لح نتجاوز العناوين ونبدأ بتعريف الحج. الحمد لله رب العالمين . معنى الحج يعني القصد. حج الى مكة يعني قصد مكة. حج الى البيت يعني قصد البيت. معنى الحج يعني القصد هذا في اللغة. وفي الشريعة زيارة مكان مخصوص في زمن مخصوص بفعل مخصوص. هذا الحج. زيارة مكان مخصوص وهو مكة وعرفات. هذا المكان المخصوص للحج في زمان مخصوص اشهر الحج شوال ذو القعدة و10 ذو الحجة . بفعل مخصوص بنية واحرام لاداء مناسك الحج. الحج هو الركن الخامس من اركان الاسلام. اركان الاسلام خمسة الشهادتين والصلاة والصيام والزكاة والحج. قال الله تعالى : (وَلِلَّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلًا). فرضية الحج الحج فرض عين على كل مسلم بالغ مالك لمال يكفيه ذهابا واياباً . ما دام عنده مال يكفيه روحة ورجعة وبيكفي عياله فرض عليه الحج. فحكمه فرض. ويكفر الجاحد. انه واحد انكر الحج فهو كافر. قوله تعالى (وَمَنْ كَفَرَ) يعني ترك فرضية الحج (فَإِنَّ اللَّهَ غَنِيٌّ عَنِ الْعَالَمِينَ). الحج فرض في العمر مرة واحدة. المرة التانية والتالتة هيدا نفل. اما الفرض فهو مرة واحدة. لما سئل النبي ﷺ قال : الحج مرة فمن زاد فهو تطوع. ولما ثبتت الاية القرآنية وثبت الحديث الاجماع اجماع الامة اخذوا بالاية والحديث اجمع علماء المسلمين ان الحج فريضة. لكن اختلفوا هل هو على الفور ام على التراخي. القول الاصح ان الحج على الفور لمن ملك. اما مانه مالك على التراخي. واحد هلق بيملكله 200 الف فرض عليه الحج. اما واحد ما بيملك غير 30 الف الحج معه لحتى يحصّل على المال. المال ما فقط ليطلع عالحج ويرجع بده يطلع معه مال يكفيه بالسفر روحة رجعة . بالسفر وهونيك اجار البيوت واجار الخيم واجار بده يكون عنده ما يكفيه. اذا ما في معه ما يكفيه ما وجب عليه الحج. في واحد بيتدين مشان يطلع ما بيجوز. لانه الله ما فرض عليه حتى يصير معك. لمن استطاع. ما استطاع ما وجب عليك الحج. والعلماء بضعهم قال على الفور وبعضهم قالوا بل على التراخي. يا ترى فرض عليّ هالسنة اطلع؟ ما دام معك مال لا تتأخر لانّ الفريضة دائماً يجب ان يأتي بها الانسان مباشرة. ما بتعرف شو بيصير معك بكرا بتقدر تحج ما بتقدر تحج. النبي ﷺ كان يقول: تعجلوا الى الحج فإن احدكم لا يدري ما يعرض له. ما منعرف بيصير مخالفات سياسية بيمنعوا الحج بيوقفوا الحج ما في عندك استعداد ما في سيارات اذا صار معه لا يتأخر الواحد. فمن استطاع اليه سبيلا يعني فليبادر. فإذاً اجمع الفقهاء ان العجلة في الحج افضل لقول الله تعالى (وَعَجِلْتُ إِلَيْكَ رَبِّ لِتَرْضَىٰ ) اما تأخير الحج على التراخي هذا قول من اقوال العلماء ولهم بذلك سنة ونسأل الله ان يتقبل منا ومنهم جميعاً. ثبتت فرضيته بالكتاب والسنة بالاجماع اما الكتاب فقول الله تعالى في سورة ال عمران (وَلِلَّهِ عَلَى النَّاسِ حِجُّ الْبَيْتِ مَنِ اسْتَطَاعَ إِلَيْهِ سَبِيلًا وَمَنْ كَفَرَ فَإِنَّ اللَّهَ غَنِيٌّ عَنِ الْعَالَمِينَ) هذا كلام رب العالمين. ومن كفر يعني ترك فرضية الحج فهو كافر والله غني عنه وعن امثاله. وقال الله تعالى (وَأَذِّن فِي النَّاسِ بِالْحَجِّ يَأْتُوكَ رِجَالًا وَعَلَىٰ كُلِّ ضَامِرٍ– يعني كل بعيد مسافر على بعير مهزول - يَأْتِينَ مِن كُلِّ فَجٍّ عَمِيقٍ * لِيَشْهَدُوا مَنَافِعَ لَهُمْ ) هذا اصل الحج. شهود منفعة بتروح عالحج حتى تنتفع بالحج. ويذكروا اسم الله في ايام معلومات وهي ايام منى. فهون الحج ليشهدوا منافع لهم. الآن ما حدا بيحب ياخد منفعة. المنفعة هي منفعة ايمانية دينية. الناس ظنوها منافع دنيوية. هذا بيطلع بيشتري تلفزيون هذا بيطلع بيشتري فيديو.. انه هي منفعة.. هنيك ارخص من هون بيحمل. طلعنا مع اخوان في الحج اول ما بيدأ الواحد بيبدأ بالحرم. سبقونا هني اظن بين 4 او 5 ساعات. نحن نزلنا انا رايحين على الفندق مشان نحط غراضنا ونرجع ننزل .. شفته حامل على كتفه وجاي.. شو ؟ قال لي والله لقطة لقينا تلفزين لقطة. نزلت.. لسا ما صلى. دغري راح اشترى التلفزيون وجاي. هيدا رايح يحج ولا يتاجر؟ فالمنفعة في الحج منفعة دينية. ان يمتلئ قلبه من هيبة الله وجلال الله . خاصة اذا وقف في عرفات قالوا : عرفات موضع تعرف فيه عظمة الله. بالمية 80 من الحجاج يلي بيطلعوا معنا لما نوقف بعرفات يرون السماء قريبة منهم في منهم يقول : والله لو مديت ايدي كنت مسكت السما. بيشوف السما يعني هي هيبة وجلال يجدها الحاج في عرفات. فعرفات لمعرفة الله سبحانه وتعالى. معرفة فضل الله كرم الله رحمة الله.. بينتقل من عرفات الى مزدلفة. مزدلفة الازدلاف والقرب الى الله. يزداد قربا الى الله في مزدلفة حيث يقف فيقوم بالدعاء والتوجه الى الله فيزدلف القلب ويتقرب من الله. ثم يتجه الى مِنى وفي منى يبلغ مناه . ما يطلبه من كل شيء الله يعطيه اياه في منى. ومنى عليه الصلاة والسلام قال : ايام في منى ايام اكل وشرب وذكر الله تعالى. ايام ذكر كلها. فهيدا الحج هيك بكرا بتطلعوا اذا الله اكرمكن بالحج بكرا بتشوفوا بتستغربوا مطالعين معهم الاركيلة مطالعين معهم تلفزيون مطلعين معهم الفيديو على عرفات طالع عم يشرب اركيلة ويتفرج عالتلفزيون. طالع سيران. الله يهدينا. واما في السّنّة فقد خطبنا رسول الله ﷺ فقال : ايها الناس ان الله كتب عليكم الحج فحجوا. فقال رجل أفي كل عام يا رسول الله ؟ فسكت. ما رد عليه. ثم عادها تاني مرة: افي كل عام يا رسول الله؟ سكت النبي ولم يرد. تالت مرة افي كل عام يا رسول الله؟ فالنبي قال : لو قلتُ نعم لوجبت. ولما استطعتم. لو كل سنة بدك تطلع عالحج ما ممكن ما استطعتم. لو قال نعم لوجبت انه كل سنة بدك تطلع ولما استطعتم. معناها صار في كل سنة في معصية. ترك الحج كل سنة. لذلك قال في كل عام يا رسول الله؟ قال لو قلت نعم لوجبت لكن يكفيك في العمر مرة. صلى الله عليه وسلم. الحج مرة فمن زاد فهو تطوع. واما اجماع الامة على فرضية الحج انه ركن من اركان الاسلام. اجمعت الامة بجميع اطيافها ومذاهبها وفئاتها ان الحج فرض على كل مسلم ومسلمة. فهو ركن من اركان الاسلام. فُرض الحج سنة 9 من الهجرة. بعدما هاجر النبي ﷺ 9 سنوات فُرض الحج. قبل ما كان فريضة. كان عادة العرب يطلعوا. مرة يعملوا موقف في مزدلفة مرة يعملوا موقف في منى مرة في عرفات.. فلما نزل الحج عيّن المواقف عيّن عرفات في الموقف وعيّن مزدلفة للدعاء وعيّن منى للذبائح. فالاسلام فرض الحج في السنة التاسعة. ﷺ حج بعد الهجرة حجة واحدة ﷺ حج سنة 10. فُرض سنة 9 فحج النبي ﷺ سنة 10. الواحد بيسأل ليش النبي ﷺ حج مرة واحدة بس؟ مشان يعلمنا. مشان يعلمنا. هلق المشايخ كل سنة بيطلع عالحج. اذا في دعوة الدعوة ركن فرض والحج سُنة. لو فرضنا هون عنده كم يتيم قائم بخدمتهم. بيخدم الايتام ولا بيطلع حج النفل؟ خدمة الايتام افضل من حج النفل. حاجج حجة الفرض معه مصاري بده يطلع. لكن في واحد تقي وصالح ما في عنده بيت نقول له بدل ما تطلع عالحج اشتري له بيت. حج النفل. اما ستر هذا الانسان فرض. هذا افضل من حج النفل. ابن المبارك (رضي الله عنه) من اكمل اهل السلف الصالح (رضي الله عنه) كان لما يطلع عالحج ياخد اهل بغداد معه. يطلعوا مع الشيخ يعني. وحجة بلا الشيخ ما بتساوي شي. اذا طلع عالحج اذا ما معه شيخ الحجة بتطلع فالصو ما بيطلع له من الحجة ولا عشرها.. فقاعدين كانوا لما يطلعوا معه كلهم يجمعوا النفقة معه. قديش بتكلف الحج مثلا 50 الف طلع معه 50 واحد . 50 واحد ب50 الف مليونين ونص. بيجمعوهن، بيشتريلهم خبز وجبن وكل ما يحتاجه المسافر يحملوا عالجمال ويمشوا. بعدما طلع من بغداد 12 يوم 13 يوم مروا بالصحرا ماتت معهم دجاجة. في منهم اخد معه دجاج كانوا يدبحوا ويطبخوا دجاج بالطريق. ماتت معهم دجاجة رموها واذ بامرأة بالبرية اطلعت ما في حدا اخدت الدجاجة وخبتها تحت العباية وراحت. شافها عبد الله ابن المبارك. قام هو راح لعندها ليحكيها قال لها يا اختي انت شو اخدتي معك؟ قالت له اخدت الدجاجة. قال لها هي ميتة. قالت له : نحن اهل بيت احلت لنا الميتة. انا وزوجي واولادي صرلنا 4 ايام ما اكلنا طعام. فنحن حلال انه ناكل الميتة. ما عم تاكلوا ما في اكل؟ ابن المبارك قال لهم وقفوا. جاب الخازن تعى لهون اديش معنا بالخزنة قال له معنا مليونين ونص. قال له خليلنا نفقة توصلنا لقلبنا نرجع للبلد. والباقي كله اعطيهم لهالمرأة. الطعام والاكل والمال اعطيهم لهالمرأة. يا سيدي والحج ؟ قال له ما في حج هالسنة. يلي بده يحج ياخد نفقته ويروح. انا راجع عالبلد. نحن مع الشيخ رجع رجعوا معه. عطوها المصاري وعطوها المونة والاكل وعطوها. اخدوهن يعني. رجعوا. صارت الناس تحكي انه ما مقبولين والله ردهم وكذا.. قال لهم : ما حدا يرد على الناس. نحن عملنا مع الله. رجعوا الحجاج . لما رجعوا الحجاج اول ما اجوا عند ابن المبارك . حج مبرور يا سيدي تقبل الله يا سيدي. قال لهم ما طلعت عالحج. قالوا بلى والله يا سيدي ما انت يلي دعيتنا حول الكعبة ؟ ما انت يلي دعيتنا في عرفات والله انت. لك يا ابني والله ما طلعت. واحد قال له : اقسم بذات الله انه والله انت يلي دعيتنا. قاعدين معك.. وعملتلنا درس على كذا وعلى كذا.. تحيّر .. وكان معك فلان وفلان وفلان.. اخوانه. بعت ورا فلان وفلان.. يا ابني شو؟ قالوا والله اجوا كمان عم يقولولنا انه حج مبرور شافونا بالحج. قال لهم اتركوها لله. ليلتها من كتر ما بكي عم يقول له يا ربي شو الموضوع؟ ما طلعت كلن عم يقولوا حجيت رأى ملكا نازلاً من السماء في المنام يقول له يا ابن المبارك لما انفقت لهذه الفقيرة المال ورجعت ما سألت على كلام الناس وطعنهم وحكيهم الله عز وجل غفر لك ولكل من كان معك وغفر للحجاج بسببك وخلق الله ملائكة على صورتك وصورة اخوانك يحجون عنك الى يوم القيامة. كل سنة بيحجوا عنك الى يوم القيامة. اي طلعت اغنى ؟ الحجة ولا ؟... هي الاكرام. فالحاصل يا احبابي. هي المنفعة غفر الله له ولاخوانه وللحجاج.. ف صلى الله عليك يا رسول الله. اجمع الفقهاء على ان الحج فرض فُرض في السنة التاسعة من الهجرة وحج الرسول ﷺ بعد الهجرة مرة واحدة سنة 10. لما سألوا سيدنا انس خادم النبي ﷺ كم حجة حج النبي ﷺ ؟ قال حج مرة واحدة واعتمر 4 عمر. 4 عمرات . العمرة يلي افتتح فيها مكة ﷺ. وعمرتين تلاتة بعدها اما الحجة مرة واحدة.
فوائد الحج.
للحج فوائد عظيمة واثار كبرى تعود بالخير العميم والنفع الجليل على الفرد والجماعة. اهم فوائد الحج التي تعود على الافراد : الحج برهان عملي من المؤمن على انه مفضّل حب الله تعالى على ماله واهله وعمله. اي اغلى عليك؟ الله ولا اولادك؟ الله ولا شغلك؟ بيترك شغله واهله ليطلع على الحج هذا يثبت انه محب لله تعالى . عم يتحمل مشقة السفر وخطر الطريق تلبية لدعوة الله تعالى. الحج عزيمة الهية. تيقّن عزيمة ربانية. لما الله بيعزمك بتترك الكل وبتمشي. ما عاد في بقلبه شي بيترك الكل وبيمشي. عزيمة الهية. واذا ما عازمك ما بتحسن تطلع. الله عز وجل يدعوك. لما سيدنا ابراهيم بنى الكعبة قال له يا رب بالصحرا مين بده يجي عالصحرا؟ الله قال له عمّر. (واذ يرفع ابراهيم القواعد من البيت واسماعيل) رفع البيت. لما انتهى قال : نادي بالحج. صحرا. بين جبال.. وين.. قال عليك النداء وعلينا البلاغ. فنادى يا مخلوقات الله يا عباد الله ان الله يدعوكم الى الحج فحجوا. فالنبي قال : فلبّت الرجال والنساء والاطفال في الارحام والاطفال في اصلاب الرجال وارحام امهاتهم. كلهم لبوا. فمن لبّى مرة حج مرة ومن لبّى مرتين حج مرتين. ومن لبّى اكثر حجّ اكثر. فعليك النداء وعلينا البلاغ. فالله عز وجل نادى من يريد الى بيت الله الحرام.
