يقول الله تعالى:(خَلَقَ الْإِنْسَانَ مِنْ نُطْفَةٍ فَإِذَا هُوَ خَصِيمٌ مُبِينٌ * وَالْأَنْعَامَ خَلَقَهَا ۗ لَكُمْ فِيهَا دِفْءٌ وَمَنَافِعُ وَمِنْهَا تَأْكُلُونَ * وَلَكُمْ فِيهَا جَمَالٌ (يعني وزينة) حِينَ تُرِيحُونَ وَحِينَ تَسْرَحُونَ)
حين تريحون (حين تأتي إلى استراحتها في المساء) وحين تسرحون (يعني بها في الصباح) (وَتَحْمِلُ أَثْقَالَكُمْ إِلَىٰ بَلَدٍ لَمْ تَكُونُوا بَالِغِيهِ إِلَّا بِشِقِّ الْأَنْفُسِ ۚ إِنَّ رَبَّكُمْ لَرَءُوفٌ رَحِيمٌ) . فهذه السورة سورة النحل بدأها الله عز وجل بخطابه لعباده بتذكيرهم بإنعامه وفضله عليهم. أولاً نعمة الخَلق ونعمة الوجود والإيجاد. خلق الانسان من نطفة فإذا هو خصيم مبين نقله من عدمٍ إلى وجود ومن موت إلى حياة ومن نطفة إلى انسان زيّنه وأعطاه السمع والبصر والحواس والعقل وأرسل له المعلمين والاساتذة المربين بثقافته الربانية وبحكمته السماوية وجعلهم يعلمون الناس ويبنون عقلهم حتى صاروا حكماء ونفوسهم حتى صارت ملائكة وافكارهم حتى صار الواحد منهم ينتقل من راعي جمال الى قائد امم وشعوب وجيوش وفاتح ومنتصر ومظفَّر وبناّء حضارة تدوم قرونا وقرونا وأجيالا بعد أجيال .. يعني ما بس اعتنى بأجسامنا ما فقط نقلنا من غذاء مهضوم في المعدة إلى دم، الدم راح الى الخصيتين، فهناك صُنّع فصار حيوانا منويا ثم خُزن في الحويصل المنوي ثم وُضع صُنع له مصنع التخليق فلما وُضع المني في مكانه الحيوان المنوي وحده ما بيصير انسان كذلك من مبيض المرأة المرأة في الشهر بتبيض بيضة صغيرة من صغرها قد لا تدركها الأبصار. فذهب الحيوان المنوي واتت البيوضة ليلتقيا في طريقة معينة كما يلتقي المتحابان والخطيبان فبلقائهما بيعمروا البيت التصاقا وعلوقا بجدار الرحم فالدم الذي دم العادة الشهرية الي كان يخرج من المرأة إلى الخارج فيُحبس ليكون غذاءً لهذا الانسان الجديد التي وُضعتْ بزرته في مزرعة التخليق والتصنيع. فمين يلي رتّب هذا الترتيب مين الي وضع هذا المخطط مين الذي اخترع هذا الاختراع مين يلي وضع قوانين الوجود والحياة مين جمع هالحيوان بالبيوضة مين هيّأ الرحم وحبس الدم ليكون غذاء ثم هالخلية تنقسم الى خلايا منها بيصير خلايا القلب .. خلايا القلب بيصير تركيبها غير خلايا الكبد. الكبد بيعلموا ستين سبعين تمانين صنعة كيماوية كيف يطرد السموم كيف يحوّل الاغذية كيف .. خلايا المرارة خلايا الرئتين خلايا الأعصاب خلايا العظام خلايا الشعر خلايا الاظفار وكله من خلية واحدة كما قال تعالى:( يُسْقَىٰ بِمَاءٍ وَاحِدٍ )ونفضل بعضها على بعض في الاكل. مين صنع من هالذرة العين بطبقاتها بأعصابها بخلاياها بشرايينها الشعرية الدقيقة التي تغذي كل خلية من خلايا العين مين وضع الاعصاب تاخد الصور المرئية امامها تاخدها الى الدماغ يلي وظيفتها الابصار. فالله افتتح السورة يذكرك بنعمه عليك ويذكرك بعطفه عليك ويذكر بمحبته فيك ويذكرك بعنايته ورعايته اعطاك من غير سؤال واعتنى بك من غير مقابل.. حتى اذا طلع لك شوارب وصار الخنجر على جنبك والفرد عالجنب التاني.. ايه..( (أَوَلَمْ يَرَ الْإِنْسَانُ أَنَّا خَلَقْنَاهُ مِنْ نُطْفَةٍ فَإِذَا هُوَ خَصِيمٌ مُبِينٌ) من نطفة وين منين طلعت ووين صرت.. فإذا هو خصيم مبين.((وَضَرَبَ لَنَا مَثَلًا وَنَسِيَ خَلْقَهُ ۖ قَالَ مَنْ يُحْيِي الْعِظَامَ وَهِيَ رَمِيمٌ ) اتى بعض الجاهلين الى النبي بعضمة ميت مسوسة فركها ادام النبي طحنها قال من يحيى العظام وهي رميم.. وضرب لنا مثلاً ونسي خلقه..((قُلْ يُحْيِيهَا الَّذِي أَنْشَأَهَا أَوَّلَ مَرَّةٍ ۖ وَهُوَ بِكُلِّ خَلْقٍ عَلِيمٌ) إذا واحد فرط السيارة هلي اخترعها وصممها وركبها ما بيعرف يعيدها..؟ الذي انشأها اول مرة.. خلق الانسان من نطفة فإذا هو خصيم مبين. إنما امره إذا اراد شيئاً.. نحنا الاشياء بتكلفنا جهد بتكلفنا وقت.. بدنا مواد.. بدنا علوم بدنا دراسات اما هو انما امره وارادته اذا اراد شيئاً ان يقول له كن فيكون. هو كلمة كن ما في لكن هذا تعبير بالنسبة لأفهامنا..وتمثيل والا قلت بالارادة.. هلأ لما بترفع ايدك بتقول لها كوني مرتفعة ؟ لا .. إذا بدك تنظر بتقول لعيونك كوني ناظرة؟ لا.. فهذا تمثيل ان سرعة تحقق الاشياء اذا ارادها.. وما امرنا الا واحدة كلمح بالبصر. فكيف لما بتشوف سيارة بتقول اديش هيدا مصممها عظيم وإذا رأيت طيارة بتقول اديش هيدا مخترعها عالم كبير.. طيب واذا ركبت بالطيارة اديش بتفرح بحالك انو ركبت بطيارة.. في حدا منكم ما ركب طيارة بزمانه يرفعلي اصبعته. ما ركبتوا طيارة ؟ ايه اصبحتوا منكم عرفانين .. ما في واحد منكم فارق الطيارة طول حياتكم راكبين وغير مفارقين.. هي الأرض.. هي الارض ما طيارة؟ .. واديش دفعتوا اجرة ركوب طول الحياة وبشرط مكشوفة ما الها سقف. فلو الطيارات هلي بتوصلكن من هون لمكة.. لجدة من غير سقف كان لفاتكم طارت طرابيشكم طارت وانتو من كراسيكم بتطيروا. فشو هالتصميم الالهي الارض تدور حول الشمس بسرعة 100 الف كيلو متر بالساعة وسبع الاف كيلو بالساعة. فالطيارة تبعنا اذا كانت بتطير بالساعة 2000 -3000 كيلومتر الله يثبت علينا العقل والدين.. وليش الطيارة هلي هي صنع الله ومن غير سقف ومن غير بترول .. هي لو الارض بدها تطير معكم بالبترول باليوم اديش بدكم بترول؟ ولو بدكم تدفعوا اجرة الركوب ومع السرعة.. وما في طيارة غيرها تستقروا فيها اذا الله قلعكم منها وين بدكن تروحوا بحالكن؟ بالفضا؟.. فهذا الإله هذا الخالق هذا المحسن هذا الحنان هذا المنان هذا العليم هذا الخبير هذا المبدع هذا الذي هو أحن عليك من حنان امك وابيك عليك هو الذي غرس الرحمة في قلوبهما عليك. والحنان عليك أفنسيته أفجحدته أفكفرت بشرعه أنبذت مدرسته وتعاليمه أهجرت كتابه أأعرضت عن خطابه ماذا انت.. إذا قدّرت هذه الامور وذكّرت نفسك بها ورأيتها حقيقة واقعة فشو لازم تحكم على نفسك؟ هل انت جهول ومعك الشهادات العالية ؟.. هل انت لئيم وانت ابن العوائل الكذا.. هل انت ذكي ويصدر من عقلك هذا التصور وهذا الاهمال للحقائق التي لا حقيقة تماثلها او تعادلها أو تضارعها وتشابهها.. اديش عاد بتستحي من نفسك خلق الانسان من نطفة.. هذا بيشوف حاله بشهادته هيدا بيشوف حاله بنياشينه هيدا بشوف حاله بوزارته وبكرا بكرا شفلي حالك بكفنك. شفلي حالك بهالقصر هلي عضايضه .. عضايضه من بني آدم .. أربع عضايض بيمشوا وبيمشوا بإيش وبناؤن من ايش من عضم وعضل.. بكرا لما بيحملوك عالنعش وبيشلحوك التقومة تبعك وبيلبسوك.. ويلبسوكِ الكفن.. ولي .. دخلكن مشان الله ما تحكوا .. هيدا هيدا جبن وقلة عقل.. حقيقة وبدها تقع شتي وبدو ينزل .. دخلكن لا تحكوا لك عم نحكيلكن مشان تطينوا السطوح.. ما بكرا بتكونوا نايمين بتصير الخشب بتنزل عليكم المطر متل المزاريب .. شو الحقيقة شو الفائدة للنعامة اذا خبت راسها من الصياد وراء الشيحة بيجي بيدب بيمسكها من زلعومها ورأساً على السكين. أما إذا فكرتْ ودبرتْ وتهيأتْ ايه يمكن تنجو لأولادها. فالموت حقيقة لقاء الله الي خلقكك بدو يوقفك امامه .. ويوقفك امامه. ما في لا انا ابن فلان ولا بنت فلان ولا زوجي فلان ولا وظيفته فلان ولا الو كيان فلان.. ايه..(مَا أَغْنَىٰ عَنِّي مَالِيَهْ ۜ * هَلَكَ عَنِّي سُلْطَانِيَهْ)لا جنود ولا عسكر ولا سلاح ولا أنصار ولا أحباب( (وَأَنْ لَيْسَ لِلْإِنْسَانِ إِلَّا مَا سَعَىٰ * وَأَنَّ سَعْيَهُ سَوْفَ يُرَىٰ * ثُمَّ يُجْزَاهُ الْجَزَاءَ الْأَوْفَىٰ ). بعدين في الدنيا وضع لك برنامج التربية والتعليم. لما العرب آباءك وأجداددك الذين تعتز بهم. تقول فمنا الوليد ومنا الرشيد فلم لا نسود.. تعتز بهم ثم تطلب ان تكون سيدا كما سادوا ثم تستنكر مدرستهم التي وهبتهم السيادة تستنكر مدرستهم التي اعطتهم الوحدة واعطتهم النصر على الدولتين الأعظم في عصرهم وزمانهم وانت ما عم تحسن تنتصر على الدولة الأحقر والأتفه في زمانك.. فيا ايها الانسان العربي هل انت اخلصت للعرب؟ هل احببت عروبتك هل انت احببت قوميتك. فيا ترى النبي دعا إلى القومية التركية.. الفارسية.. يما الفييتنامية..( الر ۚ تِلْكَ آيَاتُ الْكِتَابِ الْمُبِينِ * إِنَّا أَنْزَلْنَاهُ (يما جعلناه) قُرْآنًا عَرَبِيًّا لَعَلَّكُمْ تَعْقِلُونَ)في سورة الرعد(وَكَذَٰلِكَ أَنْزَلْنَاهُ حُكْمًا عَرَبِيًّا) فالقرآن يقول في تكريم القومية العربية وإنه لذكر لك يعني لشرف القرآن والإسلام لك ولقومك والآن عم نعتز بإيش؟ إذا بدنا نعتز في تاريخنا ما في غير العزة بالإسلام. بس بالاسلام.. ابني خلينا نحكي ما لنا وما علينا.. الاسلام شوّه شوّهت علومه وشوّهت مفاهيمه وشوهّت .. وشوّه تطبيقه وسلوكه وشوّه الانتساب اليه.. الاسلام حقائق والحقائق لا تتغير اخلاق علوم عقل انتاج حب اخاء تعاون تواضع بذل ايثار.. عمل دؤوب حتى ما نصير في مصاف الامم الراقية حتى نقود الامم الراقية نقودها إلى ما هو أرقى إلى ما هو أسمى نقودها الى الاخاء الى الحب الى التعاون الى الفضائل الى المدرسة الالهية التي يتخرّج الانسان منها لا يحب اخاه الانسان بل يحب كل مخلوق في هذا الوجود فتتندى منه الرحمة نحوه والمساعدة له والعطف عليه ولا معاملته بالعدل لا بل يعامله فوق العدل بالاحسان.. لا يعطيه حقه بل يعطيه زيادة على حقه .. إذا سميت هالمعاملة اسلام هي الحياة والسعادة الخيالية.. هذا الخيال العرب آباءكم وقومكم طبقوه بالعمل بواسطة امام المسجد لكن الذي كان اماماً حقيقياً.. اماماً للعقول وقائداً للنفوس ومهذباً للأرواح ومزكياً لها وقال صلى الله عليه وسلم : لن يصلح آخر هذه الأمة إلا بما صلح عليه اولها .. خلق الانسان من نطفة. فقدّر حالك نطفة متل هيداك الملك يلي دخل عليه الضيف وشاف الكشكول فوق راسه قال له شو هاد نزعت السرايا تبعك وسمعتك قال له لأ هيدا الكشكول هيدا اساس الملك تبعي.. لأن أصلي شحاد وهيدا كشكولي. فلحتى لا أنغر بعظمة الملك ونعيم السلطان فدائماً حاطه قدامي لحتى ما انسى أصلي .. فالله عم يذكرنا بأصلنا خلق الانسان من نطفة .. فعم يذكرك .. اذا غضبت واذا بدك تبطش( (وَإِذَا بَطَشْتُمْ بَطَشْتُمْ جَبَّارِينَ).. اذا بطشت .. النبي قال صلى الله عليه وسلم : من اتق الله لم يشف غيظه. ايه هيدا الانسان الكامل لما بتشتعل فيه نيران الغيظ والغضب عنده من قوة التربية والتهذيب النفسي ما يكبح جماح غضبه وغيظه فلا يظلم الناس ولا يتعدى على حرماتهم ولا يدوس كراماتهم لا بقول ولا بعمل ولا في دم ولا في مال ولا في ديْن ولا في مشاركة ولا في مجاورة. السلام عم يطلبوا السلام في اوروبا.. السلام لا يكون بالمعاهدات ولا يكون بالتمنيات السلام بدو عقائد وبدو تربية وبدو مربين وبدو علوم.. التي نزلت بها السماء لكن تلوثت بأوساخ وبأقذار أهل الأرض فلا بد لها من تصفية حتى تعود لنقائها الأول. فعند ذلك ما بيتحقق السلام تتحقق السعادة والاخاء والحب والهناء في هذا الكون وهذا لا بد آتي ولا يكون إلا في الاسلام. قال: والانعام خلقها لكم. الانعام هي البقر والجمال والغنم والماعز ثمانية ازواج من الضأن اثنين ومن المعز اثنين. وفي سورة اسمها سورة ايش ..الانعام. ليش سماها سورة الانعام لحتى اذا شفنا البقرة تكون مسبحة النا هي البقرة اد ما عظموها اهل الهند عبدوها وبيتغسلوا ببولها ليشكروا النعمة ..بس لو فهموا ما بيغتسلوا ببولها بيشكروها الها بيشكروا يلي خلقها والذي صممها وأبدعها واخترعها وقدمها لنا هدية وجعل فيها معمل. هلأ لو السيارة بتكون مثل البقرة أنه بعد سنة تحبل عندك سيارة تلد ايش سيارة تانية يا سلام.. المشمشة شغل الله معمل الله بيعطيك السيارة بيعطيك شجرة المشمش ما شجرة بتحمل بتاكل مشمش وبس لا بيحطلك بكل مشمشة معمل. فالمشمشة كم بزرة بطالع؟ اذا 200- 300 -400 مشمشة يعني 400 مصنع. فلو السيارة بطالعلها 300 -400 مصنع لحتى يبين الفرق بين صنع الله وبين صنع ايش الانسان.. خلق الانسان.. فكر بخلقك في عظمة الخالق فكر بعيونك كيف خلق لك الأجفان إذا صار غبار وتراب او نور باهر ما بتتحمله العيون حط لك البرادي وعملك الابواب وبيسكروا عالالكترون بمجرد الارادة ما بتحتاج لا لزر تكبسه ولا لمفتاح تقفله. خلق لك الأهداب .. فيما اذا صار غبار بتحسن بتحط هالاهداب فوق بعضها البعض بتمثل شبك ترى امامك ولا يدخل الغبار الى عينك. مع ذلك لو دخل الغبار فجعل الأجفان متل المكنسة بتضل بطلوعها ونزولها بتعزل الغبار عن الناظرين وبتسوقهم إلى طرفي العين. فلما بيتجمع بيكونوا لزجين بيبّسلك ياهن فلا بيصلحوا للقلع بيعملك هيك متل حكة بسيطة انت مانك داير بالك ولانك منتبه قام شو بتشيلهم وما بتحس فمين رتب هالترتيب ؟.. مين وضع اللعاب في فمك ؟.. مشان الخبز والكعك والقضامة بتمبلع لو كان ما في عندك لعاب؟ مين اختزن لك اللعاب في جسمك ويعطيه في فمك بالقدر المطلوب. لو زاد ريالتك بتشط.. بتكون انت محامي بالمحكمة عم تدافع بعد شوي ما منشوف الا شطت ايش .. والدكتور إذا كان عم يعمل عملية وراسه فوق صدر المريض بعد شوي ما منشوف الا ريالته نزلت وين بأحشاء المريضة يلي بين ايديه وكله جراثيم تخربط الشغل كله.. فمين جعله بمقدار.. (وَإِنْ مِنْ شَيْءٍ إِلَّا عِنْدَنَا خَزَائِنُهُ وَمَا نُنَزِّلُهُ إِلَّا بِقَدَرٍ مَعْلُومٍ)
فمين وضع لك العصارة في المعدة بمجرد ما يوصل الطعام بتقابله العصارة حتى تهضم اللحم والمواد البروتينية. بالأمعاء في عصارات لهضم الدهن عصارة في البنكرياس لهضم السكر. وكلو بمقادير الكبد الو كذا. خلق الانسان.. وخلق احشاءه وأعضاءه خلايا دماغك عدوها قالوا 14 مليار خلية كل خلية الها عمل خاص هلأ ايدك هي انا ايدي عم تتحرك مين عم يحركها خلايا في الدماغ بحسب الارادة يمين شمال فوق تحت ..الصوت النطق الشم اللسان.. الخلايا التي تحفظ العلوم قالوا كل مدة من الزمن كل خلايا جسمك كلها بتتغير. لما بتفوت عالحمام وبتفرغ بالكيس هيدا ما وسخ هيدا خلايا جلدك الميتة بتموت بيطالعلك خلايا جلد جديدة. قالوا في كل 7 سنوات كل عظم الانسان يتغير. خلاياه القديمة بتروح والله بيخلق له خلايا جديدة خلايا جلدك عضلاتك اضافيرك شعرك كله بيتغير الا خلايا الدماغ فلا تتغير لم لأن خلايا الحفظ والذاكرة هلي حافظ فيها ابوك وامك وبيتك وعلومك لو تغيرت واجت خلايا جديدة هيديك راحت والعلم يلي معها راح بدك عاد يحطوك بالمدرسة الابتدائية وانت عمرك 50 سنة لحتى يعلموك الف باء.. فمين رتب هالترتيب في خلق الانسان فلو الانسان بدو يذكر عظمة الله.. ادنيك حطلك فيهن الشيء اللزج المر وإلا كان النمل بيشم ريحة نخاع وانت نايم ما بتشوف إلا ادنيك محشوين بالنمل واكلولك مخك. فمين حارسك وانت نايم فيا قليل الفهم يا قليل الشكر يا المسيء الى اعظم محسن يا المبتعد الى اعظم حبيب حنان منان نسيت اوامره واستهنت بها وجحدتها وجحدت بوجوده وتظن حالك عالم وانت اجهل الجاهلين. شو الفائدة إذا تعلمت كيف بيصير الحيط وكيف بيصير السقف يعني مهندس وجهلت هلي خلق وهندس الكون وبنى عوالمه ووضع قوانينها.. الخلية لما في دمك الخلايا الكريات البيضاء هيدي مهمتها متى ما صار جرثوم في اي مكان من جسمك في الحالة تتوالد وتنتج خلايا جديدة على حسب المرض وخطورته تتكاثر وكلها تتجه نحو المكروب وبتعمل معه الحرب الحرب المستميتة الاستشهادية لأجل الحفاظ على وجودك.( وَمَا يَعْلَمُ جُنُودَ رَبِّكَ إِلَّا هُوَ ۚ وَمَا هِيَ إِلَّا ذِكْرَىٰ لِلْبَشَرِ) فهل عرفت هذا وهل عرفت من أبدع وخلق ورتب هذا .. هل هذا المنعم بوجودك بحفظك بإبداعك.. مين ركبلك سنانك بتمك.. لو شاوروك وين ركبلك سنانك واحد بيحطن بكتفه واحد بيحطن تحت دقنه واحد بيحطن تحت باطه واحد بفخده واحد بضهره.. انه يتركبوا بالمحل هلي الله وضعهم.. ثم الأضراس من جوا القواطع من برا. لو الاضراس الطواحين من برا بدك تطحن من برا الاكل بيطلع لحاله .. مين رتب. ثم بينطبق السن على السن بحيث الخيط بليط .. هذا كله ذكرته فشكرته.. عرفته فعظمته. عرفته فآمنت به فطبقت تعاليمه وهو في غنى عنك وعنها.. من انت وشو اعمالك كلها لسعادتك وكلما امتثلت اوامره اكثر وفهمت تعاليمه اكثر بتكون سعادتك ونجاحك وتوفيقك وعزك وكرامتك اكثر واكثر.(وَكَانَ حَقًّا عَلَيْنَا نَصْرُ الْمُؤْمِنِينَ)(وَمَنْ يَتَّقِ اللَّهَ يَجْعَلْ لَهُ مِنْ أَمْرِهِ يُسْرًا)
