بعد ان انتهينا من بحث الصلاة وفرائضها وواجباتها ومكروهاتها ومندوباتها ومفسداتها الى ان انتهينا الى اخر ابواب الصلاة وهي الصلاة على الجنازة.. اليوم نفتتح بتوفيق الله عز وجل بكتاب الصيام.. عندنا اليوم الصيام وما فيه من احكام شرعية .. اولا تعريف الصيام ثم بعدين سبب الصيام ثم بعد ذلك شرط الصيام واحكام الصيام وركن الصيام وحكمة الصيام كله هذا ان شاء الله سنأخذه فيما يأتي.. الصيام فُرض على المسلمين في 10 شعبان السنة الاولى من الهجرة. او بعد الهجرة بسنة ونصف فُرض الصيام.. بعد هجرة النبي ﷺ الى المدينة المنورة بسنة ونصف فرض الصيام ب10 شعبان. الصيام معناه اولاً : معناه الامساك نهارا عن ادخال شيء الى الجوف عمداً او خطأُ بطنا او ما له حكم الباطن.. اولا الامساك هو ان يمسك الانسان عن الطعام وعن الشراب وعن كل ما يدخل الى الجوف من كل منفذ من منافذ الجسد سواء دخل الى الدماغ او الى البطن اي شيء يفسد الصيام.. صغر او كثر.. كسمسمة فما فوقها اذا اكلها الانسان في نهار رمضان او شرب ولو كان نقطة ماء فهذا يفسد صومه ويجب عليه القضاء مع الكفارة فيما سيأتينا بالتفصيل.. الصوم هو الامساك ان يمسك الانسان نهارا .. والنهار يبتدئ من اذان الفجر الى اذان المغرب. هذا النهار.. ادخال شيء اي شيء كان نافعا او مغذيا من طعام او شراب يفسد الصيام.. نحن قلنا كل شيء ينفع ويغذي.. بيخرج معنا لو دخل الغبار الى فمه او دخل الدخان الى انفه فهذا لا يفسد الصوم اذا كان عادة .. اما اذا كان بصنعه يفسد.. عادة شلون الناس عم يشعلوا الدخان وانت ماشي شميت الدخان هذا لا شيء فيه.. او عم يفرغوا سيارة تراب طلع غبرة دخلت الغبرة بانفك فلا شيء بذلك.. اما لو كان مشعلين عود بخور وجيت انت لعود البخور اخدت شوية دخان بخور نقول لك فسد صومك.. بيصير الصيام بيفسد اذا تعمده الانسان.. فادخال شيء عمدا او خطأً.. خطأً متل لما الانسان بيكون عم يتمضمض هو وعم يتمضمض بيسقط نقطة مي الى الحلق فهذا فسد الصوم ووجب عليه القضاء لكن ما في كفارة.. يجب عليه قضاء هذا اليوم.. هذا خطأ.. يا عم يضحك او عم يتطلع.. او تمضمض بسرعة بتسقط نقطة مي الى الحنجرة ما بقا تطلع هي راحت.. فهذا صيامه بكمّل اليوم ما بيفطر وعليه القضاء ولكن لا كفارة عليه.. فهذا اذا كان خطأً.. فبيخرج معنا النسيان.. وان جاء الاحكام.. النسيان لا يفسد الصيام.. عمدا او خطأً.. النسيان لا يفسد.. لا في الفرض ولا في النفل.. رجل صايم فرضا او نفلا ونسي فأكل او شرب وهو ناسي وما تذكر الا بعدما اكل.. نقول له ان شاء الله فيها العافية.. شو اكلت؟ قال والله نفد بوقتين لحمة وقدام منهم صحن سلطة وصحن مسبحة.. نفد فيهن واكل ورا منهم 3 -4 قطع بقلاوة .. وبعدما خلص اوف لك والله انا صايم... نقول له اي ان شاء الله فيها العافية وصيامك صحيح كمّل صيامك وهالاكلات هيدول هدية من الله لك.. وهيك النبي قال : يلي بيفطر بياكل او بيشرب وهو ناسي فانما هو رزق ساقه الله اليه.. هذا بالفرض والنفل.. هذا بالنسيان.. اما اذا عمل حاله نسيان واكل فهذا ماذا يجب عليه ؟ القضاء والكفارة.. ولما نقول كفارة يعني صيام 60 يوم متتابعات.. هو الامساك نهارا عن الطعام والشراب عن ادخال شيء.. بيخرج معنا الامساك عن الكلام هل يعتبر صياماً ؟ كقول الله تعالى (إِنِّي نَذَرْتُ لِلرَّحْمَٰنِ صَوْمًا فَلَنْ أُكَلِّمَ الْيَوْمَ إِنسِيًّا) هذا لا يُعتبر صياماً في شريعتنا وهو غير جائز في الشرع الاسلامي ان يصوم الانسان عن الكلام هذا لا يصح شرعا.. هو شرع في دين بني اسرائيل.. اما في دين الاسلام لا يجوز الانسان يسكت عن الكلام يندر انه ما بيحكي.. الكلام بالذكر والطاعة خير من السكوت عنها.. لان تذكر الله او تتلو القرآن خير من السكوت عنه.. فنتكلم بالصالحات ونسكت عن النقائص ما في مانع.. لا يعتبر هذا صياماً ولو انسان ندر انه ما يحكي لا يؤجر في نذره هذا ونذره يعتبر معصية وغير صالح.. النذر يجب ان يكون طاعة هذا نذر معصية لذلك نقول له تفطر وتطالع كفارة يمين.. هو الامساك نهارا عن ادخال شيء عمدا او خطأ.. بطناً يعني سواء ادخله الى بطنه او ما له حكم الباطن.. اذا ادخله الى بطنه بالطبع الدخول الى البطن له ثلاث منافذ : الفم والانف والمخرج.. هيدول 3 منافذ للبطن.. الفم يدخل منه طعام وشراب.. واذا واحد شرب من انفه ممكن؟ ممكن.. من الانف يدخل الماء من الانف لوين ؟ الى الحلقوم..في بعض منهم يدخل السلسلة من انفه بيطالعها منين؟ من فمه.. في مدخل.. فاذا دخل من الانف او من الفم او من الدبر كمن اخذ حقنة فهذا يفسد الصيام ويجب عليه القضاء مع الكفارة الا ان الحقنة اذا اخذها لمرض .. المريض بده يفطر.. اذا اخذها لمرض فليس عليه كفارة انما عليه القضاء فقط.. اما اذا عطشان وما لح نقدر واذا بدنا نشرب اخي بدكن تقولولنا صوم 60 يوم لا لح اخد حقنة وانا بدبر حالي.. يعني لح يشرب من سفله يعني.. فهذا شو يجب عليه ؟ القضاء مع الكفارة.. جاي معنا الاحكام الشرعية.. فهذا اذا بطنا او ما له حكم الباطن.. حكم الباطن يلي له شيئين : الجائفة والآمة.. الجائفة : الشق في البطن.. مشقوق بطنه ودخل له ماء ما يقال لها ؟ جائفة.. الآمة شق الرأس ما يوصل الماء الى الدماغ فسواء شق الراس او شق البطن.. وصل الماء الى الدماغ او وصل الماء الى الجوف فهذا يفسد صومه هذا يفسد الصوم لكن هنا لا كفارة لانه ليس بارادته وليس له فيها الاستعداد او الارادة.. وعن شهوة الفرج كذلك متل ما بدنا نترك الطعام والشراب بدنا نترك شهوة الفرج .. شهوة الفرج سواء كان بزواج او كان بعبث يعني بلعب يلي بيلعب بيده مثلاً واخرج منيه فسد صومه.. وهناك قولين قول عليه القضاء مع الكفارة 60 يوم متتابعات لانه ساعد على خروج المني من جسده.. هي معصية كبيرة ارتكبها وخطأ فلذلك البعض منهم قال عليه القضاء مع الكفارة.. والبعض قال لا قضاء من غير كفارة.. اما فسد؟ نعم .. وانتهك حرمة الشهر وارتكب اللعنة والمعصية.. لانه في شهر رمضان وهذا امر لا يجوز فعله للانسان.. هذا عن شهوة الفرج او عن العبث فيما يخرج من الانسان شيئا من المني في اي حالة من الحالات.. سواء كان عبث بيده او بحركة بعمل.. بأي عمل سبّب خروج المني وفي النهار وجب عليه القضاء مع الكفارة مع ارتكاب الاثم والمعصية واللعنة لانه فعل هذه الفاحشة في الحياة.. فمتل ما بده يترك الطعام والشراب كذلك عن شهوة الفرج بنية دائماً في كل عبادة نحتاج الى النية.. الفرق بين العبادة والعادة شو هي ؟ النية.. هذا الفرق .. كل عمل عملته من غير نية فهو عادة.. اما اذا عملته بنية فهو عبادة.. انا هالسكرة حطيتها بفمي بنية تنشير الحنجرة على الدرس فهذه عبادة اما اذا حطيتها عادة ما فيها ثواب.. بدك تشرب بنية تغذية جسمك للتقوي على الطاعة فهي عبادة اما شرب عادة ما في لك ثواب.. اكلت عادة ما في ثواب اكلت تقوية على طاعة الله فطعامك طاعة.. لبست هي عادة عم بلبس.. اذا لبس وطلع وفات ما في له ثواب.. اما اذا لبست تزيناً لدين الله وتجملاً لعبادة الله فهذه طاعة .. لذلك القاعدة العامة : المباحات تنقلب بالنية عبادات.. شو المباحات؟ الطعام الشراب العطر.. التطيب هيدا شو هوي؟ مباح.. فاذا انا تطيبت وقلت بسم الله الرحمن الرحيم نويت التطيب للصلاة على سيدنا رسول الله .. اللهم صل على سيدنا محمد.. هذا الطيب شو حكمه؟ عبادة وطاعة لانه أُدّي به طاعة.. اما اذا تطيّب من غير ما يصلي على النبي ومن غير ما ينوي عادة..فاذاً كل عمل مباح نوينا به فهو طاعة واذا ما نوينا شو بيقلب؟ عادة لا ثواب فيها .. ف بين ان تاخد الثواب وبين ان تكون عادة لك.. فالنسبة للصيام اذاً الطعام والشراب بده يكون ناوي الصيام.. لما بينوي الصيام فُرض عليه هذا الشهر.. اما انسان كان مجنونا ما وعي على وقت النية .. النية امتا ؟ الفجر.. ما كان من اهل النية كان في حالة جنون وفاقد .. وفتح عينه الضهريات او بعد الضهر.. واخد كاسة المي وشرب.. ما وعيان ورد جن.. عليه قضاء هاليوم؟ ما عليه قضاء لا ادرك وقت النية ولا ادرك.. هذا ما عليه قضاء لانه ما موجودة النية.. طيب.. وليش هون عم يقول : بنية.. هون بنية من اهل الصيام.. بده يكون الواحد اهل للصيام.. اما يلي ما اهل هون النية ما بتعمل شي متل ايش؟ اذا كانت امرأة في حالة العادة او في حالة النفاس.. هي منها من اهل نية الصيام لانه الصيام عليها محرّم سواء كانت في العادة او كانت في النفاس الصيام بالنسبة لها محرم.. ما بيصير تصوم.. فهون يا ترى لو اكلت او شربت هل عليها من اثم؟ لا بل يجب عليها.. المرا لو اتتها العادة قبل المغرب ب10 دقايق ما بيصير تضل للمغرب صايمة بدها تاخد كاسة مي تشرب .. ما شرط قدام الناس .. تشرب.. لان ما عاد صح تكمّل الصيام.. صار حرام عليها الصيام تفطر.. فلذلك لا يجوز للنفساء ولا للمرأة في عادتها ان تبقى صائمة من غير طعام.. ما لح احسن اكل.. ليش؟ تضرب هالعادة شو ما اغلظها.. لح تفطر.. نقول لها : واجب عليك الافطار واجب بدك تفطري لانه انت منك من اهل الصيام..والله تعالى اوجب الافطار على المرأة في الصيام وعليها القضاء من ايام اخر 7 ايام عندك سنة كاملة بتقضي هال7 ايام.. هذا ما اوجبه الشرع اما في بعض النساء تستحي ان تشرب او تاكل وتضل في امساك نقول لها هذا حرام ولا يجوز.. شو واجب عليها بدها تفطر وما في نية هون نيتها غير صحيحة.. كمان الكفر هل له نية للصيام ؟ المجنون هل له نية للصيام؟ هيدول كلن ما لهم نية للصيام..
ما هو سبب الصيام؟ سبب وجود رمضان شهود جزء منه.. متى يجب علينا شهر رمضان؟ اولاً لماذا سُمي رمضان؟ ليش سميناه رمضان؟ رمضان من رمضَ من الرمضاء يعني الحر الشديد.. يعني الحر الشديد الذي يذهب عن الانسان خطاياه.. فرمضان متل ما الحر الشديد يحرق كل شي على وجه الارض هكذا رمضان يحرق السيئات كلها فلا يبقي سيئة على الصائم.. فرمضان لذلك اسمه لانه يحرق الذنوب.. اما سبب الصيام شهود جزء من رمضان.. متى ما دخل ليلة رمضان هذا جزء صار من رمضان وجب صيام الشهر كله على الانسان.. لقول الله تعالى (كُتِبَ عَلَيْكُمُ الصِّيَامُ كَمَا كُتِبَ عَلَى الَّذِينَ مِن قَبْلِكُمْ ) كُتب يعني فُرض.. فمتى ما دخل جزء مثلاً هذه الليلة ليلة ايش هي؟ ليلة التلاتا .. متى يدخل اليوم؟ من بعد صلاة العصر يدخل اليوم.. اذاً يوم التلاتا دخل ايمتا ؟ من بعد العصر.. فبكرا مثلاً اجا يوم رمضان من امتى بيدخل ؟ يدخل من بعد عصر 29 شعبان.. هذا اذا رأينا الهلال واذا ما رأينا الهلال يوم 29 بعد العصر يدخل رمضان.. فمتى ما دخل جزء من رمضان وجب صيام الشهر على المسلم. بوجود جزء منه. هذا الجزء يلي بده يدخل يلي وجب فيه علينا الصيام دخل من العصر.. يعني وجبت علينا النية من بعد العصر الى الفجر.. هي وقت نية الصيام.. امتى ما نوينا النية صحيحة.. النية تبتدئ من اذان الفجر او قبل الاذان الى اذان المغرب.. لو نوى الانسان بعد صلاة المغرب.. كل يوم بده نية جديدة.. كل يوم بده نية.. في ناس بيقول اخي انا بنوي من اول شهر رمضان عن شهر رمضان كله.. نويت صيام شهر رمضان كله.. نقول له كل ليلة بدك تبيّت النية.. لانه الاحاديث التي وردت : من لم يبيت نية الصيام فلا صيام له.. تبييت النية. من امتى بتبيتها؟ نحن هون بالجامع امتى مننوي؟ ننوي قبل التراويح.. بعد فرض العشاء نقول : نويت ان اصوم غدا لاداء فرض شهر رمضان هذه السنة ايمانا واحتسابا لوجه الله تعالى.. هذه النية لما ننويها لو اكل بعدها او شرب هل يضر؟ لا يضر.. هي النية صحت كل ليلة تنويها حتى للفجر معك.. فاذا اذّن الفجر وما نويت في مذهب الشافعي صيامك غير صحيح وجب عليك الصيام وقضاء هذا اليوم.. كل يوم لا يبيّت النية فيه عليه اعادته.. هذا في مذهب الشافعي.. مذهب الحنفي معك الى طلوع الشمس.. اذا لطلوع الشمس تذكرت ونويت صح الصيام.. لكن انا مع الامام الشافعي.. لانه الحديث ثبت .. من لم يبيت النية فلا صيام له يعني بده يقضي.. فمعنى ذلك لازم تنوي بالليل معك من المغرب الى الفجر.. ما لح تتذكر بكل هالوقت تقول نويت الصيام؟ اما يلي بينوي طول شهر رمضان نيته في مذهب المالكي صحيح اما مذهب الحنفي والشافعي غير صحيح.. واحد من اول شهر رمضان يقول : نويت صيام شهر رمضان كله.. عال انوي هالنية باول شهر رمضان صح صيامك على مذهب المالكي.. وتنوي قبل الفجر صح صيامك على المذهب الحنفي والشافعي .. صح صيامك على المذاهب كلها.. اما كل يوم بده نية جديدة.. لصحة اداء الصيام.. فمن لا ينوي لا يصح صيامه.. يصوم من غير ان يفطر وعليه القضاء.. فلو واحد فز على بكرا ما نوى عادة الناس هلق شو صاير ؟ بيسهر بيتعشا وبينام او بيتسحر متل ما بيقولوا الساعة 12 وبينام.. اذا نوى صح.. واذا تعشا ونام نسي ينوي فز الساعة 6 او الساعة 7 ما ناوي طالعة الشمس نقول له بدك تمسك كل النهار لا يصح تشرب نقطة مي وعليك قضاء هذا اليوم.. لانه لم يبيت النية.. لذلك الاسلام حرّض المسلم على السحور تحريض وشد همة للمسلم وقال : "ان الله وملائكته ليصلون على المتسحرين".. بدك تفز تتسحر والسحور امتا بيكون ؟ وقت السحر يعني قبل الفجر بنص ساعة.. فز بتصلي وبتتسحر وبينوي الصيام.. فلذلك كل يوم سبب لاداء الصيام.. هذا في كل يوم سبب لاداء الصيام. عرفنا هلق وقت النية .. عند الشافعي امتا؟ من المغرب الى قبل اذان الفجر.. عند الحنفي امتا؟ من اذان الفجر الى بعد طلوع الشمس بشوي بيسموها قبل الضحوة الكبرى.. يعني بعد طلوع الشمس بساعة زيادة.. عند المالكي امتا؟ من اول الشهر.. لكن هلق نحن بأي مذهب لح نعمل؟ لح نعمل بالمذهب الشافعي بالنسبة للنية حتى تكون كلها صحيحة..
ما حكم صيام شهر رمضان؟ حكم صيام شهر رمضان فرض عين على كل مسلم ومسلمة بالغ عاقل عالِم بالوجوب.. هيدول 4 شروط لمن يفرض عليه صوم رمضان. صوم رمضان فرض اداءً وقضاءً..ما اداء فرضه اذا فاتنا راح .. قضاء رمضان فرض عين على يلي فاته.. ولا يفوته لو بلغ من العمر مهما بلغ لو واحد كان بشبابه مفطر ما كان منتبه يتوب قبل ما يجي الى المسجد كان يفطر بده يقضي الايام ولا تفوت.. وكل فرض فات للمسلم في الحياة وجب ان يؤديه في نار جهنم.. فالصلاة بده يؤديها على بلاط جهنم والصوم يؤديه وين؟ في جهنم بده يصوم وهو في حر النار واليوم بألف سنة.. لذلك هون احسن ولا هنيك؟ يلي عليه قضاء هون بده يقضي.. على من اجتمع في اربع صفات اول شي مسلم.. لانه الخطاب للمسلم اذا غير مسلم يعني كافر.. الكافر غير مكلف بالصيام.. مسلم او مسلمة.. بالغ.. البلوغ مر معنا على قديش كم قسم؟ على قسمين شو هوي؟ اما بلوغ بالسن واما بلوغ بالاحتلام.. يعني يشوف منام انه تزوج بيفز عبكرا بيلاقي لباسه مبلول يوجب عليه الغسل.. هذا احتلم معناها صار رجل.. وجب عليه الغسل.. ما احتلم ما شاف منام بلغ من العمر 15 سنة متى ما دخل بسن ال15 صار رجلاً وجبت عليه الفرائض كلها : الصلاة والصوم والزكاة اذا كان غنيا والحج اذا كان قادراً.. هذا البلوغ ابني.. فالبلوغ اما بالسن واما بالاحتلام.. ثانياً العقل.. لما قلنا بالغ بيخرج معنا الصبي.. الصبي ما وجب عليه الصوم لكننا نمرنه تمرين بسنّ 7 يالله حبيبي منصومه للضهر .. بل8 منصومه لبعد الضهر بشوي .. بل9 منصومه للعصر.. لل10 منصومه لبعد العصر.. يعني نمرّنه حتى قبل ما يبلغ يكون متعود على الصيام ما يشوف الصيام صعب عليه.. نحن صمنا اظن انا كان عمري 6 سنوات اول سنة بصومها.. 