2- في الحج تعويد للحاج على الصبر تحمل الشدائد ومفارقة الاولاد والاهل. بيترك وبيطلع. ولاده بيحبهم . اطلع. في بعض الحجاج طلعنا عن طريق البر لما وصلنا للاردن واحد معنا من لبنان اشتاق لولده بده يشوف ابنه بده يشوف مرته ما بقى يحسن يقعد. لك يا ابني طالعين عالحج طوّل بالك رجع من الاردن للشام الى لبنان قعد مع مرته وولاده يوم ورجع اجا عالاردن. قلتلو اذا بدك تحج بدك ترجع بكرا من عرفات يعني؟ ما عاد حسن يقعد. فلما عرفناه انه شو الحج انقلب لحب الله ونسي الكل. حج وانتهى لما خلّص الحج اشتغل الشوق للبيت. وهذا ورد انه ما دام انتهى الحج ما دام نزلوا من عرفات في ملك بالسوط الى بلادكم الى بلادكم يلا. بيشتغل الشوق للمرا وللولاد انه يلا على بلادك ما استنى لحتى.. نزل على جدة دغري قطع ونزل دغري. لا اله الا الله. ففي صبر ليش يا اخوان. الاسلام تربية الاسلام بده يربي الرجال على البطولة ان لا يكونوا منقادين لشهوة. ان لا يكون الرجل عبد هواه. بل عبد لله. عمل له بالشهر 7 ايام الى 10 ايام المرا نايمة قدامه وحرام ان تتقرب اليها. (وَيَسْأَلُونَكَ عَنِ الْمَحِيضِ قُلْ هُوَ أَذًى) الك والها (فَاعْتَزِلُوا النِّسَاءَ فِي الْمَحِيضِ ) بكفي واعتزلوا. قال (وَلَا تَقْرَبُوهُنَّ حَتَّى يَطهُرْنَ) في المذهب الحنفي. ( حَتَّى يطّهرنَ) في المذهب الشافعي. شو الفرق بين يطهرن ويطّهّرن ؟ يطهرن ما دام طهرت من الحيض وشافت القصعة البيضاء ما دام دخل في عنقها وقت صلاة وبتحسن كانت تتغسل وتصلي ما تغسلت وصلت في المذهب الحنفي لا ينتظر الرجل. يقربها وان لم تغتسل. هذا حتى يطهرن. طهرت. رأت القصعة البيضاء شرط ان يدخل في عنقها وقت صلاة. يعني بتحسن تصلي ما تغسلت ولا صلت. فلا ينتظر . اما عند الشافعي يقول له ابدا. اوعى. لا يجوز ان تتقرب حتى تغتسل. لذلك في بعض الفقيهات بتملك زوجها بتقول الصلاة انا بقضيها لكن بدي احرق قلبه. ما تغسلت ما لحقت اتغسل.. والرجل قاعد عم يستنى اول يوم تاني يوم ممنوع حتى تتغسل. ابو حنيفة قال له ليش عم تنتظر؟ اسحبها من راسها تعي لهون رضي الله عنهم وارضاهم. الحاصله تعويد الرجال على ملك نفسهم. فإذا نزل للمعركة ما انوجد اكل بدك تعوّد حالك عالخشونة قل الطعام ما في زوجة بدك تصبر كل ذلك تعليم وتاديب من الله سبحانه وتعالى حتى يتدرّب المسلم على الرجولة.
وفيه تقوية للايمان تهذيب النفس تكفير السيئات فالمؤمن يتفرغ فيه للعبادة. انه طالع ما في عنده شي. ما في عندك الا العبادة والطاعة. بيروح عالمدينة المنورة بدك تصلي الخمس صلوات في الجامع. 8 ايام ب 5 = 40 صلاة . 8 ايام بدو يصلي في الجامع. هذا في المدينة ما في غير زيارة النبي ﷺ . اما في مكة عندك الطواف ما بدك تطوف بتقعد بتطلع بالكعبة النظر الى الكعبة "ان الله ينزل كل يوم على الكعبة من 120 رحمة" 60 للطائفين و40 للمصلين و20 للناظرين. يلي بيقعد بيطلع عالكعبة في له 20 رحمة يلي بيصلي له 40 ويلي بيطوف له 60. لا اله الا الله. لما الحج بده يروح الى الحج بده يدخل الى مكة وهو محرم. الاحرام بالقرعة ما في شي على راسه لا قميص ولا لباس فوطة فوق وفوطة تحت فقط. ما بيصح يلبس فوق . فوطة فوق وفوطة تحت وقرعة وحافي. يتشبه بموقف يوم القيامة. تحشرون يوم القيامة حفاة عراة جل جلال الله حتى يتذكر موقف يوم القيامة موقف عرفات بيجتمع مليونين – تلات ملايين عم يصل ل4 مليون. كله كله مكشوف الراس حافي الرجلين. ان حط طاقية على راسه مقدار صلاة بده يدبح خروف. ان لبس برجليه ساتر اصابيع رجله او ساتر رجله بده يدبح خروف. كل خطيئة خروف. بيجي معنا بكرا ان شاء الله. فموقف عرفات اذاً لتتذكر موقف يوم القيامة.