( (وَلَوْ أَنَّ أَهْلَ الْقُرَىٰ آمَنُوا وَاتَّقَوْا لَفَتَحْنَا عَلَيْهِمْ بَرَكَاتٍ مِنَ السَّمَاءِ وَالْأَرْضِ ). ما خيرات الارض بل ومعها خيرات السماء. وما تظنوا التقوى بس الصلاة او الصوم او الحج فقط لا. ومن التقوى استخراج المعادن ومن التقوى بناء السدود ومن التقوى وحدة الامة ومن التقوى نشر العلوم ومن التقوى الاخلاق والفضائل وحسن المعاملة ومن التقوى تفتش عن المعلم المرشد هلي المهندس الذي يحسن بناء عقلك الاسلامي.. كما ان كلية الطب بنت للطبيب العقل الطبي وكلية الهندسة بنت للإنسان للطالب العقل الهندسي كذلك بدك كلية تبني لك العقل الاسلامي حتى تصير بالعقل الاسلامي مسلماً وبالوجدان الاسلامي تصير مسلماً وبالتهذيب الاسلامي تصير خلقك خلق اسلامي فإذا صرت المسلم الحقيقي فأنت العالم وانت الحكيم وانت المهذب وانت القومي قوميتك ولإنسانيك ولربك ولسماءك وما عم تدخل في معركة.. العرب والقومية العربية لما اتاها الاسلام واستمسكت به يا ترى هل هزمت في معركة؟ واي معارك خاضوها كان دائماً المستوى العددي كان الانسان العربي الواحد يهزم عشرة من الرومان. أو عشرة من الفرس او 10 من الاوروبيين فليش القومية العربية هزمت كل القوميات.. القومية لساتها موجودة ..القومية وحدها بلا علم بلا عقيدة بلا سلوك بلا تاريخ بلا ارتباط حاضرها بماضيها المشرف الذي يعتز به العالم.. عظماء اوروبا كلهم بيقولوا نحن مدينين بحضارتنا وتقدمنا العلمي لمين للعرب العرب قبل الاسلام يما بعد الاسلام. فان شاء الله مناكل فول ومنرجع للاصول. الناس كلهم خير يا ابني.. لكن الفرق بين واحد يفيقك وانت نايم يكون لابس جزمة وفيها مسامير ويدعس على بطنك مشان يفيقك عصلاة الصبح .. هاه.. أو يدعس على مناخيرك بالجزمة تبعه لأجل الأمر بالمعروف والنهي عن المنكر يا اخي ليش هيك عملت قال الله تعالى:( (وَأْمُرْ أَهْلَكَ بِالصَّلَاةِ وَاصْطَبِرْ عَلَيْهَا ). ايه يمكن إذا في معك شي فرد لتقوم تقوصه.. هاه.. او شي خنجر تخنجره. هيدا اذا ما سبيته وبهدلته.. وإذا جبلك شي حمالة ورد وحطها على مناخيرك من غير ما تمس مناخيرك حتى تستيقظ برائحة أريجه وعطره أو جبلك شي شريط مسجل لترتيل قرآني أو صوت موسيقي جميل وصوت ناعم لطيف أو عروستك هلي هي ملكة جمال تعطرت وتزينت وحطت خدها على خدك تقول لك: وأمر اهلك بالصلاة واصطبر عليها .. بتفرق بين الاولانية والتانية يما ما بتفرق.. بتصلي بالتانية يما ما بتصلي ؟.. وبالأولانية يمكن ما بس ما بتصلي يمكن توقع بجريمة. هذا الفرق يا ابني بين : ( (ادْعُ إِلَىٰ سَبِيلِ رَبِّكَ بِالْحِكْمَةِ وَالْمَوْعِظَةِ الْحَسَنَةِ ) والفرق (وَلَوْ كُنْتَ فَظًّا غَلِيظَ الْقَلْبِ لَانْفَضُّوا مِنْ حَوْلِكَ ۖ فَاعْفُ عَنْهُمْ وَاسْتَغْفِرْ لَهُمْ وَشَاوِرْهُمْ فِي الْأَمْرِ ) خلق الانسان من نطفة فإذا هو.. شاكر طائع تقي .. مؤمن صالح.. قال فإذا هو خصيم مبين. متل حكاية هيداك الشخص يلي كان بالحج شاف واحد مقطوع وعم يلفق فركضوا عليه أنقذوه تلات اربع خمس ايام وهني يخدموه ويسعفوه وينجدوه حتى مثل الشفاء وصحا فالتفت قال مين منكم يلي انقذني قالوا له فلان قال والله انت بدي كافيك لأن النبي صلى الله عليه وسلم قال: من لم يشكر الناس ايش لم يشكر الله. قال له لأ اخيه انا فعلته معك لوجه الله قال له ولو فعلت معي لوجه الله الشكر واجب ((وَإِذَا حُيِّيتُمْ بِتَحِيَّةٍ فَحَيُّوا بِأَحْسَنَ مِنْهَا أَوْ رُدُّوهَا ) قال له انت كافيتني بأمر دنيوي انا بدي كافيك بأمر اخروي شلون طالع فرده قال بدي قوصك فيه مشان تروح عالجنة وانا من تحت راسك بروح عالنار بس لأجل ايش شكر المعروف والمكافأة على ايش الحسنة هيدا الشكر هيك؟.. فالله خلقك واعطاك ورفعك وعزك وأغناك وعلمك واعطاك الالقاب.. فإذا هو خصيم مبين.. ايه المعركة مع الله ما بعتقد صاحبها ناجح ولا مظفّر .. مهما طال الأمد ( سَنَسْتَدْرِجُهُمْ مِنْ حَيْثُ لَا يَعْلَمُونَ) لا تنغر بشبابك ولا بغناك ولا بجاهك ولا بقوتك. ( (إِنَّهُمْ يَكِيدُونَ كَيْدًا * وَأَكِيدُ كَيْدًا * فَمَهِّلِ الْكَافِرِينَ أَمْهِلْهُمْ رُوَيْدًا) وشر الاخذات اذا اخدك عند الموت والموت في مفر... يلا لنشوف.(قُلْ يَا أَيُّهَا الَّذِينَ هَادُوا إِنْ زَعَمْتُمْ أَنَّكُمْ أَوْلِيَاءُ لِلَّهِ مِنْ دُونِ النَّاسِ فَتَمَنَّوُا الْمَوْتَ إِنْ كُنْتُمْ صَادِقِينَ * وَلَا يَتَمَنَّوْنَهُ أَبَدًا بِمَا قَدَّمَتْ أَيْدِيهِمْ ۚ وَاللَّهُ عَلِيمٌ بِالظَّالِمِينَ * قُلْ إِنَّ الْمَوْتَ الَّذِي تَفِرُّونَ مِنْهُ فَإِنَّهُ مُلَاقِيكُمْ). انت هربان منه ما بتشوفه الا ايش صار قدامك. فإذا جمد البصر وفُقد الوعي وكلموك فلم تسمع ولسانك لم ينطق ورأيت ملائكة الله فقل لي لشوف وظيفتك وقل لي مكانتك وقل لي نجومك و وقل لي ملايينك واملاكك وجماِلك وزوجك وسياراتك ومصايفك شو محلها من الاعراب ؟ .. صارت متل ورق الجوز وقت الاحراق بيكون مضى عليه شي شهرين تلاتة ونازل المطر طخطخ وهكذا كل ما تملك من دنيا ( (يَوْمَ لَا يَنْفَعُ مَالٌ وَلَا بَنُونَ * إِلَّا مَنْ أَتَى اللَّهَ بِقَلْبٍ سَلِيمٍ) وفي وقت يقول النبي (عليه الصلاة السلام) : ليس بخيركم من ترك دنياه لآخرته. سيدنا عمر كان رجل الدولة وكان يحمل كل هالمعاني الدينية .. سيدنا خالد كان القائد الأعظم صاحب معركة الست ايام في اليرموك وصاحب معارك العراق وفتح العراق (رضي الله عنه).. فانشغاله بالفتح وبقيادة الجيوش.. سيدنا عمر بانشغاله بتوحيد العرب ومعهم العجم والكرد والترك وسيدنا عثمان وحد الصين والسند والهند وشمال أفريقيا ونزلت جيوشه في اسبانيا.. سيدنا عثمان المهضوم حقه.. فما منعهم كل اعمالهم السياسية والدولية والحربية والتجارية ما منعتهم ان يكونوا في القمة في الايمان وفي التقوى وفي محبة الله وفي التقوى لله فكانوا أبطال الدنيا وأبطال الآخرة. نحن الآن يا حسرتي علينا لا أبطال الدنيا.. لحد هلأ ما منعرف بسكليت.. مروحة كهربا متل حكاية هي .. كُزْلُك.. متل حكاية هيدا منعرف نعمل بلوراه.. ايه شو منعرف نعمل؟ منحسن المفاتيح نستخرج حديدهن ونصهرهن.. الدنيا ما في.. وآخرة.. ما في. متل فقراء.. ايش .. فقراء اليهود .. بس عنا غرور وعنا ادعاءات وعنا كبرياء وعنا اشكال وألوان.. يا ريان لكن على مين عالمزبلة تبعنا لكن اطلع لبرا امام الامم امام علمها .. تقدمها حضارتها المادية مع عظيم حضارتها عم تبحث عن الاسلام وتدخل فيه والاسلام دين الامم والشعوب المتخلفة العالم الثالث.. الدرجة التالتة يعني الدرجة السفلية.. فخلينا يا ابني نرجع الى اسلام حي اسلام الدنيا والآخرة اسلام الجسد والروح اسلام الحاضر والتاريخ المشرف فنصل حاضرنا بماضينا بعقل وحكمة واخلاص وصدق وهلي بيدوم يا ابني وهلي بيبقى(فَأَمَّا الزَّبَدُ فَيَذْهَبُ جُفَاءً ۖ وَأَمَّا مَا يَنْفَعُ النَّاسَ فَيَمْكُثُ فِي الأرض ). هلي بيدوم الإخلاص الحقيقة .. الامور القائمة على العلم على الحق على الصدق على الوفاء على مراقبة الله.. خلق الانسان من نطفة فإذا هو خصيم مبين.. هيك.. يعني بدكن تكونوا من مذهب الفرد شكر ضار يما من مذهب العرب الاول هلي كانوا يعتزوا بالاسلام والاسلام أيضاً اعتز بهم..الله يباهي ملائكته بالانسان المؤمن الله ما بيباهي بأبي بكر؟ ما بيباهي بالعرب الاول فالله يباهي بهم في سمائه.. ايه نحن منحسن نتباهى بحالنا او حدا يتباهى فينا؟ ان شاء الله منرجع مناكل فول.. بس في فوالة ؟ الفول يلي بدو يرجعنا للأصول هيدا ما بيصير الا بالجامع وما بيصير الا بواسطة الشيخ.. بس الشيخ ابني الله يبعتلنا شيخ.. (والأنعام خلقها لكم).. الأنعام الجمل هذا .. هذا الجمل.. الدبور لما الله ما بيسخره الك وانت طول الجبل قدامه بيهجم عليك ما بتشوف الا ايش الهلع والفزع بتعمل بإيديك هيك واهرب... ليش؟.. حيّة بتقرب عليك ما منشوفك الا ايش هربت منها. والجمل رقبته وجسمه وسنانه.. لو بيهجم عليك ويعضك شي عضة راسك بيطلع بتمه.. ( (أَوَلَمْ يَرَوْا أَنَّا خَلَقْنَا لَهُمْ مِمَّا عَمِلَتْ أَيْدِينَا أَنْعَامًا فَهُمْ لَهَا مَالِكُونَ * وَذَلَّلْنَاهَا لَهُمْ) شفلك شي ضبع وذلـله لنشوف.. أو شي ديب وسخره.. ديبها خليها خود حليباتها وخود ابنها من قدامها وشوف.. بتقول لك قانون الله ما هيك انا ماني مذلـلة الك.. ((وَذَلَّلْنَاهَا لَهُمْ فَمِنْهَا رَكُوبُهُمْ وَمِنْهَا يَأْكُلُونَ * وَلَهُمْ فِيهَا مَنَافِعُ وَمَشَارِبُ ۖ أَفَلَا يَشْكُرُونَ) الشكر ذكر لله.. ذكر لنعمته توجب للقلب المثقف للقلب المنور للقلب العارف اذا ذكر الله وذكر عطاء الله أن يشكره بالقول وبالعمل وبالقلب. فقلبه بيمتلئ غبطة بالله وفرح بالله وجوارحه كلها بتستعمل في امتثال اوامر الله ولسانه يلهج دائماً بالمديح والثناء على الله .. (وَالْأَنْعَامَ خَلَقَهَا ۗ لَكُمْ فِيهَا دِفْءٌ وَمَنَافِعُ وَمِنْهَا تَأْكُلُونَ) .طقم جوخ انكليزي.. ايه اشكر المعمل .. ألهمهُ فكرة الابداع وتركيب المصنع. مين خلق البترول حتى يشغل المعمل أو البخار او الكهرباء.. كله منه.. كله.. كله منه.. ( (يَا أَيُّهَا النَّاسُ اذْكُرُوا نِعْمَتَ اللَّهِ عَلَيْكُمْ ۚ هَلْ مِنْ خَالِقٍ غَيْرُ اللَّهِ يَرْزُقُكُمْ مِنَ السَّمَاءِ وَالْأَرْضِ ۚ لَا إِلَٰهَ إِلَّا هُوَ ۖ فَأَنَّىٰ تُؤْفَكُونَ)لك وين عقولكم رايحة؟ لك ما بتستعملوا تفكيركن؟ .. ايه صاير متل قطط شباط.. ما همه الا شامه وشامه همها اصلان افندي وعالحيطان وعالأساطيح وما بيخلوا حدا ايش ينام ونسيانين الله ومتنزلين من انسانيتهم الى اخلاق وعقل ايش القطط والشخاتات والفيران واكتر من هيك ما في.. ايه الله يجعلنا الانسان الحقيقي. الدين يا ابني .. الإسلام لما كنا بإيران الوفد الياباني كان من كبار رجال العلم والثقافة والجامعات.. هَيْ اليابان تعتبر في رقيها متل روسيا ومتل اميركا.. مأسلمين جديد وما في بلد اسلامي يرفع به الرأس في التقدم والحضارة بالنسبة للدول المتقدمة الحضارية.. كيف عم يتركوا دين اقوامهم ودين الدول العليا وعم يدخلوا في الإسلام ما عيب على المسلمين ما يدرسوا اسلامهم ادرسوه.. ما عيب عليهم أن لا يعملوا حوار ونحن في أخطر معارك التاريخ. الآن كما قال النبي صلى الله عليه وسلم وهذا من معجزاته،( تتداعى عليكم .. يعني تجتمع وتتآمر عليكم .. هيدي بهيئة الأمم وبمجلس الأمن.. كما تداعى الأكلةُ على قصعتها).. اشلون الأكيلة لما بيجتمعوا حولان المنسف وكلن متعاهدين ما يخلوا ولا ملعقة.. قالوا أعن قلة نكون أم عن كثرة؟ قال: عن كثرة ولكنكم غثاءٌ كغُثاء السيل.. رغوة متل رغوة السيل . بتشوف رغوة هيك متكومة فوق بعضها البعض يلي ما بيفهم بيخمن صخور.. لما بجي بنفخة واحدة ما بشوف الا الرغوة ايش.. راحت. يصيبكم الوهن. قالوا: وما هو الوهن يا رسول الله؟ قال: حب الدنيا وكراهية الموت.. حب الدنيا حب الشهوات حب البطن حب الفرد عبادة المال.. وكراهية الموت للجهل لفسلفة الموت وما بعد الموت.. اجا الاسلام اخرج الانسان من انانيته حرّره من شهواته ربطه بالمثل العليا سواء قومية أو وطنية أو إنسانية بل أرضية وسماوية.. ثم عرّفه بحقيقة الموت حتى جعله يشتهي الموت ويركض نحو الموت ويقول ركضاً إلى الله بغير زاد إلا التُقى وعمل المعاد. وين ثقافة الإنسان العربي هلي كان في اليرموق وفي القادسية وفي نهوند وفي ذات الصواري ودائماً العربي الواحد يقاتل عشرة من ايش أعدائه .. الآن عشرين عربي ومائة عربي عم يحاربوا يهودي واحد والنتائج كلها ايش منعرفها. فإن شاء الله ربي بيرجع العرب إلى العروبة الأولى وإلى نبعها الأول وعند ذلك بينحط الدولاب على السكة والله عز وجل ان شاء الله يبني لنا الدنيا والآخرة. (والأنعام خلقها لكم فيها دفء) من وبرها ومن صوفها ومن شعرها (ومنافع) من حليبها ولبنها وجبنتها وسمنتها والقشطة والشمندور.. آه يا قليل الأصل آه.. بتاكل القشطات بس ما بتشكر هلي عملك معمل الحليب. مين بيحسن يعمل من الزبل .. من بين فرث ودم.. أول بيكون زبل بالأمعاء، بعدين الزبل بيمتص بيتحول إلى دم، بعدين بيجي الدم إلى البزاز.. فهالغدة بيسموها دكتور ؟ .. هالغدتين هالثديين.. معملين بيحولوا الدم إلى حليب.. اللون .. منين جابوا الصباغ. منين جابوا أقطان.. كيف تحول بالهشكل مسدود بسد أوتوماتيكي إلهي.. ما بيطلع إلا إذا عصرت. بتترك العصر بيسكر ايش لحاله.. ((وَإِنَّ لَكُمْ فِي الْأَنْعَامِ لَعِبْرَةً ۖ نُسْقِيكُمْ مِمَّا فِي بُطُونِهِ مِنْ بَيْنِ فَرْثٍ وَدَمٍ لَبَنًا خَالِصًا سَائِغًا لِلشَّارِبِينَ)يعني مشتهى ما مستقذر (للشاربين). لكم فيها دفء ومنافع ولادها بتدبح خاروفها بتدبح عجلها.. لو الله جعل تدبح ابنك.. يما تدبح بنتك.. وهكذا العرب قبل الاسلام كانوا يذبحون ابناءهم من الفقر والجوع وبناتهم ايضاً من العار والسبي والسلب والنهب. فأتى الاسلام فجعلهم في تواددهم وتراحمهم مثل الجسد الواحد إذا اشتكى منه عضو تداعى له سائر الجسد بالسهر والحمى.. ومنافع من المنافع بتركب عليها.. الجمل شو.. مذلل بتنخخه.. بتحمّل عليه حجار حطب.. بتسبه بتبهدله.. بتضربه ولو الله يسلطه عليك لحتى لو جمل يهرب ويهجم عليك وبالجامع بيفرط كل جلستكم.. تور.. لو بيفلت.. ولكن.( سُبْحَانَ الَّذِي سَخَّرَ لَنَا هَٰذَا وَمَا كُنَّا لَهُ مُقْرِنِينَ) بقوتنا ما منحسن نسخره لكن هو الي خلقه وسخره قال ومنها تأكلون ولكم فيها جمالٌ .. ما اكتفى انه يعطينا الغذاء لأجسامنا والدفء لأبداننا أحب كمان يعطينا المناظر الجميلة لأبصارنا وأعيننا قال: (ولكم فيها جمال حين تريحون وحين تسرحون) لما بتجي عند عشية إلى مراحها واستراحتها وبيتوتها هذا المنظر منظر جميل في عينيه بيدخل البهجة والسرور على قلبه. ما اكتفى بغذائنا بطعامنا .. لأ.. أحب كمان يعطينا المناظر الجميلة والفن الجميل.. حين تريحون يعني لما تجي في المساء وتسرحون تروح إلى الرعي في الصباح.. وتحمل أثقالكم إلى بلد لم تكونوا بالغيه إلا بشق الأنفس.. بتحمل أثقالكم بتحمل أهلكم وإلى الحج وإلى السفر صار لها مئات الألوف من السنين.. وإن ربكم لرؤوف رحيم. فهذا الخلق من رحمته. الرأفة أدق وأخصّ من الرحمة. الرأفة دخل في الأمور الصغيرة ايش.. الدقيقة. والخيل والبغال والحمير لتركبوها.. ما تركبوها وزينة.. ما بس يأمن لكم حمل أثقال والركن في المسافات .. كمان لو جعل لك الفرس بشكل من المنظر البشع القبيح المفزع المخيف.. شو جعل لك ياها بمنظر جميل بمنظر حلو.. ما بيشبع صاحب الفرس من النظر إلى فرسه.. أديش فيه ذوق.. أديش فيه عناية أديش عم يذكرك.. أديش مهتم فيك.. أديش سخر لك من القوى .. إيه ما تعجز عن اقل واحدة منها.. ما بتحسن تعمل شعرة بدنب الكديش.. لأن كل شعرة في دنب الكديش كل شعرة مثقوبة مثل البوري لحتى يتنفس منها جلده وجسمه. فبتحسن الشعرة تثقبها بمذأب وتعمل لها خلايا والدم يوصل إلى آخر ذرة فيها؟.. يغذيها بشكل دائم يجعل فيها الحياة والنمو.. ابني بتحسن تعمل شريط من نحاس.. لكن انت مين خلق معدن النحاس ومين خلق معدن الحديد. ومين عطاك العيون حتى تطلع في المنجم.. مين عطاك الاجرين حتى توصل لهونيك مين عطاك الايدين حتى تستخرج.. مين اعطاك العقل والفكر حتى تصنع وتصنّع.. هل من خالق غير الله يرزقكم من السماء والأرض؟..فوينك لا تنغر.. لك بكرا.. انت عامل حالك العظيم الأعظم الباشا الأكبر.. الوزير الأفخم .. الغني المليونير.. لك بكرا بيصير اسمك جنازة.. وحياة الله.. والله كلكن بكرا بتكن تصيروا جنايز.. والخانم يلي هلأ اسمها خانم ومرت الوزير ومرت الأمير ومرت الباشا والله بكرا بدها تصير جنازة.. بكرا بدهن يحطوها عالمغتسل.. والله وكل هالشلحات وهالتفصيلات وهالأرواب هلي كل واحد حقه ألف وفوق ومن تحت.. والله لحتى يبدلوها بكفن واحد آخر موضة. ففكري . فكري فكري اتقي الله في نفسك في زوجك في اولادك في بناتك وهيدا ما بيمنعك تؤدي حقه كاملاً.( رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ)
العرب الأول لما اتقوا الله هذه التقوى المرأة حُرمت زوجها؟ حُرمت زينتها؟ حُرمت أولادها؟ لا.. بل صاروا اولادها مفخرة التاريخ.. صاروا مفخرة امتهم امتهم قوميتهم .. صاروا مفخرة العالم والانسانية. فوينا نحنا ضايعين عن أصولنا؟ وهلي بينقطع وبيقطع نسبه عن ابوه وعن أجداده يا ترى يعني الو فخر والو شرف؟ إذا واحد قال عن ابوه الحقيقي ما هيدا ابوي وانتسب إلى غير ابوه شو بيقولوا عنه ابن حلال؟ أولئك آبائي فجئني بمثلهم إذا جمعتنا يا جرير المجامع.. هيدول .. أبي الإسلام لا أب لي سواه.. إذا افتخروا بقيس أو تميمِ.. بس ما مننتسب إلى الاسلام يعني الجمود.. ما مننتسب إلى التزمت ونسميه الإسلام.. إلى الكراهية والحقد والبغضاء نسميه اسلام.. إلى الظلم والجَوْر نسمية اسلام.. إلى التخلف والاستسلام للشهوات والأشر والبطر ونسميه اسلام.. لا يا ابني الاسلام علمٌ وحكمةٌ واخلاقٌ واخلاصٌ وصدق وإيثار وإسعاد ونشر العدل ونشر الإخاء ونشر الحب والتعاون هيدا كله بدو مين يصنع الإسلام.. طاولة لحالها ما بتصير من غير نجار وقبقاب ما بتصير من غير قباقيبي وطبخة مجدرة بدها طباخ ورغيف بدو خباز. فصناعة الإنسان المسلم..