ما في شيء من اربع ايام وان كان امر خاص لكن تيقنوا ان الله عز وجل لا ينسا.. الله عز وجل يرزقه من حيث لا يحتسب ويستخلص له الحلال الصرف من بين فرث الحرام ودم الشبهات.. (من بين فرث ودم لبناً خالصاً سائغاً للشاربين).. فالله عز وجل بينقيله من بين فرث الحرام ودم الشبهات بيجبله اللقمة الحلال الطيبة بيطعميه ياها.. مدلل على الله.. ذاكر لله.. والا فقد اجمع اشياخ الطريق كلهم على ان من اكل الحرام والشبهات لا يصح له اخلاص في عمل.. مهما حاول يخلص لا يمكن.. الاصل اللقمة الحلال .. ما يكون فيها شبهة.. تجوز او لا تجوز؟ حلال ولا غير حلال ؟ اتركها خلص.. ما دام وقع في شك بين الحلال والحرام خلص حرام اتركها.. فهؤلاء ابناء الذكر يا ابني .. الاصل الاخلاص.. ليش قال : لانه لا يخلص الا اذا حضر حضرة الاحسان.. ما بيصير له الاخلاص الا اذا دخل حضرة الاحسان.. ولا يكون في طريق الاحسان الا اذا كان اشتغل بذكر الله.. ذكر الله بيوصل لمقام الاحسان ان تعبد الله كأنك تراه.. مقام الاخلاص بيوصل للاحسان .. ولا يدخل حضرة الاحسان الا المطهر من سائر النجاسة الباطنة والظاهرة.. اذا كان واحد ملوث بالنجاسة بتصح صلاته؟ اذا كان قلبك ملوث بالنجاسة شلون بدك تدخل؟ قال عطاء الله السكندري (رضي الله عنه وارضاه) كيف يشرق قلبٌ صور الاكوان منطبعة في مرآته .. الغفلة جنابة شلون بده يدخل الى حضرة الله؟ ام كيف.. الحاصل مني مذكرها.. بتجي معنا لسا ان شاء الله.. ام كيف الى الله وهو لم يتطهر من جنابة غفلاته.. الحاصل.. فالمراد 3 اشياء انتبهوا : اللقمة الحرام تمنع الانسان من الاخلاص واذا ما في اخلاص لا يدخل الى حضرة الله لا يصل الى مقام الاحسان ولا يدخل حضرة الاحسان الا المطهر من سائر النجاسات الباطنة والظاهرة لان مجموع اهل هذه الحضرة حضرة القرب والاحسان مين مجموع اهل الحضرة؟ انبياء وملائكة واولياء.. هيدول من اهل الحضرة وهؤلاء من شروطهم العصمة والحفظ من تناول الحرام والشبهات.. ما كل واحد بيصف الصواني بيصير حلواني.. الفضل فضل الله.. معصومين او محفوظين من تناول الحرام والشبهات.. فكل شيخ لم يصح له الحفظ في نفسه فهو عاجز عن توصيل غيره الى تلك الحضرة.. اذا هو ما وصل شلون بده يوصل غيره؟ اللهم الا ان يمنّ الله تعالى على بعض المريدين بالجذب دون السلوك المعهود فلا مانع منه.. ممكن بعض المريدين بيصرله حالة جذب .. حالة الجذب بالنسبة للمريدين نادرة.. المريد بيكون سالك لكن ما عنده فراغ للسلوك ليتعلم او يتخلق.. فبتجيه جذبة الهية جذبة تجذبه من المعاصي الى المحبة.. متل ما حصل مع رضي الله عنه وارضاه الشيخ يلي كان بالمهاجرين.. شو كان اسمه.. الحارون.. رضي الله عنه وارضاه امّي كان لا يقرأ ولا يكتب.. زكرت من هالزكرتية.. كان يحافظ على سيدنا الشيخ محيي الدين.. ف اجته جذبة من جذبات اهل الله صار على اهل.. سيدنا الشيخ امين الزمركاني الله يقدس سره .. ما كان عالم كان تاجر له محل بالبزورية.. سكر المحل والله اكرمه جذبة الهية.. خرّج العلماء والاولياء.. جذبة.. ممكن تصرله جذبة للمريد.. لكن ايهما اكمل الجذبة او السلوك؟ السلوك اكمل.. المجذوب ما بيحسن يسلّك.. اما السالك يسلّك.. الحاصل.. فعُلم انه يجب على كل طالب علم لم يصل الى الاخلاص ان يتخذ له شيخاً يعلمه طريق الوصول الى درجة الاخلاص.. من باب ما لا يتم الواجب الا به فهو واجب.. فبدك شيخ.. بلا شيخ لا يصل ولا يحقق الوصال .. اسال الله ان يتقبل منا ومنكم .. امتا نحن بدنا نمشي؟ 6.. لكن بس لالبس واجي بس .. مشان بدنا نعزي بالشيخ صالح فرفور اظن .. عبد اللطيف فرفور.. الله عز وجل يغفر لنا ولكم.. قليل تؤدي شكره خير من كثير لا تطيقه.. الى ان يتكرم الله لنا بالجلسة التانية ان شاء الله.. هلق شو الخلاصة اخدناها؟ اللقمة الحرام عكسها اللقمة الحلال تودي الى الاخلاص .. الاخلاص يودي الى مقام الاحسان.. مقام الاحسان ان تعلم ان الله معك حيثما كنت.. الله يوفقنا واياكم ويرضا علينا وعليكم.. وصلى الله على سيدنا محمد والحمد لله رب العالمين..