من فوائد الحج في عرفات وفي منى الغني والفقير العظيم والحقير الملك والسلطان كله مع بعضه ما بتعرف هاد من هاد فوطة فوق وفوطة تحت.. ما في يعني اذا كان ملك منلبسه.. اذا حط العباية على كتافه بده يدبح خروف. بدو يضم فوطة فوق وفوطة تحت. هيك لما الملك بده يطوف بيحطوا جيش حواليه بينزل بالفوطة بيطوف وبيطلع بيغير. نحن منطوف نبقى هو انسانية مجتمع كله متل بعضه البعض لا فرق بين ابيض واسود ولا فرق بين غني وفقير ولا بين رئيس ومرؤوس
5- يكتسب المؤمن بالحج ثقافة واسعة وخبرة عملية. حجه يختلط بالناس بمختلف ديارهم واوطانهم بيعرف اخبارهم بيحس مشاعرهم بتلتقي مع الاسود بتحكي معه شلون الدين عندهم شلون الايمان. تجتمع بأهل الشرق تجتمع بأهل الغرب البخارة وطاشقند وسمرقند شلون ايمانهم وموريتانيا والمغرب وكذا شلونهم.. بتتعرف على المسلمين بيتعرفوا عليك بيصير بينك وبينهم اخد ورد بيصير الانسان عنده شفاشية روحية مع الناس. كل واحد بدك تقعد معه تسمع منه لغته لسانه ايمانه تقواه.. لا اله الا الله..
ولو لم يكن هناك الا ان ترى البقاع التي وقف فيها رسول الله ﷺ لكفى. الله عز وجل امرنا من البقاع قال : (وَاتَّخِذُوا مِن مَّقَامِ إِبْرَاهِيمَ مُصَلًّى) . شو مقام ابراهيم؟ الحجر الذي وقف عليه ابراهيم لبناء الكعبة. حجر وقّف عليه اسماعيل يناوله وابراهيم يحطه. الحجر من حبه لسيدنا ابراهيم ساخ تحت اجريه فنزلت اجرين سيدنا ابراهيم بالحجر. والى الان الحجر موجود واجرين سيدنا ابراهيم.. فلما الحجر حب سيدنا ابراهيم الله قال اجعله قبلة اوقفوا قدامه صلوا. شو القصد؟ اذا وقفت تصلي لاحظ سيدنا ابراهيم واقف عالحجر. بتوفيق الله رب العالمين الله عز وجل يتقبل منا وقفت مرة وانا في حالة توجه رأيت سيدنا ابراهيم بشيبته واقف عالحجر ورأيت سيدنا اسماعيل بشبابه عم يناوله الحجر وسيدنا ابراهيم عم يرفعه.. فالحجر عم يرتفع حتى يحط الحجر. بيرد بينخفض لحتى يستناول الحجر منظر لا اله الا الله.. لا يملك الانسان الا ان يشهق بالبكاء. سيدنا ابراهيم بعمر 120 سنة عم يعمّر البيت وسيدنا اسماعيل عمره 12 سنة عم يناوله الحجر. عم يجيب الحجر يناوله لابوه وابوه عم ياخده يرفعه.. (رَبَّنَا تَقَبَّلْ مِنَّا ۖ إِنَّكَ أَنتَ السَّمِيعُ الْعَلِيمُ ) هيدا من جملة الفوايد.. منشوف الحجر الاسود. شلون النبي كان يستلم الحجر الأسود ويقبّل الحجر الأسود ومرة دخل عالناقة فمدّ عصاية استلم الحجر الاسود وقبلّها قبل محلها. صلى الله عليه وسلم. ما استطعت تقبل بإيدك بسم الله الله اكبر بيقبّل ايده. كلما سلّم عالحجر بيقبّل ايده. سيدنا عمر اجا بدو يبوس .. حجر. قال : اعلم انك حجر لا تضر ولا تنفع ولولا اني رأيت رسول الله قبّلك ما قبّلتك. فسيدنا علي قال له يا عمر بلى والله انه لينفع ويضر لقد سمعت رسول الله ﷺ يقول: ان للحجر عينان ولسان يشهد لمن لمسه. يشهد لمن اشار اليه. يشهد له يوم القيامة. فكان عمر كلما طاف يقبّل الحجر الاسود.