الانسان المتعلم المعلّم، المُرَبى المربِي، الحكيم معلم الحكماء، لحالو بيصير؟ صناعة الانسان أقدس وأعظم وأعقل وأهم من صناعة الوجود.. يبني الرجال وغيره يبني القرى.. شتان بين قرى وبين رجال.. وإنما الأمم الأخلاق ما بقيت فإن هم ذهبت اخلاقهم ذهبوا. قال: والخيل والبغال والحمير لتركبوها وزينة. يعني الله عز وجل ما بس خلقها لتحمل أثقالنا قال كمان بدي اعطيكم حظ لأبصاركم من المناظر الجميلة تشوف الفرس الرهوانة الناقة الذلول. ايه قال ما بس هيدول لتحمل اثقالهم قال في كمان فوق منهم (ويخلق ما لا تعلمون). في شيء سيحمل أثقالكم ويحمل أبدانكم ويوصلكم إلى مسافات لا تبلغوها إلا بشق الأنفس، لكن لا تعلمونها الآن ستعلمونها حين يحين وقتها. لو قال لنا اوتومبيلات يمكن كان منهم كافر قال تعوا اسمعوا .. تعوا اسمعوا بكرا بيصير بغال اسمهم اوتومبيلات.. كان ابو جهل وابن ابي سلول كان قرقعوا الدنيا .. الملاحدة والزنادقة الي صاروا.. حاربوا الإسلام كانوا جرّصوا الدنيا لكن جاب تعبير يثبت الحقيقة ولا يخلي لمنافق أو زنديق أو ملحد يعترض عليه، قال بكرا بتشوفوا (ويخلق ما لا تعلمون). وإذا يخرُج البُخار.. البخار اجا استعمله الانسان حصره وجعل قوته الدافعة تحرّك الدواليب وتحمل أثقالكم إلى بلد لم تكونوا بالغيه إلا بشق الأنفس.. هي معجزة علمية هي أعظم من معجزة سيدنا موسى. فلق البحر في واحد بيقول لك ما لها اصل .. أما هَي بتشوفها بعينك.. هي النبي حكاها عن الوحي من قبل 14 ودخلنا بالقرن الخامس عشر. ليش ما قال : والأنعام خلقها لكم وبعدها قال ويخلق ما لا تعلمون. ؟ الأنعام ما مزودلنا بيكفي.. أما المركوبات والخيل والبغال والحمير لتركبوها وزينة بعد منها قال ويخلق ما لا تعلمون. بعدين اجا الفحم الحجري عمل البخار .. بعد الفحم الحجري اجا البترول وبعد البترول وقبله اجا الكهرباء.. فاجت المناطيد المنطاد بالهواء وبالغازات.. بعدين اجا السائل الجامد هيدي يلي عم يعملوا فيها الصواريخ ويصلون بها إلى الكواكب. يا ترى خلصت القصة؟ ويخلق ما لا تعلمون. ايه هي وحدها لو الانسان العربي قراها لكان مثاله كما قال الشاعر : لو يسمعون كما سمعت كلامها خروا لعَزَّةَ ركّعاً وسجوداً لكن مع الأسف الجهل. الجهل ويا ريت الجهل البسيط. جاهل فقد العلم والعالم لكن إذا عُلم يتعلم إذا دُعي للعلم يستجيب. أصعب من هذا الجهل الجهل المركب.. الجهل المركب لا يعتقد نفسه انه جاهل.. متل يلي معه سرطان ويقول لك انا ما فيّ مرض. مسلول وبيقول لك ما في مرض.. وعم بيطالع دم.. كوليرا وصاير ينبع معه من فوق ومن تحت وبيقول لك انا ما فيّ شي.. هيدا لا يقبل الدواء ولا يقبل العلاج ولا يعرف انه مريض هيدا كارثة ابني.. غرور وأنانية وجهل وتخلّف وفي الأخلاق وفي الأعمال وفي الانتاج.. في الوحدة.. هي العرب.. 22 دولة لما العرب اتاهم الاسلام أبو بكر ارادوا يرجعوا لما كانوا عليه قبل الإسلام في الردة كسر رقبتهم ب14 شهر رد أرجعهم إلى الوحدة ووحد معهم امم الأرض. والآن إلا الإسلام ما يوحد العالم كله.. ليظهره على الدين كله.. النبي (عليه الصلاة السلام) يقول في آخر الزمان بما معناه: تبطل الحروب ويسود السلام.. عم اذكرلكم الحديث بالمعنى.. ولا يبقى من الملل إلا ملة الإسلام.. ابشروا لا تخافوا .. لسا الله عز وجل الله كريم .. ووعد الله لا يخلف الله وعده .. وما ينطق عن الهوى إن هو إلا وحي يوحى.. هيدا دين الله يا ابني شو أنا وشو انتو وشو فلان وشو واجا على هالدنيا اشكال الوان عادوا الإسلام .. الصليبيين اوروبا كلها، والتتر سيلهم حطّم آسيا واوروبا.. اجا الله بعتلهم مملوك من مماليك الإسلام.. هيدا مظفّر قطز كان عبد مملوك بينباع وبينشرى.. بالأسواق التقى معهم بمعركة في عين جالوت في فلسطين هزمهم حتى وصلت هزيمتهم من فلسطين إلى الفرات. شو اليهود شو صهاينة شو استعمار ابني.. في الله.. لكن ما بنقول الله على اساس "اذهب انت وربك فقاتلا انا ها هنا قاعدون".. لا.. كل مسلم بدو يقوم.. كل انسان عربي بدو يقوم بدو يقوم إلى اسلام العلم اسلام الإيمان اسلام الاخلاق اسلام العمل اسلام الانتاج اسلام الحب اسلام الاخاء اسلام عدم الأحقاد اسلام التعاون حتى رد نرجع امة واحدة .. رد نرجع نرجع الامم امة ايش واحدة.. وان هذه امتكم امة واحدة وانا ربكم فاتقون.. ان شاء الله بيصير ان شاء الله بس نحنا نشوفه ما يجي بعد منا .. ما يكون لنا نحن من حياتنا إلا الاحزان على فرقة امتنا وتخلفها وإلى آخره.. الله عز وجل يجبر بخاطر الامة العربية.. وبالأمة الإسلامية بل وبكل امم العالم. ويخلق ما لا تعلمون، وعلى الله قصد السبيل ومنها جائر. قال الله هو تعهد بشيء من خصائصه ومن صفاته ونحنا علينا كمان شيء حسب خصائصنا واستعدادنا.. قال الله من اختصاصه ومما اوجبه على نفسه قصد السبيل لنا . السبيل هو الطريق وقصد السبيل الطريق المقتصد المعتدل يعني يعبّد لنا طريق الفهم. ويعبدلنا ويسهّل علينا طريق العلم والمعرفة للحقائق. الجورة يقول لنا هي جورة اوعكن تمشوا تسلكوا فيها.. هون حنش اوعى تدعس عليه بعدين بيلسعك بعقب رجلك.. هون نار اتقيها هون سم احذره.. هنا ضار هنا نافع قال: وعلى الله قصد السبيل .. يعني بيان طريق الحياة التي توصل إلى السعادة إلى النصر إلى الوحدة إلى التقدم إلى الحضارة إلى الرفعة إلى العز إلى المجد . فلما العرب أخذوا الخريطة تبع الله يلي فيها قصد السبيل يعني بيان الطريق إلى السعادة إلى العز إلى القوة إلى الرفعة إلى الوحدة وطبقوها وصلوا إلى العز إلى المجد إلى التحرر إلى نحر الاستعمار ما حرروا بلادهم حرروا نصف العالم.. ما وحّدوا بلادهم وحّدوا نصف العالم. وبأديش.. نابليون بونابرت يبدي دهشته واعجابه يقول كيف أن العرب وحّدوا وحرروا وحضروا نصف العالم بنصف قرن ما كان في لا سيارة ولا خطوط حديدية ولا كهربا ولا لاسلكي بسواعدهم وسيوفهم وعضلاتهم وقلوبهم وعقولهم وأفكارهم الذي أتاهم من طريق الوحي بواسطة معلم واحد. استاذ واحد بس عمل مدرسة للمعلمين خرّج فيها معلمين وخرّج فيها رجال دولة وسياسة واقتصاد وحرب وإلى آخره.. ايه نحنا هي شوية يهود صار لنا يزيد على 30 سنة وكرمالنا العرب عم يتمزقوا ويتقاتلوا ويتفرقوا ويتعادوا.. هاد اجنبي على هاد وهادا حاطط حدود على هاد..