6 سنوات صمت اول يوم وتاني يوم برمضان من فرحهم فيّ حملوني.. ابي على كتافه .. واخي على ضهره ويطالعوني وينزلوني عالدرج.. ايه صام صام ما شاء الله على الصيام هيك كانوا يرغبوا الولاد بالصيام.. فست سنوات.. بل7 سنوات ما فطرت ولا يوم.. ومن ال7 .. بس هلق ما عم صوم ابداً.. هلق بشهر رمضان ما عم صوم ولا ليلة.. ايه بالنهار بصوم اما بالليل لا.. يعني لو واحد قال لك عم تفطر برمضان ؟ ايه بس امتا ؟ بالليل.. اما بالنهار في صيام.. فقلنا مسلم خرج معنا الكافر.. قلنا البالغ شو بيخرج معنا الصبي.. العاقل .. بده يكون عاقل شو بيخرج معنا المجنون .. المجنون ما عليه صيام.. والجنون كمان نوعين .. جنون متقطع وجنون دائم.. الجنون المتقطع اذا كان صاحي وقت النية ونوى وجب عليه القضاء.. واذا ما كان صاحي وقت النية فلا قضاء عليه.. اما يلي جن جنون دائم اذا اخذ ما اوهب اسقط ما اوجب.. الجنون المتقطع بيقولوا مثلاً بيكتر الجنان بايام الباتنجان.. بيكون قاعد ما بتشوفه الا بيعمل عمل بيحكي مع هاد بيسب هاد بيضرب هاد .. كنت مبارح ما عليك شي.. بيجي جنان متقطع.. هذا الحمق وقلة العقل.. الله يحمينا.. هذا يجب عليه الصيام؟ اذا كان وقت النية بعقله ووعيه وجب عليه الصيام اما اذا ما في وعي.. طيب.. العلم بالوجوب لمن اسلم بدار الحرب.. يلي اسلم بالحرب هذا وجب عليه الصيام؟ بده يعرف اولاً نقول له الشهادتين بعد الشهادتين نعلمه الصلاة بعد الصلاة نقول له في الصيام فاذا علم بوجوب رمضان وجب عليه صيامه واذا كان ما علم به فلا صيام عليه.. حتى يعرف الوجوب.. او هون بدار الاسلام.. موجود بدار الاسلام يقول اخي انا ما بلغني انه في رمضان نقول له بدار الاسلام ما في جهل .. واحد انوجد بالشام قال اخي انا ما بعرف انه في رمضان هذا عذر؟ هذا لا عذر له.. للحديث: ان الله لا يعذر على الجهل.. والقانون شو القانون يقولون : القانون لا يحمي المغفلين.. فكمان في الاسلام في الواحد يقول انا ما بلغني؟ نقول له ابدا وجب عليه القضاء..
طيب لح ننتقل الى شروط شرط وجوب اداؤه.. يعني بدنا نؤدي شهر رمضان متى يجب علينا.. ماذا يشترط لوجوب اداء رمضان .. يعني من الذي يجب عليه الصيام؟ اولاً ان يكون صحيحاً معافى.. ان تكون هناك وجود الصحة.. اذا وجدت الصحة وجب الصيام اما اذا كان مريضاً فالمريض على نوعين.. في مرض لا يقدر فيه على الصيام وفي مرض يقدر فيه على الصيام لكن بتعب.. فمثلاً واحد مريض صاير معه وجع راس.. شو يعتبر هذا مريض .. ضرسه عم يوجعه مريض.. اجره مكسورة مريض يعتبر.. لكن هذا المرض يمنع من الصيام ؟ هذا لا يمنع من الصيام.. هذا الحكم فيه ان افطر فلا اثم عليه.. عليه القضاء والافضل ان يصوم. اما واحد معه قرحة بالمعدة واحد معه جلطة.. هذا نقول له الصيام لا يجوز بالنسبة لك تفطر وتطالع كفارة.. او مريض مرضا لا يستطيع فيه الصيام لكن يستطيع القضاء اذا كان عوفي فنقول له لما الله بيعافيك تقضي الصيام.. بالنسبة للي معه القرحة الدائمة والجلطة الدائمة او معه ارتخاء بعضلة القلب او معه امراض القلب التي لا يطيق الصيام فيها هذا ما بده قضاء .. هذا يفطر ويطالع كفارة عن كل يوم اطعام مسكين.. شو بده ياكل كل يوم يلي بده ياكلن بيطعميهن للمسكين.. هذا اذا كان مرضه لا يُشفى.. اما اذا كان مرضه يُشفى نقول له تفطر وعليك القضاء..فلو ان انسان مريض لكنه تحامل على نفسه وصام.. مريض لكن قال اخي لو بدي موت ما بفطر.. بدي صوم.. نقول له : اولاً بدك تسال طبيب مسلم فاذا الطبيب المسلم قال لك افطر فُرض عليك الافطار .. بده يسال طبيب مسلم.. راح لعند الطبيب قال له الطبيب بتفطر ما بيصير تصوم قال له : والله لو بدي موت ما لح افطر.. اذا صام فهو عاصي وليس بطائع.. اذا صام شو بيكون ؟ عاصي هذا ما طائع.. صيامه معصية ما طاعة.. لان قول الطبيب المسلم هو قول الشرع.. فاذا الطبيب قال له لا تصوم لا يجوز له الصيام.. يقول اخي هيدول الاطباء بيقطع وبيلحش انا ما لح افطر.. نقول له وجب عليك الافطار وان صمت فانت عاصي ولا ثواب له.. انتبهتوا هي الصحة.. الصحة من مرض.. مثلاً الصحة من عدم حيض او نفاس كمان هذا يعتبر مرض خروج الدم يضعف الجسم فهي عم يخرج منها الدم نقول لها صومي؟ الاسلام قال لها لا بتفتطري.. عادة 7 ايام – 8 ايام – 10 ايام.. نقول لها تفطري.. النفاس 40 يوم.. ولدت باول رمضان تفطر بكل شهر رمضان.. ليش؟ لان الاسلام رحيم.. اذا بده يقول لها صومي .. عم يخرج منها دم والدم يعني كله غذاءها عم يروح منجوعها كمان ؟ بده يصير فيها هلاك هي.. فالدين قال لها لا.. اذا ولدتي قبل رمضان بتفطري كل شهر رمضان وعليك القضاء فقط.. هي كمان يعتبر من المرض.. اذاً الصحة اول شرط.. يلي بده يصوم كل رمضان شو بده يكون .. شو بيخرج معنا المريض.. المريض (فعدة من ايام اخر)..
ثانيا الاقامة.. يلي بده يجب عليه شهر رمضان شو بده يكون؟ مقيم.. شو بيخرج معنا ؟ المسافر.. المسافر مطلق الحرية ان شاء صام وان شاء افطر.. مطلق.. والصيام ان لم يكن له في سفره تعب الصيام افضل.. (وَأَن تَصُومُوا خَيْرٌ لَّكُمْ) هذا ان ما وجد مشقة.. اما اذا في مشقة نقول له افطر.. مثلا السفر ان كان على الحمار او بالسيارة او بالطيارة او ماشي اي سفر متى ما كان اكتر من 80 كلم اذا كان المسافر بيصير معه تعب دوخة وجع نقول له تفطر والافطار افضل واذا ما بيصير معه لا تعب ولا وجع ولا شي راكب سيارة وفيها اركوندشن وقدامه تلفزيونه وهو بالسيارة ما في لا تعب ولا شي.. ايهما افضل بالنسبة له ؟ الصيام افضل.. اما اذا قال انا بالسيارة بدوخ بالطيارة بدوخ.. فنقول له اذا بتدوخ افطر.. هذا بالنسبة للمسافر.. لذلك المسافر اذا كان يصيبه في سفره تعب فالافضل له الافطار وان لم يكن له تعب في السفر فالافضل له الصيام.. فاذاً حتى يصح وجوب شهر رمضان عليك بدك شرطين : ان تكون صحيحاً مقيماً.. بيخرج معنا المريض والمسافر هيدول يلي فيهن رخصة والباقي نقول واجب عليهم يصوموا.. طيب هذا وجوب الصيام..
صحة اداء رمضان.. امتى بيكون الصيام صحيح؟ ممكن الواحد يصوم يكون صيامه ما صحيح .. امتى بيكون صيامك صحيح؟ حتى يصح الصيام بده 3 شروط.. الشرط الاول : النية.. حكينا عالنية.. تبدأ من بعد الغروب الى قبل الفجر .. من صام من غير نية شو حكم الصيام؟ صيامك يجب عليه القضاء يعتبر صيام غير صحيح.. يقول اخي ما دام بدي اقضيه خليني اكل لكن.. نقول له لا.. اذا اكلت معناتها هتكت.. شهر رمضان له حرمة.. فلا يصح.. تمسك لانك انت المخطئ.. تمسك من غير اطعام حتى الغروب وعليك القضاء.. هذا تأديباً.. تاني يوم بينسى النية؟ تأديب الاسلام بلطافة.. فأول وحدة النية.. والنية اعتبرنا تقسيط ولا دفعة وحدة.. بالتقسيط كل يوم مساء نويت ان اصوم غدا لاداء فرض شهر رمضان هذه السنة.. لو واحد قال : نويت الصيام لوجه الله تعالى.. صح ؟ صح.. يعني ما شرط.. كسؤال : هل يعتبر السحور نية؟ ام لا بد من التلفظ فيها؟ عند الشافعية لا بد من التلفظ فيها .. لا بد ان تقول نويت الصيام لوجه الله تعالى.. اما واحد والله انا فزيت على السحور لما فز عالسحور بالحقيقة يعني ناوي يغني ولا ناوي يلعب؟ ناوي يتسحر مشان يصوم.. فالامام ابو حنيفة الله يرضى عنه اعتبرله ياها ان قيامه للسحور نية .. لكن الافضل ايهما؟ التلفظ بها.. بده يقول نويت.. ليش؟ قال ممكن الواحد يقوم جوعان ياكل.. ما يفز صياما اكل جوعاً.. اذا اكل جوعا لا يعتبر صايم.. فلحتى لا تختلط العادة بالعبادة شو قلنا له ؟ بده ينوي.. النية لا بد منها.. ثانياً الخلوّ عما ينافيه من حيض ونفاس.. ما بدها تكون المرأة لا حائضة ولا نفساء.. لكن الجنابة هل تدخل يا هل ترى في صحة الصيام؟ الصيام لا يحتاج الى طهارة.. لو ان رجلا او امرأة صام شهر رمضان كله وهو جنب ما حكم الصيام؟ الصيام صحيح لكن شو ارتكب ؟ معصية ترك الصلاة.. اما الصيام صحيح.. فلا تشترط الطهارة لصيام شهر رمضان.. فاذا الانسان اصبح وهو جنب ما حكم صيامه ؟ صحيح.. وقد ورد ان النبي ﷺ في رمضان اصبح وهو جنب فاغتسل ﷺ.. شو حكم الصيام ؟ صحيح.. فاذاً الحيض والنفاس يمنعان صحة الصيام اما الجنابة لا تمنع صحة الصيام.. فلا يشترك الخلو عن الجنابة لكن نقول له الافضل مشان الصلاة.. النية والخلو عما ينافيه من حيض ونفاس وعما يفسده.. شو يلي بيفسد الصيام بدك تبتعد عنه.. جايين المفسدات.. كل ما يدخل الى الجوف حتى ولو نقطة مي.. توضأ مستعجل بده يلحق الجماعة الله اكبر هو وعم يتوضا شواربه نقطت نقطة مي.. علقان نقطة مي جمعت نزلت لهون هو وعم يقرأ الحمد لله رب العالمين الرحمن الرحيم شرق هالنقطة هي .. نقول عظم الله اجركم فسد صومك.. والصلاة شو صار فيها كمان؟ كمان فسدت.. فعليك اعادة الصلاة واعادة الصيام .. هذا يعتبر شرب.. اخد نقطة من برات الفم.. فكل شي بياخده من برات فمه ولو نقطة افسد الصيام.. فعلى الانسان ان يكون مبتعد عن كل هذه الامور..
طيب اركان الصيام.. ما هي اركان الصوم.. ركن الصوم ركن واحد وهو الكف عن قضاء شهوتي البطن والفرج وما أُلحق بهما.. فهنا الكف يعني بدك تمسك عن قضاء شهوة البطن والفرج فلا اكل وشرب ولا قضاء لشهوة هذا الذي يجب .. هذا ركن الصيام.. وما الحق بهما هذا بيجي معنا متل استعمال الادوية .. واحد صار معه حرقة بالمعدة قال بده ياخد شوية مالوكس فواحد صار معه حرقة نقول هذا مفطر لا يصح.. واحد وجعه راسه حب ياخد اسبريني ما بيصير هذا كله مما يفسد الصيام.. بقي الحكم بالنسبة لحكمه.. حكم هذا الصيام اذا صمنا سقط الواجب عنا بين يدي الله .. اذا صمنا هذا الصيام امسكنا من الصباح الى المساء سقط الواجب عنا في الدنيا ونال الثواب في الدار الاخرة.. والثواب في الدار الاخرة له ما ورد في عدة احاديث عن النبي ﷺ بالنسبة للصائم عطاء الهي في الدار الاخرة لا يُحدّ.. ان في الجنة باب يقال له الريان لا يدخله الا الصائمون.. طيب هذا بالنسبة الان.. الفصل الاول يلي اخدناه.. بعدين لح يجينا تقسيم الصوم الى ستة اقسام.. فرض وواجب وسنة بعدين مناخدن.. فهنا الصيام اذاً له شيء واحد .. فالصيام يلي لح نصومه الان ما هو فضيلته؟ فضل هذا الصيام انه يطهر النفس الامارة بالسوء.. تطهير النفس الامارة بالسوء وتزكيتها من الوقوع في المعاصي والخطايا.. للقاعدة التي اتخذها اولياء الله رضي الله عنهم.. قالوا : اذا شبعت النفس جاعت الجوارح واذا جاعت النفس شبعت الجوارح.. هي قاعدة كيف.. اذا شبعت النفس عبيت بطنك.. متى ما عبيت بطنك صار عينك بدها تطلع ويدك بدها تاخد ورجلك بده يمشي ولسانك بده يحكي.. الجوارح كلها شو صارت جاعت كل وحدة بدها حقها.. اما اذا جاعت النفس فضي البطن.. لما فضي البطن ما بقا الك قلب تحكي بيجي واحد بيسبك تقول له اخي ايه الله يسامحك .. بيجي واحد بده .. ما لك يد ترفع ايد تضربه.. تقول له روح.. الله يسامحك.. اذا جاعت النفس شبعت الجوارح.. اذا واحد قال لك انظر سبحان الذي خلقها شوف .. لك اخي عيفنا.. استغفر الله واتوب اليه .. ما له قلب لا يحكي ولا يطلع ولا.. لانه جاعت النفس.. اذا جاعت النفس شبعت الجوارح واذا شبعت النفس جاعت الجوارح.. الايد صار بدها تضرب و الرجل بدها ترفس واللسان بده يسب ويشتم والعين بدها تطلع.. فلذلك اعتبر الصيام تزكية للنفس وتطهير لها.. وهذا امر الهي فرضه في كل الاديان.. كل الاديان فيها صيام.. وما خلا دين من الصيام.. غير ان بعض الاديان صيامها اقسى من بعض.. مثلاً المجوس عندهم صيام لكن عندهم صيام بدون طعام.. وما يوم بيفطر عشية.. بيسحبها 40 – 50 – 60 يوم بدون اكل.. مين كان يصوم هالصيام هذا؟ غاندي.. هذا كان رئيس الهند.. كان يصوم هالصيام هذا يلي بيقوي الروح.. لذلك كانت روحانيته قوية كان يعرف شو يصير بالقصر من غير ما يمشي فيه .. الروحانية بتصير كشافة بتصير تكشف الغيب.. هي تزكية النفس.. اما بالنسبة للنصارى بيصوموا لكن تحول صيامهم صار بيصوموا عن كل شي فيه روح.. او يخرج من روح.. بيض ما بياكلوا لحم ما بياكلوا .. حليب لبن جبن ما بياكلوا.. كل ذي روح او خرج من ذي روح لا يؤكل.. بيصيروا على ايش على الخضرا وعالزيت..لذلك بيقولوا من كفر وصام عن الزفر.. اما الاسلام فقد جعل في الصيام شرط ان لا يكون صيام طيٍّ.. صيام الطي يصوم يومين من غير اكل .. هذا في الاسلام لا يصح.. بدك كل يوم تفطر مساء وتتسحر قبل الفجر.. فلو واحد ما رضي يفطر وسحبها اول يوم وتاني يوم فنقول له قد اضعت اكثر مما اخذت.. في الاسلام لا يجوز صيام يومين من غير افطار.. فلو واحد مثلا كحكم شرعي بالنسبة للصيام.. واحد في رمضان ادّن ولما ادّن فز صلى من غير ما يفطر .. صلى من غير افطار فنقول له صلاة من غير افطار غير صحيحة.. بدك اولاً تفطر ثم بعدين تصلي.. وافطار مع تاخير الصلاة كذلك خطأ.. فلذلك السنة ان ناخد كاسة مي او ناكل 3 -4 تمرات ومنفز منصلي هي افطرنا.. منصلي ثم منرجع منتعشا الى ان نشبع مننزل نصلي صلاة العشا.. فصلينا المغرب بوقتها وافطرنا قبل الصلاة.. هلق كتير الناس بتصوم نفل.. بشعبان برجب.. بيصوم 27 رجب بيصوم 15 شعبان .. عند المغرب بياكل بعدين بيصلي .. نقول له اخطأت كثيرا .. صيام النفل اذا ترك صلاة المغرب مع الجماعة يعتبر صيامه مكروها.. يعني ما في له ثواب منيح.. بده يصلي مع الجماعة فرض المغرب اول بيصلي فرض المغرب بعدما يفطر على كاسة مي بيصلي المغرب بعدين بيفطر.. فهذا كتير الاخطاء شائعة في المسلمين.. ما بيصير الواحد يصلي من غير افطار .. بتفطر بعدين بتصلي بعدين بتاكل.. اما نحن هلق شو صاير العادة؟ منقعد عالسفرة قبل المغرب بأديش بربع ساعة قاعدين عم نطلع.. الكوسا طالع الهباب منها الله.. ما شاء الله.. والرز بشعيرية قدامها والملوخية والفاصوليا.. ما شاء الله .. وعم نستنى.. شو باقي والله دقيقتين.. ما منشوفه الا حمل كاسة الماء بيده بس بده يضرب المدفع .. ما دام ضرب المدفع دغري كرعة وحدة.. له يا ابني له.. خطأ.. في يا احبابي اداب في سنن.. هي بدكن تتعلموها كلها.. اول شيء قبل ما يضرب المدفع قوم افرك اسنانك ولسانك بدك كلن تفركن.. ما دام فركتن بتغسل ايديك وتدخل.. ادّن بتاخد الماء بتشربها 3 انفاس.. بين كل نفس ونفس بتاكل تمرة.. بتاكل تمرة بتشرب نقطة مي بتاكل تمرة تانية بتشرب نقطة مي بتاكل تمرة تالتة بتكمل الكاسة.. 3 تمرات مع كاسة المي بتفز بتصلي بعدين بعدين منرجع مناكل ... معك للعشي .. كول لتشبع .. نحن صاير يا منسرع اكلنا ما منبلع منيح ما منعلك منيح ومنأخر صلاة المغرب الى ان يكون بعد ادان المغرب باكتر من تلتين الساعة صار.. في منهم بيجي الجامع قبل العشي ب10 دقايق.. بيصلي المغرب هذا صلاته بالمذهب الشافعي غير صحيحة .. صح؟ غير صحيحة.. لانه وقت المغرب لبعد ما تنتهي الصلاة انتهى وقت المغرب.. يعني بعد وقت المغرب بربع ساعة انتهى المغرب .. يلي بيصلي بعد الربع ساعة صار صلاته مكروهة .. هي وين كلها.. الله يوفقنا واياكم.. اللهم علمنا ما ينفعنا وانفعنا بما علمتنا وزدنا علماً.