فنحن الآن في تفسير بعض آيات من سورة طه. يقول تعالى (فتعالى الله الملك الحق ) وقبلها قال (وكذلك انزلناه قرآناً عربيا) انت النبي العربي وأُرسلت لأمة العرب لتجعل منهم دعاة وهداة ومبشرين ومعلمين للأمم وللشعوب لذلك باعتبارهن هني الاساتذة بدن يفهموا الرسالة فـ.. وأن تكون بلغتهم. (وصرفنا فيه من الوعيد) ذكرنا في القرآن الوعيد والتهديد للعرب اذا قصّروا في واجبات القرآن واذا لم ينفذوا اوامر الاسلام على الوجه الاتم فالله ما أوعدهم وهددهم بنوع واحد .. صرفنا يعني كررنا وبأساليب متنوعة. فبدءاً من تسلط العدو الى حياة الذل والهوان الى الفقر والمسكنة الى التخلف والجهل والجاهلية الى العذاب عذاب الحريق وعذاب الجحيم وغضب الله والى آخره. وصرفنا يعني كررنا من الوعيد يعني من التهديد والانذار انه اذا ما بتأدوا الواجبات وما بتكونوا مسلمين العلم والعمل والتطبيق والاخلاق وتحمل المسؤوليات وبذل الجهود وتحمل المشاق والايذاء في سبيل الله فأمركم اشد ما يكون من العذاب والقصاص والعقوبة الالهية قال فأنزلنا (وصرفنا من الوعيد لعلهم يتقون) نحن ما مرادنا من الوعيد ان نعذبهم.. ما مرادنا من التهديد ان نخيفهم.. مقصودنا تقويمهم وتكميلهم واعزازهم ورفعتهم وبناء امجادهم وليكونوا محررين ومعلمين لكل شعوب العالم. (لعلهم يتقون أو يحدث لهم ذكرا) يتذكروا واجباتهم الانسانية والعلمية والعالمية. هذا درسكن الماضي. ثم قال الله تعالى (فتعالى الله الملك الحق) فالذي تعاليمه هي هذه التعاليم ورسالته السماوية لرفعة شأن الانسان .. الانسان كل الانسان وفي كل العالم. واراد وانتقى وانتقض من انسان العالم انسان الامة العربية. ليكون معلم الأمم وقائد الخير قائدها الى الخير معلمها الحكمة الانسانية الفضائل السعادة الحضارة العلوم. فهذا اله شأنه عالي يما شأنه واطي؟ (فتعالى الله الملك الحق) يعني له الصفات العالية والقدرة العالية والحكمة العالية والرحمة العالية (فتعالى) بصفاته وبذاته ..ذاته اعلى من كل الذوات. وحياته اعلى من كل انواع الحياة. وغناه وقوته وقدرته وعذابه وعطاؤه اعلى من كل اشباهها ونظائرها في هذا الوجود (فتعالى الله الملك ) الاله في القرآن هو المالك ما كما الاله في الانجيل المصلوب هلي يبكي تضرعا وتذللاً الى مريدي صلبه يتذلل الى الله لينجيه من كربه وكربته. (فتعالى الله الملك الحق) هو اله حق وملك حق. اما انت اذا ملكت ملكك مجازي ملكك موقت ملكك زائل. ملكك ضعيف. اذا نسبنا الالوهية الى غير الله هذه ما الوهية حق الوهية مزيفة وباطلة وغير صحيحة. (فتعالى الله الملك الحق) والإله الحق. وكان النبي (عليه الصلاة والسلام) اذا لقّنه جبريل آيات القرآن عند نزول الوحي حرصاً من النبي ان لا ينسى شيئاً من كلمات القرآن فكان عند الوحي وتبليغ جبريل للنبي كلمات القرآن كان يكررها والوحي ينزل عليه. بينما المطلوب ان تصغي للمتكلم ما تكرر كلامه لأنه بيضيع عليك الكلام التاني الي عم ينطق به فكان النبي يكرر حرصاً على حفظ القرآن وأن لا يتفلت منه شيء او ينسى منه شيئاً. فالله خاطبه قائلا حول هذا الموضوع: (ولا تعجل بالقرآن من قبل ان يُقضى اليك وحيه) .. ما بتكرر لحتى ينقضي اليك وحيه واذا بتخاف من النسيان (سنقرئك فلا تنسى) هلي منحفظك ياه اذا كان بتحفيظ الله .. بتحفيظ الله فأداة الفكر والأداة الحافظة في الدماغ عاملينلك ياها من احسن ماركة. ماركة ربانية نبوية. ما بتضيّع كلمة ولا حرف. سنقرئُك فلا تنسى) (ولا تعجل بالقرآن من قبل أن يُقضى اليك وحيه) .. وانت عم تستعجل حفظاً على العلم لا يتفلت ولا ينقص. عندك حرص على حفظ العلم وعندك رغبة بالعلم بارك الله فيك (وقل رب زدني علما). فهذه من منطلق النفس الكاملة والروح الفاضلة هلي ما بتخلي يضيع عنها اي شيء من واجباتها ما بتضيع اي شيء يمكن الاستفادة منه سواء في اعلى الاشياء كالوحي والقرآن بل وفي ابسط الاشياء وارخصها كان اذا رأى كسرة خبز فكان النبي يأخذها شقفة الخبزة ويضعها على عينه ويقول : "يا عائشة اكرمي مجاورة نعم الله فإن النعمة اذا فرّت قلّما ترجع". ورأى شاةً ميتة ملقاةً على مزبلة يعني الشاة الغنمة. فقال: "هلا أخذتم اهابها يعني جلدها فدبغتموه فانتفعتم به". لأنه الفطيسة جلدها نجس. اما اذا انسلخت واندبغ الجلد بيصير طاهر. قال الشيء ولو نجس واذا امكن الانتفاع به من امور الدنيا لا تضيعوه. هذا نظام الاقتصاد في الاسلام. ايضاً مثال آخر كان اذا انتهى من الاكل كان يأخذ الصحن ويلعقه بأصبعه هذا هلي بينلحس من الصحن في مادة غذائية ؟ ايه كم غرام عم تمثل؟ ايه بتحرز؟ حتى يعلمنا الكهربا ما نسرف في اضاءتها بغير اللزوم والماء ما نفتح الحنفية ازيد من الحاجة. حتى في كتب الفقه في متن الزبد بيقولوا : مكروهه –يعني مكروه الوضوء- مكروهه في الماء حيث أسرف. ولو من البحر الكبير المترف. فالمسلم من جملة اسلامه ان يتعلم الاقتصاد. الاقتصاد في الوقت. ما يسرف وقت زائد عن الحاجة. يعني ربع ساعة يروح عليك ما تستفيد منهم هذا اسراف في صرف الوقت. الاسراف في الثياب. زوجك راتبه محدود وما بتخيطي الا عند الخياطة هلي اجرتها 500 ليرة. هذا ما اسلام هذا كفر بالإسلام الاقتصادي. اذا تارك صلاة هذا كافر بالاسلام العبادة. بإسلام الصلاة., مناع زكاة هذا كافر (ولا تكونوا من المشركين الذين لا يؤتون الزكاة) هذا كافر بالإسلام الاقتصادي المالي .. فالاسلام يا ابني.. الاسلام برنامج الهي للانسان الفرد والانسان العائلي والاسرة والانسان المجتمع والدولة والاسلام العالم كله. ليجعل منه امّة واحدة وشخصية واحدة وهدفا واحدا متآخين متحابين متعاونين هكذا العرب الأول صنعوا اسلامهم في انفسهم وبيوتهم ومجتمعهم وامّتهم وأمم العالم. آخوا بين الصين وبين السنغالي وبين العربي بإيش آخوا بينهم؟. بالاسلام. انما المؤمنون اخوة. فأخوة الاجسام ما بتعمل اخوة الروح. والدليل التوار او الحمير. بيكونوا من ام واب. الكلاب من بارود وتوتية وبطن واحد بيعضوا بعضهن البعض. هذا ايمان واسلام يما كلبنة وبهيمية وحيوانية؟.. "المؤمنون في تواددهم وتراحمهم مثل الجسد الواحد. اذا اشتكى منه عضو تداعى له سائر الجسد بالسهر والحمى". شلون بتتوادد بيأمرك بصلته حتى ولو قطعك., بإعطائه ولو منعك. بالاحسان اليه ولو أساء. فكيف اذا كان يحسن وانت تسيء؟ يصل وانت تقاطع؟ وين الاسلام يا ابني؟ اسلام الصحبة اسلام الاجتماع والمجتمع اسلام المعاملة والاخلاق. (ولا تعجل بالقرآن من قبل ان يُقضى اليه وحيه وقل رب زدني علما) اذا انت عم تكرر القرآن حرصا عليك ما يتفلت منك شيء من العلم ايه بارك الله فيك والله يزيدك حرصاً على حرص. دخل رجل الى مسجد النبي، ورأى النبي في الصلاة وهو راكع. فحرص الصحابي على ان يدرك الركعة مع النبي ما اقتدى لحتى يوصل للصف اقتدى بالنبي عند الباب خاف اذا بدو يمشي لحتى يوصل للصف النبي يرفع راسه تفوته الركعة مع النبي. فركع عند الباب وبعد ما ركع واقتدى بالنبي مشي وهو راكع حتى دخل في الصف. فبعد الصلاة بلغ النبي ما فعل هذا المسلم الصحابي النبي قال له: زادك الله حرصا ولا تعد. زادك الله حرصا ولا تعد. فالاسلام يا ابني كلمة اسلام علوم وتربية والعلوم بدها معلم والتربية بدها مربي فإذا وُجد المربي والمعلم صفي عاد انت المعلم تفتح اذنك وتفتح قلبك (ان في ذلك لذكرى لمن كان له قلب) القلب شو القلب؟ النفس المتهيئة المتعطشة التي تحضن كل ما تسمعه من علوم ومعارف وتتفاعل مع العلم حتى يتحول العلم الى عمل واخلاق وشعور ووجدان. متل ما بيتحول الكرمب والمشمش والبرغل في الجسم الى دم وطاقة لتغذية كل خلايا الجسد. ثم قال تعالى . بعدما ذكر في معظم السورة سيدنا موسى وفرعون سيدنا موسى والسحرة سيدنا موسى وبني اسرائيل ثم علّق عليها .. سيدنا محمد والعرب وقريش. واعداء الدعوة أو اعداء انفسهم هلي بيعادي النبي يا ابني عم بيعادي نفسه هلي بيعادي العلم عم بيعادي نفسه. هلي عم بيعادي الاسلام عم بيعادي نفسه. لأنه الاسلام علوم واخلاق وحب واخاء وتعاون وقلوب مملوءة بالصدق والاخلاص والعمل والانتاج والاقتصاد واداء الواجب. من غير رقيب ولا حسيب. فلما عم تعادي انت عم تعادي هالمعاني. وعم تعادي هلي خلقك وهالمهندس هلي خلقك وصورك وبعدين امامك لقاؤه وحسابه امامك جنته قد تفوتك وناره قد تخلد فيها فهلي بيعمل لنفقه هذا العمل هذا صديق نفسه او عدوها؟ هذا عاقل او مجنون هذا حكيم او احمق؟.. الله عز وجل، فبعد فكر موسى وحياته وشيء من حياة النبي وجهاده وعمله، الآن عم بيعطينا في بناء النفس وتهذيبها وتزكيتها نموذجا وشكل جديد بطريق القصة من اجل معالجة بعض امراض النفس من اجل بعض الجراثيم التي تكون في النفس مما اذا لم نعالجها تكون حياتنا خاسرة وحياتنا فاشلة واهدافنا المفيدة غير محققة وغير صحيحة وغير موجودة.. هذه القصة قصة الملائكة وابليس وآدم. (واذ قلنا للملائكة اسجدوا لآدم فسجدوا الا ابليس أبى). فالله هو الآمر. الله الآمر والخالق هو المنعم هو المحسن هو العليم هو الحكيم المنزه عن الأهواء الذي لا يصنع شيئاً عبثاً الا وراءه حكمة وفائدة للمأمور وللمأمورين. والأمر للملائكة وكان معهم ابليس. هي القصة وقعت وانتهت فشو المقصود (واذ) يعني واذكر هي اذ زمان بمعنى حين. يعني تذكر يا قارئ القرآن ايها المسلم ايتها المسلمة اذكري هذه القصة تذكريها ادرسيها ليش قال هي درس إلك. انا عم بعملك درس بطريق الاولاني بطريق التاريخ تاريخ الانبياء والرسل هي درس بتاريخ القصة. مكونة من تلات عناصر : الملائكة وآدم وابليس. في سورة البقرة قبل القصة الله قال: (واذ قال ربك للملائكة اني جاعل في الارض خليفة) هون قال بيزيدوا (قالوا اتجعل فيها من يفسد فيها ويسفك الدماء ونحن نسبح بحمدك ونقدس لك ) هذا تربية اذا الله عم بيقول لكم هذا خليفتي انتو بتقولوا ايه هذا مفسد في الارض وسفاك الدماء من أنتم ومن الذي قال خليفتي؟ القائل هو الله الذي يعلم الغيب والشهادة يعلم السر وأخفى. من هذا ؟ هو المنعم عليكم المتفضل الذي اوجدكم من العدم بعلمه وحكمته فهل يعقل ان يأمر أمرا خطأ او سفها؟ او يعمل ما هو خلاف الحكمة وخلاف الكمال؟ مما يدل بأن جوابهم ما كان الجواب الصحيح ولا جواب هلي فهمان ما يجب ان يفعله. مع انن ملائكة. كما انهم زكوا انفسهم قالوا (ونحن نسبح بحمدك ونقدس لك) طعنوا في شيء لم يقع. طعنوا في مجهول نسبوا شيئا غير صحيح الى انسان ما فعل هذا الامر. اذا آدم فعل ايه قولوا يفسد في الارض ويسفك الدماء. وفوق ذلك (ونحن نسبح بحمدك ونقدس لك) الانسان ان يمدح نفسه هذا مذموم في علم الآداب والاخلاق. أن يزكي نفسه هذا مذموم في علم الآداب والأخلاق وفي القرآن (فلا تزكوا انفسكم هو اعلم بمن اتقى) النبي كان يقول: "لن يدخل احد منكم الجنة بعمله قالوا ولا انت يا رسول الله ؟ قال : ولا انا الا ان يتغمدني الله بفضل ورحمة " التواضع يا ابني وعدم رؤية النفس وعدم الأنا هذا يلي بيرفع شأن الانسان .. اما مدح الانسان لنفسه واعجابه بعقله او ببعض عمله او رؤيته على الآخرين هذا بيدل على قلة العقل. انه بدو يكبر حاله في نظر الناس فيصغر بدو يجعل حاله مقبول عند الناس فيرفض. بدو يعز حاله فيذل. هلي بيحط حاله بالصدر الناس بيقولوا له قوم اقعد اهنيك. العاقل بيقعد دون مقامه حتى الناس يفززوه يقولوا له لا اقعد في الصدر. "فمن تواضع لله رفعه الله" فالكبر العجب تزكية النفس تمدح حالك قال.. حكوا للقاء جبلنا اجمل الطيور. جبلنا اجمل واحلى الطيور فجبلن ابنه. فابن القاء وقت بيجي شو بيجي؟ راسه كبير وحجمه صغير هلي بيشوفه يعني ما في ابشع من هيك. يعني اذا جاب ابنه يعني بيصير احلى الطيور؟ فحاسبوا انفسكم قبل ان تحاسبوا. رحم الله امرءاً عرف قدره ووقف عنده. بتحط حالك بأعلى من مقامك لن تنال وبتصغر حالك. حط حالك دون مقامك. (واذ قال ربك للملائكة اني جاعل في الارض خليفة. قالوا اتجعل فيها من يفسد فيها ويسفك الدماء ونحن نسبح بحمدك ونقدس لك). قال لهم: (قال اني اعلم ما لا تعلمون) يعني انتو جهلاء عم تنطقوا بجهل ليس عندكم علم ولا عندكم حكمة وعم تعترضوا على من هو اعلم ومن هو احكم. مصدر الحكمة والعلم والعدالة والفضل. فاذا واحد عم يعترض على اعمال الله او الناقص عم يعترض على اعمال الكامل او الجاهل على اعمال العالم اولاً كلامه يُرَد. وثانياً يُنظر له بنظر الازدراء والنقص. وثالثاً ما يتكلم به لا ينفد بيرجع بالخيبة والهزيمة وما بينقال ما تتمنى نفسه. لأنه هلي بدك تتمناه بدك تهيئ اسبابه وتناله بالاستحقاق العملي. اما بالتمني وبالانانية ما حدا بينال الاشياء بالاماني. (ليس بأمانيكم ولا أماني اهل الكتاب) اجتمعوا اليهود والمسلمين في زمن النبي اليهود قالوا نحن اهل الجنة لأنه ديننا اقدم من دينكم يا مسلمين. ونبينا قبل نبيكم .. المسلمين قال: لأ نحن أولى بالجنة لأنه ديننا جديد ودينكم عتيق. نبيكم اكل الدهر عليه وشرب. نبينا ابن عصره وزمانه. فأجوا عند النبي قصوا عليه ما وقع الحق مع مين؟ نحن يما هني؟ الله انزل: (ليس بأمانيكم ولا أماني اهل الكتاب ) (من يعمل سوءاً يُجز به ولا يجد له من دون الله ولياً ولا نصيرا) (ومن يعمل من الصالحات من ذكر او انثى وهو مؤمن فأولئك يدخلون الجنة ولا يظلمون نقيرا). النقير.. النواية اذا بتاخدها قفا النواية وضهرها في حفرة صغيرة هي اسمها النقرة.. قال اذا كنت عامل من الخير او من الشر مقدار النقرة من الخير ما تظن الله ما بيكافيك وبيظلمك حقك. لا.. (ونضع الموازين القسط ليوم القيامة فلا تظلم نفسٌ شيئاً وان كان مثقال حبة من خردل اتينا بها وكفى بنا حاسبين) اذا المحاسب الله يا ابني بدو مين يساعده؟ بدو مين عاونه لحتى ما يضيع شي؟ (وكفى بنا حاسبين) فإذا دقت ساعة الحساب يا ابني بينكم وبين الله وقد تدق ساعة الحساب في الدنيا قبل الآخرة وانت ماشي في الشارع وانت على المائدة طاعم او شارب. فاحذروا يا ابني حساب الله ومحكمة الله ومحاكمة الله اذا النعامة خبت راسها ورا الشيحة حتى لا يراها الصياد اعتقادا منها اذا ما شافت الصياد ، الصياد ما بشوفها بيجي الصياد بكل سهولة بيدق فيها منين ؟ من رقبتها وبالسكين بيشحتها. فالحساب والله قائم. والله وعلى مثاقيل الذر. وانا عم شوفه بالدنيا قبل الآخرة. فالله يعين الجاهل هلي منو حاسب حساب الله. بيظلم بيغدر بيمكر بيترك فرائض الله بكل استهتار بكل لا مبالاة لا خوف من الله ولا تأمّل في تهديد الله ولا خوف من وعيد الله بيترك الفرائض ولا بيبالي بنداء الله ولا بأمر الله ولا بثواب الله هذا ابني هذا مسلم هذا؟ هي مسلمة هي؟ ليش هيك عم تعمل ؟ طول حياتها لا قعدت في مدرسة اسلام ولا درست في معهد ايمان. ولا تثقفت بثقافة القرآن طول حياتها بين المطبخ وبين الموضة وبين العلكة والبانة وبين الحكي بالليل وبالنهار فلانة وفلانة وفلان وفلان وبعنا واشترينا فهي شلون بدها تصير مسلمة؟ اذا كان الطبيب ضيع عمره بهالشكل بيصير طبيب؟ المهندس اذا ضيع عمره هيك بلا دراسة ولا مدرسة ولا كلية بيصير مهندس؟ الخياطة اذا ما قعدت عند معلم الخياطة وأعطت كل عقلها ووقتها بتصير خياطة؟ فأنت شلون صرتِ مسلمة؟ انتَ شلون صرت مسلم؟ علوم الاسلام اخلاق الاسلام حكمة الاسلام احكام الاسلام كتاب الاسلام هذا القرآن يا ابني هذا القرآن قرأتيه قراءة علم فهم تطبيق عمل تنفيذ ؟ لا .. بتقرأه ما بتفهم.. طيب فإذا كان المهندس بيقرأ كتب الهندسة وما بيفهم بيصير مهندس؟ واذا كان الطبيب بيقرأ كتب الطب وما بيفهم منها ولا كلمة بيصير طبيب؟ هذا كتاب الاسلام يا ابني القرآن ، هذا القرآن كتاب الاسلام فالمسلم بدو يقرأ ليفهم ويطبق ويعمل. فبعد العلم والعمل مع الاخلاص مع الارتباط الكامل بكل اوامره بكل نواهيه اذا كان الطبيب درس تلات ارباع الطب وترك الربع بيصير طبيب؟ الطب اذا ست سنين اذا درس اربعة وترك 2 ، 5 وترك واحدة.. بدو يستكمل الدراسة زمناً وعلماً وتدريباً ومعلماً ومدرسة حتى يستأهل ويكون في اهلية لأن ينال لقب طبيب. فمسلمة وانت كمسلم اولادك بناتك أسرتك سهرتك سيرانك واجباتك.. ما بيعرف شي من الاسلام.. هذا من يدعي الاسلام وهو بهذا الشكل هذا في القرآن اسمه منافق. وفي قاموس النبي اسمه منافق وفي قاموس الله وعند الله ويوم القيامة اسمه منافق (وان المنافقين في الدرك الاسفل من النار ولن تجد لهم نصيرا الا الذين تابوا وأصلحوا واعتصموا بالله وأخلصوا دينهم لله فأولئك مع المؤمنين وسوف يؤتي الله المؤمنين أجراً عظيماً) (واذ قلنا للملائكة اسجدوا لآدم ) ايه الله لما عم بيقول اسجدوا ولآدم الله عم بيأمر بالسجود لآدم لأن آدم يستحق او لا يستحق؟ فالامتناع من السجود معناته انه آدم لا يستحق هذا نسبة الجهل الى الله. ونسبة عدم الحكمة في أفعال وفي أوامر الله. واستكبار على من هو أهل للتكريم والاحترام. فالقصة راحت وانتهت . ابليس أخذ جزاؤه والملائكة امتثلوا وآدم الله تاب عليه. المقصود أنت .. فاذا الله فضّل غيرك عليك في زمانك في امثالك من رفاقك واحد الله بيعطيه ذكاه اكتر من التاني بيعطيه قوة اكتر من التاني بيهيأله فرص أكتر من التاني ما بتصير؟ بدك تسجد بدك تخضع لأمر الله اذا جعله اعلم منك .. لما سيدنا موسى كان في درسه سأله سائل : هل تعلم أحداً أعلم منك يا موسى؟ قال لا. فعتب الله عليه وقال : لنا عبدٌ في مجمع البحرين هو أعلم منك يا موسى. كنت لازم تقول الله اعلم. انت علمك محدود. فلما علم بوجود من هو أعلم منه قال" لا أبرح "– يعني لا.. أضل مسافرا مفتشا وطالبا لمن هو أعلم مني حتى أضيف علمه الى علمي وايمانه الى ايماني لأزداد مما زاده الله عليه بدي دم مسافر ومفتش وشرق وغرب حتى أبلغ مجمع البحرين او أمضي حقبا. فأدب القرآن عم بيقول لك إذا رأيت من هو أفضل منك اكتسب مما زاد عليك. من علم وفضيلة .. المؤمن هو العاقل .. العاقل هيك بيتطلب اذا أعلم منك خود ما زاد عليك من علم حتى تكون اعلم العلماء. الأحمق الجاهل بيحسد. فبدل ما يضيف الى علمه علم الاعلم بيجي بيأذيه بيسبه بيغتابه بيحاول الاضرار به. أولاً احترم مزاياه. احترم فضائله. شيء تاني بيغار منه انه ليش هذا افهم واعلم. يعني ما بيكفيك نقصك بتصير أنقص ما بيكفيك جهلك بتصير أجهل. ما بيكفيك تقصيرك بتصير أكثر تقصير هذا طاعة الهوى. ومجانبة التقوى هذا عدم الدين معناته عدم العقل معناته النتائج الخسارة معناته الفشل معناته سواد الوجه معناته خسارة الدنيا والآخرة وجاينا هلأ المثل الأعلى في الموضوع مين؟ مين ؟ ابليس. تلاتة آدم والملائكة وابليس. والله عز وجل عم يعرض الدرس. قال: فسجدوا الملائكة رغم انهم اخطأوا لكن الله قال لهم (اني اعلم ما لا تعلمون). اخطأوا مرة واحدة لما الله نبههم الى خطأهم فرجعوا عن خطأهم., وكان النبي (عليه الصلاة والسلام) يقول: اني لا احلف على يمين.. لو بقول الشغلة الفلانية الا لأفعلها او الشغلة الفلانية والله ما بفعلها .. فأرى غيرها خيرا منها اذا تبين لي اني انا مخطئ في يميني في سلوكي في سيري ولو كنت مأكده باليمين. (اني لا أحلف على يمين فأرى غيرها خيراً منها الا فعلت الذي هو خير) هون الف قلبة ولا غلبة. ولا غلبة يعني ما يغلبك الشيطان. ما تغلبك نفسك الامارة بالسوء. ما يغلبك الهوى (واما من خاف مقام ربه ونهى النفس عن الهوى فإن الجنة هي المأوى) ما جنة الآخرة بس. وفي الدنيا جنة التوفيق وجنة السعادة وجنة محبة القلوب للذي يسلك الصواب ويرجع عن الخطأ.. بيسلك الاستقامة ويترك الطريق الاعوج. فكله.. كله بموازين.. بتسجيلات بساعات عم بتسجل بالأرقام. لو بتحط سكّرة بتمك.. ملضميناية هي محسوبة على جسمك.. اديش بدو سكريات 20 غرام هي محسوبة من جملة ال20 غرام. اذا زاد بيتعب البنكرياس تبعك اذا تماديت بالزيادة ما عاد بيفرز الانسولين لهضم وحرق السكر بيظهر السكر غير محترق .. فظهور السكر في الدم غير محترق هذا شو بيسموه مرض السكر. فبقاؤه في الجسم غير محترق بيضر. بتجي الكليتين بتاخده من الدم وبتطالعه مع البول .. لذلك لما بيحللوا البول يجدوا فيه سكراً غير ايش محترق. فإذا بيذوق وما بيحمّل جسمه اكتر من طاقته بيستريح البنكرياس ويمكن بيستعيد نشاطه. واذا بيتمادى في غيه وضلاله الكليتين كمان بيعطلوا ما عاد بيحسنوا بيفرزوا السكر الغير المحترق من الدم. ما عاد بيطلع مع البول بيدم وين؟ بيدم في الدم. دكتور هيك مزبوط؟ بيدم في الدم. اذا صار بالدم عاد يا بيعميله عيونه لأنه ما كان يذوق يا بيضربه بكبده يا بقلبه. فإذا اراد الله بعبد خيراً ألهمه رشده. ألهمه رشده.. ففي الخير يقدم واذا تبين له الغي يحجم وينتهي. اذا ما انتهى طيب ما انتهى كول سكر. طيب عطل البنكرياس بعدين بتعطل كمان الكليتين بعدين كلك بتعطل. يعني بالجبانة ما في؟ ما في شواغر؟ في شواغر .. فما بترجع واحد. شفتوا واحد مات وما لاقوا له قبر؟ ما وجدنا ابداً. الخلاصة. قال (فسجدوا الا ابليس أبى). ففي سورة البقرة (ما لك ألا تسجد) في آيات.. قال (أبى واستكبر وكان من الكافرين) كفر بأمر الله كفر بعدالة الله كفر بحكمة الله. الملائكة ما بدن يسجدوا قال انا آمركم بالسجود عن علم وانتو عم تحكوا عن جهل وانا اعلم منكم انقادوا واطاعوا بنصيحة واحدة. ابليس. نسأل الله العافية من الشقاء يا ابني. فأوعكن تكونوا ابليس زمانكم يا ابني .. هي مرة واحدة صارت مع ابليس لكن كل واحد منكم الله عم بيأمره ب500 أمر ..تارك الصلاة كم سجدة عم يترك في اليوم والليلة؟ ابليس اذا ما سجد لو الله قال له اسجد لي ما بيسجد له؟ اما لآدم يعني مسكين ابتلي. ولو كان موفق .. شو بيهمك انت؟ لو الله قال اسجد للحطبة. نحن مربوطين بالله. اسجد للحطبة بسجد لآدم بسجد.. الله عم بيقول لك اسجد إلي.. لله.. تارك الصلاة .. صلاة الظهر فيه 8 سجدات.. فامتنع عن 8 أوامر الهية وعن 8 سجدات هلأ صار ابليس كم مرة؟ صار ابليس 8 مرات. و8 مرات ابليس لكن ابليس مكرر. هيداك ابليس تبع السجود لآدم أما الامتناع عن السجود لله بتعادل كم سجدة لآدم؟ ايه هيدا صار يمكن ابليس على 7 آلاف مرة .. هيدا بصلاة الظهر واذا ضفنا عليها صلاة العصر وصلاة المغرب وبترك سجدة واحدة شو صار فيه. آدم أخطأ والملائكة أخطأوا.. لكن بعد ما أخطأوا ما أصروا على الخطأ أذنبوا ما أصروا على الذنب. أول شعروا فكراً بخطئهم. بعدين ندموا بقلوبهم بعدين صححوا الخطأ بأعمالهم. فغفر الله لهم ولم تكن خطيئتهم سبب هلكتهم. فإبليس .. هلأ في واحد بيعمل 500 واحدة لكن كل واحدة بيتبعها بتوبة بإنابة بندم بإستدراك بتصحيح ما خرّب.. التائب من الذنب كمن لا ذنب له. هذا بواحدة ركب راسه وأصرّ على ما فعل وما تراجع عن عقله .. ايه ابني .. مع الله الشغلة.. الشغلة مع الله. الله بيتغالط؟ الله بيتحارب؟ الله بتحسن بتقاتله؟ فأمر رسول الله من امر الله. كل قضية اذا الله امرك تأدي للناس أمانتها ما أديت ما ذنبك مع من أكلت ماله فقط لأ ذنبك مع من أمرك أن تؤدي اليه ماله. اذا ظلمت ضعيف ما بس ذنبك مع هذا الضعيف ذنبك مع من أمرك بالعدل والرحمة والاحسان. يا ابني متل ما الله قال: (وخافونِ ان كنتم مؤمنين) وحضرة الله.. هي جاية معكم في آية (ولولا كلمةٌ سبقتْ مِنْ ربّك لكان لزاماً وأجلٌ مسمى) يعني لولا كلمة الله التي هي حلمه وتأخير العقوبة عن المسيء وعدم الاستعجال. لولا كلمة وأجل مسمى.. التأخير في تأخير ومع التأخير لكن في وقت معين لتنفيذ العقوبة التي هي الاجل المسمى لكان لزاما شو اللزاما ؟ يعني لكان نزول العذاب حتميا وسريعا. لكن الذي أخّر العذاب عن العاصي هلي أخّر العذاب عن المسيء الظالم كلمة ربك التي هي حلمه واجل مسمى محدد وقت التنفيذ بعد سنة بعد سنتين بعد عشرة. بيذكروا كنكتة حول هذا المعنى.. بيقول واحد تعدى على جحى ظلمه ضربه سبه شتمه.. جحى قال له : الله يكسر اجره البعيد بعد اربعين سنة. الجماعة كلهم ضحكوا شو هالدعوة هي .. وقت واحد بيزعل من واحد بيقول الله يسارع له بالعقوبة حالا يكسر له اجره. بعد 40 سنة ضحكوا. فهلي دعا عليه جحى مشي خطوتين تلاتة اجت قشرة موز تحت اجره وقع قام كسر اجره. اجوا لجحى .. قالوا لك جحى هذا الي دعيت عليه بعد 40 سنة تنكسر اجره هلأ انكسرت اجره. قال لهم لأ هي ما تبعي. قال لهم : هذا عامل ذنب قبل 10-15 -20 .. الله جاعل له أجل مسمى بكسر اجره هلأ. أما تبعي بدو يكسر له اجره التانية. هههه وبعد اربعين سنة. فابني الله يرزقكم الايمان .. ايه اسلام مخافة الله اسلام الايمان بعدالة وقصاص الله للمذنب للمسيء.. بتكون ملك شو ملك يا ابني امام الله؟ ملك شو ملك؟.. هتلر شو هتلر .. هتلر شو وين قبره .. ماله قبر مقبرته .. الشاهدة تبعه موسوليني.. شنقوه من كراعيب رجليه. راسه لتحت واجريه لفوق. الاغنياء الشباب العظماء ما في مع الله شو نحن؟ نحن هباء.. فهذا الاله العظيم هلي كلامه كله موجه الك مكرر وبأنواع منوعة لا تذكره ولا تتذكره ولا تتهيبه ولا تحسب له حساب.. دبانة بتحسب لها حساب. لك لسا في دبانة بدي نام ما اطالعوها.. كلهم بيركضوا هذا بالمروحة وهذا بالكتانة وهذا بالمدري ايش مشان دبانة. مشان ناموسة فحضرة الله هلي خالق الكون مين .. الارض هلأ الارض كم طون هي بتطلع الارض؟ كطائرة في الفضاء كم راكب حاملة؟ مع بغالهم مع الكبش تبعهن مع الطنابر مع الباصات مع القطارات اديش سرعتها؟ سرعة الارض في جريها حول الشمس الارض بالسنة بتدور دورة حول الشمس. فدورانها حول الشمس ادي سرعتها في الساعة؟ مائة الف كلم و7 آلاف كلم بالساعة. مع هالكواكب والنجوم هلي لا تعد ولا تحد ما في نجم او كوكب بيحيد عن مجراه والسكة تبعه ولا ملمتر. ولا بتخف السرعة مين القائد؟ مهندسين الصيانة مين ؟ هلي عم بيغيروا الزيت والشحم مين ؟ المحروقات البترول مين؟ هي الارض لو منحطلها بترول بساعة بتستهلك كل بترول وكل آبار البترول.. هي الارض وهي بتطلع ذرة .. فهي مين حاملها ؟ مين مسيرها انت كبدك مين عم بيشغله؟ خلايا مخك كل خلية الها عمل خاص. 14 مليار خلية في مخك. كل خلية الها عمل. متل خطوط الهاتف وتلغراف. كريات الدم البيضاء والحمراء مين عمل نظامها؟ هي البيضاء متل الشرطة والحرس. ما دام دخل اي جرثوم كلهم بيركضوا نحو الجرثوم. اذا عددهم ما كفى المصنع موجود حالاً. بينتج كريات بيضاء اضافة عن الموجود بمقدار ما يتكافأ مع عدد الجراثيم. كلو اوتوماتيك وانت ما عندك خبر ما عندك علم. انت عم تذكر وعم تلعب بالداما وعم تلعب قمار وعم تشرب عرق وعم تزني وعم تفسق وتخالف هلي عم يرعاك ويحافظلك على صحتك وخالق لك جنود (وما يعلم جنود ربك الا هو وما هي الا ذكرى للبشر ) وبعت لك الانبياء والرسل والوحي وجبريل ومانك سائل عن شي.. بيقول شيش بيش .. هذا لازم ياكل خبز يما ياكل تبن؟ يمكن الحمير يحتجوا اذا كان بدو يعطوه هوية حمار لانه الحمير ما بيعصوا الله. لو الله امرهم.. امرهم يطيع بني آدم بتشوفه لو يعض بني آدم بيروحه. لكن مأمور الجمل مأمور البقرة مأمورة. ايه الله لا يجعلنا من الجاهلين بالله ولا بكتاب الله ولا بهدي الله ( واذ قلنا للملائكة اسجدوا لآدم ) ملائكة نحن ملائكة ونسجد لآدم .. مبارح كان صنّة وطين وطين اسود (من صلصال من حمأٍ مسنون) .. الحمأ الصنة المصنون المأنتن. اليوم عملته عالم وناس ونقوم نسجد له؟ اسجدوا فسجدوا . هي ما.. انت مع الله ما بيصير تقول لم وكيف.. انت مع الله (سمعنا وأطعنا) شو ابني.. سمعنا.. فهلي بيكون مع الله سمعنا وأطعنا بيجح يما بيفشل ؟ واذا بدو يكون مع الله سمعنا وعصينا لأنه عقله ضد عقل الله .. الله عم بيقول له ابيض وهو عم بيقول له احمر. هاه.. يا ترى عقلك أثبت يما علم الله وتدبير الله وشرع الله ؟ فهلي بدو يعمل حاله افهم من الله وأعلم من الله اعلم من رسول الله أعلم من العلماء والحكماء هي علامة الشقاء يا ابني. هلي مالو الشيخ ومالو المعلم ومالو المزكي يرتبط به ارتباط الروح بالجسد ارتباط الرضيع بثدي امه ارتباط البخيل بذهبه وفضته ارتباط العاشق بمعشوقته. اذا ما كان الوارث المحمدي احب اليك من كل شيء في هذا الوجود بعد الله ورسوله محبة ما الإدّعاء محبة العمل والامتثال والإنقياد والصدق والاخلاص في الظاهر والباطن والحضور والغيبة. وهلي المعامل والمراقب مين والمكافئ والمعاقب الله. علقتك مع الله يا ابني بدك تتلاعب على الله؟ يكذبوا عالنبي والنبي بشر وتمشي عليه الكذبة لكن على الله بتمشي؟ ايه مين هلي عم بيسجل بدال النبي وعم بيراقب؟ الله ... ايه الله بتخفى عليه خافية؟ هذا ايمان يا ابني هالايمان فيك؟ اذا فيك هذا جزء من الاسلام. اذا الأجزاء كلها موجودة بتصير مسلم. واذا ناقصة بمقدار النقص بيصير النفع او الضرر. سيارة بلا دولاب.. سيارة سيارة لكن بتمشي؟ بتوصلك ؟ بتستفيد منها؟ سيارة ومن غير فائدة.. بتحط ضرائب بتحط مصروف وكاراجيه.. غُرم بلا غرم.. ليش؟ ليش اسلام وما نستفيد من اسلامنا لأن ما في المعلم ما في مدرسة الاسلام. انتساب الى كلية الطب من غير حضور في مدرسة الطب .. بتصير طبيب؟ هذا مستحيل. ( فسجدوا الا ابليس ابى ) ايه ابى لنشوف. (قلنا يا آدم ان هذا عدوٌ لك ولزوجك) الزوجين كل واحد منهما الرجل والمرأة يقال لهما زوج. يعني عايشة مرت محمد ، عايشة اسمها زوج ومحمد اسمه زوج. (عدو لك ولزوجك) ما زوجتك. كلمة زوج كمان تطلق على الزوجة (فلا يخرجنكما من الجنة فتشقى) الشقاء الخروج من الجنة بيكون بمعصية الله. ومعصية الله تسلمك الى ايش؟ الى السعادة أم الى الشقاء؟ الى النعيم يما الى العذاب؟ الى التحقيق الامل والرجاء ام الى الفناء والعدم واللاشيء؟ فلا تكون مغرور يا ابني بأمانيك او بجهلك. الجهل والعلم. العلم ما أن تقرأ، ما أن تحفظ، ما أن تأخذ الشهادة.. العلم للعمل. فإذا كنت بما تعلم عاملاً ومع العمل مخلصاً فأنت السعيد. ولو عملت بالعلم ولم تكن مخلصا ما بتستفيد هذا رياء والرياء لا ثواب عليه. بدو يكون من جوا عمل القلب قبل عمل الجسد. (ان لك أن لا تجوع فيها ولا تعرى) لا جوع ولا فقد الثياب. (وانك لا تظمأ فيها ولا تضحى) لا عطش ولا تضحى يعني لا يصيبك حر الشمس في الجنة اذ لا شمس فيها لأن أهلها في ظل ممدود. ظل الجنة ثابت ما متحرك. (ألم ترَ الى ربك كيف مد الظل ولو شاء لجعله ساكناً) ظل الدنيا متحرك اما ظل الجنة ظل ثابت ممدود غير منقوص. (فوسوس اليه الشيطان) نسأل الله العافية ابني المعصية بتجر الى معصية. اذا ما تبت منها هلأ الجربان اذا حكّ أول حكة يعني بيمشي الحال؟ يما الحكة بدها تلحقها حكة تانية والتانية بتلحقها تالتة حتى يطلع الدم بعدين حتى يبيّن العضم. فإذا أذنبت بسرعة الجرثوم اذا دخل الجسم بيكون واحد لما بيصير بالدم بدو يتوالد. حتى يمتزج بكل ذرات الدم. حتى يهوي الجسم الذي هو كالجبل الشاهق امام الجرثوم الحقير التافه. كان النبي يقول: "اياكم ومحقرات الذنوب " لا تقول هذا ذنب بسيط هي الكلمة ما عليها شي.. لا تقول سيكارة نفخ تنفيخ ما واحد شرب سيكارة وأدمن عليها الا دخل بمرحلة التنفيخ قبل الكل. السيكارجي اول شي بيكون منفاخ بيش شيش بيش.. اذا صاحبت واحد تبع شيش بيش خاصة اذا كان طالب علم ما شاء الله تبارك الله يا عيني يا سلام.. تنظر نظرة الى منظور ما بيجوز. لكن بتتناوأ في حدا شايفك؟ ايه ارفع راسك لفوق. ارفع راسك لفوق.. الفوقاني شايفك يما ما شايفك ؟ هذا ليش ما بتراعيه؟ هذا مانك سائل عنه؟ شو يعني شأنه رخيص عندك؟ يما صغير يما بدوي يما ما بيفهم يما نايم؟ هيك بتحتقر مقام الله بتحسب حساب طفل صغير ما يشوفك بشخصك وأما جراصة الله مانك سائل عنها. بتخاف من شرطي جلواز بلدية يعاقبك ما بتخاف من عقوبة الله .. اذا صار انذار من محكمة بتخاف .. من الله ما بتخاف. انت مسلم؟ المسلم (وخافون ان كنتم مؤمنين) وأعلى من الخائف ذو الخشية. الخشية خوف ممزوج بحب واجلال واحترام. لا يخاف عذابه لكن يخشى غضبه ان يفوته رضاءه. انا أفعل ما لا يرضى به الله ؟ ولو بالفكر ولو بالنية.. انا امشي مع من لا يحبه الله ؟ انا اجلس في مجلس يمقته الله؟ انا أتكلم بكلمة توجب سخط الله؟ هذا ما بيجتمع مع الاسلام. كان المسلم في زمن النبي ما يعرف الذنب .. الواحد طول عمره كان يذنب ذنب ومعظم الكل ما يعرفوا الذنب. لا الصغير ولا الكبير لا بالمزح ولا بالجد لذلك الله جعلهم عظماء الارض والسماء. جعلهم ما غرة في جبين تاريخ العرب. غرة في جبين تاريخ الانسان والعالم. فتحوا مشارق الارض ومغاربها. الانكليز فتَح لكن فتْح استعمار واذلال للشعوب وتجهيل لها ومعاداة لها. اما الفتح الاسلامي فتح فتح حضاري فتح علمي فتح اخائي ارتقى بالشعوب حضرها ثقفها آخى بينها وبين العرب. حتى جعل من العبيد في عنا دولة اسمها دولة المماليك. كافور الاخشيدي كان ملك مصر وهو ملك أسود. بأميركا بيعملوا عبد أسود رئيس جمهورية؟ فهذا الاسلام وانسانيته هذا الاسلام وعالميته هذا الاسلام وفتوحاته. هذا الاسلام وحضارته. المسلم في هذا العصر خصوصي هلي بيقول عن حاله متعلم شو تعلم؟ تعلّم حرفة ياخدله منها 1000 ورقة أو 200 -300 ورقة. الرواس هلي حامل بالفرش على راسه اجرين وصرامي الخواريف صنعته وثقافته بتجبلو مصاري اكتر من هيداك. وتعلم المصلحة بيومين تلاتة بياخد شهادة جامعية وبياخد ضعف المعاش وما في عنده غرور .. الرواس بيقول لك والله انا درويش على باب الله. هيداك مخاره منفوخ وراسه صاير أكبر من راس جوز البقرة. ولا بيعجبه الله ولا النبي ولا الدين ولا الإسلام ولا .. والبق ما عاجبته. الدبانة بتحتقره. الارض والسما بتعرفو انه ما بيسوى شي. وارجينا شو انتاجه؟ في دنياه قبل آخرته وفي دنياه قبل دينه لكن نسأل الله العافية من الغرور. الغرور ابني اذا ضرب بالراس متل راس الكرمب المشرش متل الفحم العراض ما في غير دخان ووجع الراس والاذى والسموم. كرمب بتاكله ما بيتاكل ما في غير بعد ما بتعلكه بتبصقه. وبيصفي بالمزابل. (فلا تغرنكم الحياة الدنيا). العجب يا ابني احذروا العجب. ابليس خرب بيته العجب. خرب بيته الكبر. خرب بيته التمرد على امر الله. ملك 50 الف سنة ضيعن بلحظة واحدة. فارتبطوا بالله يا ابني اعرفوا الله من هو الله بعظمته بقدرته بعلمه بعذابه ببطشه بقدرته .. بثوابه بعطائه .. بالايمان به. الايمان يا ابني لما المسلمين عرفوا الإسلام الحقيقي وسلكوا طريقه بسلوك حقيقي كانوا اسياد عصرهم على كل امم الارض. الآن.. الآن يا ابني اليهود.. اليهود أذل شعوب الارض. في توراتهم ذكرت انهم (ضربت عليهم الذلة والمسكنة). وغضب الله عليهم.. وقصاتن توراتن وانبيائن.. الآن عم بيجتاحوا لبنان وعلى مرأى ومسمع العروبة وينها هي العروبة؟ القومية؟ وين القومية وين دول العرب وين حكام العرب؟ فبعضن عم بيروح الى اوروبا عم بيشحدوا ويتسولوا ويتعطفوا اميركا وريغن وتبع المانيا وفرنسا.. ايه مشان يمنوا علينا انو يا اسرائيل ارفعي العصاية. سيدنا عمر هيك بيعمل؟ الاسلام هيك بيرضى؟ وين عزة الاسلام؟ هلي لما اتت العرب كانوا في اسفل السافلين صاروا في اعلى عليين. وين (انفروا خفافا وثقالا) .. وين كل دولة عربية عندها طيارات وين طياراتن؟ عندها جيوش وين جيوشهم؟ عندها طاقات وين طاقاتهم؟ مالية وبترولية وسلاحية وجيوش والى آخره. الشعب لذلك.. نحن منعرف واجبنا. في مثل هذه الساعة في مثل هيك الظروف الحكم الاسلامي الشرعي التشريع الاسلامي : اذا دخل العدو على ارض المسلمين وجب الجهاد والقتال على كل فئات الشعب. على الرجال وعلى الاطفال وعلى الشيوخ وعلى النساء وعلى العبيد .. بالحجارة بالعصي بالاضافير بكل الوسائل. هذا الحكم الشرعي. في هالوقت، قد الجندي يحتاج للدم. لازم كل واحد يتبرع للدم ما تبرع.. مكتب الدم بيعطيك وصل وامتى ما احتجت دماتك بيعطيك ياهن ماهيك دكتور؟ يعني اذاً ما تبرع هذا .. يعني عم بتحط في بنك الدم دم إلك يوم من الايام يصرلك شي هال50 غرام يرجعولك ياهن 100 غرام يرجعولك ياهن. لكن هلأ قد يحتاجن جندي جريح.. هلأ بياخدن بيكون انتفع منهم وانت يوم من الايام بتنتفع منهن. يمكن بعد الجريح ينتفع شخص تاني وتالت ورابع وإلخ.. وبيجي غيرك بيجيب دمه .. دماتك اذاً الكمية محفزظة إلك. كمان هذا يعتبر من الجهاد .. بالمال وبالنفس وبالدم. العدو قد يشيع اشاعات ليفرق الأمة قد يعمل مقدمات قبل المعركة لتفريق وتمزيق وحدة الأمة في مشاكل وبفتن حتى اذا صارع الأمة بيصارعها وهي غير متحدة.. غير موحّدة متمزقة وأفئدتهم هواء. لأن العدو عالم وماكر وحكيم. ما بدنا .. بدنا نكون على مستوى معرفة العدو لو كنا على مستوى الإسلام علماً وتربية ما مندخل معركة الا وننتصر فيها. لو كنا على مستوى الاسلام علماً وتربية ما مندخل معركة الا وننتصر بها. لو كنا على مستوى الاسلام مساجدنا مدارس فيها العلماء الحكماء العقلاء المخلصين الصادقين. النبي لما اتى النبي هو العالم الاول وهو الشيخ الاول .. شيخ الأنبياء والرسل. فأتى للأمة وكانوا كلن مسلمين وبالجوامع ؟ وكلن بيصلوا وبيصوموا؟ كل واحد حاطت صنم وعم بيسجد له ويركع له ويتدخل عليه.. شو عمل من اجل هؤلاء الوثنين الجاهليين الاعداء المتعادين؟ جعلهم كالجسد الواحد. نحن مشايخنا هيك عم يعملوا يا ابني؟ هذا قصور لأنه الشيخ ما عم نعرف نصنع الشيخ الحقيقي مدارسنا ما عم تعمل هيك لا أزهرنا ولا كلياتنا ولا ثانوياتنا.. فالله يلهم المسؤولين الله يلهمهن الرشد والصواب ويلهمهم ما فيه رضاء الله الى ما فيه الخير. والله ينصر اخواننا الفلسطينيين وينصر جيشنا وجنودنا ويحميهم ويرعاهم ونحن بقلوبهنا كلنا معهم. وبدنا نعتبر حالنا كلنا في المعركة كل واحد منا بحسب امكاناته ومسؤولياته بدنا نحذر الاشاعات والأخبار والارجاف.. العدو بيذيع اشاعات .. مرة ليرعب الناس، مرة ليفرق وحدتها مرة ليفرق كلمته مرة ليباعد بعضها عن بعض. والنهاية ليأكلنا جميعاً ويلتهمنا جميعاً. ما بيوفّر حدا. من الشيخ الى الفريخ وما بينهما.. لذلك يا ابني.. الله يهيئ لهذه الأمة المشايخ الأكفاء العلماء المثقفين الثقافة الحقيقية بالإسلام. ثقافة الإسلام ما بتفرق بين ابناء الشعب. الذمي .. الذمي اليهودي الشريف المواطن. وان كان هذه بالنسبة لليهود تطبيقها على المواطن صعب. لكن الشرع بيكتفي بالظاهر ويدع السرائر الى الله. اما اي مواطن من اي دين من اي نحلة نحن كمسلمين نحن أمة واحدة. المذاهب لا تفرق بيننا. مادام قال الانسان : لا اله الا الله محمد رسول الله ولو بقلبه كاذب ولو لا يعمل بها بدك تعطيه حكم ما تعطيه لأبي بكر وعمر. حفظ حقوقه كرامته حسن معاملته.. الدفاع عنه التعاون معه.. الى آخره. الله قال: ان الذين فرقوا دينهم وكانوا شيعاً مذاهب وفئات متعددة لست منهم في شيء انت منهم بريء وما إلن صلة فيك لا من قريب ولا من بعيد. ايه واقع المجتمع الآن شيع.. نحن لازم نحارب هالتفرّق والتمزق وكل من قال لا اله الا الله فهو مسلم. بل المواطن لو كان لا يقول لا اله الا الله ويقول الله ثالث ثلاثة مواطن هذا. وعم يعطي الوطن حقه بدنا نعامله كما نعامل انفسنا. أنتو مشايخ عم بحكي غلط ؟؟ هاه.. بكل المذاهب الإسلامية. فإذاً لازم نكون على مستوى المعركة ونكون في كل لحظة نكون مستعدين لتلبية كل واجب لأداء حقوق المعركة. ويمكن يصير مثلا .. يصير بالبلد قذف مذف الشبابيك لا تخلوهن مسكرين حتى ما يصير ضغط الهوا واذا حط لزيق الواحد على البلور حتى ما ينفجر واذا في اشياء محترقة بنزين كذا كمان بدو يحطات ما يخليه بالبيت. هلأ تركت بنزين مدري ايش لا تعملنا البيت مستودع محروقات يعني كل شي هلي بيذيعه الدفاع السلمي بيسموه؟ المدني بدنا نلتزم بكل تعاليمه ونحذر من الطابور الخامس. من الجواسيس والعملاء وهلي بينشروا الشائعات وبدها تكون كلمتنا كلها واحدة. كلها.. الله قال (يا ايها الذين آمنوا أطيعوا الله وأطيعوا الرسول وأولي الأمر منكم ) وأولي الأمر .. النبي (عليه الصلاة والسلام) قال: "والجهاد ماضٍ منذ بعثني الله عز وجل الى ان يقاتل آخر هذه الأمة الدجّال". الجهاد فرض. لا يبطله عدل عادلٍ ولا جور جائرٍ. هالأحكام هي ليش ما منطبقها قد واحد يقول لك: الحاكم الفلاني فعل كذا .. نعم ولو فعل كذا.. هيك النبي عم بيقول لك. يعني انت اعرف يما الله لما قال للملائكة اسجدوا لآدم (قال اني اعلم ما لا تعلمون) فإذا بتعمل حالك أعلم من الله يما اعدل من الله.. ورئيسنا انا بعرفه مؤمن مسلم دخّلكم 230 طالب لحتى يكون علماء دين ودخّل كل الفئات مئات الطلبة لكليات الشريعة من الحزبيّين ومن الساحل ومن جبل العرب هذا شو معناه.. لحتى كله ينشأ في هالمستويات علماء بعقيدة واحدة بمذهب واحد بدراسة واحدة. أما أهواء وانانيات ابني انا ما بدخل بهالموضوع.. انا بذكر الواقع. وهلي ما بيآمن بالواقع مرة عملوله عملية جراحية في أثناء التخدير كان ينطق بلا ارادة يا الله.. بأثناء التخدير.. لما الانسان بيفقد وعيه بينطق بدخيلة قلبه. فإذا كان بهيداك اللحظة.. انا لما كنت تحت التخدير ساعة ساعتين وأنا عم بنطق بالدرس وببناء الدعوة وببناء الإسلام والاخوان سجلوا بيطلعوا 10 صفحات.. بين تضرع بين توجه الى الله بين ببناء الإسلام. يعني اذا هالعمل ظهر مني ظاهرا بيكون نابع منين؟ من القلب. فالشاهد في هذه الظروف الحالكة لما العدو بيفائجئ بدو يكون الامة كلها كتلة واحدة شخص واحد يعني اذا تفرقنا هلي بدو يستفيد مين؟ الجيش الاسرائيلي. هاه.. شو اسمو؟ بيكن؟ ايه بدو يجيك بيكن بيك.. منيح؟ بيكن بيك .. هلي أجلى اخواننا الفلسطنيين من اوطانهم.. واستولى على اراضيكن بدو لا يخلي لا هون ولا اهنيك وعامل الخريطة من النيل الى الفرات .. هلأ وسعها الى يثرب وسعها الى آبار البترول ولسا المسلمين في التوافه وفي الفرقة وفي الخصام فلازم كل منا حاكماً ومحكوماً راعياً ورعية نبتغي وجه الله ونحرص على رضاه فلعل الله عز وجل ان ينصرنا اذا نصرناه (ولينصرن الله من ينصره) قولوا آمين. الله يحفظ جنودنا .. وجيشنا .. الله ينصرهن ولا يذلنا ولا ي1لهم.. ويخزي اعداءنا من المستعمرين واسرائيل والصهاينة وعملاؤهم واذنابهم واشياعهم وكل من يظاهرهم او يعاونهم ظاهراً وباطناً.. فـقال (فوسوس اليه الشيطان) قال : الوسوسة هي الحديث الخفي. اذا واحد بيتحدث الك بحديث ما حدا بيسمعه وشوشة هذا شو اسمه؟. وشوشة ويمكن تكون اصلها وسوسة. فالوحي الله بيقذف الكلام في نفس النبي او إلهاماً في نفوس الأولياء من غير أن يسمع صوتها احد. قال فالشيطان القى كلامه في نفس آدم (قال يا آدم) ما قال له اعصي الله ما قال له اترك وصية الله.. الشيطان لما بدو يشتغل شغلة بيحط السم بالعسل. ما بيحطه بتنكة الزبالة المأنتنة وبيقول لك تعى خود السم. وهكذا كل من يفسد بعمل أو بقول أو بحديث ظاهره حسن ولكن داخله شر وسوء وفساد فهذا عمله ونطقه وسوسة وهو شيطان والشياطين على قسمين الذي يوسوس في صدور الناس من الجنة والناس. شيطان الجن لا تراه العيون اما شيطان الانس بني آدم متلنا لكن يلقي الكلام في الخفاء. بيلقي الكلام والافساد والشرور لكن على الله بتخفى؟ لو يحسن يخفيها على الله كان بينجح. اما اذا لا تخفى على الله خافية فكله مسجل. وكله له.. (ولولا كلة سبقت من ربك لكان لزاماً )– يعني لكان العذاب والعقاب حالا وحتماً لكن في هناك كلمة الحلم وهناك الاجل والوقت المعيّن المحدد للتطبيق هذا الذي سبّب تأخير العقوبة عن المسيء وعن المجرم. (هل أدلّك على شجرة الخلد وملك لا يبلى) فهلي بيصغي لكلام الشيطان وبيهمل كلام الله. وبيشوف الشيطان له ناصحاً أميناً وكلام الله لا يرى فيه النصح ولا النفع هذا بينجح ابني؟ هاه؟ والله قال له لآدم (هذا عدو لك ولزوجك) عدوك بتاخد منه النصائح؟ بدك تاخد منه السعادة والخير؟ هذا مهمته جبلته فطرته جوهره ان يهلكك ويخرب بيتك. لكن الله يحيمنا يا ابني من الشقاء من الزلل.. قال (فأكلا منها فبدت لهما سوءاتهما).. ثيابهم هلي.. ثياب الجنة يلي كانوا لابسينها فلتت وظهرت السوءة يعني العورة. سميت السوءة لأن كشفها يسيء الى صاحبها. بيخجل بيستحي بدو يستّر حاله لأنه شي نقص .. (وطفقا يخصفان عليهما من ورق الجنة) صاروا ياخدوا من ورق الموز من ورق التين يستروا ايش.. ما بيقول ورقة التوت.. يخصفان عليهما من ورق الجنة. خصف النعل يعني رقّعها. كان النبي يخصف نعله بيده يعني يرقّع ويسكّف نعله بإيش بايده الشريفة (وطفقا) يعني شرعا وبدآ يخصفان عليهما يضعان عليهما من ورق الجنة ليسترا عوراتهما (وعصى آدم ربه فغوى) يعني ضل عن مطلوبه الذي هو الخلود , الخلود بطاعة الله. فظن انه الخلود بطاعة ابليس. هو بدو الخلود. لكن الله موثوق فيه وبنصحه يما الشيطان؟ الله عز وجل يا ابني يثبتنا بقوله الثابت. (وعصى آدم) عصى أمر الله وغوى يعني ضل وضاع عنه مطلوبه هلي هو الخلود في الجنة وفي السعادة الدائمة وضل عن أمر الله الذي هو البعد عن الشجرة وضاع عن رشده وعقله الدراك للأمور بحقيقتها. وعصى آدم قال المعصية فعل محرّم يقع من فاعله عن قصد اليه. المعصية شي حرام تفعله عن قصد. قال : والزلة ليست بمعصية عمن صدرت عنه. لأنها اسم لفعل حرام غير مقصود في نفسه للفاعل ولكن وقع عن فعل مباح قصده. ما قاصد يعصي الله قاصد الخلود. لكن على كل حال هالزلة شو عملت فيه؟ طالعته من الجنة. ما كل مرّة ب