وهادا مدري ايش جواسيس على هاد .. فان شاء الله نرجع إلى العروبة التي نعتز بها لنقول: فمنا الوليد ومنا ايش الرشيد.. منحسن نقول فمنا شي فلان او فلانة تبع هالزمان لسا ما عملوا شي مساكين الله يعينهم .. الله يعينهم ويلهمهم ويلهمنا الرشد والصواب.. الله يلهمنا ويلهمهم رضاء الله.. الله يلهمنا ويلهمهم الرجوع إلى كتاب الله إلى دراسة حياة رسول الله إلى دراسة حياة العرب الذين نفتخر ويفتخرون بهم نعتز ويعتزون بهم. في أحلى ابني من الرجوع إلى الحق؟ من الرجوع إلى صراط المستقيم وعلى ضوء العقل والمنطق ومصلحة القومية والعروبة والتقدم والاقتصاد والاشتراكية.. مبارح معكن كان درس الاشتراكية لن تنالوا البر حتى تنفقوا مما تحبون. طلع الاسلام أعظم يما الاشتراكية اعظم؟ الاسلام طلع اعظم من الاشتراكية ب100 مرة. وكانت اشتراكية اختيارية اما بالسيف وبالكرباج بالعقيدة والاندفاع والايمان حتى ما صار يشارك اخاه بطعامه أو عشائه.. يؤثره على نفسه وعلى عياله وعلى أطفاله. بل وصل إيثارهم آخر قصة معكن بدرس مبارح بأن عبد الله ابن جعفر كان في سفر دخل في بستان فرأى أجيراً أسود قُدم له طعامه تبع ال24 ساعة فإذا هو ثلاث أرغفة. فدخل عليه كلب فأعطى الكلب رغيفاً فأكله الكلب أعطاه الرغيف التاني اكله. اعطاه الثالث أكله. فعبد الله ابن جعفر كان مشهور بالسخاء وكان يُلام على السخاء. قال له ماذا أبقيت لنفسك؟ أو قال له ما هو طعامك في ال24 ساعة؟ قال له هالأرغفة الثلاث وهالأكلات يلي أعطيتهم للكلب. قال له شو أبقيت لنفسك؟ قال له ما ابقيت شي. قال له: واشلون بدك تعمل بحالك؟ قال له أطوي يومي وليلي.. شو معنى أطوي؟ يعني صائم ما باكل.. قال له كيف بتآثر كلب على نفسك؟ قال له: هذا ارضنا ليس فيها كلاب وقصدني من بعيد.. فكرهت أن أخيّبه.. فصار عبد الله ابن جعفر يقول: يلومونني على السخاء وهذا الأجير الأسود أسخى مني. فكان.. شوف تربية العرب بالإسلام. كان إذا رأوا هيك عمل يشجعوه.. فإجا لصاحب البستان أديه بدك في بستانك ايه متل هالوقت مليون مليونين دفع له اياهم. قال له هيدا شو عندك؟ قال له عبدي اديش قيمته ؟ قال له 100 الف. قال له هي 100 الف. فأعتق العبد واشترى البستان وملّكه البستان وكل آلات البستان تشجيعاً على مثل هذا العمل. هي العرب وهي القومية العربية يا ترى نحن العرب هيك بدنا نصير؟ اذا هيك بدنا نصير منسود العالم.. ان شاء الله منصير. ابني لا تيأسوا.. يعني ابن الباشا .. وان كان الباشا صارت ما عاد ايش يعني.. تخيروا لنطفكم فإن العِرق دسّاس. نحن أصولنا كريمة أصول الأمة العربية الا ما نرجع الى الاصول مهما طال الزمن... بس الله يلهمنا جميعاً نكون على مستوى الرجوع. بدها عقل بدها علم بدها خُلُق بدها حب بدها صفاء بدها تعاون.. ايه الله يلهمنا الرشد ويلهمنا رضاء الله وتوفيق الله.. ويخلق ما لا تعلمون وعلى الله قصد السبيل.. الرزق علي يما عليك؟ لا علي ولا عليك على الله. انزال المطر على مين؟ على الله.. هو أوجب على نفسه. خلق الشمس مضيئة تعطينا الحرارة لينبت الزرع ويتبخر الماء من البحار حتى يرتفع إلى أعلى ثم بعملية طبيعية بيجي بتجي الرياح والهواء فيسوق السحاب من البحر لو كان متل غطا الطنجرة الطبخية من غطا الطنجرة لوسط الطنجرة ما استفدنا من المطر شي..فبيجي بيرسل السحاب فيسوق الغمام فينزله حيث يشاء. فعليه التخليق. انت بتحسن تعمل لابنك عيون؟ لو قال لك انا راح اعطيك ابن كله كامل مكمّل بس ما راح اعطيه شفف.. شو هو.. شفف ما في.. سنانه مبينة متل الاموات .. هيدا اشلون بدو يشرب مسكين؟ اذا حط الكاسة على تمه سنان ما بتضب الميات.. اذا بدو يحط زمبوعة الابريق بتمه كاسة الشاي كلها بدها تتكبكب.. كل ما في الأمر بدو يصفى يحطوله ايش قمع او يحطوله شي بوريق صغير. ايه خلقلك ابنك كامل. امعاءك لما بتنتلي بالوسخ .. حطلك حنفية اوتوماتيك عالكهربا عالالكترون عالارادة فلو جعل لك الحنفية بايظة.. وهي ليلة عرسها لوتت حالها.. وهو بحفلة لوت حاله. شو هو والله.. جيبوا الميكانسيان خلى يصلح له الحنفية.. فتبارك الله أحسن الخالقين ءأنتم تخلقونه أم نحن الخالقون.. أفرأيتم ما تمنون ءأنتم تخلقونه أم نحن الخالقون. وينك نسيت الله... متل حكاية هيداك يلي ع طريق الحج.. انقذوه وجعل شكر المحسن فرد القرضار مشان يوصله عالجنة.. هيك هي ثقافتكم ؟.. وهذا التقدم وهذا القرن العشرين؟ هذا القرن العشرين هيدا خايف يكون قرن تيس يما قرن خاروف يما قرن وحيد القرن.. فالله يرجعنا.. يرجعنا لكتاب الله وسنة وأخلاق وهدي وسلوك سيد البشر محمد ابن عبد الله.. وعلى الله قصد السبيل .. شو قصد؟ السبيل المقتصد المبين الموضح العريض المستقيم يلي ما بيتوه ولا بيغلق ولا بيضيع.. فلما العرب قاموا ومشوا على هذا السبيل المقتصد الموضح ضلوا ؟ خسروا افتقروا ؟ تفرقوا تمزقوا ..؟ لما ركبتهم شهواتهم وأقبلت ال