اهم ما في الحج وهذا مفقود الآن تعارف المسلمين وتعاونهم. بيتعرف هاد على هاد شو بتشتغل انت انا شو بشتغل شغلتي متل شغلته شو رأيك انا ببعتلك بضاعة وانت بتبعتلي بضاعة منتعاون ما في مانع هي كلياتها من المنافع هيدا غير ائتلاف القلوب ومحبتهم حبيته وحبني بعتلي طلب اطلع زوره ببعتله طلب يجي يزورني. فصار في مودة بين البلاد هذا من جملة المنافع يلي بينالها الحاج يعني زيادة مؤالفة الشمل جمع الشمل بدل ما نفرق الشمل منجمعها.. هلق الله عز وجل .. شو بدنا نحكي.. ما بيطلع اذا بده يطلع من هون لاقرب بلد بده باص وبده اذن وبده كذا.. في الاسلام كان يمشي من الشرق للغرب ما بده لا ورقة ولا بده.. كلها بلاد اسلامية.. الحاصله.
الحج مؤتمر اسلامي عام. انا لو كون مسؤول بمكة بقول الحج بجعله ل500 واحد من الدول الاسلامية العالمية جيبو رؤساء الوزراء ورؤساء الجمهوريات وكذا .. بيحجوا وبيجتمعوا وبيعملوا تآلف بين المسلمين بين الملوك بين الرؤوساء اتفاق واحد شلون بدنا نعمل مشان نشر الاسلام تبليغ الاسلام. شو بدنا نعمل مشان اسرائيل.. بياخدوا قرار واحد بين بعضهم البعض هيدا من المنافع.. الله يعيننا.. الحمد لله الحاصله. لازم نجمع القادة اجتمعت مرة في مكة ب ابو الحسن الندوي بالهند عندن رجال الدعوة بيبعتوا وراه بالشهر 3 ايام او بالسنة شهر بيروح لتبليغ الدعوة. بينطلقوا في البلاد شلون كان النبي ياكل شلون كان يصلي شلون كان النبي يقعد يعلموا الناس بيدعوا الناس الى العبادة الى الصلاة كل شهر ببلد كل شهر بمحل.. قلت لهم يا جماعة هي ما بتنتج .. يلي بيزرع حبة لازم يسقيها اذا ما سقاها ما بتطلع. اجا وصلى تركتوا ورحتوا ترك الصلاة بعدكن. بدن يثبتوا. هلق لما طلعت عالمغرب التقيت بفئة.. فرحانين انه بيروح لهالبلد وبيروح لهالبلد امشوا معنا بيطلعوا معوا راحوا اكلوا صلوا وناموا وضموا ماشيين. قلت له يا ابني ما هيك الدعوة. الدعوة بدك تثبته على الايمان حتى يموت على الايمان والاسلام. قالوا والله نحن هيك ما منعرف. قعدت انا وياهن وخططنا ضميت عندن نحو 5 ساعات. لحتى خططنا قالوا ما منعرف هيك. الدعوة ما منعرفها هيك نحن. منعرف الدعوة انه روحوا وتعوا هيك كان النبي ﷺ يقعد هيك كان النبي ياكل.. هلق صار في ملاعق صار في صحون كان بالاول ياكلوا بايدن ما في ملاعق. بدن هلق ناكل بايدينا وهلق اذا اكل يمسح الصحن. لا اله الا الله. الحاصله.
شروط وجوب الحج. خلينا نبدأ . الشروط التي وجبت شروط فرض الحج على المكلّف وهي : اولاً الاسلام. فلا يفترض الحج على غير المسلم. بده يكون مسلم عاقل فلا يجب على المجنون بالغ فلا يجب على الصغير. فلو حج الصبي او العبد وقع حجهما نفلاً. واحد اخد ابنه معه. ثواب حجة الولد للاب. الولد لما يبلغ بده يحج الفرض. كمان اذا الولد ارتكب خطيئة الاب بده يدفع. فيجب على العبد ان يحج بعد العتق وعلى الصبي ان يحج بعد البلوغ وعلى المجنون ان يحج بعد الافاقة. واما الفقير نبدأ فيها ان شاء الله الدرس الاتي. خلي باقي الوقت الان للاسئلة يلي بده يسأل.